Aphutna 44

Khuri Ānsam

1Zosef-in a in āenpū kōma, “Hava mi ngāi puontumbūna nēksāk manbit ro, ei mator u tuk. A sum u ngāi chip chu a puontumbū u mūra thālpē ro. 2#Aph 42:20; Dān 8:2Ka khuri, sumrū khuri ha, a sahūm man le han, asakhōn khīt puontumbū mūra thāl ro,” tīna chong a pēk a. Hankēng amā'n Zosef a chongpēk anga a thō na.

3 # Rui 19:9 Khuo ei hong vār le, amāni le a sakuorpar ngāi le han, amāni chu a mansē u na. 4#Sām 35:12; Chn 17:13; Zer 18:20Khopui ātā ei suok u na, la va la zet mak a, Zosef-in a in āenpū kōma, “Anthui ro, hava ngāi va razūl ro, amāni na va huom le, a kōm u na, ‘Hong sika mo āsā chu āsiat le nei thūl u? 5#Dān 18:10-14Hivā le hin ka pumā'n ei buong chachakna ni mak mo lē sema ei en chachakna ni mak mo? Hivā nei thō una hin āsia nei thō u a ni,’ va ti ro,” a tī na.

6Amāni chu a va huom a, hava chong ngāi ang thapa a kōm una a va tī na. 7#Zos 22:22-29; 2Sa 20:20Amānī'n a kōma, “Hong sika mo ka pumā'n hivā chong ngāi hi ei ril? Hiva anga sin hi na suok ngāiin thō thak u nō ni. 8Entā, koini puontumbū mūra sum nei man ngāi um Kanān ram ātā na kōma na hong chōi rēt a. Hontin mo hanle na puma in ātā sumrū lē rāngkachak nei maruk rang? 9Na suok ngāi kāra tūkareng kōma anman ten, hava nāi ha thi rase, koini um na puma suok chang in ti,” a ti u na. 10Āenpū'n, “Na chong u anga nī rase. Tūkareng kōma ei ānmanna tak, ka suoka om rase, nangni chu siatanlō u nō ta ni,” a tī na. 11Hatuka annot sabaka, a puontumbū u chip chu phila, a masum u na, a puontumbū a malong chip u na. 12Amā'n ā rok a. Ulian khīt ātā a phut a, asakhōn tena a mong a. Khuri ha Benzamin a puontumbūna anman a. 13A raliang u ngāi a thēt u na, a sakuorpar u ngāi a mandiang chip u na, khopui tiang a kīr rēt u na.

14Zuda lē a paruol ngāi chu Zosef a ina a hong u na, ama chu hava han a lā om chian a. Amāni chu a makunga phila anbok u na. 15#Aph 3:13; Ant 32:1Zosef-in a kōm u na, “Hong sin mo hivā hi nei thō u a ni zei? Koi ka anga mī'n sema-enthei kēng tī hi riat u mak che mo?” a tī na. 16#Sām 26:6Zuda'n, “Hong mo na puma kōm nei ti rang? Imo nei ril rang? Hontin mo na rui nei manthiang thei rang a ni zei? Pathianin na suok ngāi siatna chu ei man a ni zei. Koini lē a kuta khuri ei ānmanna pū, ka puma suok ngāi chu hivā hin nā om,” a tī na.

17 # Aph 42:18; Sām 37:32-33; 75:2 Tenchu Zosef-in, “Hiva ang sin hi thō thak nō ning. A kuta khuri ei ānmūna pū rong ha, ka suok chang in ti. Nangni chu, phūkdāia na pā kōm sē u ro,” a tī na.

Zuda'n Benzamin a Zong

18Zuda'n ama chu a hong ānāi a, a kōma: “O ka puma, lungkhama na suokin ka puma riata chong khat ril rong, na taksitna chu na suok ngāi chunga manlum nō tānla, asik chu nang hi Faro ang kēng nā ni. 19#Aph 43:29Ka pumā'n a suok ngāi a rakel a, ‘Nangnī'n pā mo ole paruol mo na dōn u?’ a tī na. 20Koinī'n na puma kōma, ‘Koinī'n pā ātar lē atar tianga a nāi ruothar khat na dōn a. A paruol chu a thi zei a, a nū nāi ngāi bila ama rong hi a lā om a, a pā'n ama chu ā dit a,’ a ti u na. 21#Aph 43:3, 5; Zer 24:6Nangin na suok ngāi kōma, ‘Ka mita kei mū theina rang, ka kōma hong tuong u ro,’ na tī na. 22#Aph 42:38Koinī'n na puma kōma, ‘Nāipangtē'n a pā māk thei mak a, a pā a māk ving ten, a pā chu thī'n ti,’ na tī na. 23Tenchu nangin na suok ngāi kōma, ‘Na paruol u asakhōn na bil una na hong ruoi u nōk ten, ka mēl na hong mū pial u lāi nō ta ni,’ na tī na.

24“Na suok ka pā kōma nā sē le han, ka puma chong ngāi chu koinī'n na va ril a. 25Koini na pā'n, ‘Sē rēt u tānla, nēksāk alaktē va rachōk u ro,’ a tī na. 26#Lk 11:7Tenchu koinī'n, ‘Sē thei lāi nō ma ni. Koini na paruol asakhōn na bila a om ten, koini sē thei in ti. Asik chu na paruol asakhōn na bila na ruoi nōk ten, sovā nāi a mēl va mū thei nō ma ni,’ na tī na. 27Na suok ka pā hān koini kōma, ‘Ka thāinū'n nāipasal anni ei nei na riat u na. 28Angkhat chu ka kōm ātā a sē zei a, hatuka koiin, “Ama chu aher ahera āom ngēt nī zei ni,” ka tī na. Hava len ātā ama chu kei mū len lāi nōk a ni zei. 29#Aph 42:4; Dān 31:17; Sām 88:3-4Tenchu hivā nāi um ka kōm ātā na ruoi u na, āsia a chunga a hong āchul ten, ka samanchuok hi lungna ngōia Sheol-a na manliam u na ti,’ a tī na.

30 # 1Sa 18:1; 2Sa 1:26 “Hasikhan atun chu, na suok ka pā kōma ka hong ātung le, nāipangtē koini bila a om nōk ten, ei damna chu nāipangtē ei damna le ānthung a ni, 31Nāipangtē koini bila a mū nōk le chu, ama chu thī'n ti. Hantin han na suok ngāiin na suok koini na pā samanchuok chu lungna ngōia Sheol-a nei manliam rang nī'n ti. 32Asik chu na suokin ka pā kōma nāipangtē ruia hin zābīm ka lei nī na, ‘Na kōma ka hong ruoi rēt nōk ten, tāituona ka pā matona siatanlōna raput ka ting,’ a tī na. 33Hasikhan atun chu, lungkhama na suok hi nāipangtē rathūla, ka puma suoka na man-om ro, nāipangtē chu a paruol ngāi bila sē rase. 34#Est 8:6Nāipangtē chu ka bila a om nōk ten, hontin mo ka pā kōma kei sē rang, ka pā chunga āsiat ei hong tung rang hi ka mū ving inle?” a tī na.

Currently Selected:

Aphutna 44: RNL

Highlight

Copy