Ubwandilo 27
27
U Yisaki akumusaya u Yakobo
1Bo u Yisaki aghosipa nkani, sona bo amaso ghache ghafuye, umwakuti atakennyanga sona, akamwitizya umwana wache usongo u Esabu nukumubuzya ukuti, “Wee mwana wane.”
Po akamula akati, “Indi pano.”
2U Yisaki akati, “Ane naghosipa, sona ntakulimanya ni siku lyane ilyakufwila. 3Losi ulu senda ubwele bwako nu tulasilo, ubuke muzi pakungoghela inyama. 4Umpiyile ichakulya ichinonu nkani chicho nchighanite, wize nacho kuno. Bo nalya, nkwiza pakukusaya bo ntafuye.”
5U Labeka akateghelezya bo u Yisaki akunenezannya nu Esabu. Bo u Esabu abuka pakubinga, 6u Labeka akamubuzya u Yakobo akati, “Namwivwa ughuso akumubuzya u Esabu ukuti, 7‘Unyizile ni nyama nukumpiyila ichakulya ichinonu nkani. Bo nalya, nkwiza pakukusaya pamaso pa Mwene bo intafuye.’ 8Losi ulu, mwana wane, ivwa kuno, sona bomba zizyo nkukubuzya. 9Bukagha kuchibagha, unsendele abana abine babili aba mbuzi, umwakuti impiye ichakulya ichinonu nkani chicho ughuso achighanite. 10Po ubuke pakumupacho ughuso, umwakuti alye, po akwiza pakukusaya, bo atafuye.”
11Loli u Yakobo akamubuzya unyina akati, “Mayi, uzimanye ukuti mumubili uwa mukulu wane u Esabu ghuli nu bweya, loli uwane wakutyelemuka. 12Buli nanti utata akumpalamasya? Po akwiza pakumanya ukuti nkumuzimbula. Bunubu akwiza pakunguna mubuzilo ubwa kunsaya.” 13Unyina akamwamula akati, “Wee mwana wane, chileke ichighune chingwile ane. Awe bomba bulo zizyo nakubuzya, kansendele abana aba mbuzi.”
14Po akabuka pakumusendela unyina abana aba mbuzi bala, po unyina akapiya ichakulya ichinonu nkani chicho uwise akachighana nkani. 15Pisinda pache u Labeka akasenda amenda amiza nkani agha Esabu ghagho akaghasunga munyumba nukumuvwika u Yakobo. 16Akamuvwika sona amakwela agha mbuzi zila munyobe na musingo. 17Po akamupa u Yakobo ichakulya ichinonu chila, poka ni vibama vivyo akapiya.
18U Yakobo akabuka kwa wise nukwitizya ukuti, “Wee tata.”
Uwise akitika akati, “Eee, nkimba we mwana wane wenu?”
19U Yakobo akamwamula akati, “Ne Esabu umwana wako usongo. Nabomba vivyo ukambuzya. Nalamba, nyamuka, ikala ukuti ulye inyama yiyo nakusendela umwakuti unsaye.” 20Loli u Yisaki akamulalusya akati, “Wee mwana wane, nkimba wayagha bulibuli umwalubilolubilo?”
U Yakobo akamwamula akati, “U Mwene u Chala wako weyuyo akanyavwa ukuti injaghe umwalubilolubilo.”
21Po u Yisaki akamubuzya u Yakobo akati, “Wee mwana wane, palamila nkupalamasye ukuti imanye nanti naloli we mwana wane u Esabu pamo awe.”
22Bo u Yakobo apalamila kwa wise u Yisaki, akamupalamasya nukuti, “Amazyu ghayanite bulo nagha Yakobo, loli inyobe zya Esabu.” 23U Yisaki atakamwaghannya u Yakobo pachifukwa ichakuti inyobe zyache zikaba na meya ngati zya u Esabu. Po akanda pakumusaya. 24Loli akamulalusya sona akati, “Nkimba, naloli awe we mwana wane u Esabu?”
U Yakobo akamula akati, “Naloliloli nene.”
25Po akati, “Mpanga inyama yako ukuti indye, umwakuti nkusaye.”
U Yakobo akamupa inyama yila, po u Yisaki akalya. Akamupa sona uvinyo ukuti ang'wele. 26Po uwise u Yisaki akamubuzya akati, “Wee mwana wane, palamila ukuti nkukukile.”
27 #
Heb. 11.20
Bo apalamila ukuti amukukile, u Yisaki akanusya umunusi uwa menda ghache nukumusaya ukuti,
“Eya, umunusi umwiza uwa mwana wane
ghuyanite bulo nu munusi uwa mughunda,
ghugho u Mwene aghusaya.
28U Chala akuwisizye inganda,
sona amaghunda ghako ghelaye ivikomwa akiza.
Akupe ingano nu vinyo umwinji nkani.
29 #
Ubw. 12.3
Inko izya bantu zikubombelaye,
sona abantu bakufughamililaye.
Ubanje we mulaghili uwa bakamu bako bosi,
sona abaluko ulwa nyoko bakufughamililaye.
Abantu bosi babo bakukughuna, bope baghuniwanje,
sona abantu bosi babo bakukusaya, bope basayiwanje.”
U Esabu wepe akulaba ulusayo
30Bo u Yisaki amala bulo pakumusaya u Yakobo akepapo. Po u Esabu akabwelako pakubinga. 31Wepe bulo akapiya ichakulya ichinonu nkani nukwiza nacho kwa wise. Po akati, “Wee tata, nyamuka, ikala ukuti ulye inyama yiyo umwana wako akusendela, umwakuti unsaye.”
32U Yisaki akamulalusya akati, “Nkimba awe wewenu?”
Akamwamula akati, “Ane ne mwana wako usongo u Esabu.”
33Po u Yisaki akanda pakutetema umubili ghosi nukulalusya ukuti, “Nkimba akaba wewenu akambingila inyama nukwiza nayo kuno? Nkayilya bo awe uchili nukwiza, sona namusaya, naloli akwiza pakuba musayiwa bwila na bwila.”
34Bo u Esabu ivwa amazyu agha wise, akakolomoka sona chikamuvulazya nkani mumoyo. Po akamulaba uwise ukuti, “Wee tata, nane bulo unsaye.”
35Loli akamwamula akati, “Umuzuna wako izite pano nukunzimbula, po asenda ulusayo lwako losi.”
36 #
Ubw. 25.29-34
U Esabu akati, “Chite chakuswighisya ukuti itabwa lyache we Yakobo.#27.36: Yakobo: Itabwa ili likwivwika ngati ilya mu Chihebeli kokuti, Ukuzimbula. Aka kabubili ukuti anchevye. Pakwanda akanfyula ubwakatote bwane. Ilelo anfyula sona nu lusayo lwane bulo. Nkimba utansungiyepo ulusayo napo panandi?”
37U Yisaki akamwamula u Esabu akati, “Namwimika pakuba we mwene wako, sona abakamu bache nabapela bambombo bache. Namupa ingano nu vinyo. Wee mwana wane, chitalipo nachimochimo chicho ningakubombela.”
38 #
Heb. 12.17
U Esabu akamulaba sona uwise akati, “Wee tata, nkimba uli nu lusayo loka bulo? Wee tata unsayeko nane bulo.” Po akanda pakulila.
39 #
Heb. 11.20
Po uwise u Yisaki akamwamula akati,
“Pabuzilo bubo ukwiza pakwikalaghapo
patakwiza pakubapo umuvundo,
sona inganda yitakwiza pakubangapo pamaghunda ghako.
40 #
Ubw. 36.8; 2 Abm. 8.20 Mubumi bwako bosi ukwiza, pakulwanga bulo ubwite,
sona ukwiza pakumubombelagha umuzuna wako.
Loli nanti akabalilo kakwana akakumusambukila
ukwiza pakwepapo pasi pabulaghili bwache.”
41U Esabu akamubenga nkani u Yakobo pachifukwa ichakuti uwise akamusaya u Yakobo mubuzilo bwache. Po akati, “Amasiku aghakulila ubufwe ubwa tata ghali papipi, po nkwiza pakumughogha umuzuna wane u Yakobo.”
42Loli bo u Labeka ivwa zyosi zizyo u Esabu akalondagha pakubomba, akamwitizya u Yakobo nukumubuzya ukuti, “Ivwa kuno, umukulu wako akubatika pakutanizya. 43Wee mwana wane, losi ulu bomba zizyo nkukubuzya. Nyamuka nukuchimbilila kwa Labani umuyemba wane kukaya aka Halani. 44Wikale nawe kulakula mupaka papo ubukali ubwa mukulu wako bwikako 45nukuluvya zyosi zizyo ukamubombela. Po nkwiza pakutuma umuntu yumo pakukwitizya. Nkimba choni chicho intaghe abana bane bosi babili pisiku lyoka?”
U Yisaki akumutuma u Yakobo kwa Labani
46U Labeka akamubuzya u Yisaki akati, “Nalita pakwikala na bachi abayeni aba Esabu, nanti u Yakobo akusenda yumo uwa bakolo banaba, chingaba chizapo ukuti nane infwe?”
Currently Selected:
Ubwandilo 27: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
