Luke 14
14
1Uqpuk nhxp nhxp-nghawt tj 'Boipaw Yesyuq' khrawng a'mx buq e-hai yj mawdong dawn tiq 'Phariqsye' im mj a'vawng. Jn hxvj khrawng heq na 'Boipaw Yesyuq' khrawng ning na an'tjuq ve. 2'Boipaw Yesyuq' mhawimhaw vj a'kutkho phing tiq khrawng pjinghawt a'mji khen cuvj 3'Boipaw Yesyuq' na 'Phariqsye' heq, uqpade yawcu tiq sarapaw heq j " uqpuk nhxp pj an'niqnawng heq khrxk sawk khrawng 'Pxtpaw Phawlaw' tala dj a'khjk ke yaw khjk ke yju vaw" tiyj a'nghiq. 4Sinakha jn heq na hawu ba yaq ling ngj dek na an'mji khennj 'Boipaw Yesyuq' na jn kang yaq tiq khrawng a'kut tj kjng na a'niq khrxk ba sawk pjnnj nhi khrawng a'im nghaw pawt a'tjq ba. 5Pjnnj ce 'Boipaw Yesyuq' na nhi tiq j "nang'hi caw kha siyj seq, sya kha siyj seq uqpuk nhxp pj tui dvawng duk kj an'kraw na ce mhokn 6Sinakha nhi tiq na i u-nghawt kha hawu ba khoq yju uq. 7Mawn lju pji yj a'hyawk khrawng khawm laq tiq khin heq khrawng e-pji ok-pji duk kj a'lhji yj a'pawi nawk dxn yawng lui theqna an'ngvaw khrawng 'Boipaw Yesyuq' na a'mhuq hxvj nhi tiq j khuicut nawk u-nghawt nhuk theqna a'cokhawu. 8" 'Boipaw Yesyuq' na "Khrawng pjinghawt bawng na nang ngj mawn ljuq pji yj na'lo hai tok a'hyawk lo hxvj a'lhji yj a'pawi nawk dxn nj ngvaw kawq. Ibahai yj nawk hxvj ce mrawt tiq khrawng khrawng nang baw vj a'hyawk khrawng khawm laq theqna a'khrai lo hxvj 9nang'hiq pjinhiq djn nj hyawk tiq pji mawqpaw khrawng nang ceng tjq lo theqna 'nang ngvaw nawk dxn nj ni khrawng yawng ngvaw sawk ka' tiyj a'hawu lo vai. Jn hxvj nang khrawng hyawk ke laq na a'nhu dj vj mji tiq ngvaw nawk kj yawng na'ngvaw ye ba laq ai. 10Jnkhennj nang'hi khrawng mawn lju pji yj nan'cet khaw hxvj nhem me theqna a'nhu dj vjyawng ngvaw bjiq cuq. Jn hxvj yawng pji mawqpaw na nang'hi a'mhuq hxvj 'khepui yj ni thawk kj bji tiq a'mhawimhaw dxn nj yawng ngvaw lo va tiyj a'hawu vai. Jn hxvj nang'hi dj ngvaw nghaq tiq khin heq mhawimhaw vj nang'hi khrawng mhawi nan'laq ai. 11A'punghaw na punghaw a'lhxng tiyj khin ne tiq ce a'nhem khrawng a'khawm laq ai. A'punghaw na a'punghaw nhem me tiq ce a'lhxng nawk kj tawk khrawng a'khawm laq ai tiyj a'cokhawu. 12Pjnnj ce pji mawqpaw lawm pawt mawng theqna "nang na pji u-nghawt na'poqcai khaw vj na'khepui heq, na'imlong pui heq, na'bongbawi heq na boi tiq imcengpui heq yawng hyawk theqna sawu kawq. Nang na ni baw na'poqcai na ce jn khrawng heq na nang khrawng kha jn baw vj hyawk ba theqna an'duqcawq ba vai. 13Jn baw si yaq kaw vj nang na pji na'poqcai khaw vj cek ke ti heq, kutkho kxmyom yaq ti heq, lilek ti heq, mikmhu yaq ti heq yawng hyawk theqna duqcawq bjiq. 14Jn baw duqcawq ba khoq yaq tiq khrawng heq j nang na na'duqcawq khen cuvj nang khrawng na'bjikhji. Ibahai yj nawk hxce krundiu tiq khrawng heq an'bjt nawk kj kxq an'heng lo ba cxn nj 'Pxtpaw Phawlaw' na nang ngj bji tiq boiqma a'dxkdxk kj a'kxmyom sawk kai tiyj a'hawu. 15'Boipaw Yesyuq' dj ngvaw nghaq tiq khrawng pjinghawt na jn a'cokhawu khrawng heq a'yawk hxvj "'Pxtpaw Phawlaw' neng-ngeng yj kxq e-pji ok-pji yj e-o laq tiq khrawng an'bjikhji" tiyj 'Boipaw Yesyuq' j a'hawu. 16'Boipaw Yesyuq' na jn khrawng ngj "khrawng pjinghawt na pji a'poqcai hai tok khin heq batnghawt tj a'hyawk. 17Pji cxn a'khrai na ce a'hawu ve khrawng, Khrawng heq ceng ngj a'mapaw pjinghawt tjq theqna "i-tom a'kxmyom pjn pji han'cat tai nghxq lo nghxq yawng ngjn tiyj a'hawu ve sawk. 18Jn hxvj a'hyawk khrawng khawm laq tiq khrawng heq na lo khok yju tiyj uawppe nawk na an'hawu. Cxkcxk pjinghawt na ce na'lung si ye kawq ke na lai kekcaw nghawt ka'lheq pjn khen cuvj cet na ka'so ve laq ai tiyj a'hawu. 19Na'lung si ye kawq sya seng panghaw ka'lheq cjn khrawng a'mji khen cuvj cet na ka'cawm me laq ai tiyj a'hawu. 20A'tha pjinghawt na kha ke ce tuq j yawng imthong ka'e cxk khen cuvj lo koq yju tiyj a'hawu. 21Jnkhaw hxyawng a'mapaw kha lo ba na a'boipaw vj jn heq na an'hawu khrawng heq a'sai lo ba. Jn hxvj a'boipaw khrawng a'lung sutsut theqna jn a'mapaw vj 'luq duk kj kxq lawm nu, lawm caw, lawm ka'kra tjq tuq kung ngj cet theqna cek ke tiq heq, kutkho kxmyom yaq ti heq, lilek ti heq, mikmhu yaq ti heq, nhaw pawng ti heq na cumleng yaq ti heq lo pui naw bjiq tiyj hawu na a'tjq batx. 22Jn a'mapaw na jn baw a'lupcak cawng pjnnj nhi na 'boipaw vj a'dxn heq a'jng nge yawng hawm tiyj a'hawu. 23Boipaw na jn a'mapaw vj luq krawng ngj kxq lawm nu, lawm caw, lawm ka'kra tjq cet theqna na'mhuq na'khom khrawng, khrawng heq tomti ni im luiq hawn nj ni pji tjq lo pui naw bjiq tiyj a'hawu. 24Sinakha a'hjmmj han'hyawk nghxt khrawng, Khrawng heq pjinghawt kha ni ke e-ok pji yj vawng sawk kawq tiyj nang ngj tatiq ka'pet pjn bj tiyj a'sin. 25Jnpjnnj khrawng heq batnghawt na 'Boipaw Yesyuq' nhu an'yun ne lo. Jnkhennj 'Boipaw Yesyuq' khrawng nhi tiq lawm pawt mawng theqna 26"Ke ceng ngj lo tiq khrawng na ke a'khet khrawng thawk kj nu-paw, caw-nawu, peha, ta-nawu ci-nawu heq na a'punghaw sawk a'lhji yj khet te tiq j thonne na ce jn khrawng khrawng ke tabeq j thonne khoq yju. Nhi na a'punghaw sawk a'khet te khrawng thawk kj ke khrawng a'lhji yj a'khet laq ai. 27Nan'punghaw kutyvaw koptjng ba theqna ke kon yun khoq yaq tiq heq khrawng ke tabeq j thon khoq yju. 28Khrawng pjinghawt na im im-nghawt ka'sawk kai tiyj a'khin hxvj jn im sawk cawng hawn tjq phjisa tawngkaw a'lok lok yju nawk khrawng a'cok hai tok kj a'sumsawq-e hai khrawng cxkcxk tokkhret kaw vj mji hai siyju. 29Jn baw vj tokkhret kaw im a'sawk na ce im cawn hawn nj sawk njn hai siyju. Jn mhu tiq tjng na nuiqkheu naw theq u-na 30'ni khrawng na ce cat na saw tx na kha cawng hawn nj sawk njn yju' tiyj set an'sui yai. 31A'tha yx nghawt tj hawu laq ai hxce mawnglen pjinghawt khrawng a'kyaw mawnglen pjinghawt dj a'sunkawp pe yai hxvj sunpui seksaw song-nhiq dj lo tiq mawnglen khrawng a'punghaw seksaw song-nghawt bawng ngj a'tjk njn nai tjk njn yju nawk khrawng a'xm me laq khrawng a'coktawt mji tiq heq dj an'krju kheu ve nawk maw vai siyj vaw. 32A'mhawnmx tjk njn yju nawk hxce a'sunpui heq a'lhawm mj an'mji tun nj cipaw heq tjq theqna sunkawp pe khrawng ya ba hai tok a'djukawn ne sawk kai. 33Jn baw vj nan'punghaw pjng khrawng boiqma heq dju nghxt khoq yaq tiq heq khrawng ke tabeq j thon khoq yju. 34"Maci khrawng a'bji. Sinakha maci khrawng a'nga tiyaq na ce i-baw nga hawn nj na'poqcai ba njn nai. 35Bji tiyaq tiq maci khrawng dekphuk tok kj kha siyj seq bikbo tawk nawk pa tok kj kha siyj seq a'sum me yj laq tiyaq na ce krawng ngj yawng an'djutit laq. Nhaw mji tiq heq tjng na yaw laq theqna yawcu bjiq seq uq tiyj a'hawu.
Currently Selected:
Luke 14: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
