مَتّی 12

موقَدَسَه شَنبه صاحیب

1اَروجونکا، عیسی موقَدَسَه شَنبَه روجیکا گندمَه باغیکا دَیوَری. چَی شاگردِن وِشنَگی خونه گَندمَ جومبورَاون لَچی اَچینینَه و اوون هَرین. 2فَریسیون فرقَه عالیمِن وَقتی اِمی بَویندین عیساشون واتَه: «دَیَس، اِشتِه شاگردِن کاری بَکَنه کن موقدسَه شَنبَه روجیکا دِرِست نییَه.» 3عیسی جواب داشه: «مَگَم خَندَرون نی کن اَموقه کن داوود پادیشا اَیِنی کن بَینَه دَر بین اَنشتا بینَه داوود چِش کَردَ؟ 4چنتَه داوود خدا کَه دِلَه دَرمَه و اَ موقدسَه نونی هَردشَه و اِشتَن یارون نی آداشَه، هر چَنَه اَ نونی هَردِ، اَیرا و چَی یارِونرا جایز نِبه، بَلکَم اَ نونی هردِ تاکَه معبدی کاهینونرا جایز بَه. 5یا مَگَم توراتیکا خَندَرون نی کن موقَدسَه شَنبَه روجونکا، کاهینِن معبدیکا، موقَدسَه شنبَه روجی حُرمتی غَم نینَّرد و با اِم کن گرد اِم کارون بَکَنه، بی‌گناخین؟ 6بَه شمَه باتیمَه کَسی اِم جگا کارَ کن معبدیکا یال تَر! 7اَگَم شمَه اِم کلامی مَعنی بفَهمَه کن ”اَز رَحمت بَپیمه نِه قِربونی،“ دِ بیگناخون محکوم نَکَریرون. 8اِمی خاطر کن اینسانی زوعَه موقَدسَه شَنبَه صاحیبَه.»

شِلَه مِردی شفا دوعِه

9چَی بَه دوملَه عیسی اَ جگا کا شَه و یهودیون عیبادَتگا دِلَه دَرمَه. 10عیبادَتگا کا مِردی بَه کن چَی ایله بال لَم آبَه بَه. اَیِنی کن اَجِگاکا مند بین اِمی خونه کن عیسی موتَّهم کَردِرا رِقی بِدارن، بَیکا دَپَرسِستین: « شفا دوعه موقَدسَه شَنبَه روجیکا جایزَ؟» 11عیسی اَیِنِش واتَه: «اَگَم ایله شِمَکا پَسی بدارِ و اَ پس موقدسَه شَنبَه روج، چالیکا ویرَگنه، اَی نینَّگَت و چالیکا بِرِن بَنینّوَرد؟ 12ایسَه، اینسان چَنه پَسیکا باارزشترَ! پس چاکی کردِ موقدسَه شَنبَه روجیکا جایزَ.» 13چَی بَه دوملَه عیسی شِلَه مِردیش واتَه: «اِشتِه بالی دراز اَکَن!» اَ اِشتَن بالی دراز آکردش و چَی اَ بال، دییَربالی شیوار سی آبه. 14ولی فَریسین بِرِن بَرشینَه و یَندِنه گَفه ژَنه اَکَرینَه کن چِنتَرَ عیسی نیفیت آکَن.

پاسَریی کن خدا بَی اینتِخاب کَردِشَه

15عیسی کن اِمیکا سَر آگِنَه بَه، اَجگا کا شَه. خَیلیِن عیسی دومله شینَه و اَ گردِ اَیِنِش شفا داشَه. 16و اَیِنِش قدغن کَردَ تا دییَر آدَمون وَربَی تَریف نِدَرن. 17اِنتَرَ آبَه تا اَ چیی ایی کن اِشعیای پَیبغَمبَری واسیطَنه واتِه بَیه اَنجوم ببو کن:

18«اِمَه چمن پاسَری کن اَز بَی اِینتخاب کَردمه،

چمن خاجَتی کن چمن جان اَیکا خَشَه.

اَز اِشتَن روح چَی سَریکا آمَنا

و اَ عیدالَتی قامونرا اییلام بکَیَه.

19نِه ژِ ژِ بَکَی و نَه جِکَّلَه

و کَسی چَی سَسی کوچه‌ اونکا دَنیَرَست.

20ترَک پِگَتَه لَلَ نیَچاکنست

و نیم سیجَه پِلتَه دَنیَکِشت،

تا عیدالتی پیروز آکَرِ.

21چَی نوم گردِ قامونرا اومید بَبیَه.»

خدا موقدَسه روح کِفر واتهِ

22چَی به دوملَه ایلَه پَریانیَه مِردی کن هِم ناوینا بَه و گِنگ، عیسی وَر وَردشونَه و عیسی بَی شفا داشَه، ایی جوری کن اَ مِرد هِم اَشایَه گَف بژَنِه و هِم ویندِ. 23جماعت گرد تُعَجُب کَردِشونَه و واتِشون: «بَبی اِم مِرد هَه وَعدَ آدوعَه مسیح ببو کن پی داوود پادیشا اودومیکا با؟» 24ولی وَقتی فَریسیون فرقه عالیمِن اِمی دَرَستِشون واتِشون: « اِم مرد پَریانون رَئیس، بِعَلزَبولی کاریَرینَه، پَریانون بِرِن بَرَکرد!» 25عیسی چَوون فکریکا سَر آگِنه اَیِنِش واتَه: «هر مملکَتیکا کن اِشتَن زِرَبَرا تقسیم ببو، نیفیت آرَبن و هر شهر یا کَه ایی کن اِشتَن زِرَبَرا تقسیم ببو، پابرجا نیَمَند. 26اَگَم شیطون، شیطونی بِرِن بَرکَرِ، اِشتَن زِرَبَرا دِدَستَگی دَرَفندَشَه؛ پس چِنته چَی پادیشاهی پابرجا بَمَندیَه؟ 27و اَگَم اَز بِعلزِبولی کاریَرینَه پَریانی بِرِن بَمَکَرد، شمَه شاگردِن چیکی کاریَری نه اَوون بِرِن بَنَّکرد؟ پس شِمَه شاگردن شمَه سَردِرِ دیوون بَکَنَه. 28اَمّا اَگَم اَز خدا روح کاریَرینَه پَریانی بِرِن بَمَکَرد، یقین اَزونه کن خدا پادیشاهی شمَه وَر آمَیَه. 29یا چِنتَه کَسی بَشای قودورَ مِردی کَه دِله دَرا و چَی اَموالی پِتارِ، مَگَم امکن اَولیکا اَمِردی بالون و لِنگون دَبَستِه. چَی بَه دوملَه حَییقتا بَشایَ چَی کَه پِتارِستِه. 30هر کم بَمنَه نیَه، چمن زِرَبَرایَه، و هر کم بَمنَه جم آنِکَر، ولاخ بَکی. 31پس بَه شمَه باتیمَه، هر مودیل گناخ و کفری کن اینسان اَنجوم بِدَر بَبخشسته بَبی، ولی اَگَم خدا روح کفر بواجِه بَخشیدَ آنیَبِن. 32هَر کم گَفی اینسانی زوعَه زِرَبَرا بواجِه، بَخشِسته بَبی، ولی هر کم خدا موقَدَسَه روح زِرَبَرا کفر بواجه نه اِم زَمونَکا و نه آینده دِنیا کا، بَخشیدَ آنیَبِن.

دار و چَیی میوَه

33«اَگَم چاکَه میوَه بَپیرونَه، شمَه دار پی چاک ببو، اِمی خونه کن بَدَ دار بَدَ میوَه آرَدا. داری چَی میوه‌کا بَشارون آنَزنستِه. 34ای آوشَرِن، شمه کن آوشَریرون، چِنتَر بَشارون چاکَه گَف بِواجَه؟ اِمی خونه کن زون اَچیی ایکا گَف بَژَیَه کن دل اَیکا پَتلَمَیَه. 35چاکَه آدَم، اِشتَن دِلی چاکَه خَزانَه کا چاکی بِرِن بَرَوَرد، بَدَ آدَم اِشتَن دِلی بَدَ خَزانَه کا بَدی. 36بَه شمَه باتیمَه کن مردم هرهیچه گَفی کن زونی سَر بوعَرن، دیوون کَردِ روجیکا حیساب پس آنَّدا. 37اِمی خونه کن اِشتَن گَفینَه تبرئه بَبینه و اِشتَن گَفینَه محکوم بَبینَ.»

یونوسی نِشونَه

38اَموقه چن نفَری توراتی موعَلیمِن و فَریسیون فرقه عالیمونکا عیساشون واتَه: «اِستا اَپیمونَه نِشونَه ایی بَتکا بِوینَم.» 39ولی عیسی جواب داشه: «اِم آوشرو و زیناکارَ اودوم نِشونَه ایی بَپیشون! ولی نِشونَه ایی بِه اَیِن آدوعِه نیَب، جوز یونوس پَیغمبَری نِشونَه. 40چون هَته کن یونوس سه شَوانه روج یاله مای لَوَ کا بَه، اِینسانی زوعَه نی سِه شَوانه روج زَمینی دَلکا بَمندیَه. 41شهر نینوا آدَمِن دیوون کَردِ روجیکا اِم اودومی آدَمونَّه راست آنَّب و اَوون مَحکوم بَکَنهَ. اِمی خونه کن اَیِن یونوسی موعیظۀ خونِه توبَه کَردشون و ایسَه کن کَسی یونوسیکا یال تَر اِم جگا کارَ. 42ملکۀ جنوب دیوون کَردِ روجیکا اِم اودومی آدَمونَّه راست آرَب و اَوون مَحکوم بَکَیَه، اِمی خونه کن اَ، دِنیا اَ وَریکا آمَه تا سلیمونی حیکمتی دَرَسهِ و ایسَه دَیسَه کن کَسی سلیمونیکا یال تَر اِم جگا کارَ.

43«هَنگومی کن شَیطونیَه روح کَسی کا بِرِن بومَی، خِشکو بی آوَ جِگا اونرا بَشیَه تا ایستراحَتیرا جِگایی پَیدا بکَرِ، اَمّا نیَویند. 44پس اِشتَنَه باتیَه،” اِشتَن هَه کَرا کن اَ جِگاکا آمَه ایمَه آمَگَردِست.“ اَمّا وَقتی اَجگارا آرَستَه و اَ کَه تَی و گِزِ ژَ وتَمیز بَویندی، 45اَموقه، اَ بَشیه و هفت گِلَه روح اِشتَنکا آوشَرتَر بوعَردی و گرد دَله دَنَش و اَجگا کا بَمَندینَه. آخیر بَسَر، اَ آدَمی آخیر چَی اَوَّله حالیکا بَدتَر بَبیَه. اِم آوشَرَ اودومی آخیر نی اِنتَرَ آرَبن.»

عیسی نَنَه و چَی برا اِن

46عیسی هَنوزَنی مردمینه گَف اَژَنیَه کن، چَی نَنه و برااِن بِرِنیکا پا مَندبین و اَپیشون بهَ بَینه گَفه بِژَنِن. 47پس ایی نفر عیساش خبر دوعَه کن: «اِشتِه نَنَه و برا اِن بِرنیکا پامَندینهَ و اَپیشونَه بَتنَه گَف بِژَنِن.» 48عیسی اَ کَسی کن اِم گَفی ژِشَه واتش: «چمن نَنَه کییَه و چمن برااِن کییِنین؟» 49وچَی به دوملَه اِشتَن بالینَه شاگردون طَرَف ایشا کَردِشَه و واتِش: «اِمِنین چمن نَنَه و برا اِن! 50اِمی خونه کن هر کم چمن آستامونیَه دَدَ ایرادَ اَنجوم بدَرِ، چمن برا و خالا و نَنه یَه.»

Currently Selected:

مَتّی 12: CTB

Highlight

Copy