Luke 12
12
1Jnkhaw cxn nj khrawng heq thong brek cuq-e theq u-na pjinghawt na pjinghawt liq e-tong hawn nj an'mji. 'Boipaw Yesyuq' na a'tabeq heq j cxkcxk a'hawu khrawng ce " 'Phariqsye' heq, hen vbaw vj khrawng pawi baw vj mji tiq khrawng heq tatiq taw na phen ne bjiq cuq. 2Khrawng heq na kxp na a' tawk khrawng heq kha 'Pxtpaw Phawlaw' a'awuq vai. Khrawng heq na thuq na an'tawk khrawng heq kha 'Pxtpaw Phawlaw' na a'dawn kyaq ai. 3Jnkhennj a'hyung duk kj nang'hi na nan hawu khrawng heq kha a'vang nawk kj mji tiq khrawng heq na an'yawk laq ai. Nang'hi na nhaw ka caw vj nan'hawu khrawng heq kha imkrung hawn nj pang tiq baw vj a'mji yai. 4'Boipaw Yesyuq' na khepui heq j nang'hi yj ke na hawu dang ka'ti khrawng ce nang'hi pumyo tu hai tiq khrawng kiq law yju. Jn heq na nang'hi pumyo vj kxq loi na a'kyaw i-kha tu khoq yju. 5Sinakha nang'hi kiq laq hai ce 'Pxtpaw Phawlaw' pjinghawt pjt yawng a'mji. 'Pxtpaw Phawlaw' na nang'hi sawk khrawng a'yuq njn tawn yju ngalai pawt kha thawk khoq tiq j a'thonne. Jnkhennj nhi yawng nan'kiq laq ai. 6Phet caw wlu panghaw khrawng 'Ataqriq' tawngkawx khaiq-nhiq j yawng nan'lheq laq siyju vaw. Sinakha 'Pxtpaw Phawlaw' na ce phet caw lu-nghawt pjt kha nyhaq khoq yju. 7Nang luki yj kxq lusawm heq kha i-hyawq a'mji nawk khrawng 'Pxtpaw Phawlaw' na sxp na a'tawk pjn. Jnkhen cuvj lhawq kawq cuq nang'hi khrawng phet caw heq thawk kj nan'phu kong. 8"Ke na ka'hawu vai khrawng heq mhawimhaw vj ke tabeq tiyj hawu ve vawm tiq ce 'Ceqcaw' vj thon tiq ke na kha 'Pxtpaw Phawlaw' hawn cipaw heq mhawimhaw vj nhi khrawng ke tabeq a'si tiyj ka'hawu vawm mai. 9Sinakha khrawng heq mhawimhaw vj ke caqtit tiq heq ce 'Pxtpaw Phawlaw' hawn cipaw heq mhawimhaw vj jn khrawng heq ka'caqtit ba vai. 10'Ceqcaw' khrawng mongkhok kj kret mhaw naw tiq ce a'kret lhjq khrawng khawm laq ai. Cimkya tiq muikhraw khrawng kret mhaw naw tiq ce a'kret lhjq khrawng khawm laq hai siyju. 11Nang'hi Khrawng damarung ngj kha siyju seq, om tiq heq na canglen heq mhawimhaw vj kha siyju seq an'sawu hxvj i-baw nan'hawu ba laq ai nawk khrawng lhawq-e kawq cuq. 12Ibahai yj nawk hxce, jn tanawcaw vj i-baw nan'hawu laq ai nawk khrawng cimkya tiq muikhraw na a'coksawng pet tai tiyj a'hawu. 13Jnkhaw vjyawng khrawng heq batnghawt duk kj kxq pjinghawt na " 'Boipaw' vj, ke ta'u na mhe heq ke yj pheq hai hawu pet maw va tiyj a'hawu. 14'Boipaw Yesyuq' na jn khrawng ngj hu-u na ke khrawng nang'hiq tala khranhya hai tiq tiyj ke yj a'awp tiyj a'nghiq. 15Jn nj kxq lon na nan'lxto kong khrawng phen ne bjiq cuq. Ibahai yj nawk hxce boima cu na kha nan'boiqma vj nan'sawk lheq j laq yju tiyj a'hawu. 16Jn pjnnj 'Boipaw Yesyuq' na khrawng heq batnghawt tj khuicut nawk u-nawk tj a'hawu khrawng ce "Boipaw pjinghawt na a'lhji yj dek pawi tiq laikhan nghawt a'tawk ke. Jn lai yj a'theq a'pa heq a'lhji yj a'the-pa. 17Jnkhennj i-baw ka'poq laq ai tiyj a'aqpjtcaw khin ne theqna a'mji. 18Jnpjnnj ce nhi na ke cawng im khrawng khrak theqna ni thawk kj len tiq cawng im ka'sawk kai. Jn cawng im mj ke cawng heq, thing theq heq na a'kyaw pawi ti heq kha ka'cxm me yai. 19Jnkhaw vj ce ke ceng ngj a'tha khokum batnghawt tok boiqma heq krem hawn nj ka'tawk ke pjn khennj tuq j thoq cat na ke khrawng dxm pheng, e-pheng, o-pheng, ka'lung lhju na yawng ka'mji yai hxyawng" tiyj a'hawu ve. 20Jn baw a'khin ne tun nj 'Pxtpaw Phawlaw' na "j khrawng ljng ngj tuq yawn kung na'bjt tai. Jnkhennj nang na na'cxmseppe khrawng na'boiqma heq u-na a'pjng ngai tiyj jn boipaw vj a'hawu. 21Jn baw vj an'punghaw tok boiqma heq cxmseppe na kha 'Pxtpaw Phawlaw' mhawimhaw vj ce cek ke tiq khrawng yawng boima tiq dj a'lju ve tiyj a'hawu. 22A'tha krawn-nghawt 'Boipaw Yesyuq' na a'tabeq heq j "jnkhennj nang'hi yj ke na hawu dang ka'ti khrawng ce nang'hi sawk nghawt nan'mji khoq hai tok i ka'e laq ai, i ka'khoq-e laq ai nawk khrawng lhawq-e kawq cuq. 23Nan'e hai thawk kj nan'sawk khrawng jn tawn yaq a'phulen. Nan'suisawk thawk kj nan'pumyo khrawng a'phulen. 24'Awngaw' heq so theqna nan'lung suisaw ye yjn. Nhi tiq na a'ciqnaw lin yju uq phvawq yju uq. Cawng kha yan yju uq. Cawng im kha mji yju. An'cxm nawk hai dxn kha mji yju. Sinakha 'Pxtpaw Phawlaw' na nhi tiq a'duqcawq. Jn haw heq tawn yaq nang'hi nan'phulen tx siyju yaw. 25Hu-u ce an'lhawq-e khrawng ngj an'sawk meqcaw bawng an'sawu ba nawk. 26Nang'hi na khrawng ni baw vj a'yuiqbet caw pawngsum poqcai khoq yju cuq hxvj ce ibahai yj a'kyaw heq tok kj nan'lhawq nawk. 27Nhawng thing heq i-baw an'len lo nawk khrawng so na suisaw ye maw vjn. Jn thing heq na yai tong hawn nj kha lupcak law yju uq. Bokyoi yj thonne hawn nj kha poqcai law yju. Sinakha a'phun len tiq 'Syawlamung' mawnglen suisawk na pawngsum jn thing thing-nghawt hyawq kha phaw yju tiyj ke na ka'hawu. 28J meqcaw yawng yum ti heq j tuq nhxp nan'sawk heng theqna nghawt-tjq j mipxm duk kj djutit khrawng khawm laq tiq tju vj kxq nhawng papa kung kha 'Pxtpaw Phawlaw' na jn hyawq a'khoqbawq pet nawk hxvj ce nang'hi yj jn thawk tawn yaq a'khoqbawq pet tai siyju vaw. 29E-Khrawng ok-khrawng tok kj lhawq na mji kawq cuq. 30'Pxtpaw Phawlaw' yum yaq tiq heq na yawng jn heq a'yai khawm na an'sui. Sinakha nang'hi 'Paw Phawlaw' na nang'hi na i nan'lx nawk khrawng a'mhuq a'cok. 31Jnkhennj 'Pxtpaw Phawlaw' neng-ngeng yawng a'yawng ngj sui yjn. Jn hxyawng nang'hi lx khrawng heq kha a'pet tai. 32"J to cuq cawy heq, kiq-e kawq cuq. Nang'hi 'Pxtpaw' na nang'hi yj neng-ngeng pet hai tok kj a'lx mji. 33Nan'tawk ke khrawng nan'boiqma heq ye na cek ke ti heq j peso vjn. Krawyang theq yaq tiq phjisa ik heq poqcai na mo ve ti heq hawp khoq yaq nawk, pxu heq na an'khrak khoq yaq nawk hawn luq j pjiq khoq yaq tiq nan'boiqma heq cxm na taw yjn. 34Ibahai yj nawk hxce nang'hi boiqma mji nawk dxn nj nang'hi lungbong heq kha a'khrai theq khennj thonne. 35'Boipaw Yesyuq' na "Sawmmhji yoi khrawng nongnong khoq-ez theqna simipung khrawng daw cjn taw vjn. 36A'boipaw mawn lju pji yj kxq lo ba na sot a'khok lo hxvj krawn-nghawt pjttj sot hong pet hai cong tiq a'mapaw baw vj mji yjn. 37Jn baw vj an'boipaw im mj a'lo ba hai cong nge tiq ma heq khrawng an'bjikhji. Nang'hi yj ke na a'mhawn ka'hawu laq ai hxvj ce jn boipaw na a'ma heq j ngvaw sawk theqna sawmmhji khoq-e theqna a'punghaw kung lo na a'duqcawq ai. 38Khoyawn cingleng ngj kha siyj seq, Khovalawm mj kha siyj seq lo ba tiq an'boipaw cong nge tiq ma heq khrawng an'bjikhji. 39Immawq paw na mo ve tiq lo hai cxn a'cok na ce nhi im mj mo ve lo khoq yaq hawn nj a'cong ngai nawk khrawng nang'hi na co vj. 40Jnkhennj i-khaw tom mj a'cjncjn mji bjiq cuq. Ibahai yj nawk hxce 'Ceqcaw' vj thon tiq khrawng nang'hi na nan'xt nawk yaq cxn nj a'lo ba vai" tiyj a'hawu. 41'Petaruq' na 'Boipaw Yesyuq' j " 'Boipaw' vj, ni khuicut nawk khrawng ke'hi tok kj na'hawu vaw, khrawng tjng tok kaw" tiyj a'nghiq. 42Jn hxvj 'Pxtpaw Phawlaw' na "cetcaw mji na a'cok a'tawt mji theqna poqcai pet tiq ce hu-u. Jn khrawng khrawng a'ma heq pan naw hai na e-cxn ok-cxn na ce poqcai pet hai a'boipaw na a'lui khrawng ngj a'thonne. 43A'boipaw a'lo ba khaw vj jn baw poqcai ye tiq a'mapaw a'mhuq hxvj jn a'mapaw khrawng a'bjikhji. 44Nang'hi yj ke na a'mhawn ka'hawu hai khrawng ce, a'boipaw na nhi na a'tawk ke khrawng a'boiqma heq khrawng jn a'ma vj awp theqna a'pan nawk sawk kai. 45Sinakha jn a'ma na ke boipaw lo ba ti hai siyju tiyj khin theqna a'kyaw ma mhutaw, putaw heq mvaw tvaw na o-e theqna moiq na a'mji ye hxvj 46jn 'ma' na a'boipaw khrawng nhi na xt nawk yaq khonhxp pj a'khrai lo ba vai. Jn hxvj nhi yj a'kret batnghawt pe na cetcaw mji yaq tiq heq dj bji yaq nawk dxn nj a'tawk nghaq ai. 47A'boipaw lx khrawng co pheng ngj poqcai yaq kaw vj taw tiq ma na mvaw tvaw khrawng a'lhji yj a'khawm laq ai. 48Sinakha a'boipaw lx khrawng co yaq na a'kret poqcai tiq ce mvaw tvaw khrawng meqcaw yawng a'khawm laq ai. Batnghawt laq-e tiq na ce batnghawt a'pet ba laq ai. Batnghawt awp khrawng khawm laq tiq na ce jn thawk kj a'lhji yj tong khrawng a'khawm laq ai. 49'Boipaw Yesyuq' na ni somdek kj mi khraw hai yj ke ka'lo. Jn im a'daw lo lhawn tjq ke'lx kxmyom yju. 50Ke khawm laq hai a'sisaw 'Betticen' u-nghawt a'mji. Jn 'Betticen' ka'khawm lhawn tjq a'lhji yj ka'lung lhing. 51Ke khrawng ni somdek yadik dawmdak hai tok lo tiq tiyj nan'xt nawk kaw. Si kung yju. Ke lo laq khrawng ce khrawng heq kayang sawk hai yj ka'lo yawng. 52Tuq j ka'thoq cat na im nghawt pjttj mji tiq khrawng pjipanghaw khrawng, vawng lawm mj pjinhiq, vawng lawm mj pjithum an'punghaw ko an'kayang ngai. 53Paw na caw, nu na caw, cilen na nawu an'punghaw ko an'lungbong an'kayang ngai tiyj a'hawu. 54Jnkhaw vjyawng 'Boipaw Yesyuq' na khrawng heq batnghawt tj " khoni krawk lawm mj kxq khoset heq a'kawi lo khrawng nan'mhuq hxvj khoyawq aw vai nghxq tiyj nan'hawu ve tong. Nang'hi hawu baw vj khoyawq kha a'aw theq. 55A'cum lawm khri a'thju lo hxvj kha a'utcawt lo vai nghxq tiyj nan'hawu ve tong. Nang'hi hawu baw vj kha a'utcawt theq. 56Khrawng pawi baw vj mji tiq heq, nang'hi na hawnnhi na dek so theqna khrikho i-baw mji yai nawk khrawng nan'cok khoq. Sinakha tuq kawlawq j i-baw thon nai nawk khrawng ibahai yj co khoq yju cuq. 57Nang'hi na mhawnkawn tiq poqcai hai yj nan'punghaw ko nan'punghaw ibahai yj sunsawng nge yju cuq. 58Nang na tala lx ve tiq khrawng pjinghawt khrawng tala sa tiq canglen ceng pawt na'hiq cet nghaq hxvj lawm mj tala ya ba hawn nj thathxn bjiq. Jn baw yawng siyju khaw ce jn khrawng na nang khrawng tala phansa tiq canglen mhawimhaw tjq kxng na a'ceq pui nawk kai. Jnpjnnj ce tala phansa tiq canglen na nhi thawk kj len tiq canglen ceng tjq nang a'awp pai. Jn canglen na nang khrawng thong ngj a'khrawk kai. 59Jn baw thon na ce nang na na'pet laq hai na'le heq kha na'pet ba khoq yaq tjq nang khrawng thong duk kj kxq ljt khoq hai siyju tiq" tiyj a'hawu.
Currently Selected:
Luke 12: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
