YouVersion Logo
Search Icon

Ubwandilo 28

28
1Po u Yisaki akamwitizya u Yakobo nukumusaya, po akamulamula akati, “Utakasende nalumo umukolo umu Kenani. 2Loli bukagha kuchisu icha Mesopotamiya, kukaya aka ghusokulu u Betuweli. Kulakula umusende weka uwa bana abalindu aba Labani, unalume wako. 3U Chala Uwamaka Ghosi ayisaye isendwa yako, nukukupa abana abinji nkani, umwakuti ubanje we munyenya uwa inko inyinji nkani. 4#Ubw. 17.4-8Akusaye awe poka na baluko lwako ukuyana namumo akamusayila u Abulahamu, umwakuti ufyule ichisu chicho ukwiza pakwikalaghamo pakuba we muyeni, ichisu chicho u Chala akamupa u Abulahamu.” 5U Yisaki akamutuma u Yakobo kwa Labani umwana uwa Betuweli umu Alamu, umuyemba uwa Labeka kuchisu icha Mesopotamiya yuyo akaba we nyina uwa Esabu nu Yakobo.
U Esabu akumusenda umukolo uyunji
6U Esabu akivwa ukuti u Yisaki akamusaya u Yakobo, sona nukuti akamutuma kuchisu icha Mesopotamiya pakumusenda umukolo kulakula. Akivwa sona ukuti bo akumusaya akamulamula ukuti atakasende nalumo umukolo umu Kenani. 7Akivwa ukuti u Yakobo akamwivwila uwise nu nyina nukubuka kuchisu icha Mesopotamiya. 8Po u Esabu akazyaghannya ukuti abakolo aba mu Kenani batakamuhobosya uwise u Yisaki. 9U Esabu akabuka kwa Ishimayeli umwana uwa Abulahamu nukumusenda u Mahalati umwana uwa Ishimayeli, umuyemba uwa Nebayoti.
Ichilota icha Yakobo pa Beteli
10U Yakobo akepako ku Belisheba nukubuka ku Halani. 11Pachamabwila bo izuba lyinjila, akafika pabuzilo bumo ubuzelu, akazenga ivisakasa vyache palapala ukuti aghone ubusiku bulabula. Akinulila ibwe kumutu wache. 12#Yoh. 1.51Akalota ukuti ikwelelo likufuma pasi mupaka kumwanya. Akabennya abantumi aba Chala bakwika nukukwela pikwelelo lila. 13#Ubw. 13.14-15Po u Mwene akimilila mulubazu lwache nukuti, “Ane ne Mwene u Chala uwa Abulahamu, sona nuwa Yisaki. Nkwiza pakukupa awe na baluko bako pachisu chicho ughonitepo. 14#Ubw. 12.3, 22.18Abaluko lwako bakwiza pakuba binji nkani ngati lufumbi ulwa pachisu ichapasi. Impaka zyabo zikwiza pakufika kunkuto zyosi. Ukwendela mumwako na baluko lwako nkwiza pakubasaya abantu aba inko zyosi. 15Nkwiza pakuba nawe nukukusungilila kosi kuko ukubuka, sona nkwiza pakukunyosezya kuchisu chinichi. Ntakwiza pakukuleka nalumolumo mupaka papo nakubombela zyosi zizyo nkakulayizya.”
16Bo u Yakobo alamusya mutulo akati, “Naloliloli u Mwene ali panapa, sona ane intakazimanya.” 17Ubogha bukamulema, po akati, “Mwee, pano pakoghofya. Naloliloli ubuzilo ubu yo Nyumba iya Chala, sona gho mulyango uwakumwanya.”
18Pandabindabi nkani u Yakobo akasenda ibwe lilyo akinulila kumutu wache. Akalyimika pakuba chikumbusyo nukulipungulila amafuta gha syunguti, po akalipaghulila kwa Chala. 19Ubuzilo bula akabwita ukuti Beteli,#28.19 Beteli: Itabwa ili mu Chihebeli kokuti, Inyumba iya Chala. Pakwanda akaya kala kakitiziwanga ukuti Luzi.
20Po u Yakobo akalapa pamaso pa Chala nukuti, “Wee Mwene nanti ukwiza pakuba nane nukunsungilila pabulendo bwane ubu, sona nukumpa ichakulya na menda 21umwakuti inyokele akiza kunyumba iya tata wane, po ukwiza pakuba we Chala wane. 22Ibwe ili lilyo nalyimika pakuba chikumbusyo, likwiza pakuba Nyumba iya Chala, sona nkwiza pakukupa ichigaba choka pa vigaba 10 ivya vintu vyane vyosi vivyo ukwiza pakumpa.”

Currently Selected:

Ubwandilo 28: LMB2024

Highlight

Share

Copy

None

Want to have your highlights saved across all your devices? Sign up or sign in