Luke 13
13
1Jnkhaw hxvj khrawng heq meqcaw 'Boipaw Yesyuq' ceng ngj lo u-na 'Pxtpaw Phawlaw' tok dawpawq hai poqcai tiq 'Galiqle' kresaw meqcaw heq khrawng 'Piqlet' mawng na seksaw heq tjq na a'tuk ke sawk tiyj an'hyawk lo. 2Jnkhaw hxvj 'Boipaw Yesyuq' na 'ni a'tuk khawm laq tiq 'Galiqle' kresaw heq khrawng a'kyaw 'Galiqle' kresaw heq thawk kj an'kret a'sisaw kong khennj ni baw vj an'khawm laq tiyj nang'hi na nan'xt nawk kaw. 3An'kret mji khennj siyju. Ke na hawu hai ka'lx khrawng ce nang hi heq kha nan'lung nan'suisaw ye yaq na ce jn baw nan'cimkrak laq ai. 4Jn tawn yju 'Syiqlong' kaulhxnga a'kru hxvj a'kep nawk khawm laq na bjt tiq pji kalaisat heq khrawng 'Yeruqsalawng' luqsaw heq thawk kj an'kret mji khennj tiyj nan'xt nawk kaw. 5Jn baw an'kret mji khennj siyju. Nang hi yj ke na ka'hawu vai. Nang'hi heq kha nan'lung nan'suisaw ye yaq na ce nan'cimkrak kai. 6Jnpjnnj 'Boipaw Yesyuq' na khuicut nawk a'hawu khrawng ce khrawng pjinghawt na 'Capyek' dyaw duk kj a'lin khrawng thabeq thing thing-nghawt a'mji. Nhi khrawng lo na jn thing ngj kxq a'theq heq sui na kha theq-nghawt kha khom yju. 7Jnkhennj nhi na dyaw cong tiq j so maw va 'ni thabeq thing ngj thabeq theq the yai tiyj taw theqna cong nge nghxt khrawng kum thum kung a'mji nghxt pjn. A'theq lungnghawt kha the hawm yju. Ni thing khrawng a'krj mji yaq na dek dxn yawng a'kat te khennj khru nghxq yawng nga' tiyj a'hawu. 8Dyaw cong tiq na sarapaw vj 'ni thing khrawng ni kum kum-nghawt ce mji ye maw lhaq lhjn'. Ke na a'khocju cju theqna dekphuk heq san theqna ka'pan nawk maw vai. 9Ni baw poqcai hxvj ce seng kum mj a'theq pawi a'the lo ba ci yai. Sinakha a'theq the yaq na ce ka'khruk kai' tina a'hawu" tiyj a'hawu. 10Uqpuk nhxp nhxp-nghawt tj 'Boipaw Yesyuq' na damarung ngj a'cokhawu khaw hxvj 11Jn dxn nj nawtsi poq-e khrawng khawm laq na kum kalaisat diu nghxq tiq a'yung kuk na tung khoq yaq tiq mhutaw pjinghawt a'mji. 12'Boipaw Yesyuq' na jn mhutaw a'mhuq hxvj a'punghaw ceng tjq pan ne theqna j mhutaw nang khrawng na'niqnawng ngj kxq na'ljt pjn tiyj a'hawu. 13'Boipaw Yesyuq' na jn mhutaw vj a'kut a'tawng na mhoknghawt pjttj jn mhutaw khrawng a'yung yan na a'tung ba khoq. Jnkhennj jn mhutaw na 'Pxtpaw Phawlaw' phun a'tjuqkauq ve nawk. 14Jn uqpuk nhxp pj 'Boipaw Yesyuq' na an'niqnawng heq a'khrxk sawk khennj damarung mawqpaw khrawng a'thisju theqna khrawng heq j "nan'thonlok laq hai khonhxp nhxp sok a'mji khennj uqpuk nhxp pj siyaq kaw a'kyaw nhxp heq j yawng nan'niqnawng heq to ve hai yj lo bjiq cuq tiyj a'hawu. 15Sinakha 'Boipaw' na "khrawng pawi baw vj mji tiq heq j, uqpuk nhxp pj nang'hi na nan'tawk ke khrawng sya heq, naw heq nan'khun nawk kj kxq lhjq theqna tui pet hai yj nan'ceq pui nawk siyju vaw. 16Jnkhaw hxce kum kalaisat diu hawn nj nawtsi na a'poq-e khrawng khawm laq tiq 'Abrengheng' caw vj thon tiq ni mhutaw kha uqpuk nhxp pj a'niqnawng heq j kxq ljt hai yj bji yju vaw" tiyj a'hawu. 17Jn baw a'hawu hxvj 'Boipaw Yesyuq' j si lx ve tiq khrawng heq ce an'hyawk ke laq. Sinakha a'kyaw khrawng batnghawt na ce 'Boipaw Yesyuq' lupcak khrawng mhawnkau hai bji tiq heq khrawng an'lung lhju nawk. 18Jnpjnnj 'Boipaw Yesyuq' na a'hawu batx khrawng ce " 'Pxtpaw Phawlaw' neng-ngeng khrawng i-dj a'lju ve. Hi-i yj na'cut nawk laq ai" tiyj a'hawu. 19Jn khrawng dikkhit tiq mungyang ciq nukb dj a'lju ve. Khrawng pjinghawt na jn a'ciq khrawng lju theqna dyaw duk kj a'lin. Jn a'ciq cjt lo na a'khong a'bak kxmyom tiq thing len nj a'thonne lo. Jn a'khong a'bak kj hawnnhi yj kxq haw heq kha an'bu poqcai na an'mji njn tiyj" a'hawu. 20A'tha krawn-nghawt 'Boipaw Yesyuq' na a'hawu batx khrawng ce "'Pxtpaw Phawlaw' neng-ngeng khrawng hi-i dj a'lju ve tiyj a'nghiq hxvj 21Jn khrawng hen dj a'lju ve. Mhutaw pjinghawt na tun-mhxn tong thum duk kj hen meqcaw a'san khennj mung heq an'len kyaq" tiyj a'hawu. 22Jnpjnnj 'Boipaw Yesyuq' khrawng 'Yeruqsalawng' luq pawt cet nawk lawm mj luq-nghawt vawng luq-nghawt thok, nam-nghawt vawng nam-nghawt thok na a'cokhawu yok. 23Khrawng pjinghawt na 'Boipaw Yesyuq' j "'Boipaw' vj khrawng meqcaw na yawng 'Pxtpaw Phawlaw' ljulawk ke khrawng an'laq ai yaw" tiyj a'nghiq. 24Jnkhaw hxvj 'Boipaw Yesyuq' na nang'hi khrawng cekkhet tiq kjt tj vawng khoq hawn nj thathxn bjiq cuq. Nang'hi yj ke na hawu hai ka'lx khrawng ce khrawng heq batnghawt na jn kjt tj vawng hai yj thathxn u-na kha vawng khoq yju uq. 25Immawq paw vj thon tiq 'Pxtpaw Phawlaw' na thju lo theqna sot a'khaq na ce nang'hi khrawng krawng ngj tung na boipaw vj sot hong pet maw va tiyj nan'khawq-e laq ai. Sinakha Immawq paw na 'nang'hi i khjk kj kxq nan'lo nawk khrawng ke co hx' tiyj a'hawu ba vai. 26Jn hxvj nang'hi na kha "ke'hi khrawng 'Boipaw Yesyuq' dj kan'e-nghxt kan'o-nghxt pjn. Lawm khrung heq j 'Boipaw Yesyuq' cokhawu khrawng heq kha kan'nge nghxt laq" tiyj nan'hawu ba vai. 27Jn hxvj jn khrawng na "nang'hi i-lawm mj kxq nan'lo nawk khrawng ke na co hx. J khrawng ljng tiq heq ke ceng ka vj kxq cet ba vjn" tiyj a'sjt tai 28'Abrengheng', 'Iqcek', 'Yakuk' na 'Parawphek' heq khrawng 'Pxtpaw Phawlaw' neng-ngeng duk kj an'mji khrawng mhu laq cu na kha nang'hi ce krawng pawt sjt khrawng nan'khawm laq ai. Jn dxn nj nang'hi khrawng haw ye ye na nan'kap laq ai. 29Somdek khrung ngj mji tiq khrawng heq khrawng kre kiu palhi (nhi-thoq, nhi-krawk, a'cum, a'sip) yj kxq khrai lo theq u-na 'Pxtpaw Phawlaw' neng-ngeng duk kj an'e-o nghaq ai. 30Jn hxvj tuq j len dj tiq heq khrawng dik dj tiq j an'thonne yai. Tuq j dik dj tiq heq khrawng a'len dj vj an'thonne yai tiyj a'hawu. 31Jnkhaw hxvj ''Boipaw Yesyuq' ceng ngj 'Phariqsye' heq khrai lo theqna mawnglen 'Heruk' na nang khrawng tuk hai yj a'lx mji khennj ni dxn nj kxq a'kyaw dxn pawt cet nghxq yawng nga tiyj an'hyawk ke. 32Jnkhaw hxyawng 'Boipaw Yesyuq' na 'jn khevaw heq j cet theqna hawu ve yjn. Ke khrawng tuq nhxp na nghawt-tjq j nawtsi heq sjt theqna kang yaq tiq heq ka'kang ba sawk kai. Nhxp-thum nhxp na ce ka'poqcai hai mji khrawng heq a'kau vai. 33Ibahai yj nawk hxce i-bawng 'Parawphek' heq kha siyj seq 'Yeruqsalawng' luq j kxq lon na a'kyaw dxn nj a'bjt tj laq yaq khennj ke khrawng tuq nhxp, nghawt-tjq na tuq nhxp heq j khari ka'cet laq hawm mai. 34"J 'Yeruqsalawng' luq, 'Yeruqsalawng' luq nang na 'Parawphek' heq kha na'tuk soi nang ceng tjq 'Pxtpaw Phawlaw' na a'tjq lo khrawng cipaw heq kha lung ngj na'khong. 'A' nu na 'A' caw heq nhi pha kvaw vj kxp theqna a'pan nawk baw tjng ngj ke na kha nang luqsaw heq khrawng ka'punghaw dj ka yaq ling ngj pan nawk hai krawn mhji krawn mhji poqcai hx na kha nang na lx ve yju tiq. 35Nang'hi mji nawk im kha tju baw vj khrawng mji yaq ling ngj hiudik theqna a'mji ye nghxt tai. Nang'hi yj ke ka'hawu khrawng ce 'Pxtpaw Phawlaw' phun nj lo tiq 'Boipaw Yesyuq' khrawng bjikhji bjiq seq tiyj nan'tjuqkauq-e lhawn tjq nang'hi na ke khrawng i-khaw vj kha mhu laq ti hai siyju cuq' tiyj a'hawu.
Currently Selected:
Luke 13: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
