LUKAS 7

Isa lapakagassingi atanna sere parawira ri Kapernaum

7:1-10

(Mat. 8:5-13; Yah. 4:46-53)

1Sungka'i maemmo Isa a'bisara ri a'rakanna tau lohe injo, Ia antama'i ri Kapernaum. 2Ri injo rie' se're parawira ngampunnai ata, nusanna' lakamaseanna. Ata injo sarro dodonna na ammadammu. 3Rihattunna parawira injo lalangngere passala'na Isa, ia assuromu ri tutoa-toana Yahudi mange ri Isa langera, solanna Ia battui lalapakagassing atanna. 4A'lampamu mange ri Isa na sarro pangera tulunna mange ri Ia, lakua, ”Ia siratangi Mutulung, 5saba' lakamaseangi bangsata na iamo pole labaungi sapo passambajangamba.” 6Jari assurang ngase'mu Isa mange ri saponna. Sungka'na Ia gelemu dere battu ri saponna parawira injo, parawira injo lasuromu baha'-baha'na laappau mange ri Ia, ”Karaeng, andamuKi a'mangngang-mangngang, saba' nakke inni gele siratang lakutoanaKi lalang ri sapongku; 7injomo saba'na nakke kurapang todo'i kalengku gele siratang lamange ri Ditte. Mingka appaumamoKi sipali' pau, lagassingi injo atangku. 8Saba' manna nakke inni turiparenta jua, na rahangangku rie' todo' parajuri'. Ampa nakke appau mange risala se'renna parajuri' injo: A'lampako!, injo ia a'lampa toje'i, na mange ri sitauwang pole: Maeko! rie' toje'i mae, iyareka mange ri atangku: Jamai inni!, lajama toje'i.” 9Sungka'i lalangngere Isa pappauna injo, lannasai Isa ripassala'na, na ria'gilinna mange ri tau lohe injo, appaui, ”Nakke appau mange ri kaui, gelepa minang anrumpa' tutappa' appakonni bakka'na, manna pole ri tau Israele!” 10Sungka'na ambattumo tau risuro injo mange ri sapo, lajanjammu ata injo gassing muliang.

Isa appakaattallasa ana' taruna ri Nain

7:11-17

11Rimaennamo injo a'nyara-nyarai Isa a'lampa mange rise're kota riare' Nain. Ana'-ana' gurunNa a'lampa todo'i minahang ri Ia, na lohe pole tau maraeng a'rurung-rurung minahang ri Ia. 12Sungka'i seppa'mo Isa ri babaang pantamakanna kota injo, rie' tau mate ribule' ansulukang kota, ana' bura'ne sitau-tau ri idonna na balu-balumu, na lohemo tau ri kota injo larurungi balu-balu injo. 13Rihattu lajanjanna Isa tau balu-balu injo, rie'mo ri atiNa saba' ripangamaseang, ampai appau mange ri ia, ”Ammakkangko apparau!” 14Jari laseppaki bulekang injo ampai lakaraha, jari attaa'i pabule' injo, appaui Isa, ”Oe ana' taruna, Nakke appau mange ri kau, ambaungko!” 15Ambaung toje'i tau mate injo na attolongi surang pakaramulamu a'bisara, maeng injo Isa lapassareangi mange ri idonna. 16Malla' ngase'mu tau lohe injo na lapakala'biri Allataala, lakua, ”Rie'mo se're nabbi bakka' ammumba ritangnga-tangngata,” na rie'mu ”Allataala lapakasalama' umma'Na.” 17Jari alla'bammu kareba passala'na Isa risibatu Yudea surang riampi'-ampi'na.

Isa na Yahya Pario

7:18-35

(Mat. 11:2-19)

18Sungka'i lalangngere Yahya kareba risikonjo kajariang battu ri ana'-ana' gurunna, 19ia akkeo'i rua tau ri ana'-ana' gurunna na lasuroi mange akkuta'nang ri Isa, ”Kaumoka intu tularie' injo iyareka parallu juapakang attajang tau maraeng?” 20Sungka'i ambattumo tau rua injo mange ri Isa, akkuta'nangimu, ”Lasurokang Yahya Pario mange akkuta'nang, Kaumoka intu tau larie' injo iyareka parralu juapakang attajang tau maraeng?” 21Rihattu injo Isa attangngai appakagassing lohe tau battu risikonjo rupanna garring na battu rikasinsaraang surang tau lapantamai injo setang, na lasarei panjanjang mange ri tau buta injo. 22#Yes. 35:5-6, 61:1Jari lakuamo Isa mange ri iyai, ”A'lampaimoko, na mupaui mange ri Yahya apa mujanjang surang mulangngere: tau buta akkulle anjanjang, tau pesu' akkulle a'lingka, tau kattakang a'jari tangkasa, tau bongolo akkulle allangngere, tau mate ripakaattallasa muliang na mange ri tau tuna injo ripappauwangi kareba baji'. 23Sunggulalo tau gele injo a'boko ri Nakke.” 24Sungka'i muliangi tau lasuro injo Yahya, pakaramulamu Isa a'bisara mange ri tau lohe injo ripassala'na Yahya, ”Apa mupaa'lampaang mange ri parang luara? Lamange nilingi bulo anggeong lairi' anging? 25Iyareka apa pade' mupaa'lampaang? Lamange nilingi tau makeang ballo? Tau makeang ballo surang baji' injo tallasa'na, tampa'na ripammariang karaengi. 26Jari, apa pade' mupaa'lampaang? Lamange nilingi se're nabbi? Toje'i, na Nakke appau mange ri kaui, la'bipa pole battu ri nabbi. 27#Mal. 3:1Saba' ripassala'na ia rie'i ta'ukiri:

Janjangimu, Kupalampa riolo suroKu battu ri Kau,

ia laappakasadia pa'lalangangamMu ri a'rakamMu.

28Nakke appau mange ri kau: Risikonjo turianakang ri bahine, gele rie' tula'bi bakkakang battu ri Yahya, mingka tau kaminang ki'di' injo ri Pakkaraengang Allataala bakkakangi battu ri ia.” 29#Mat. 21:32; Luk. 3:12Sikuanna tau allangngere pauNa, antama' todo'i palele sima injo, lapana'bai ma'nassana Allataala toje'i, saba' maengimu lapassareang kalenna ririo ri Yahya. 30Mingka sikuanna tau Farisi na guru Tora' latolla'i pattujunna Allataala ri kalenna, saba' untukinna ririo ri Yahya.

31Lakuai Isa, ”Surangang apa laKupakkalebarangi tau konni-konni, na surangang apamo laKupassinrapangi? 32Iyai injo assinrapangi ana'-ana' attolong injo ri pasara na assibalasa pantong:

Tapassulingangko, mingka geleko attari-tariang.

Tapakkelongangko kelong kamateang, mingka geleko apparau.

33Saba' Yahya Pario rie', ia gele nganre kanre na gele todo'i nginung anggoro, na mukuai: Ia ladongkoki setang. 34Maeng injo Ana' Rupatau rie', Ia nganre na nginungi, na mukua: Janjangimu, Ia se'rei tau balala na painung, bahaanna palele sima na tau doraka injo. 35Mingka pangisse' ri Allataala nuripattoje'i risikuanna tau latarima injoi.”

lsa ririo songkabala ri bahine doraka

7:36-50

36Rie' se're tau Farisi lakeo'i Isa lamange nganre ri saponna. Isa a'lampai mange ri saponna tau Farisi injo, ampai attolong nganre. 37#Mat. 26:7; Mark. 14:3; Yah. 12:3Ri kota injo rie' bahine daa geo'na. Sungka'i lalangngere bahine injo ma'nassana Isa rie'i nganre ri saponna tau Farisi injo, mangemu konjo ngerang sibuli-buli minnya' hondu. 38Ammarrangi na mangei ammenteng ribokona Isa riampi' bangkenNa, ere matanna lapabissai ri bangkenna Isa na uhu'na lapalu'lu', maeng injo lahau bangkenNa ampai laminnyaki ri minnya' hondu laerang injo. 39Sungka'i lajanjang tau Farisi lakeo' injo Isa, appaui lalang ri atina, ”Ampa Ia inni nabbi, tantu laisse'na, inai bahine inni surang bahine ngura akkaraha injo ri Ia; tantu laisse'na ma'nasana bahine injo tau doraka.” 40Jari appaui Isa mange ri ia, ”Simon, rie' nua'ra' laKupau mange ri kau.” Pappihalinna Simon, ”Pausadai mae, Guru.”

41”Rie' rua tau kainrangang mange rise're tau appaje'ne' doe', tau se're injo inranna a'bilangangsa'bui na tumaraeng injo appulo sa'bu. 42Kanara gelena akkulle labajari, jari ia labute inranna tau rua injo. Inaiang ri tau rua injo lakaminang ngamaseang ri ia?” 43Appihali Simon, ”Panguppaku tau lohe injo inranna rilappasi.” Lakuamo Isa mange ri ia, ”Nabai panguppamu injo.” 44Riassailena mange ri bahine injo, appaui Isa mange ri Simon, ”Mujanjangi tau bahine inni? Nakke antama' ri sapommu, mingka gelea musare ere pambissai ri bangkengKu, mingka ia labissai bangkengKu ri ere matanna na uhu'na lapalu'lu'. 45Kau gelea muhau, mingka riantama'Ku mae ri inni, ia gele ammari lahau bangkengKu. 46Kau gele musare minnya' hondu ulungKu, mingka ia laminnyaki bangkengKu ri minnya' hondu injo. 47Injomo saba'na, Nakke appau mange ri kau: Kadorakaanna nulohe injo maemmu rilappasi, saba' ia lohemo pangamaseang lageokang. Mingka tau siso'di' injo pangamaseang lageokang, so'di' todo' rilappasiangi.” 48Maenna injo appaui Isa mange ri tau bahine injo, ”Maeng rilappasimu kadorakaammu.” 49Sikuanna tau rie' attolong nganre surang Isa, appikkiri lalang ri atina, ”Inaimo Ia inni, sa'genna Ia akkulle allappasi kadorakaang?” 50Mingka appaui Isa mange ri tau bahine injo, ”Tappa'mu lapakasalama'ko, a'lampamoko lalang salama'!”

Currently Selected:

LUKAS 7: LAI_SLY

Highlight

Copy