Ubwandilo 30
30
1Bo u Lakelo ennya ukuti atakumupapila u Yakobo abana, akanda pakumubikila akabini umukulu wache yula. Po akamubuzya u Yakobo akati, “Umpe abana, nanti awe, chizapo infwanje bulo.”
2U Yakobo akamukalalila u Lakelo nukuti, “Nkimba ane ne Chala, yuyo ighalila impapo yako?”
3U Lakelo akamwamula akati, “Uwambombo wane u Biliha uyu. Banga poka nawe ukuti ampapile abana. Bunubu ane nkwiza pakuba na bana ukwendela mumwache.”
4Po akamupa umulume wache uwambombo wache Biliha pakuba muchi wache, po u Yakobo akaghona nawe. 5U Biliha akamela ulwanda nukumupapila u Yakobo umwana umulumendo. 6U Lakelo akati, “U Chala andongela inongwa, sona azyennya intamyo zyane nukumpa umwana umulumendo.” Po umwana yula akamwita ukuti we Dani.#30.6 Dani: Itabwa ili likwivwika ngati ilya mu Chihebeli kokuti, Alonga umwakunhobosya.
7U Biliha akamela sona ulwanda nukumupapila u Yakobo umwana uwabubili umulumendo. 8U Lakelo akati, “Nalwa nkani ubwite nu mukulu wane u Leya, loli namupota.” Po umwana yula akamwita ukuti we Nafutali.#30.8 Nafutali: Itabwa ili likwivwika ngati ilya mu Chihebeli kokuti, Ukulwa.
9Bo u Leya ennya ukuti aleka pakupapa, akamupa u Yakobo uwambombo wache u Zilipa pakuba muchi wache. 10U Zilipa akamupapila u Yakobo umwana umulumendo. 11U Leya akati, “Indi nu lusako nkani.” Po umwana yula akamwita ukuti we Gadi#30.11 Gadi: Itabwa ili likwivwika ngati ilya mu Chihebeli kokuti, Ulusako..
12U Zilipa akamupapila sona u Yakobo umwana umulumendo. 13Po u Leya akati, “Nahoboka nkani. Abakolo bosi bakwiza pakunyitizya ukuti ne muhobosu.” Po umwana yula akamwita ukuti we Asheli.#30.13 Asheli: Itabwa ili likwivwika ngati ilya mu Chihebeli kokuti, Muhobosu.
14Pakabalilo akakwinulila ingano u Lubeni akabuka mumaghunda nukuwagha umulembo uwa mpapo. Akiza nagho nukumupa unyina u Leya. Po u Lakelo akamubuzya u Leya akati, “Wee, Leya nalamba mpanga ghumo umulembo uwa mpapo uwa mwana wako.”
15Loli u Leya akamwamula akati, “Nkimba utakikutiziwa nu mulume wane yuyo wanfyulite? Nkimba ilelo ukulonda sona unfyule nu mulembo uwa mwana wane bulo?”
U Lakelo akamubuzya akati, “Nanti wampako amulembo uwa mwana wako, kokuti pabusiku ukwiza pakughona nu Yakobo.” 16Pachamabwila bo u Yakobo abwelako kumughunda, u Leya akabuka pakukomana nawe. Po akati, “Ubusiku ubu ughone kunyumba yane, pachifukwa ichakuti nakughula nu mulembo uwa mwana wane.” Ubusiku bulabula u Yakobo akaghona nawe.
17U Chala akivwa inyiputo izya Leya, po akamela ulwanda nukumupapila u Yakobo umwana umulumendo uwafayivi. 18Po u Leya akati, “U Chala ampa umuvwalo pachifukwa ichakuti nkamupa umulume wane umuzya wane.” Po umwana yula akamwita ukuti we Isakala.#30.18 Isakala: Itabwa ili likwivwika ngati ilya mu Chihebeli kokuti, Umuntu uwaganyu sona Umuvwalo ghulipo.
19U Leya akamela sona ulwanda nukumupapila u Yakobo umwana uwasikisi. 20Po u Leya akati, “U Chala ampa ichabupi ichiza nkani. Losi ulu umulume wane akwiza pakunchindika pachifukwa ichakuti namupapila abana abalumendo sikisi.” Po umwana yula akamwita ukuti we Zebuloni.#30.20 Zebuloni: Itabwa ili likwivwika ngati lya Chihebeli kokuti, Itika, sona Ichabupi.
21Pisinda pache akapapa umwana umulindu nukumwita ukuti we Dina.
22U Chala akamukumbuka u Lakelo, akivwa inyiputo zyache nukumwighula impapo yache. 23U Lakelo akamela ulwanda nukumupapila u Yakobo umwana umulumendo. Po akati, “U Chala anyefya isoni. 24U Mwene anyonjelezye sona umwana uyunji.” Akamwita umwana yula ukuti we Yosefu.#30.24 Yosefu: Itabwa ili likwivwika ngati lya Chihebeli kokuti, Ampe sona umwana uwamwabo sona Anfyulite.
U Yakobo akwitinkana nu Labani
25Bo u Lakelo apapa u Yosefu, u Yakobo akamulaba u Labani akati, “Unyitikizye ukuti inyokele kuchisu chitu. 26Umpe abachi bane poka na bana bane pakuti nkachesya pachifukwa icha babo, po nkwiza pakubuka. Pakuti uzimenye ukuti nachesya akiza nkani.”
27Loli u Labani akamwamula akati, “Unyitikizye ukuti inene ivyakusingo. Ane nazimanya pachifukwa icha vimanyilo ukuti u Mwene ansaya pachifukwa icha wewe. 28Mbuzya amalipilo ghako, po nkwiza pakukulipila.”
29Po u Yakobo akamwamula akati, “Uzimenye namumo nachesezya, sona umenye namumo ivitekwa vyako vyanyamila, bo nkuvidima. 30Utunandi tuto ukaba nato bo intizite kuno, ilelo twanyamana umwakuchilapo, sona u Mwene akusaya pachifukwa icha nene. Loli ilelo ko kabalilo akakuti nane niyimile pa nemwene?”
31U Labani akamulalusya akati, “Nkimba ukulonda malipilo ghoni?”
U Yakobo akamwamula akati, “Ntakulonda naghamoghamo amalipilo, loli nkwiza pakudima ing'ozi ni mbuzi zyako, nanti ungitikizya amasakizyo ghane. 32Unyitikizye ilelo ukuti idumusannye muvitekwa vyako vyosi. Nkwiza pakusabulapo ing'ozi zyosi infitu, ni mbuzi zyosi izyamabalamabala, sona nizya madoba. Vinivi vyo malipilo ghane. 33Muntazi muno, bo ukwiza pakwennya amalipilo ghane, ukwiza pakuzyaghannya nanti nabomba zinizi mubusita busubiliwa. Nanti ukwiza pakuyagha imbuzi yiyo yite na mabalamabala pamo madoba, pamo ing'ozi yiyo yite nfitu, umanye bulo ukuti yo yabwiba.”
34U Labani akamula akati, “Awe, nitika. Tukwiza pakubomba vivyo wasakizya.” 35Loli pisiku lilalila u Labani akefya abasabwe bosi abamolomolo, pamo abamabala, sona ni mbuzi zyosi na zyosi izya mabalamabala, izya madoba, sona ni ng'ozi zyosi infitu nukubapa abana bache ukuti bazidimaye. 36Bo abomba zinizi, akalekana nu Yakobo nukwenda ubulendo ubwa masiku matatu, bo u Yakobo akudima ing'ozi ni mbuzi zyosi izya Labani.
37Po u Yakobo akasenda isamba imbisi izya makwi matatu aghakulekanalekana agha muchisu chila, sona nukukasa ivikambi vyache, umwakuti isamba zila zikaboneka ngati bo buzilo ubuswepu. 38Po akazilambalika isamba zila kuntazi kuvitekwa muvyakung'welelamo amizi, umwakuti vibanje kuntazi ku ng'ozi ni mbuzi, pakuti abasabwe na badubi bakendezyanga inkolo, bo vikung'wela amizi. 39Vikendezyannya kuntazi ukwa samba zila, vikapinya nukupapa abana abamolo, na bamadoba, sona na bamabala. 40Po u Yakobo akasabula abana abang'ozi pakuba bene nukuzilumbizya ing'ozi zila ukuti vyenannye ni vitekwa ivyamwabo ivyamolo ni vifitu ivya Labani. Umu momumo u Yakobo akasabulila ivitekwa vyache kuvitekwa ivya Labani. 41Bo ing'ozi ni mbuzi zyache inyine zikulondela, u Yakobo akalambalika isamba zila kuntazi ukwa vyakung'welela amizi, umwakuti abasabwe bendezye musamba zilazila. 42Loli ing'ozi ni mbuzi zizyo zikaghanda, u Yakobo atakalambalika isamba. Po ivitekwa vyosi ivighande vikaba vya Labani, sona ivitekwa vyosi ivyine vikaba vya Yakobo. 43Pakubomba bunubu u Yakobo akaba muntu mukabi nkani. Akaba ni vitekwa ivyinji nkani, na bazya abanavuli na bakolo abinji nkani, ni ngamila, sona ni mpunda.
Currently Selected:
Ubwandilo 30: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
