رَسولون اَعمال 5

حَنانیا و سَفیرَه

1ولی ایی نَفَر حَنانیا نوم، اِشتَن ژِنینَه کن چَی نوم سَفیرَ بَه، تیکَه زمینیشون خِرَتَه، 2حنانیا تیکَلی ایی اَ زَمینی پولیکا، نون آکَردِشه و چَی ژِن نی خَبر داری و پولی بَقیَه وَردِش، و رَسولون نَکا آناشَه. 3ولی پِطروس بَش واتَه: «حَنانیا، چیرا هَشتِر شَیطون اِشتِه دِلی اِنتَرَ پَتلَمَه آکَرِ کن خدا موقدسَه روح دِروو بِواجی واَ زَمینی پولیکا تلَکَه ایی اِشتَرا غَم بَری؟ 4مَگَم چَی خِرَتِه بَه نَ اِشتِه شِن نِبَه؟ مَگم خِرَتِه بَه دوملَه نی چَی پول اِشتِه اِختیاریکا نِبَه؟ چِه چیی باعیث بَه کن تِه اِنتَرَ فکری بِکَری؟ تِه، نِه کم اینسانی، بَسکَم خدا دِرور دوعَه!»

5وَقتی حَنانیا اِم گَفِنِش درَسته، زَمینی سَر بَرگِنِستَه و جَخت مَردَ! گِردِ اَیِنی کن اِمِشون درَسته بَرک تَرسِستین. 6اَموقه جَوانِن نَ آمینَه و اَی کَفَنیکا پِپِشتِشون و بِرِن بَردِشونَه، چال کَردِشون.

7سه ساعَتی به دوملَه، حنانیا ژِن کن اِم ایتفاقیکا خَبر نِداری، دِلَه دَرمَه. 8پِطروس اَیکا دَپَرسِستَه: «بَمن بَواج کن زَمینی هِم قیمَتِرون خِرَته؟»

سَفیره جواب آداشَه: «ها، هِم قیمتینه.»

9پِطروس بَش واتَه: «چیرا یَندِنَه هَمدَست آبیرون تا خداوندی روح وَرداوَرد بکَرَ؟ اَیِنی کن اِشتِه شو چال کَردِشونَه ایسَه بَرَنگا سَریکاینَه و بَتِه نی بِرِن بَبَنَه.»

10جَخت، سَفیرَ نی پِطروسی لِنگون نَکا گِنِستَه و اَ نی مَردَ. وقتی جَوانِن دِلَه دَرمین، ویندِشونَه کن سَفیرَ نی مَردَیَه. پس اَشون نی بِرنیرا بردَ، و چَی شو وَریکا چال کَردِشون. 11اَموقَه گِردِ کلیسا آدَمِن و اَیِنی کن اِمِشون درَسته بَه، یالَه تَرسی اَوون گَتِشَه.

رسولون نشونَه اِن موعجیزَاِن

12رسولِن اوزون وِرَ نِشونَه اِن و موعجیزَ اِن مردومی دِلَکا اَیر آرَکَرینه و ایمان دارِن گِرد یَک دِل سِلِیمونی اِیوانیکا جَم آرَبینَه. 13اَمّا دییَر آدَمونکا کَسی جورئَت نِکَری اَوون نِزِک آبو، هر چَنَه آدَمِن گِرد، اَوون وِرَ ایحترام اَکَرین. 14وِرَ آدَمِنی ژِنِن و مِردونکا خداوندی ایمان اَوَرینَه و چَوون جَمعیکا ایضاف آرَبینَه، 15اَدَ کن حتی آزاریون شَهری مَیدونون را اَوَرینَه و اَوون جیکَرِن و تَختون سَریکا اَخِسامونین تا وَقتی کن پِطروس اَ جِگاکا دَرَیوَرد، دست کم چَی سا بَعضیون سَریکا بَرگِنِه و اَیِن شفا بیگِن. 16مَردوم نی کاولَه کاولَه اورشَلیمی اَطرافی شَهرونکا آین و آزاریون و اَیِنی کن پَلیدَ روحونکا ویلاخیستَه بین اَوَرینَه، و گِرد شفا اَگِرین.

رَسولِن زیندانی بین و چَی به دوملَه رَخِستین

17ولی یالَه کاهِن و گِردِ اَیِنی کن بَینَه دَرِ بین یعنی صَدوقیون فِرقَه کن زِرَ خونِه دَست بَه کار آبین 18و رَسولِنِشون گتَه، و اَ زیندانیکا کن هَمَه مودیل آدَم چَی دلَکا بَه دَرَفَندِشون. 19ولی شَویرا، خداوندی ایلَه فرشتَه زیندانی بَرَنگااون آج آکَردِشَه و اَیِنش بِرِن بَروردَ 20و واتِش: «بِشَه و مَعبَدیکا پا بومونَه و اِم زندَگی بخشَه پَیغومی کامیل مَردومیرا بِواجَه.»

21پس سوکَه خون هَتَه کن اَیِنِشون واتَه بَه مَعبَدی دِلَه دَرمینَه و دَمَندین مردومی آموج دوعِه.

وَقتی یالَه کاهِن و اَیِنی کن بَینَه دَرِ بین آمینَه، شورا آدَمِن گِرد و یهودی گردِ ایسبیَه ریشِنِشون خِلِه کَردَ و چن نفری عَندِشونَه تا رَسولون زیندانیکا بوعَرِن. 22ولی وَقتی مَامورِن آمینَه رَسولِنِشون زیندانیکا نِویندَ. پس اَیِن آگَردِستین و خَبَرِشون بردَ کن: 23«اَمه زیندانی بَرَنگا اِنِمون ویندَ کن سَخت اَچَر بین و نیگَبانِن نی بَرَنگا اون نَ کا پا مَند بین. ولی وَقتی بَرَنگا اِنِمون آج آکَردَ، هیچ کَسی زیندانیکا پَیدا نِکَردِمون.» 24مَعبَدی نیگَبانون فَرماندَ و سَران کاهینِن اِم خَبَری دَرَستِه خونِه، حَیرون مَندین، وفکر آشین کن «اِم کاری عاقیبَت چِه بَبیَه؟»

25اِم هَنگومیکا، ایی نفر آمَه و اَیِنِش خبر وردَ کن: «دیسَه اَیِنی کن شمَه زیندانیکا دَرَفندرون بَه، ایسَه مَعبَدیکا پا مَندینَه و مَردومی آموج دَرِن.» 26چَی به دوملَه مَعبَدی نیگَبانون فَرماندَ، مَامورونَّه شینَه و رَسولِنِشون وردَ، ولی نِه زورینَه، اِمی خونه کن اَتَرسینَه مردوم اَوون سِنگ سار بِکَن.

27وَقتی رَسولِنِشون وَردَ، اَوون شورا نَ کا پا داشتِشون. اَموقه یالَه کاهِن اَوونکا دَپَرسِستَه و واتش: 28«اَمه بَشِمَه سخت غدغَنِمون کردَ بَه کن دِ اِم نومینَه آموج نِدَرَ؟ اِم حالینَه شِمَه شهر اورشَلیمی، اِشتَن آموجینَه پَتلَمَه آکَردَرون و اَپیرونَه اَ مِردی خونی، چَمَه مِل دَرَفَنَه.»

29ولی پِطروس و دییَرَ رَسولِن جوابِشون دوعَه: «اَمه پی خدا کا ایطاعَت بکرَم نِه اِمکن آدَمونکا. 30چَمَه بابااون خدا، عیساش مردَاونکا زندَ آکَردِش، هَه عیسی کن شِمَه بَی صَلیبی سَردِرِ جیبَستِرون، و کِشتِرون، 31و خدا اَش اِشتَن راستَه بالی وَریرا کَفا بَردِش، و بَی رهبر و نیجات اَدَر آکَردِشَه و یهودی آدَمون توبَه کردِرا و چَوون گِناخون بَخشِستِرا فِرصَت داشَه. 32و اَمه اِم چیون شاهیدیمونَه، هَتَه کن خدا موقَدسَه روح نی شاهیدَ، هه روحی کن خدا، اَیِنیرا کن بَیکا ایطاعَت بَکنَه عَطا کَردَشَه.»

33وَقتی شورا آدَمِن اِم گَفِنِشون درَستَه اَدَ آسرَنگِستین کن اَپیشون بَه اَوون بِکِشِن. 34ولی فَریسیون فِرقَه عالیمونکا ایی نفر کن چَی نوم گامالائیل بَه و و شَریعَتی معلیم بَه و مردوم گِرد بَی ایحترام اَکَرین، مَجلِسیکا راست آمَندَ و فِرمون آداشَه رَسولون ایی لَحظَه بِرِنیرا بِبَن. 35چَی به دوملَه اَیِنی کن اَجِگاکا مند بین واتِش: «یهودییِن، هواسِرون ببو کن اَپیرونَه اِم آدَمونَّه چِبکَرَ. 36اِمی خونه کن چیمی بَه نَه، ایلَه مِرد کن چَی نوم تِئوداس بَه، پِبَه و ایدعا اَکَریَه اِشتَنرا کَسیَه، و حِدود چار صَد نَفر نی اِشتَن دووریکا جَم آکَردِش. ولی اَشون کِشتَه و چَی پِیرووِن نی گِرد نیفلَه آبین. 37چَی بَه دوملَه، یَهودای جَلیلی، سَرشُماری زَمانیکا شورِش کردَ و ایی کاولَه ایی نی اِشتَن دوملَه دَراکِنیشَه. ولی اَ نی نیفیت آبَه و چَی پیرووِن نی وِلاخ آبین. 38پس اِم مَسئله خونه را نی بَه شِمَه باتیمَه کن اِم آدَمون وَر آدَرَ و اَوون اِشتَن حالیکا آهَرزَ. چون اَگَم چَوون قَصد و نییَت اینسانیکا ببو، جِگا ایرا آنییَرَست. 39اَمّا اَگَم خدا کا ببو، شِمَه نینَّشا چَوون نَه بیگِرَ، اِمی خونه کن اِنتَرَکِه خدا نَه بَجَنگِستیرون!»

40پس اَیِن گامائیلی نَصیحتِشون گوش آدوعَه و رَسولِنِشون خِله کردَ، اَیِنِشون شَلاغ ژَ و قدغَن کَردِشون کن دِ عیسی نومی خونه گَفی نِژَنِن، اَموقه رَسولون ایجازَ آداشونَه بِشون.

41پس رَسولِن خَشینَه شورا آدَمون حِضوریکا بِرِن شینَه، اِمی خونه کن لایق آبینَه کن عیسی نومی خونه بی حورمتی بوینن. 42و اَیِن هر روج چِه معبدیکا و چِه کَه اون دلَکا، اِم آموج و خشَه خبَریکا کن وعدَ آدوعَه مسیح هِم عیسی اَ، دَست پِنِگَتِشون.

Currently Selected:

رَسولون اَعمال 5: CTB

Highlight

Copy