رَسولون اَعمال 6

هَف نفر خیدمت کردِرا اینتخاب آنَّب

1اَ روجونکا کن شاگِردِن کایبینَه ایضاف آبِه، یَهودیِنی کن یونانی گَف اَژَنینَه، یَهودیونیکا کن چَوون زبان عِبرانی بَه گِلَی کَردِشون، کن چَوون ویوَ ژِنِن اِشتَن روزانَه غَذا رسَتی دِرِست آنینَّدا. 2اَ دانزَ رَسول، شَاگِردون گَردی خِلَه کَردِشون و واتِشون: «درِست نیَه کن اَمه مردومی غذا آدوعِه را، خدا کَلامی موعیظَه کردِ، آهرزَم. 3پس بِرااِن، اِشتَن دِلَکا هَف نَفرَی کن خوش نامین و خدا روح و حیکمَتیکا پَتلَمَه بِبون اینتخاب بکَرَ تا اَوون اِم کاریرا بِنَرَم. 4ولی اَمه گردِ اِشتَن وقتی دِوا کردِرا و خدا کلامی خیدمَتیرا بَنامون.»

5رسولون گَف گِردیرا چاک آمَه. اَیِن استیفانِشون کن مِردی پورایمان و خدا موقدسَه روح کا پَتلَمَه بَه اینتخاب کردِشون و هنتَرَکه فیلیپُس، پروخُرُس، نیکانُور، تیمون، پارمِناس و نیکولائوسینَه کن اَنطاکیَه کا یَهودی آبَه بَه، اینتخابِشون کَردَ. 6اِم مِردون رَسولون وَر بَردِشونَه و رَسولِن دِوا کَردِشون و چَوون سَر بال آناشون و اَوون گردی، اِم خیدمتی سَردِرِ آناشون.

7پس خدا کَلام هَمه جِگاکا پخش آرَبیَه و شاگِردون تعداد اورشَلیمیکا خَیلی ویشتَر آبَه و یالَه کاولَه ایی یهودی کاهینونکا نی ایمان وردشون.

استیفانی ویلاخیستِه

8استیفان فیض و زِبقیکا پَتلَمه بَه و یالَه مُعجیزَ اون و نِشونَه اِنی مردومی دِلَکا اَیر آرَکَریَه. 9چَی به دوملَه چَن نَفر کن ایلَه عیبادَتگاهی شِن بینَه و چَی نوم آزاد آبَه اون عیبادَتگا معروف بَه، استیفانینَه بحث اَکَرینَه. اَیِن قیرَوانی یهودیونکا و اسکندَریَه و کیلیکیَه و آسیا آدَمونکا بین. 10ولی اَیِن نَشاینَه حیکَمت و خدا روح ناریکا کن استیفان چَی واسیطنَه گَف اَژَنیَه، مقاوِمت کَردِ. 11پس اَیِن نونَکِه چَن نَفَریشون دیم پِنوعَه تا بِواجِن: «اَمه دَرَستَمونَه کن استیفان بَه موسی اِ پیغمبر و خدا، کفر باتی.»

12اَیِن مردوم و ایسبیَه ریشون و توراتی موعلیمِنِشون استیفانی زِرَبَرا جیکو جیکو ژِشون، و اَیِن نی استیفانی سَردِرِ ویبین و اَی گَتِشونَ و شورا وَر بَردِشون. 13اَیِن چَن گِلَه دِروعَه شاهید نی وَردِشونَه، کن اَواجینَه: «اِم مِرد، یَژَن اِم موقدسَه جِگا و شَریعَتی زِرَبَرا گَف بَژَی و اِم کاریکا دست پِنییَگَت. 14اِمی خونه کن اَمه اِشتَن دَرَستِمون کن اَواجیَه اِم عیسای ناصِری، اِم جِگا ویراوِنِست و رَسمِنی کن موسی اَمه آداشَه، عَوَض بَکَی.» 15اِم هَنگومیکا، گِردِ اَیِنی کن شورا کا مَند بین، استیفانیکا چَم دَشتِشونَه و ویندِشون کن چَی صَفَت هِنَته ایلَه فرشتَه صَفَتی شیوارَ.

Currently Selected:

رَسولون اَعمال 6: CTB

Highlight

Copy