مَتّی 15

سِنَّتِن و حِکمِن

1چَی به دوملَه ایی کاولَه فَریسیون فرقه عالیمِن و توراتی موعَلیمِن اورشلیمی شهریکا عیسی وَرآمینه و واتِشون: 2«چیرا اِشتِه شاگِردِن ایسبیَه ریشون سِنَّتی پا بن بَنانَه و اِشتَن بالی غَذا هَردِ بَ نَ نینّشوشت!» 3عیسی جَوابیکا واتِش: «شمَه چیرا اِشتَن سِنَّتی غَم هَردِ خونِه، خدا حِکمی پا بن بَنارون؟ 4اِمی خونه کن خدا حِکم کَردَشه: ” اِشتَن دَدَ و نَنَه ایحترام بکَه “ و هَنی ”هَر‌کَم اِشتَن دَدَ یا نَنَه زَمون بدَرِ پی اَی بکشِن .“ 5ولی شمَه باتیرون اَگَم کَسی اِشتَن دَدَ یا نَنَه بواجِه هَر کُمَکی کن پی بَمنکا ویگِرَ خدا وقفَه،“ 6اِم گَفینه، دِ چَیرا واجب نیَه اِنتَرَکه اِشتَن دَدَ نَنَه ایحترام بکَرِ. اِنتَرَکِه شمه اِشتَن سِنَّتی غَم هَرد خونه خدا کلامی دَدار بَحیساب بوعَردیرون. 7اَی دِ سَرَ کَرچَنگِن! اِشعیای پَیغمبَر شِمَه خونِه چَنَه چاک پیشگویی کَردِش، اَموقه کن واتِشَه:

8«‌”اِم قام اِشتَن لِوونَه چمن حُرمَتی غَم بَردینَه،

اَمّا چَوون دِل منکا دورَ.

9اَیِن دَدار بَمن پَرَستش بَکَن،

اَیِن خدا عَوَض اینسانی حِکمی آموج دَرِن.

چِه چی آدَمی نِجِس آکَرِ

10چَی به دومله عیسی اَ جماعتی اِشتَن وَر خِلِه کَردِشَه و واتِش: «گوش آدَرَ و بِفَهمَه. 11اَ چیی کن اینسان بَردییَه بَی جیفینین آنییَکَرد، بَلکَم اَچیی کن چَی گَویکا بِرِن بومَی هَیَه کن آدَمی جیفینین بَکَی.» 12اَموقه شاگردِن عیسی وَر آمینَه و واتشون: «بَموستیش کن اِشتِه اِم گَف فَریسیون فرقه عالیمون مَچَه گِنَه یَه؟» 13عیسی جواب داشه: «هر بِنَه ایی کن چمن آستامونیَه دَدَ کَشتَش مبو ریشَه‌ کن آرَبن. 14اَوون اِشتَن حالیکا آهَرزَ. اَیِن کورَ راهنَما اینَه. هر موقه ناوینایی دییَرَ ناویناای چَلیکی دَراکِنِه، هر دِ چالیکا وینَّگنست.» 15پِطروس عیساش واتَه: «اِم مَثَلی مَعنی چَمرا بواج.» 16عیسی جواب داشَه: «شمَه ایسَه نی سَر آنینَگِنِست؟ 17مَگم نینَّموست کن هَر چیی گَویکا دِلَه درَش لَوَرا بَشیَه و چَی بَه دوملَه دفع بَبی؟ 18ولی اَچیی کن گَویکا بِرِن بومَی، دلیکا سرچشمَه بَگَتیَه، و اِمه اَچیی کن آدَمی جیفینین آکَرِ. 19چون دلیکارَ کن، پَلیدَ فِکرِن، آدَم کِشتِه، زینا، بی‌ عِفَتی، پِتارستِه، دِروعَه شهادت و توهمَت سرچشمَه بَگَتی. 20امِنینهَ کن آدَمی جیفینین آنَّکَرد، نِه غذا هَردِ اَنَشورَ بالینه!»

کَنعانیَه ژِنی ایمان

21عیسی اَجگا کا بِرِن بَرمَه ومنطقه اِ صور و صیدونیرا شَه. 22ایی روج کَنعانیَه ژِنی، اَجگا آدَمونکا، چِی وَر آمَه و جکّله نَه واتِش: «اَی آقا، داوودپادیشا زوعَه، بَمن رحم اَکَن! چمن کله بَرک پَریانی آبَیَه.» 23ولی عیسی هیچ جوابی آنِداشَه، تا اِمکن شاگردِن نَ آمینه وبَیکا خاشتو خاز کَردشونَه واتشون: «اَ ژِنی راهی بِکَه، اِمی خونه کن جِکَّلَنهَ چَمه دوملَه کا آمِه.» 24عیسی جَوابیکا واتِش: «اَزتاکَ قام بَنی اسرائیلی گین آبه پَسون خونه رَونَه آبَه ایمَه.» 25ولی اَ ژن نَرا آمَه و چَی نَ کا زنگ ژشهَ و واتِش: «آقا مِرا آرَس!» 26عیسی جَوابیکا واتِش: «خِردَنون نونی گَتِه و عِسبَه اون نَکا بَرَفندِ درِست نیَه.» 27ولی ژن واتِشَه: «ها، آقا، ولی عِسبَه اِن نی نونَه خِردَاونیکا کن چَوون صاحیبی سِفرَسَریکا بَرَگنِست بَردینه!» 28اَموقه عیسی واتِش: «اَی ژن، اِشتِه ایمان یالَه! اِشتِه خاشتو خاز بَرآووردَ ببو!» جَخت چَی کلَه شفا گَتِشَه.

عیسی وِر کسون شفا آدَرِ

29عیسی اَجگا کا رَونَه آبه و دیراچۀ جلیلی وَریکا دَیوَردَ، چَی بَه دوملَه کویی کا پِشَه و اَجگا کا نشته. 30یالَه جمعیتی چَی وَرآمینَه و اِشتَنَه شِلِن و ناوینااِن و فَلَجن و گِنگِن و دییَرَ آزاریون وَردشون، و عیسی لنگون ناریکا آناشونَه و اَ اَیِنِش شفا داشَه. 31مردوم وَقتی ویندِشون کن گِنگِن گَف بَژَن، شِلِن سَق آرَبینَه، فَلَجِن گَل بَژَنه و ناوینااِن کان ویندِ، تَعَجُب کَردِشونَه، و اسرائیلی خدا، ستایش کَردِشون.

32عیسی اِشتَن شاگردون خِلِه کَردِشَه و واتِش: «چمن دل اِم مَردمی حالیرا بَسیجیستی اِمی خونه کن ایسَه سِه روجَه کن اَیِن بَمِنَه دَرِ اینَه و چیی ایی هَردِراشون نیَه. نیمَپیست اَوون اَنشتا بَینِم، ایمکان دارِ را دِلَکا نیفلَه آبون.» 33چَی شاگردن واتِشونَه: «اِم وَیاوونی دِلَه کِرَم جِگاکا بَشامون اِم جَمعیَتی سیر آکَردِ و چَوون اندازَ نون آمادَ آکَرم؟» 34عیسی دَپرسستَه: «چند گِلَه نون دارَ؟» اَیِن واتِشون: «هف نون و چنگلَه گچَه مای.» 35عیسی آدَمون دستورداشَه زَمینی سَردِرِ بنشن. 36اَموقه هف گِلَه نون و چَنگِلَه مای گَتشه و شِکر کَردِ بَه دوملَه، اَیِنِش پِزارنِستِشَه و اِشتَن شاگردون آداشَه و اَیِن نی اَ جماعتی آداشونَه. 37گرد هَردشون و سیر آبین و شاگردن هف گِلَه پَتلَمَه چَرگَه ، نون و مایَه خرده‌ اونکا گرد آکَردشون. 38اَ کسِنی کن هَردشون بَه، غیراز ژِنن و خردَنِن، چار هَزار مِرد بینَه. 39مردومی عَندِ بَه دوملَه، عیسی لاتیکه سردِرِدَنشتَه و منطقه مَجَدانی آوادیرا شَه.

Currently Selected:

مَتّی 15: CTB

Highlight

Copy