مَتّی 14

تَعمید اَدَرَ یَحیا مَردِ

1اَ زمونه کا عیسی تَریف هیرودیسِ حاکمی گوش آرَستَه، 2و هیرودیس اِشتَن پاسَریِنِش واتَه: «اِم تَعمید اَدَرَ یَحیی یَه کن مَردِ بَه دوملَه زندَ آبَیَه و اِمی خاطِرَ کن اِم موعجیزَاون بَشایَه اَنجوم دوعِه.»

3اِمی خاطیر کن هیرودیس هیرودیا خونه کن چیمی بَه نَ چَی برا فیلیپُسی ژن بَه، یحیی گَتش به واَی دَبَستَش بَه و زیندانیکا دَرَفندَ بَه. 4اِمی خونه کن یحیی هیرودیس پادیشاه واتَش به: «حلال نیَه ته اِم ژِنینَه بَبی.» 5هیرودیس اَپیشبَه یحیی بکشِه، ولی مردومیکا اَتَرسیَه، اِمی خونه کن اَیِن قِبول دارینَه کن یحیی پَیغَمبَرَ.

6هیرودیسی جشنِ تَوَلودَ روجیکا، هیرودیا کِلَه مجلسی وَسَطیکا دوش کَردشَه و هیرودیسی دلی خَش آکَردِش، 7اَنَه کن هیرودیس قَسم هَردِشه هر چیی کِلَه اَپیشَه بَی بدَرِ. 8اَ کَله نی اِشتَن نَنَه گَفینَه واتشَه: «تَمعید اَدَرَ یحیی کَلَّه، هِم جگا کا مِجمَه ایی دلَکا بَمن بِدَ.» 9پادیشا بَرضخ آبهَ اَمّا اِشتَن قَسَمی خونِه و اِشتَن میمانون ایحترامی خونه دستور داشَه چَی خواستَه براووردَ ببو. 10پس هیرودیسی فِرمونینَه یحیی کَلّه زیندانی دلَکا ژِشونَه 11و یحیی کَلَّه مجمَه ایی دِلَه وَردشونه، و کله آداشون و اَ نی اَوِش اِشتَن نَنَه وَر بَردشَه. 12یَحیی شاگردِن آمینه وچَی مَیّتی بَردِشونَه و چال کَردِشون، چَی بَه دوملَه شینَه و عیساشون خبر دوعَه.

عیسی پِنج هَزار نَفری هَردَ چیی بَدای

13وَقتی عیسی اِمش دَرستَه، تاکَه لاتیکه ایکا دَنشتَه و اَجگا کا دورَ خَلوَتَه جگاییرا شَه. ولی مردوم باخبر آبین و اِشتَن شهرونکا پیادَ چَی دومله رَونَه بین. 14وَقتی عیسی لاتیکَکا ویرمَه، یالَه جَمعیَتی ویندِشَه و چَی دل چَوون حالیرا سیجیستَه و چَوون آزارییون شفا آداشَه.

15دیَرمازی نِزِک، شاگِردِن عیسی وَر آمینَه و واتشونَه: «اِم جگا دورَ پَرتَه جگااییَه و کا شَو آبِه. مَردومی بَینِن تا اَطرافی آوادیونرا بِوشون و اِشتَنرا هَردَ چیی بِخِرن.» 16ولی عیسی اَیِنِش واتَه: «نیازی نیَه مردوم بوشون. شِمَه اِشتَن اَوون هَردَ چی بدَرَ تا بَرِن.» 17شاگردِن واتِشونَ: « اِم جگا کا غَیراز پنج نون و دِ گِلَه مای دِ چیی نیمونَه.» 18عیسی واتِش: «اَوون چمن وَر بوعَرَ.» 19چَی بَه دوملَه مردومی دستورداشَه تا سوزَ اون سَریکا بنشن. اَموقه پِنج نون و دِ گِلَه مای پِگَتش و آستامونی دَیَشتشه وبَرَکت آداشَه. اِم کاری بَه دوملَه نونون پِزارنِستِشَه و شاگردون آداشَ و اَیِن نی مردومی آداشون. 20گرد هَردشون و سیر آبین و مایو و نونه خِردَ اونیکا کن مندَ بَه، دانزَ گِلَه پَتلمَه چَرگَه جَمع آکَردِشون. 21اَیِن کن هردَشون به‌، غَیراز ژِنِن و خردَنِن پِنج هَزار مِرد بین.

عیسی آوی سَریکا گَل بَژَی

22هَه موقِه عیسی اِشتَن شاگِردون واتِشَه تا هَه حالیکا کن اَ مَردومی مرخص بَکَی، اَیِن لاتیکَکا دَنشِن و چَی ناردَکَر دَیراچَه اَوَریرا بوشون. 23مردومی عَندِ به دوملَه، عیسی کورا شَه تا تاکَه دِوا بکَرِ. شَوآبَه و اَ اَجگا کا تاک بَه. 24اِم هنگومیکا، لاتیکه دَیرا کَناریکا خَیلی دور آبَه بَه و یاله موجون دِلَه ویلاخیستَه، اِمی خونه کن بَر عسکَه وا کایبَه آمِه. 25حِدودن ساعت سه شَو بَه و عیسی هَتَه کن آوی سَردِرِگَل اَژَنیَه چَوون طَرَف شَه. 26وَقتی شاگردِنْ عیساشون ویندَ کن کا آوی سَریکا گل ژِ، بَرک تَرسستینَه و واتِشون: «روحَه»، و تَرسیرا لَسه ژِشون. 27اَمّا عیسی جَخت اَیِنِش واتَه: «دِلی زِبق غَم بَرَ. اَزیمَه، مَترسه!»

28پِطروس واتش: «آقا اَگَم تِه ایشه بَمن دَستورآدَ تا آوی سَردِرِ اِشتِه وَربام.» 29عیسی واتِشَه: «بِه!» اَموقه پِطروس لاتیکه کا بِرِن آمَه وآوی سَردرِعیسی طَرَف آمَه. 30ولی وَقتی کن وا ویندِشَه، تَرسستَه و هَتَه کن آویکا کایبَه ویشِه لَسه اَژَنیَه: «آقا بَمن نیجات بِدَ!» 31عیسی جَخت اِشتَن بالی دراز آکردشه و اَی گَتشَه و واتِش: «اَی کم‌ایمان، چیرا چیمه میمه کَردِرَ؟ 32وَقتی اَیِن لاتیکه دِلَه دَشین، وا نشتَه. 33چی بَه دوملَه اَیِنی کن لاتیکه کا بینَه عیسیاشون پرستش کَردَ و واتشون: «واقییَن کن ته خدا زوعَه ایشه!»

عیسی جِنیسارِتیکا آزارییون شفا بَدای

34وَقتی اَیِن دَیراچَه اَوَریرا آرَستین، وِلَته جِنیسارِتییکا ویرمینَه. 35اَجگا آدَمِن وقتی عیسی آزنستِشون، کَسِنی گردِ اَ منطقه اونرا عَندشونه تاگِردِ آزاریون عیسی وَر بوعَرن. 36اَیِن عیسی کا خاشتو خاز اَکَرین کن فقط ایجازَ بدَرِ تا فقط چَی ردا گوشَه دَست آسا بکَن و هر کم دَست آسا اَکَریَه، شفا اَگِریَه.

Currently Selected:

مَتّی 14: CTB

Highlight

Copy