مَتّی 21

عیسی شاهون شیوار آمَه

1وَقتی عیسی و چَی شاگِردن شهر اورشَلیمیکا نِزِک آبین و آوادی بِیت‌ فاجیرا کن کوه زَیتونی دومَنه کا بَه آرَستین، عیسی دِ نفراِشتن شاگردونکا عَندشَه. 2عیسی اَیِنش واتَه: «آوادی ایرا کن شمه ناریکارَ بِشَه. هنتَه کن دِلَه دَشیرون، ایلَه خَرکن چَی کِرَ نَه آبَستَشونَه بَویندیرون. اَوون آکَرَ و چمن وَر بوعَرَ. 3اَگَم کَسی بَشِمَه گَف ژِشَه، بواجَه :”خداوَند اَوون نیاز دارِ،“ و اَ جَخت اَوون رَونَه آرَکَرد.» 4اِم ایتفاق دَگنسته تا اَ چییی کن پَیغمبَرواتَش بَه حَییقتینَه اَنجوم ببو کن:

5«اورشلیمی و صحیونی کلَه بواجَه،

”ایسَه پادیشا اِشتِه وَر بومَی،

سَر بَه جیرَ وخَری سَر دَنِشَته یَه و کا آمِه،

خَرَ کِرَ سَردِرِ دَنِشتَه یَه و کا آمِه.»

6اَ دِ شاگرد شینَه و هر چیی ایی کن عیسی اَیِنش واتَه بَه اَنجوم داشون. 7اَیِن خَرو چَی کِرَ وَردشونَه و اِشتَن ردا اون چَوون سَریکا پِرَفَندشونَ و عیسی رَدااون سَرنِشتَه. 8یالَه جمعیتی نی اِشتَن رَدااوون راه سَریکا جیکردشون و بَعضییِن نی دارون بَشو خالی دَبِرینَ و راه دِلَکا جیرَکَرین. 9مردومی کن عیسی نَ کا اَشینَه و اَیِنی کن چَی پَشتیکا کایبین آمِه، جکّله نَه اَواجین:

«داوود پادیشا زوعَه، نیجات بِدَ!»

«موتبارَکَ اَ کن خداوندی نومینَه کا آمِه!»

«نیجات، عرشِ بَرینیکا!»

10وَقتی کن عیسی شَهر اورشَلیمیکا دِلَه دَشه، شور و شوق شهری هَمه جِگااون گَتَش بَه. مردم دَرَپَرسینَ: «اِم کییَه؟» 11و اَجماعت جواب اَدَرینَه: «اِم عیسای پَیغمبرَ ناصِرَ اِ جلیلییکا!»

عیسی مَعبَدی دِلَکا

12اَموقه عیسی معبدی دِلَه دَرمَه و گردِ اَیِنی کن اَجگا کا کاسبی اَکَرینَه، بِرِن بَرکَردِش و صرّافون تَختی و کَفترَ خرَشون بساطی ویگاردانستِش. 13و اَیِنش واتَه: «موقدسَه نِوِشتَه اونکا نِوِشتَه آبَیَه کن، ”چمن کهَ، کَه اِ دوا خِلِه بَکنَه،“ ولی شمه اَجِگارون پِتارچییون لونَه سِی آکَردَرونَه.»

14معبدی دلَکا، ناوینا اِن و شِلِن عیسی وَر آمینَه و اَ اَیِنِش شفا داشَه. 15ولی وَقتی کن سران کاهینن و توراتی موعَلیمن چَی عَجیبَه کارون ویندِشونَه و هَنی اَوینینه کن خردَنِن معبدیکا لَسه بَژَن: « داوودِ پادیشا زوعَه، نیجات بِدَ،» بَرک آسرَنگِستین. 16اَیِن عیساشون واتَه: « دَشَرست اِمن چه باتین؟» عیسی جواب داشَه: «ها. مَگَم داوودی زبوریکا خَندَرون نی کن،

«‌” خردَنِن و چلینه خردنن نی اِشتَن زونی نَه

بَی ستایش بَکَن؟“

17عیسی چَوون وَریکا شَه و شهریکا بِرِن بَرشَه، اَ بِیت‌عَنْیا آوادیرا شَه و اَجگا کا مَندَ.

عیسی اِنجیلَه داری خِشک آکَردِشَه

18سوکَه خون وقتی عیسی شَهریرا ویرَگَردی، اَنشتا آبه. 19راه قِرَقیکا، اِنجیله داری بویندیَه وچَی طَرَف بَشیَه ولی غَیراز لیو چیی ایی چَی سَریکا نَوینیَه. پس دارِش واتَه: «نِکَرِ کن دِ هَرگز میوَای بَتکا پِرا!» جَخت اَ دار خشک آبَه. 20شاگردِن کن اِم ایتفاقی ویندِ را حَیرون آبَه بین، واتشون: «چِنتَه اِنجیله دار اَنَ جَخت خشک آبه؟» 21عیسی چَوون جَوابیکا واتِشَه: «حییقتا بَه شمَه بَاتیمَه، اَگَم ایمان بدارَ و چیمه میمَه نِکر نه تاکَه بَشانه اَچیی کن اِنجیله داری سَر گذَشتَه اَنجوم بِدَر، بَلکَم حَتی اَگَم اِم کو بواجه اِم جگا کا پِوَجِه، اِ شتَن ویدارِ دَیرا دِلَه،“ اِنتَر آرَبن. 22اَگَم ایمان بدارَ، هَرچیی ایی دِوا کا بَپیرون، وینَّگَت.»

عیسی زاکینداری کا سوال کَردِ

23وَقتی عیسی معبد ی دِلَه دَرمَه وکایبَه آموج دوعِه. هِم هنگومیکا، سران کاهنِن و قامی ایسبیَه ریشِن چَی وَر آمینَه و واتِشون: «چِه زاکینی نَه اِم کارون بَکَشَه؟ کی اِم زاکینی بَتِه آدوعَشَه؟» 24عیسی چَوون جَوابیکا واتِش: «اَز شِمَکا سوالی دارِم؟ اَگَم جَواب آدارون اَز نی بَه شمَه بَاتیمَه کن چه زاکینینَه اِم کارون بَکَم. 25کی اِم حقو ایختیاری یحیی آدوعَش بَه کن تعمید بدَرِ؟ خدا طَرَفیکا بَه یا اینسانی طَرَفیکا؟» اَیِن یَندِنه گَفَه ژَنِه کَردِشونه و واتِشون: «اَگَم بِواجَم ”خدا طَرفیکا بَه“، عیسی باتیَه پس چیرا بَی ایمان نِوَردِرون؟“ 26اَگَم بِواجَم ”اینسانی طَرَفیکا بَه“، مردمیکا بتَرسِستیمون، اِمی خونه کن گِرد یحیی ایلَه پَیغَمبر بَموستین.» 27پس عیساشون جواب دوعَه: «اَمه نِزنَم» عیسی واتِش: «اَز نی بَه شمَه نِمَوات چِه زاکینینَه اِم کارون بَکَم.»

دِ زوعَه مَثَل

28« شمه نَظرچِچیَه؟ مِردی دِ زوعَه داری. اَ اِشتَن یالَه زوعَه وَرشَه و واتِش: ”زوعَمَه اُمروج چمن اَنگرَ باغیرا بش و کار بکَ“. 29یالَه زوعَه جواب داشه: “اَز نمَش.“ ولی چَی بَه دوملَه پَشمون آبَه و شَه. 30چَی به دوملَه دَدَ گِچَه زوعَه وَر شَه و هَه گَفی بَی واتِش. گِچَه زوعَه جواب داشَه: “اَقَه، اَز بَشیمَه،“ ولی نِشَه. 31شِمَه نَظَر کِرَم گلَه اَ دِ زوعَه کا خواست اِشتَن دَدَ اَنجوم داشَه؟» اَیِن جواب آداشونَه: «اوّلی.» عیسی اَیِنِش واتَه: «حَییقتا بَه شمَه باتیم، خَراج ویگِرن و خَراوَ ژِنِن شمکا نارتَر خدا پادیشاهی دِلَه دَنَّش. 32اِمی خونه کن یحیی آمَه و راهی کن صالح بِه طرف اَشیَه بَشِمَه آمونِستِش ولی بَی ایمان نِوردرونه، ولی خَراج ویگِرن و خَراوَ ژِنِن ایمان وَردشونَه و شمه حتی وَقتی اِم چییون ویندِرون، پَشمون نِه آبیرون و بَی ایمان نِوَردرون.»

باغَه وونون مَثَل

33«ایسَه اِم مَثَلی گوش آکَرَ. ایلَه اَربابی بَه کن اَنگرَ باغی گَتِشَه وچَی دووری حیصار پَناشَه و اَ باغی دِلَکا اَنگِری لرت آکَردِرا حووضی سِی آکَردِشَه واَ باغیکا نیگَبانی دوعِه خونه قَلَه ایی ساستِش. چَی بَه دوملَه اَنگِرَ باغی چَن گِلَه باغَه وونی ایجارَ داشَه و اِشتَن دییَرَ وِلَتیرا شَه. 34اَکینی پِگَته وَقت کن آرَستَه اِشتَن پاسَرییون باغَه وونون وَر عَندِشَه تا اِشتَن رَسَتی اَنگِریکا تحویل بیگِن. 35ولی باغه وونِن چَی پاسَرییِنشون گَتَه، ایله ژِشونَه و دیَیری کِشتِشونه و سوّمی سِنگسار کَردِشونَه. 36ایکَر دییَر، اَرباب قَبلَنَه کا ویشتَر پاسَری چَوون وَر رونه آکردش. ولی باغَه وونِن اَوونَّه نی هَته رفتار کَردِشون. 37آخیر بَسرارباب اِشتَن زوعَه باغَه وونون وَر رَونَه آکردشَ و اِشتَنَه واتِشَه: “اَیِن چمن زوعَه حُرمتی غَم بَردینَه.“ 38اَمّا هَنگومی کن باغَه وونِن چَی زوعَه ویندِشونَه، یَندِنَه واتِشون: “اِم وارثَه بِرَ اَی بِکشَم و تا چَی اِرث اَمه آرَسِه.“ 39پس اَ زوعَشون گَتَه و اَنگِرَ باغیکا بِرِن بَرَفندشونَه و کِشتِشون. 40ایسَه اِم کارینَه، وقتی اَنگِرَ باغی صاحیب با، اِم باغَه وونونَّ چِه بَکَی؟» 41اَیِن جواب آداشونَه: «اَ بی‌ رحمینَه اَ آوشَرَ باغَه وونون نیفلَه آرَکَرد و اَنگرَ باغی دییَر باغَه وونون دست آرَدا تا چَی میوَه چَی فَصلیکا بَی بِدَرِن.»

42اَموقه عیسی اَیِنِش واتَه: «مَگَم داوودی زَبوریکا خَندَرون نی کن:

« اَ سِه ای کن اِستا اِن رَد کَردِشونَه،

ایسَه ساختمانی اَصلیه سِه آبَیه.

خداوند اِم کاری کردَشَه؛

و چَمَه نَظَریکا عَجیب بومَی؟“

43پس بَشِمَه باتیمَه کن خَدا پادیشاهی شِمَکا ویگَتِه بَبیَه و بَه قامی آدوعَه بَبییَه کن چَی اَکینی بِدَرن. 44هَر کم اَ سِه سَر بَرگنهِ، خِرد آرَبن، و هروَقت اَ سِه کَسی سَربَرگنهِ اَی لِرت آرَکَرد.

45وَقتی سران کاهنِن و فَریسیون فرقه عالیمِن عیسی مَثَلِنِشون دَرَستَه، سَر آگِنینَه کن عیسی چَوون خونِه گَف بَژَی. 46پس اَیِن راهی دوملَه اَگَردینَه تا اَی ویلاخنِن، ولی مردمیکا اَتَرسینَه اِمی خونه کن مردوم عیسی ایلَه پَیغَمبر بَموستین.

Currently Selected:

مَتّی 21: CTB

Highlight

Copy