LUKAS 8

Tau bahine anjampangi injo ri Isa

8:1-3

1Gele sallo maenna injo a'lingka-lingkai Isa battu rise're kota mange ri kota maraeng na battu rise're desa mange ri desa maraeng appala'bang Injili Pakkaraengang Allataala. Sampuloiya rua suroNa minahang todo'i ri Ia, 2#Mat. 27:55-56; Mark. 15:40-41; Luk. 23:49na lohe todo' tau bahine maeng injo ripakagassing battu risikonjo setang iyareka lohe rupanna garring maraeng, iamo intu Maria turiareng injo Magdalena, tau maeng injomo ripakagassing battu ri tuju rupanna setang, 3na Yohana bahinenna Khuza pananro doe'na Herodes, Susana surang lohe pole tau bahine maraeng. Iangase'mo injo bahine anjampangi ri uranna Isa lalang rikakalumannyangannai.

Pakkalebarang passala ripatahuru

8:4-15

(Mat. 13:1-23; Mark. 4:1-20)

4Sungka'i ambattumo tau lohe a'rurung-rurung injo, iamo intu tau battu risikonjo kota lapasse're kalenna minahang ri Isa, appaui Isa lalang rise're pakalebarang, 5”Rie' se're patahuru a'lampa mange attahuru. Rihattunnamo latahuru lamunganna, sidahuang lamunganna a'dappe'i ri biring lalang, maeng injo lalisa'i tau na lakanre todo'i jangang-jangang sa'genna labusu. 6Sidahuang a'dappe' ri tana demmapara, sungka'i attimbo lassiri laju kanara gelena nguppa ere. 7Sidahuang pole a'dappe' ritangnga rompo' bunga jabe, na assipattimboangi rompo' injo, na labohongi sa'genna mate. 8Sidahuang a'dappe' ri tana baji', na sungka'i attimbo buana a'lappi sibilangangi.” Sungka'namo maeng a'bisara appakonjo appau bakka'i Isa, ”Inai rie' tolinna laallangngere, sibaji'na ia appilangngeri!”

9Akkuta'nangimu ana'-ana' gurunNa mange ri Ia, apa botoanna pakkalebarang injo. 10#Yes. 6:9-10Jari lakuamo Isa, ”Kau risareko dalle' langisse' harasia Pakkaraengang Allataala, mingka mange ri tau maraeng passala injo ripauwangi lalang pakkalebarang, solanna manna injo rie' matanna, gelejuai anjanjangi na manna injo allangngere gelejuai lapahang. 11Iamo inni botoanna pakkalebarang injo: Lamungang injo iamo pauna Allataala. 12Nua'dappe' injo ri biring lalang iamo intu sikuanna tau maeng allangngere; mingka rie'i Ibilisi laalle pau injo battu ri atinai, solanna gele tappa' surang gele ripakasalama'. 13Nua'dappe' injo ri tana demmapara iamo intu tau ri maennamo allangngere pauna Allataala, latarima baji'i, mingka gele anralang aka'na, sinampe' juai tappaki na rihattu latabainna kasukkarang a'bokoimu. 14Nua'dappe' injo ri rompo' bunga jabe iamo intu tau maeng injo allangngere pauna Allataala, na lalang ripattimboang situlusu'na laappui bata-bata surang lapakaa'maling-malingi rikakalumannyangang na kasannangang lino jua tuli laboja, sa'genna gele baji' pambuana. 15Nua'dappe' injo ri tana baji' iamo intu sikuanna tau, allangngere pau injo, lananro baji'i lalang ri ati si'nonna na appasulu'i bua baji' lalang rikasabbarang.”

Pakkalebarang ripassala kanjoli

8:16-18

(Mark. 4:21-25)

16 # Mat. 5:15; Luk. 11:33 ”Gele minang rie' tau appabola' kanjoli ampai latongko' talle iyareka lataro ri siring patinroang, mingka lataro rate ri tampa' panaroanna, solanna sikuanna tau antama' lalang ri sapo injo akkulle lajanjang saunna. 17#Mat. 10:26; Mark. 4:22; Luk. 12:2Saba' gele rie' nutassa'bu na gele laripappijanjangang, na gele todo' rie' harasia na gele lariisse' surang laripappiissekang. 18#Mat. 13:12, 25:29; Mark. 4:25; Luk. 19:26Injomo saba'na, pakabaji' ta'rammu appillangngeri. Saba' inai rie' laampunnai, larisare, mingka inai gele rie' laampunnai, larialle battu ri ia, injo pole nularapang injo rie' ri ia, larialle ngase'.”

Isa na uranNa siana'

8:19-21

(Mat. 12:46-50; Mark. 3:31-35)

19Idong surang uranna siana' Isa riekii mangei ri Ia, mingka gelei akkulle seppa' saba' lohena tau. 20Rie'mo tau anjarrung mange ri Ia, ”IdomMu surang urang siana'Mu rie'i pantarang na a'ra'i laurangKo assijanjang.” 21Mingka lakua Isa ri iyai, ”IdongKu na urang siana'Ku, iamo intu sikuanna tau appilangngeri injo pau na lageokangi.”

Anging ka'bu ripakaluba'

8:22-25

(Mat. 8:23-27; Mark. 4:35-41)

22Rie' se're allo Isa nai'i ri lopi surangi ana'-ana' gurunNa na appaui mange ri iyai, ”Maeko a'lampaki anta'leang tamparang la'ba.” Jari a'lampaimu. 23Na rihattunnamo nyombala, tinroi Isa. Sikalinna battumu anging ka'bu ri tamparang la'ba injo, jari lapantamakimu ere lopi injo na latabaimu bala. 24Jari mange ana'-ana' gurunNa laronrongi Isa, lakua, ”Guru, guru, latallangki!” Jari ambaungi Isa, ampai laga'gara anging surang bombang bakka' injo. Jari luba'mu anging injo na tamparang la'ba injo a'jari sannang. 25Maeng injo appaui Isa mange ri iyai, ”Ri antee mae katappakammu?” Jari mallakimu na lannasa ngase'i, ampai assikuta'nangi, ”Inai sitoje'na tau inni, nangura akkulle assare parenta mange ri anging surang ri ere injo na tunru' ngase'i mange ri Ia?”

Isa ambongka setang ri tau Gerasa

8:26-39

(Mat. 8:28-34; Mark. 5:1-20)

26Jari rampemu Isa surang ana'-ana' gurunNa ri tanana tau Gerasa ha'leanna Galilea. 27Sungka'na Isa nai' ribonto, rie'mo se're bura'ne battu ri kota injo laurangi assijanjang Isa; tau injo ladongkokii lohe rupanna setang na sallomu gele make pakeang surang gelemu ammari ri sapo, mingka ripakkuburang mamoi. 28Rihattunna lajanjang Isa; akkariu' bakka'i ampai a'demporo ri a'rakanNa, ”Apa passilolongamMu ri nakke, oe Isa Ana' Allataala Tukaminang la'biri? Kuerai mange ri Kau, solanna andama risissa.” 29Ia appau appakonjo saba' Isa laparentai setang injo ansulu' battu ri tau injo. Saba' setang injo biasai larenreng-renreng tau injo, jari lanjagai ri ia, rirante surang risangkala, mingka akkulle juai latappu'-tappu' panga'ba' injo na rirenrengi ri setang injo mange ri tampa' sino. 30Jari akuta'nangi Isa mange ri ia, ”Inai aremmu?” Pappihalinna, ”Legion,” saba' lohe rupanna setang ladongkokii. 31Na setang-setang injo laerai mange ri Isa, solanna andamu laparentai antama' ri lanta' kamateang.

32Ri injo rie' sibakkalang bakka' bahi attangnga a'bikanre ri biring ta'bing, jari setang-setang injo laerai ri Isa, solanna lapa'biang ngase'i antama' ri bahi lohe injo. Isa laturuki pangeranai. 33Jari ansulukimu setang lohe injo battu ri tau injo na antama'i ri bahi lohe injo. Bakkalanna bahi lohe injo a'lumpa'i battu ri ta'bing naung ri tamparang la'ba jari mate tallang ngase'mu.

34Sungka'na sikonjo pakalahaki bahi injo lajanjangi apa kajariang, allariimu na lalagarai passala injo ri kota na risikonjo desa ampi'-ampi'na. 35Jari ansulukimu tau lohe injo mange latilingi apa kajariang. Battuimu mange ri Isa na lajanjangimu tau maeng labokoi injomo setang attolong riampi' bangkenna Isa; ia maemmu makeang na toromu pikkiranna. Jari mallaki ngase'mu. 36Sikuanna tau maeng anjanjang rikajariang injo lalagarai mange ri iyai, anteekamua tau lodongkoki injo setang ripakamole. 37Jari sikuanna tau assinna tana Gerasa laerai mange Isa, solanna labokoi, saba' sarro mallakinna. Jari nai'mu Isa ri lopi, ampai nyombala muliang. 38Na tau maeng ribokoi injo ri setang laerai solanna ia ripa'biangi minahang ri Ia. Mingka Isa lasuro muliang, lakua, 39”Muliammoko ri sapommu na lagarai sikonjo numaeng lageokang Allataala ri kau.” A'lampa toje'i tau injo lainroi sibatu kota na lalagara ngase'i numaeng lageokang injo Isa ri kalenna.

Isa lapakaattallasai muliang ana'na Yairus surang appakagassingi se're bahine garring lalarii rara

8:40-56

(Mat. 9:18-26; Mark. 5:21-43)

40Rihattu mulianna Isa, lohemo tau laruppai saba' iangase'na injo tusallomo attajang ri Isa. 41Jari rie'mo se're tau riariereng re' Yairus. Ia se'rei ponggaha ri sapo passambajangang. A'demporo ri a'rakang bangkenna Isa laerai mange ri Ia, solanna mange kalenai Isa ri saponna, 42saba' ana' bahine sitau-tauna, ummuru'na barang sampulomu ruantaung, injo ammadammu. Ripa'lingkaanna lamange konjo, Isa riosso'i ri tau lohe.

43Ri injo rie' se're bahine sampulomu ruantaung garring lalarii rara na gele rie' manna se're tau akkulle lapakamole, [manna injo ia maeng lapa'la'busammo pa'barang-baranganna lattarile ri dottoro]. 44Ia mange laseppaki Isa battu riboko na lakaraha rombe-rombe baju bakka'Na, rihattu injo sikali attaangi rarana. 45Jari appaui Isa, ”Inai akkaraha ri Nakke?” Kanara tide'na tau ngani, jari appaui Petrus, ”Guru, lohe tau a'domung na ngosso'i ri Kau.” 46Mingka appaui Isa, ”Ma'nassa rie' se're tau akkaraha ri Nakke, saba' kupisa'ringi rie' kahasa ansulu' ri kalengKu.” 47Sungka'i lajanjang bahine injo ma'nassana kaissengangi nulageokang injo, annetteremu na mangei a'demporo ri a'rakanna Isa na lapaui ri tau lohe injo apa saba'na na lakarahai Isa na rihattu injo sikali mole garrinna. 48Jari lakuamo Isa mange ri bahine injo, ”Oe ana'Ku, tappa'mu lapakasalama'ko, muliammoko lalang salama'!”

49Rihattu a'bisarana juapa Isa, ambattumu sitau bijanna ponggaha ri sapo passambajangang injo na appaui, ”Matemu ana'mu, andamoko pakasusai guru!” 50Mingka lalangngere Isa na appaui mange ri Yairus, ”Ako malla', tappa'moko, jari attallasa ana'mu.” 51Sungka'na ambattu Isa ri saponna Yairus, Isa gele appa'biang manna sitau minahang antama' passangadinna Petrus surang Yahya na Yakobus na ammanna surang idonna ana' injo. 52Sikuanna tau rie' ri injo ngarrang ngase'i na laparaui ana' injo. Mingka appaui Isa, ”Akomo ammarrangi; ia gelejuai mate, mingka tinroi.” 53Rikekekimu Isa ri tau lohe injo, saba' laisse' ngase'i ma'nassana mate toje'mu ana' injo. 54Maeng injo latetengi Isa limanna ana' injo ampai langa'ngara, ”Oe ana' ambaummoko!” 55Jari muliang nyahana ana' injo na rihattu injo memangjua na ambaungi. Jari Isa lasuro sarei kanre ana' injo. 56Jari lannasamu tau toana ana' injo, mingka Isa gele lapa'biangi lapappiissekang manna mange ri inai jua apa nukajariang.

Currently Selected:

LUKAS 8: LAI_SLY

Highlight

Copy