مَتّی 13

کَشاوَرزی مَثَل

1هَه روجیکا، عیسی اَکَیکا کن اَمونی بِرِن آمَه و دَیراچَه وَریکا نِشتَه. 2ولی اَنَ یالَه جمعیتی عیساشون دوور کَردَ کن اَ لاتیکه ایی سَر دَنشته و نِشتَه، در حالی کن آدَمِن دَیراچَه کَناریکا پا مَندبین. 3چَی بَه دوملَه عیسی مَثَالونَّه وِرَ چییونی اَیِنِش آموج دوعَه واَواتِشَه: «ایی روج ایلَه کَشاوَرز دونَه پِشَندِرا بِرِن شَه. 4وَقتی دونَه پِرَشونی، بَعضی رادله بَرگنینَه و پرندَ اِن آمینَه و اَینِشون هَردَ. 5تیکَلیی دونَه اونکا بِژَزَمینی سَردِرِ بَرگنینَه کن چَی خاک کَم بَه؛ پس دونَه اِن جَخت پِرمینَه، چیرا کن خاکی عُمق کم بَه. 6ولی وَقتی آختاو پِرمَه، اَیِن سیجیستین و اِمی خونه کن ریشَه نِدارین خِشک آبینَه. 7بَعضی دونَه اونکا چِغون دِلَه بَرگنینَه. چغِن یال آبین و اَیِنِشون خفَه آکَردَ. 8اَمّا بقیَه اِ دونَه اِن زورومَه زَمینی سَردِرِ بَرگِنستین و اَکین آداشونَه: بعضی صد ، بعضی شِصت و بعضی سی برابر. 9هر کم چَی گوش دَرَرَست، دَرَسه.»

10اَموقه عیسی شاگردِن چَی وَرآمینَه دَپَرسِستین: «چیرا مردومینه مَثالونَّه گَف بَژَشَه؟» 11عیسی جواب داشَه: «آستامونی پادیشاهی رازون فَهمِستِه بَشمَه عَطا آبیَه، ولی به اَیِن عَطا بَ نیه. 12چون بِه اَ کن دارِ ویشتَر آدوعِه بَبی تا فِرَوون بدارِ، ولی اَیکا کن نیشَه هَه کن دارِ نی بَیکا وینَّگَت. 13اِمی خاطر اَوونَّه مَثالونَّه گَف بَژَم، چون:

«اَیِن کان دَیشتِه، ولی نینَّویند؛

کان گوش آکردِ، اَمّا دَنینَّرست و نینَّفهمست.

14حَییقتا اَشعَیای پَیغمبَری پیشگویی چَوون خونِه اَنجوم بَبیَه کن باتی:

«‌”شِمَه اِشتَن گوشینهَ دَنَّرَست، اَمّا هرگز سَر آنِگِنَه؛

اِشتَن چَمینَه بَویندیرون، اَمّا هرگزسَر آنِه گِنَه.

15اِمی خونِه کن اِم قامی دِل سَخت آبَیه،

چَوون گوشِن سنگین آبَیه،

اِشتَن چَمون دَبَستَشونَه،

تا نِکَر اِشتَن چَمونَّه بِوینِن،

و اِشتَن گوشونَّه دَرَسِن

و اِشتَن دلونکا بِفَهمِن

و آگَردِن و اَز اَوون شفا بِدَرم.“

16ولی خَشی شمَه چَمون حالیرا کن بَویندینَه و خَشی شِمَه گوشون حالیرا کن دَنَّرَست. 17حَییقتا بَه شمَه باتیمَه، خَیلی پَیغَمبرون و صالِحه آدَمونکا طَمارزو دارین اَچیی کن شمه بَویدیرون، بِوینِن و نویندشون، و اَچیی کن شمَه کان دَرَستِه، دَرسِن ولی دَنِرَستِشون.

18«پس شمه کَشاوَرزی مَثَلی مَعنی گوش آدَرَ: 19هَنگومی کن کَسی خدا پادیشاهی کَلامی دَرَرَست، ولی اَیکا سَر آنیَگِنِست، اَ آوشَر بومَیَه و اَچیی کن چَی دلیکا کَشت بَیَه، پِرَتارست. اِم هَه دونه ایَیه کن راه دِلَکا بَرگِنِستَه. 20دونه ای کن بِژَزَمینی سَربَرَگنست کسیَه کن خدا کلامی دَرَرست و جَخت اَی خَشینَه قِبول بَکی، 21ولی اِمی خونه کن اِشتَنکا ریشَش نیَه، تاکَه کَمه زمانی بَمَندییَه. وقتی اَ کلامی خونه، سختی یا اَیذَت وآزاری بَویندیَه، جَخت اِشتَن ایمانیکا بَرَگنِست. 22دونه ایی کن چغون دِلَه برگِنستَه، کسیَه کن خدا کلامی دَرَرَست ولی اِم دِنیا تَفشیش و دِنیا مالی وَسوسَه، خدا کلامی خفه آرَکَرد و بَی بَرَ بَکَی. 23اَمّا دونه ایی کن زورومَه زَمینی سَردِرِ برگِنستَه، کسیَه کن خداکلامی دَرَرست و اَی بَفَهمستی و حَییقتا اَکیین بَدای، صد، شِصت یا سی بَرابَر بَرَ آرَدا.»

هَرزَواشی مَثَل

24عیسی دیَیرَ مَثَلی نی چَوونرا وَردشَه و واتِش: «آستامونی پادیشاهی هِنتَه مِردی شیوارَ کن اِشتَن زمینیکا چاکَه دونه پِشَندَشَه. 25ولی هَنگومی کن اَ مِردی وَزییَرِن خاویکا بینَه چَی غَنیم آمَه و گَندِمون دلَکا، هرزَ واش کَشتِشَه و شَه. 26وَقتی گندم کَو آبه و جومبورَ ژِشَه، هرزَواش نی اَیر آبه. 27وَزیَرِن، اِشتَن اَربابی وَر شینَه و واتشون: ”اَرباب مَگَم تِه چاکَه دونَه اِشتِه زمینیکا کَشتَر نی؟ پس اِم هرزَواش کِرَم جگا کا آمَه؟“ 28اَرباب جَوابیکا واتِش: اِم غَنیمی کارَ.“ وَزیَرِن اَیکا دَپَرسستین : ”بَپیرَ بشَم و هرزَواشون جَمع آکَرَم؟“ 29اَرباب واتِش: نِه! اَگَم هرزَ واشون جَمع آکَرَایمکان دارِ گندمی نی بَینه ریشه کا پِوجَه. 30بَرزَ هر دِ تا دورنوستِه موقِه یال آبون. اَموقه کا اَدورنون باتیمَه کن اَولیکا واشون جمع آکَرن دسته بکَرن تا بِسونِن، و چَی به دوملَه گَندِمون چمن اَنباریکا ذَخیرَ بِکَن.»

خَردَلَه دونَه مَثَل وخَمیرَمایهَ مَثل

31عیسی چوونرا دیَرَ مَثَلی وَردشه: «آستامونی پادیشاهی هنته خَردَلَه دونَه ایی شیوارَ کن کَسی اَی پِگَتشَه و اِشتَن زمینیکا کَشتِش. 32با اِمکن خردله دونه گردِ دونَه اونکا گِچ تَر، ولی وَقتی پِرمَه گردِ باغی کَشتَه چییونکا یال تَر آرَب، و داری آرَبن. اَنَ کن آستامونی پَرَندَاِن بومَنَه و چَی بَشو خالیکا لونه سِی آنَّکَرد.»

33چَی بَه دوملَه عیسی چَوونرا دیَیر مَثَلی وَردشَه، واتِش: «آستامونی پادیشاهی هنته خَمیرازیَه کن ژنی اَی پِرَگت و سه کنجه آردَ نَه یَندِ ژِشه تا خمیر عَشتَه.»

34عیسی گرد اِم گَفوون مَثَلینه جماعتیرا واتِشَه و بی مَثَل اَوون هیچ چیی ایی نِواتِش. 35اِنتَرَ آبَه تا اَ چیی ایی کن پَیغَمبرون گَوینَه واتَشونَه، اَنجوم ببو کن:

«اَز مَثالونَّه گَف بَژَمَه،

و هَر چیی کن دِنیا شِرووبِه کا نون آبَه بَه، باتیم.»

هَرزَواشی مَثَلی مَعنی

36چی بَه دومله عیسی جمعیتی آهَشتِشه وکَه دِلَرا شَه. اَموقه عیسی شاگردن چَی وَر آمینَه و واتِشون: « هرزَ واشون مَثَلی مَعنی چمَرا بواج.» 37عیسی چَوون جَوابیکا واتِش: «اَ کَسی کن زمینیکا چاکه دونَه بَکَشتی، اِینسانی زوعَه یَه. 38کَشت به زَمین، اِم دِنیا یَه؛ و چاکهَ دونَه خدا پادیشاهی خردَنِه اینَه.هرزَ واشِن، شِطونی خِردَنِه اینَه؛ 39و غَنیمی کن اَوون بَکَشتی، ابلیسَه. دورنوستِه موقه، اِم دِنیا آخیرَ؛ واَدورنِن، فرشتَه اِنینَه. 40هَتَه کن واشون گرد آنَّکرد وآرا کا بَسوتین، اِم دِنیا آخریکا نی اِنتَر آرَب. 41اِینسانی زوعَه اِشتَن فرشتَه اون رَونَه آرَکَرد و اَیِن، هر کَسی کن گناخ کردِ باعیث بَبی و گرد اَیِنی کن خدا قانونون پا بن بَنان، خدا پادشاهیکا تاک آنَّکَرد. 42و اَوون آتَشَه کورَ کا دَنَّفَند، جگایی کن بِرَمِستِه و گاز گازی سَر فِرچین دوعه بَبیَه. 43اَ زمانیکا صالحه آدَمِن اِشتَن دَدَ پادشاهیکا، آختاوی شیوار شَپَق بَژَنَه. هر کم چَی گوش دَرَرَست، دَرَسه.

نون آبَه گَنجی وبا ارزِشَ مرواریدی مَثَل

44« آستامونی پادیشاهی هنته نون آبَه گنجی شیوارَ زَمینی دلَکا کن شَخصی اَی پَیدا بَکَی، چَی به دومله هَنی اَی نون آرَکَردو خَشیکا بَشیه و اَچیی کن دارِ بَخرَتی و اَ زَمینی بَخریهَ.

45هن تَرَکه آستامونی پادیشاهی تاجری شیوارَ کن گرونَه مِرواریدی دومَله اَگردیَه. 46پس وقتی کن گِرونَه مِرواریدی پَیدا بَکَی، بَشیَه و اَچیی کن دار بَخرَتی و اَ مِرواریدی بَخِری.

مایَه گِری دومی مَثَل

47«هنته نی، آستامونی پادیشاهی دومی شیوارَ کن مایَه گِرِن اَی دَیرا دِلَکا وینَّفَند و همه‌ رَقم مای بَینَه بَگَتینه. 48هَنگومی کن دوم مای نَه پَتلمَه آبَه و اَی دَیرا کَناریرا دراکنِست. چَی بَه دوملَه بَنشتینَه و چاکه مایون چَرگَکا دَنَّکَرد، بَدَ و هیچَه مایِون فِر آنَّدا. 49اِم دِنیا آخَریکا نی اِنتَرَ بَبیَه. فرشتَه اِن بومَنَه و آوشَرون صالحَه آدَمونکا تاکَه بَکَنَه. 50واَوون آتَشَه کورَ کا دَنَّفَند، جگایی کن بِرَمِستِه و گاز گازی سَر فرچین دوعِه بَبیَه.»

51چَی بَه دومَله عیسی اَوونکا دَپرسِستَه: «گردِ اِم گَفونکا سَر آگِنینَه؟» شاگردن جواب داشونه: «ها!» 52عیسی اَیِنش واتَه: «پس، هر موعَلیم تورات، کن آستامونی پادیشاهی خونه آموج گَتَش ببو، هنته کَه صاحیبی شیوارَ کن اِشتَن خَزانه کا تازَ و کَنه چییون بِرِن بَرَورد.»

ناصِرَشهری آدَمون ایمان نِوَرن

53وَقتی عیسی اِم مَثالِنِش واتَه، اَجگا کا 54اِشتَن شَهریرا شَ و چَوون عیبادَت گا اونکا آدَمون آموج داشَه. آدَمِن گِرد تَعَجب اَکَرینَه، دَرَپَرسینَه: «اِم مِرد. اِنتَر حیکمت و مُعجیزَاون اَنجوم دوعِه زاکینی کِرَم جگا کا وَردَشَه؟ 55مَگَم اَ، اَ نَجاری زوعَه نیَه؟ مَگَم چَی نَنَه نوم مَریَم نیَه؟ و چَی برااِن یعقوب و یوسوف و شَمعون و یهودا نینَّه؟ 56مَگَم گردِ چَی خالا اِن چَمه دِلَکا زِندگی نینَّکَرد؟ پس اِم مِرد گِردِ اِم چییون کِرَم جگا کا وَردَشَه؟» 57پس عیسی گَفِن چَوون چَمیکا هیچ آمَه. ولی عیسی اَیِنِش واتَه: «پَیغمبَر غَیراز اِشتَن شَهر و اِشتَن کَه، هَمَه جِگا اونکا حورمت بَداشتییَه!» 58و اَجگا کا چَوون بی‌ایمانی خونه وِرَ موعجیزَ ایی نِکردشَه.

Currently Selected:

مَتّی 13: CTB

Highlight

Copy