مَتّی 22

مَثَل جشن وَییو اَوَری

1عیسی هَنی مَثَلینه اَوونَّه گَف ژشهَ، واتشه: 2«آستامونی پادیشاهی، بَبی واتِه شاهی شیوارَ کن اِشتَن زوعَه را وَییو اَوَریَه جَشنی گَتشهَ. 3اَ اِشتَن پاسَریون رَونَه آکردش تا اَیِنی کن صَلا ژَشون بَه، جشنیرا خِلِه بِکَرن اَمّا اَیِن نَپیشون بَه بان. 4پس دییَرَ پاسَریِنی رَونَه آکردش و واتِش: ”اَیِنی کن صَلا ژَمَه بواجَه ایسَه جشنی سِفرَ حاضیر آکردَمَه، اِشتَن قِبرَقه گا اون وموندَاون سَر آبیردمَه و گردِ چیِن آمادَیَه. پس وَییو اَوَری جَشنیرا بِرَ.“ 5اَمّا اَیِن ایعتنا نَکَرین و هرکم اِشتَن راه را شینَه، ایلَه بجاریرا و دیَیری اِشتَن تَجارَتیرا. 6بَقیهَ نی چَی پاسَریِون گَتشونَه و اَیذَت کَردِشون و کِشتِشون. 7پادیشا آسَرنگسته، اِشتَن لَشکَری رَونَه آکردش و آدَمَه کِشون کِشتِشَه و چَوون شهری آراش ژَ. 8چَی بهَ دوملَه اِشتَن پاسَریون واتِشَه: ” وَییو اَوَری جَشِن آماد یَه، اَمّا اَیِن کن صَلا ژَمون بهَ اَ جگا آمِه لَیاقَتی نِدارین. 9پس راهون دِلَرا بشَه و هر کمی پَیدا بَکرون وَییو اَوَریرا صَلا بِژَنَه.“ 10پاسَرییِن جَدَ اونرا شینَه و هر کمی اَوینین چه چاک و چه بد، اِشتنَّ وَردشونه و وَییو اَوَری تالار مِیمانینَ پَتلَمَه آبه.

11«ولی هَنگومی کن شاه میمانون ویندِ خونه مجلسی دِلَه دَرمَه، مِردی بَویندی کن وَییو اَوَری شِندِری دَکَردَش نِبَ. 12اَیکا دَپَرسِستَه رفِق چِنتَه وَییو اَوَری شِندِری دَنِکَردِرَو اِم جگارا آمه ایشَه؟“ اَ مِرد جوابی نِداری. 13اَموقه پادیشا اِشتَن پاسَریِون واتِشَه: چَی بالی ولِنگون دَبسته و بَی بِرِنی ظِلَماتیکا بَرفنه، جگایی کن بِرَمستِه و گاز گازی سَر سونیستِه بَبیَه.“ 14چون اَیِن کن صَلاشون ژَیَه وِرینه، ولی برگزیدَ اِن کمین.»

قِیصَری مالیاتی آدوعِه

15چَی بَه دوملَه فَریسیِون فرقه عالیمِن بِرِن شینَه و یِندنه گَفه ژَنِه کردشون کن بِوینِن چِنتَه بشانَه اَی چَی گَفینَه دوم دَرفنن. 16اَیِن اِشتَن شاگردون، هیرودیسونَّه چَی وَر رونَه آکردشون و واتِشون: «اِستا، اَمه بَموستیمون تِه صادیقَه مِردی هِستیشَه و خدا راه دِرستینَه آموج دَری و کسیکا باکیر نیَه اِمی خونِه کن ظاهیری نَه قیضاوَت نیشَکَرد. 17ایسَه اَمه بِواج اِشتِه نَظَر چِه چییَه؛ خَراج آدوعِه بَه قَیصَر درستَه یا نهِ؟» 18عیسی چَوون بَدَ فِکری فَهمستِشَه و واتِش: «اَی دِ سَرَ کَرچَنگِن، چیرا بَمن وَرداوَرد بَکَرون؟ 19سکه‌ ای کن اَینَه خراج آدَرَ، بَمن آمونَه.» اَیِن ایلَه یَک دیناریَه سکَه بَی آداشون. 20اَوونکا دَپَرسِستَه: «اِم سِکَه سَری شِکل و نوم چیکی شِنَه؟» 21جواب داشون:« قیصری شِنَه؟» اَیِنِش واتَه: «پس قیصری مالی قیصری آدَر و خدا مالی خدا بدَرَ.» 22وَقتی اِمی دَرَستشونَ تَعَجُب کَردِشوَنه و عیساشون آهَشتَه و شینَه.

فِقَه اِ صَدوقیِن قَیامَتی خونِه سوال اَکَرین

23هَه روجونکا صَدوقیِن کن مونکر قَیامت بین، چَی وَر آمینَه و سؤالی اَیکا دَپَرسستین، 24واتِشون: «اِستا، موسی اَمَش واتَه بَه کن اَگَم مردی بی‌اولاد بِمِرِ چَی برا پی اِشتَن ویوَ بِروَر ژِنی، اِشتَن ژِن آکَر تا اَ ژِنیکا اِشتَن برا را اودومی بِنَر. 25ها، چَمَه دلَکا هَف برا بینَه. اَوَلین برا ژنی گَتِشَه و مَردَ و اِمی خونه کن خِردَنی نداریَه، ویوَ ژنی اِشتَن برا را هَشتِشهَ. 26دِوُّمی و سوّمی، تا هفتومی گِلَه نی اِنتَر آبین. 27آخیر بَسَر، اَ ژِن نی مَردَ 28ایسَه روجیکا کن مَردَاِن زِندَ آبون، اَ ژِن کِرَم گلَه اَ هف برااون ژِن بَبی، اِمی خونه کن گرد اَ ژِنی بَردَشون بَه؟»

29عیسی جواب داشَه: «شمَه گمراایرون اِمی خاطِر کن نِه موقَدسَه نِویشته اونکا چیی ایی بَموستیرون و نِه خدا خَنَریکا! 30قیامتَ روجیکا نِه کَسی ژن بَگتی و نه شوو بَشی، بَلکَم گرد آستامونی فرشتَه اون شیوار بَبینَه. 31اَمّا مَردَ اون قَیامَتی خونِه، خَندَرون نیَه کن خدا شمَه چِش واتَیَه؟ 32اَ واتشَه کن، ”اَزیمَه ابراهیمی خدا و ایسحاقی خدا و یعقوبی خدا“. اَ مَردَ اون خدا نیَه، بَلکَم زِندَ اون خِدایَه.» 33مردوم اِم گَفون دَرَستِه خونِه و چَی آموجیکا تَعَجُوب کَردِشون.

یال تَرین حِکم

34ولی وَقتی فَریسیِن دَرستشون کن عیسی چِنتَه اِشتَن جَوابینه صَدّوقیِون گَوی دَبَستشَه، یَندِ وَرگرد آبینه. 35ایلَه اَوونکا شَریعَتی مُعلیم بَه و اِم نِیَّتینَه کن عیسی دوم دَرَفنِه اَیکا دَپرسِستَه: 36«اِستا، شَریعَتیکا یال تَرین حِکم کرَم گله یَه؟» 37عیسی جواب داشَه: «‌”خداوند اِشتِه خدا، گردِ اِشتِه دلینه و گِردِ اِشتِه جانینَه و گِردِ اِشتِه زبقینه و گِردِ اِشتِه فکرینه رَی بدا“ 38اِم اولینو و یال تَرین حِکمَه. 39دوّمین حکم نی اولین حکمی شیوارَ: اِشتِه خَمسوعَه اِشتَن جانی شیوار موحبت بکه.“ 40گرد تورات و پَیغَمبرون نوشته اِن ام دِ حکمی سَر آمبَستینَه.»

مَسیح چیکی زوعَه یَه

41هَنگومی کن فَریسیِن یِندِ وَرجَم آبَه بینَه، عیسی اَوونکا دَپرسستَه: 42«شمَه نَظَر مسیح خونِه چِچیَه؟ اَ چیکی زوعَیَه؟» جواب آداشون: «داوودِ پادیشا زوعَه.» 43عیسی واتِش: «پس چِنتَه داوودِ پادیشا روح واتنَه، اَی خداوند خِلِه بَکَی؟ اِمی خونه کن باتی:

44«‌”خداوند چمن خداوندی واتَه:

«چِمِن راستَه بالی طَرَفیکا بِنِش تا اَ هَنگوم کن اِشتِه غَنیمون اِشتِه لِنگون بنیکا بَرَفَنِم.“»

45اَگَم، داوود پادیشا اَی”خداوند“ خِلِه بَکَی، پس چِنتَر بَبیَه کن وَعدَ آدوعَه مسیح داوودِ پادیشا زوعَه ببو؟» 46اِنتَرَکِه، هیچ‌ کَمیرا اینجار چَی جوابی دوعه نِبه و چَی بَه دوملَه دِ کسیرا جُرئَت نِبَه اَیکا سوال دَپَرسِه.

Currently Selected:

مَتّی 22: CTB

Highlight

Copy