Luke 15
15
1A'phukok tiq heq na a'kret a'sisaw poqcai tiq heq khrawng 'Boipaw Yesyuq' soqsai khrawng nge hai yj a'ka vj an'hawp lo. 2Jn hxvj 'Phariqsye' heq, uqpade yawcu tiq sarapaw heq na "'Boipaw Yesyuq' khrawng a'kret a'sisaw poqcai tiq heq a'khepui nawk nawn naw yju nhi tiq dj a'e-o nghaq tiyj a'kret an'sui. 3Jnkhennj 'Boipaw Yesyuq' na jn heq j khuicut nawk u-nghawt tj a'hawu khrawng ce 4"nang'hi duk kj kxq pjinghawt-nghawt na to a'lu khra-nghawt a'tawk ke. Jn to heq duk kj kxq lu-nghawt a'khrxk hxvj a'kyaw to koqkip sina lu-koq khrawng khrawng heq hiusip nawk laikhan nj taw nghxt theqna khrxk tiq to khrawng kom ba hawn tjq a'sui yok kai siyju vaw. 5Jn to a'khom ba hxvj kha jn to khrawng a'bakhjm mj ba na a'lung lhju pheng im pawt a'lo pui nawk ba vai. 6Im a'khrai ba hxvj a'khepui heq na im ceng ka pui heq j kha 'ke na ka'khrxq khrawng to ka'laq ba pjn khennj ke dj nan'lung lhju nghaq nghxq yawng ngjn' tiyj a'hawu vai. 7Jn baw vj krun mhawn tiq khrawng koqkip sina pjikoq tok lung lhju khrawng thawk kj a'kret tj kxq lung suisaw ye na 'Pxtpaw Phawlaw' ceng ngj lo ba tiq khrawng pjinghawt tok hawn luq j a'lhji yj len tiq lung lhju hai a'mji yai tiyj nang'hi yj ke na ka'hawu. 8Jn nj kxq loi na a'tha khui u-nghawt ce mhutaw pjinghawt na "hen phjisa krep-nghaq a'taw ke. Jn duk kj kxq krep-nghawt a'khrxk hxvj jn mhutaw na simipung daw na a'khom yaq tjq im cu pheq na a'pawi caw vj a'sui yaq kaw vj a'mji yai yaw. 9Jn phjisa a'khom ba hxvj nhi na a'khepui heq imcengpui heq pan ne na 'ka'khrxq khrawng hen phjisa ka'laq ba pjn khennj ke baw vj nan'lung lhju vjn' tiyj a'hawu vai. 10Jn baw vj a'lung suisaw ye tiq a'kret a'sisaw mawq pjinghawt tok kj 'Pxtpaw Phawlaw' hawn cipaw heq na kha an'lung lhju nawk tiyj nang'hi yj ke na ka'hawu tiyj a'hawu. 11A'tha 'Boipaw Yesyuq' na khuicut nawk u-nghawt a'hawu khrawng ce "khrawng pjinghawt na a'caw putawcaw pjinhiq a'tawk ke. 12Nhxp-nghawt khaw vj ce a'caw suicaw na nhi paw vj 'paw vj ke na ka'laq caw hai khrawng mhe heq phe nghxq yawng nga tiyj a'hawu. Jnkhennj a'paw na a'caw hji yj nhi na a'tawk ke khrawng mhe heq a'pheq pet. 13Jnpjnnj ce i-veq kha diu yju a'caw suicaw tiq khrawng a'mhe heq lju na a'kyaw a'lhawm nawk kre pawt a'cet. Nhi na phjisa heq khrawng a'krj mji yaq nawk kj sum me theqna laqbi laq baw a'mji. 14Nhi phjisa heq a'pjiq na ce jn kre yj khrawng e-tui ok-cawk khe theqna nhi khrawng kha e-mxt ok-mxt tjq a'khrai. 15Jnkhennj nhi khrawng jn kre yj kxq kresaw pjinghawt ceng ngj cet theqna mapaw vj a'thonne ye. Jn khrawng na a'vok heq pan naw hai yj a'lai nghaw vj a'tjq. 16Nhi khrawng vok heq e-cawk petong kung e-hai lx hawn nj a'mxthak. Sinakha nhi yj e-ok pe hai khrawng pjinghawt kha mji yju uq. 17Nhulawm mj ce nhi khrawng a'cok mji lo ba na 'ke paw im mj ce thonlok ti heq batnghawt mji u-na kha nhi tiq na nghawq hawn nj an'e-o laq. Ke ce ni dxn nj mxt theqna ka'bjt laq ai nghxq. 18Ke tuq kung ngj paw ceng ngj cet ba na 'paw vj ke khrawng 'Pxtpaw Phawlaw' na nang ngj a'kret ka'mhaw nghxt pjn. 19Ke khrawng na'caw nghaw tiyj xt naw ti kawq. Na'mapaw pjinghawt tiyj yawng xt naw nghxq yawng tina ka'khawqhyawq-e yai' tiyj a'khin. 20Jnpjnnj ce nhi khrawng thju na a'paw ceng pawt a'cet ba. A'paw vj thon tiq ce nhi caw a'lo ba khrawng a'lhawm mj thoq a'mhuq na a'manne tong. A'manne khrawng lungbong ngj con lo theqna pawng pheng a'nhawm. 21A'caw suicaw na kha 'paw vj, ke na 'Pxtpaw Phawlaw' ceng ngj kha paw ceng ngj kha a'kret ka'mhaw nghxt. Ke khrawng nang caw vj thon hai yj tawn ne ti hx' tiyj a'hawu. 22Sinakha a'paw na ce a'ma heq j 'sui pawi sawk pawi a'yawng ngj lju ve na nhi yj khoqbawq vjn. A'kut tj khoicxp khoq na a'kho vj kha khopatawp tawp pjn. 23Nui pji kheu pji poqcai nawk hai thawu tiq sya thoi caw khrawng tu theqna awn nj but hai poqcai yjn. 24Ke caw khrawng a'hjmmj bjt nghxt pjn na kha tuq j a'heng lo ba pjn, a'hjmmj khrxk nghxt na kha tuq j ka'khom me ba pjn' tiyj hawu na nhi tiq khrawng nui pheng kheu pheng pji an'poqcai. 25Jn hxvj a'caw cangcaw khrawng lai yj yawng a'mji. Nhi khrawng im pawt a'lo ba hxvj im ka a'khrai na ce cxng-men baqkhjp-men heq j an'lawm khrawng an'ji khrawng heq a'yawk. 26Jn hxvj nhi na a'ma pjinghawt pan ne na 'i-baw heq j an'thonne tiyj a'nghiq. 27A'ma na kha 'nang nawu khrawng kangkang mama vj im khrai lo ba khennj nang paw na thawu tiq sya thoi caw but na nui pji kheu pji a'poqcai' tiyj a'hawu ba. 28 Jnkhaw vjyawng a'caw cangcaw khrawng a'lhji yj a'thisju na imduk pawt vawng lo yaq kaw vj a'mji khennj a'paw khrawng krawng pawt thok lo na nhi khrawng duk pawt vawng ba hai nhi lung krunthji hawn nj a'hawu ba. 29A'caw cangcaw na 'ke ce paw na na'tjq e baw vj i kha ljt yaq ling ngj nge theqna khokum lu sxp pheng ka'lup lo. Jn baw na kha paw na ke khepui heq dj e-ok hai ce miq lu-nghawt tj pawngsum pji poqcai pet phu yju tiq. 30Sinakha ni na'caw dikcaw tiq na ce nang boiqma heq khrawng pawi yaq tiq khrawng heq dj phjiq theqna a'lo ba khaw hxvj nang na sya thoi caw tu na nui pji kheu pji na'poqcai pet' tiyj a'hawu ba. 31A'paw na kha 'ke caw vj, nang ce ke dj ha'mji nghaq soi khennj ke tawk ke khrawng boiqma heq khrawng nang tok kj a'thonne. 32Sinakha nang nawu khrawng a'hjmmj bjt nghxt pjn na kha tuq j a'heng lo ba pjn, a'hjmmj khrxk nghxt na kha tuq j khom me ba laq pjn khennj han'hi han'lung lhju laq ai siyju vaw' tina a'hawu ba" tiyj a'hawu.
Currently Selected:
Luke 15: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
