مَتّی 23

وای بَه حال اَفَندییِن و فَریسیِن

1اَموقه عیسی مَردومیرا و اِشتَن شاگردونرا اِنتَر واتِشَه: 2«اَفَندیِن و فَریسیِن موسی جگا سَر نِشستینَه. 3پس اَچیی کن بَه شمَه باتینَه غَم بَرَ و اَنجوم بِدَر؛ ولی کارِنی کن اَیِن اَنجوم بَدان، شِمَه مَکَرَ! اِمی خونه کن اَ چیی ایی کن آمج بدان اِشتَن بجا نینَّوَرد. 4چَتینه بارون دَنَّبَست و مردمی دوشی سَر پِنَن، اَمّا اِشتَن حاضیر نینَّه چَی تم آدوعِه را حتی اِشتَن اَنگشتی تِم آدَرِن. 5هر کاری بَکَن اِمی خونه یَه کن مردوم اَوون بِوینِن: اِشتَن آیَه جِگا اون یال تَر واِشتن رَدا دومَنه وشاتر سِی آنَّکَرد. 6رَی بَداشتینَه مِیمانییونکا مجلسی سَرَنگاکا بنشنو عیبادَتگا اونکا بِیتَرین جِگا بِدارن، 7و مردوم کوچه و بازاریکا اَوون سلام بواجن و اِستا“ خِلِه بِکَن. 8ولی بَشمَه اِستا“ خِلِه مَکَرِن، اِمی خونه کن تاکَه ایلَه اِستا دارَ و شمَه گِرد یَندِ برا اینَه. 9زَمینی سَردِرِ هیچ کَسی دَدَ خِلِه مَکَرَ، اِمی خونه کن تاکَه ایلَه دَدَ دارَ کن آستامونیکارَ. 10و هَتَه شِمَه”معلم“ خِلِه مَکَرن، اِمی خونه کن فقط ایلَه معلم دارَ کن مسیحَه. 11اَکَن شمَه دلَکا گِردیکا یال تَرَ، شمه پاسَری بَبیَه. 12اِمی خونِه کن هر کم اِشتَن یال آکَرِ، پَست آرَبن و هرکم بَشتَن فروتَن آکَرِ سرافراز آرَبن.

13«برامه شِمَه حالیرا اَی توراتی موعَلیمِن و فَریسیون فرقَه عالیمِن کن دِ سَرَ کَرچَنگینَه! اِمی خونِه کن شمَه آستامونی پادیشاهی بَرَنگا مردمی نَ کا دَبَستَه؛ نِه اِشتَن دَله بَشیرون و نِه بَشتیرون کَسِنی کن راکانَه، دَلَرا بوشون.

[ 14« برامه شمه حالیرا اَی توراتی موعلیمن و فَریسیِن دِ سَرَ کَرچَنگ! شمَه ایی وَریکا ویوَ ژِنون کَه پِتارَ و دییَرَ وَریکا، تظاهورکردِ خونِه، اِشتَن دِوا طول بَدارون. شمَه مکافات برک چَتین بَبیَه.]

15«برامه شمه حالیرا شمَه اَی توراتی موعلیمِن و فَریسیِن دِ سَرَ کَرچَنگ! شمه دَیرا و خشکیکا اَگَردیرون تا ایی نفری اِشتَن دینی طَرَف بوعَرَ و وقتی اِم کاری کَردِرون، اَی دِ بَرابَر اِشتنکَا بَدتَر جَندمی خِردن سِی آکَرَ.

16«برامه شمه حالیرا اَی کورَ راهنمااِنِ کن باتیرون: اَگَم کَسی معبدی قَسم بَردی عَیبیش نیَیَه، ولی اَگَم معبَدی طِلِه سَر قَسم بَرِ پی اِشتَن قَسَمی اَنجوم بدَرِ.“ 17اَی کورَ نافَمِن! کرَم گِلَه یال تَرَ؟ طلِه یا معبدی کن طله تقدیس بَکی؟ 18و هَتَه باتیرون: اَگَم کَسی مذبَح قَسمی بَرِ عَیبی ندارِ، اَمّا اَگَم خَلایی کن چَی سَریکا آنوعَشونه سَردِرِ قَسم بَرِ پی اِشتَن قَسمی اَنجوم بدَرِ.“ 19اَی ناوینااِن! کرَم یال تَرَ؟ خَلا یا مذبحی کن خَلا تقدیس بَکی؟ 20پس، کَسی کن مذبح قَسمی بَردی، مذبح و هر چییی کن چَی سَریکارَ قَسَمی هَردَشه. 21و هر کم معبدی قَسمی بَردی معبد و به اَ کن چَی دِلَکا بَمندی قَسمی هَردَشه. 22و هر کم آستامونی قَسمی بَردی، خدا تَخت و اَکَن چَی سَریکا نشته قَسمی هَردَشه.

23«برامه شمَه حالیرا اَی توراتی موعلیمین و فَریسیِن دِ سَرَ کَرچَنگ! شمَه پاینِه و شِوِد و زیرَه ده‌ یک بَدارون، اَمّا شَریعَتی مُهیمَه حِکمون کن عیدالت و رحمت و وَفاداریَه، نادیدَ بَگَتیرون. اِمون پی اَنجوم اَدَریرون و اَیِن نی یاد بَنِه کَرَیرون. 24اَی کورَ راهنمااِن! شمَه پونشی پَروُون بَژَرون، اَمّا شتِری ویبَردیرون!

25«برامه شمه حالیرا اَیتوراتی موعلیمِن و فَریسیِن دِ سَرَ کَرچَنگ! شمه قَدرَ و باخشاوی بِرنی پاجا بَکَرون، ولی چَی دِله طمع و ناپرهیزیکا پَتلَمَه یَه. 26اَی کورَفَریسی، اَولیکا قَدرَ و باخشاوی دِلَه پاجا اَکَن کن چَی بِرن نی پاجا آرَبن.

27«برامِه شمَه حالیرا اَی توراتی موعَلیمِن و فَریسیِن دِ سَرَ کَرچَنگ! شمَه ایسبی آبَه قَورِونی شیوار هستیرون کن بِرِنیکا بَه ظاهِیر خاصینَه، ولی چَوون دِله مَردَاون اَستَنَه و هَمَه مودیل جیفینینَه چینَه پَتلَمه یَه! 28هن تَرکِه، شمَه نی بَشتَن مردومیرا پارسا نمود دَرَ، ولی باطنیکا دِسَرَ کَرچَنگ گیری درو و شَرارتینَه پَتلَمَه ایرون.

29«برامه شِمَه حالیرا اَی توراتی موعلیمِن و فَریسیِن دِ سَرَ کَرچَنگ! شمَه پَیغَمبرونرا تِربه سِی آکَرَ و پارسا اون خته جگا تَزیین بَکَرون. 30و باتیرون: اَگَم اِشتَن دَدَاون روزیگاریکا بیمون هرگز پَیغَمبرون کشته کا اَوونَّه شریک نِه آبیمون.“ 31اِنتَرَکِه، اِشتَن زِرَبَراشاهیدی بَدارون کن شمه اَینی کن پَیغَمبرونشون کِشتَیَه خِردَنیرون. 32ایسَه کن اِنتَره یَه، پس اَچیی کن شمه دَدَاِن شروو کَردشونَ شمَه تَکمیل آکَرَ! 33اَی نَلَتی اِن! ای اَفعی خردَنن! چِنتَ جَندمی مجازاتیکا بَوریتیرون؟ 34چیرا کن اَز پَیغَمبرون و حکیمِن و اَفَندیِن شمَه وَر رَونَه آمَکرد و شمَه بعضیون بَکشتینَه و صلیبی سَر بَبردیرون و بَعضیون موقدسَه عیبادَتگا اونکا شَلاغ بَژَرونَه و شهر به شهر تعقیب بَکَرون. 35پس، گردِ پارسا اون خون کن زمین سَر ویبَه یهَ، هابیلِ پارسا خونیکا بیگِه تا بَرخیا زوعَه زَکَریا خون، کن بَی محرابگاه و مذبح وَسَطیکا کِشترونَه، شمَه مِلیکارَ. 36حَییقتا بَه شمَه باتیمَه، گِرد اِمِن، اِم اودومی دومَنه بَگَتیَه.

37«اَی اورشلیم، اَی اورشلیم، اَی شَهری کن پیغَمبَرون بَکشتیش و اَیِنی کن اِشتِه وَر رَونَه بَبین سِنگسار بَکَش! چَنکَرَاَپیم بَه هنته کَرگی کن اِشتَن کیجه اون اِشتَن پَرون بنیکا جَم آرَکَرد، اِشتِه خِردَنون ایی جِگاکا گِرد آکَرم اَمّا نَپیربَه. 38دَیَس ایسَه شِمَه که آهَشتَشونَه و تَیَه. 39اِمی خونه کن بَه شمَه باتیمَه دِ بَمن نینَّویند تا زمانی کن بِواجَه: ”موتبارَکَ اَ کن، خداوندی نومینَه آ.“

Currently Selected:

مَتّی 23: CTB

Highlight

Copy