Ubwandilo 29
29
U Yakobo afika kwa Labani
1U Yakobo akendelela nu bulendo bwache nukufika kuchisu icha bantu abakubufumilo bwizuba. 2Kulakula akachennya ichiziba mumughunda poka ni midimo mitatu iya ng'ozi zilambalaye papipi nacho pachifukwa ichakuti ing'ozi zila zikang'welagha palapala. Ichiziba chila chikighaliliwa nibwe ikulu nkani. 3Bo ing'ozi zyosi zyabungana palapala, abadimi bakalibungulusizya ibwe kulubazu ukuti ing'ozi zyabo zing'wele amizi. Po bo zyang'wela bakalibungulusizya sona papo.
4U Yakobo akabalalusya abadimi bala akati, “Mwee bakamu bane, nkimba mwafuma kwiyi?”
Bakamwamula bakati, “Twafuma ku Halani.”
5U Yakobo akabalalusya sona akati, “Nkimba mumumenye u Labani umwizukulu uwa Naholi?”
Bakamula bakati, “Eee, tumumenye.”
6Akabalalusya sona akati, “Buli ali akiza?”
Bakamula bakati, “Ali akiza bulo, sona ennya u Lakelo umwana wache uyo akwiza ni ng'ozi.”
7Akati, “Ennya, izuba lichili bulo, kate kabalilo akakuzing'wesezya ing'ozi, nkimba buli mutangazing'wesya ing'ozi nukunyokela nazyo pakudima?”
8Bakamula bakati, “Tutangachela mupaka papo ing'ozi zyosi zyabungana pano, sona nibwe balibunguluzizya kulubazu. Po tukwiza pakuzing'wesya.”
9Bo u Yakobo achili akunena nabo, u Lakelo akafika ni ng'ozi izya wise pakuti weyuyo akadimagha ing'ozi zila. 10Bo u Yakobo amwennya u Lakelo ali ni ng'ozi izya wise, akabuka nukulibunguluzizya ibwe lila kulubazu nukuzing'wesya ing'ozi izya nyinalume wache u Labani. 11Po u Yakobo akamukukila u Lakelo nukwanda pakulila pachifukwa icha buhobosu. 12Akamubuzya u Lakelo akati, “Ane ne muvyala wako, ne mwana uwa Labeka.” Po u Lakelo akachimbila pakumupangila uwise.
13Bo u Labani ivwa nizya Yakobo, umwana uwa muyemba wache, akachimbilila pakukomane nawe. Akamukumbatila nukumukukila. Akabuka nawe kunyumba yache, po kulakula u Yakobo akamupangila ipangwi lyosi. 14Po u Labani akamubuzya akati, “Naloliloli awe we mubili wane, we libanda lyane.” U Yakobo akikala kulakula umwezi ghosi ghula.
U Yakobo akuchesya kwa Labani
15U Labani akamubuzya u Yakobo akati, “Utakambombelaye pabulo pachifukwa ichakuti ne mukamu wako. Mbuzya ukulonda ukuti nkulipile ichoni?”
16U Labani akaba na bana abalindu babili, usongo akaba we Leya, sona umunandi akaba we Lakelo. 17U Leya akaba na maso amiza, loli u Lakelo akaba wakuboneka akiza nkani ukuchila abalindu bosi. 18U Yakobo akamughana nkani u Lakelo, po akati, “Nkwiza pakukubombela amaka seveni nanti unganyitikizya pakumusenda u Lakelo.”
19U Labani akamwamula akati, “Nkwitika ukuti nkupe awe nukuchila ukuti imupe umuntu uyunji bulo. Ikala nane kunuku.” 20Po u Yakobo akamubombela amaka seveni pachifukwa icha Lakelo. Loli amaka seveni ghala ghakaboneka ngati masiku manandi nkani pachifukwa ichakuti akamughana nkani u Lakelo.
21Po u Yakobo akamubuzya u Labani akati, “Amaka seveni ghagho tukivwana ghamala. Mpanga umwana wako u Lakelo pakuba muchi wane.”
22Po u Labani akayannya ulusekelo ulwa sendwa nukubitizya abantu bosi. 23Loli pabusiku u Labani akamusenda u Leya mubuzilo ubwa Lakelo nukumupa u Yakobo, po u Yakobo akaghona nawe. 24U Labani akamupa umwana wache u Leya, u Zilipa uwambombo, yuyo pakwanda akaba muzya uwa Labani.
25Pandabindabi, u Yakobo akazyaghannya ukuti umuchi wache yula akaba we Leya. Po u Yakobo akamulalusya u Labani akati, “Nkimba choni chicho wambombela zinizi? Nkachesya pachifukwa icha Lakelo. Nkimba choni chicho wanzimbula?”
26U Labani akamwamula akati, “Lute lwiho lwitu ukuti umwana umunandi asendiwe, bo usongo atasendizwe. 27Lindilila tasi ukuti usabata uwa lusekelo ulwa sendwa iyi lumale, po nkwiza pakukupa u Lakelo nanti ukwiza pakumbombela sona amaka aghanji seveni.”
28U Yakobo akitika. Bo usabata yula amala, u Labani akamupa umwana wache u Lakelo pakuba muchi wache. 29U Labani akamupa umwana wache u Lakelo, u Biliha uwambombo, yuyo pakwanda akaba muzya uwa Labani. 30Po u Yakobo akaghona nu Lakelo, sona akamughana nkani ukuchila nu Leya. Po akamubombela u Labani amaka aghanji seveni.
Abana aba Yakobo
31Bo u Mwene ennya ukuti u Yakobo atamughanite nkani u Leya, akighula impapo yache, loli u Lakelo akaba mughumba. 32U Leya akamela ulwanda nukupapa umwana umulumendo. Po akati, “U Mwene azyennya intamyo zyane. Naloliloli umulume wane akwiza pakwanda pakungana.” Ichi cho chifukwa umwana yula akamwita ukuti we Lubeni.#29.32 Lubeni: Itabwa ili likwivwika ngati ilya mu Chihebeli kokuti, Ennya, umwana umulumendo, sona Enizye intamyo zyane.
33Akamela sona ulwanda nukupapa umwana umulumendo. Po akati, “U Mwene ampa sona umwana uyu pakuti ennya ukuti umulume wane atanganite.” Po akamwita ukuti we Simiyoni.#29.33 Simiyoni: Itabwa ili likwivwika ngati ilya mu Chihebeli kokuti, Ukwivwa.
34U Leya akamela sona ulwanda nukupapa umwana umulumendo. Po akati, “Losi ulu umulume wane akwiza pakummamatila ane pachifukwa ichakuti namupapila abana abalumendo batatu.” Po akamwita ukuti we Levi.#29.34 Levi: Itabwa ili likwivwika ngati lya mu Chihebeli kokuti, Ukumamatilana.
35Po akamela sona ulwanda nukupapa umwana umulumendo. Po akati, “Losi ulu nkumupala u Mwene.” Akamwita ukuti we Yuda,#29.35 Yuda: Itabwa ili likwivwika ngati ilya mu Chihebeli kokuti, Ukupalizya. po akaleka pakupapa.
Currently Selected:
Ubwandilo 29: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
