رَسولون اَعمال 4

پِطروس و یوحنا، یهودیون شورا نَکا

1پِطروس و یوحنا هَنوزَنی مَردومینَه گَف اَژَنینَه کن کاهینِن و مَعبَدی نیگَبانون فَرماندَ و صَدوقیون فرقه عالیمِن، آرَستین. 2اَیِن اِمیکا کن رَسولِن مَردومی آموج اَدَرین و اییلام اَکَرین کن عیسی دلَکا، مَردَاونکا زندَ آبِه دَرِ اَ، بَرک آسرَنگِستَه بینَه. 3پس اَیِنِشون گَتَه و اِمی خونه کن آختاو ویگِن بَه، اَیِنِشون تا آیندَ روج زیندانیکا غَم هَردِشون. 4ولی خَیلی اَوونکا کن اَ کَلامِشون دَرَسته بَه، ایمان وَردِشون و مِردون تیعداد حِدودَن پِنج هَزار نَفَر بین.

5سَو سَه، قامی یالَه آدَمِن و ایسبیَه ریشِن و توراتی مُعلیمِن شهر اورشَلیمیکا یندِنَه گِرد آبین. 6اِم مَجلِسیکا، یالَه کاهِن حَنّا و قیافا و یوحنا و اِسکندر و گردِ یالَه کاهینی خانوادَ مَند بین. 7اَیِن پِطروس و یوحناشون وَصَطیکا پا داشتَه، و اَوونکا دَپَرسِستین: «چِه اینجار و نومینَه اِم کاری کردَرون؟

8چَی بَه دوملَه پِطروس خدا موقدسَه روح کا پَتلَمَه آبَه، چَوون جوابیکا واتِش: «اَی قامی یالَه آدَمِن و ایسبیَه ریشِن، 9اَگَم اُمروج، شِلَه مِردیرا چاکی کَردِ خونِه اَمَکا باز خواس بَکَرون، و دَپَرسَه کن اَ چِنتَرَ شَفاش گتَیَه، 10پس گِردِ شِمَه و گِردِ یهودی آدَمِن، بِزنَه کن عیسای مسیح ناصِری نومینَه یَه کن اِم مِرد شِمَه نَکا سَلامت پامَندَ، هَه کَسی نومینَه کن شِمَه بَی صَلیبی سَردِرِ جیبَستِرون، ولی خدا بَی مَردَاونکا زندَ آکَردِش. 11هِم عیسی، هَه سِه اَ کن شِمَه اِستا اِن اَشون رَد کَردَ و ایسَه ساختمانی اَصلیه سِه آبَیَه. 12غَیراَز اِم، هِچ کَسی دِلَکا نیجات نیَه، اِمی خونِه کن آستامونی بنیکا دییَرَ نومی آدَمِنِشون آدوعَه نیَه تا بَینَه نیجاتی ویگِرَم.»

13وَقتی اَیِن پِطروس و یوحنا شَهامتی ویندِشونَه و سَر آگِنینَه کن بیسواد و عادیَه آدَمین، حَیرون آبین و فَهمِستِشون کن عیسی نَه دَرِ بینَه. 14ولی اِمی خونِه کن اَ مِردی کن شفا گَتَش بَه، پِطروس و یوحنا وَریکا پا مَند بَه، اَیِن نِشاستِشون چیی ایی چَوون زِرَبَرا بواجن. 15ولی فِرمون آداشون کن اَیِن مَجلِسیکا بِرِن بَرشون و اِشتَن دمندین یندِنَه گَفَه ژَنِه کَردِ. 16اَیِن یَندِ شون واتَه: «اِم دِ نَه چِبکَرَم؟ اِمی خونه کن گِردِ اورشَلیمی آدَمِن بَموستین کن ایلَه مُعجیزَ چَوون بالینَه اَنجوم بَیَه و اَمه نِمونَشا اَی حاشا بِکَرَم. 17ولی اِم جریان تا اِمیکا ویشتَر مردومی دِلَکا گَه بَه گَه آمَبو، پی اِم مِردون قدقَن بکرَم کن دِ عیسی نومی خونه هیچ کَسینَه گَف نِژَنِن.»

18چَی به دوملَه اَیِنِشون هَنی خِلِه کردَ و حِکم کَردِشون کن هَرگِز عیسی نومی موَرِن و آموج نِدَرِن. 19اَمّا پِطروس و یوحنا جوابِشون دوعَه: «شِمَه اِشتَن دیوون بکَرَ، کِرَم گِلَه خدا نَظَریکا دِرِستَه، شِمَکا ایطاعَت کَردِ یا خدا کا ایطاعَت کَردِ؟ 20اِمی خونه کن اَمه نِمونَشا اَ چیی ایی کن ویندَمون و دَرَستَه مونَه، نِواجَم.»

21شورا آدَمِن، پِطروس و یوحنا برکَه تَهدید کَردِ بَه دوملَه آهَشتِشون، اِمی خونه کن راهی چَوون مجازات کَردِ را پَیدا نِکَردِشون. اِمی خونِه کن آدَمِن گِرد، اَ چییون ایتفاق دگِنِسته خونه، خدا ستایش اَکَرینَه. 22چون اَ شِلَه مِردی کن مُعجیزَنَه شَفاش گتَه بَه، چِلیکا نی ویشتَر سیند داری.

ایماندارِن پِطروس و یوحنا را دِوا بَکن

23پِطروس و یوحنا رَخِستِه بَه دوملَه اِشتَن رَفَقون وَر ویگَردِستین و کاهینون سَرکَردَ و ایسبیَه ریشِن واتَه چییون، چَوونرا جیگیر کَردِشون. 24وَقتی کن ایماندارِن اِمشون دَرَسته، یَک صَدا خدا دَرگارا دِوا کَردِشونَه و واتِشون: «اَی خداوندی کن گِردِ چییون سَردِرِ حاکِمیشَه، اَی خدایی کن آستامون و زَمین و دَیرا و هَر چیی کن چَوون دِلَکارَ خَلقِر کردیَه، 25تِه اِشتَن خدا موقدسَه روح واسیطَه نَه چَمَه بابا، اِشتِه پاسَری داوودِ پادیشا زونینَه، واتِرَ کن:

«‌”چِه خونِه قامِن شورِش بَکَن

و میلَتِن دَدارَ توطِئَه بَکَنَه؟

26زَمینی پادیشاهِن همدَست بَبین

و فَرمان رَوااِن یِندِ وَر جَم آنَّب،

خداوندی زِرَبَرا

و چَی مَسیح زِرَبَرا.“

27واقییَن کن هِم شَهریکا، هیرودیس حاکیم و پُنتیوس پیلاتوس، غَیر یَهودیِن و یَهودیونَّه، اِشتِه موقدسَه پاسَری عیسی زِرَبَرا کن اَی مَسح کَردِرَ، هَمدَست آبین، 28تا اَ چیی کن اِشتِه دَست و ایرادَ چیمی بَه نَه تَیین کردَش بَه، اَنجوم بِدَرِن. 29ایسَه، اَی خداوند، چَوون تَهدیدون دَرَس و اِشتَن پاسَریون لطف اَکَن، تا گردِ اِشتَن شَهامَتینَه اِشتِه کلامی بِواجِن، 30و اِشتِه بالی شفا دوعِه را دِراز اَکَن و اِشتِه موقدسَه پاسَری، عیسی نومینَه، نِشونَه اِن و مُعجیزَ اون اَیر آکَه.»

31چَوون دِوا کَردِ بَه دوملَه، جِگایی کن چَی دِلَکا گِرد آبَه بین لَرزِستَه و گِرد، خدا موقدسَه روح کا پَتلَمَه آبین وخِدا کَلامی شَهامَتینَه اَواجینَه.

ایماندارِن یَندِ مالو منالیکا شریک بینَه

32گِردِ ایمان دارِن یَکدِل و یَک جان بینَه و هیچ کَس چیی ایی اِشتَن مالو منالیکا اِشتَن شِن نَزنیَه، بَسکَم، گِردِ چییونکا یَندِ نَه شَریک بین. 33رَسولِن یالَه زبقینَه، عیسای خداوندی زندَ آبِه خونه شاهیدی اَدَرین و خدا یالَه فِیض، چَوون گِردی سَردِرِ بَه. 34هیچ‌ کِرَمی چَوون دِلَکا دَس دَریس نِبَه، چون هَر کَم کن کَه یا زَمینی داری، اَخِرَشیَه و چَی پولی 35رَسولون نَکا اَنَریَه، تا هَر کَمی نیازی اَندازَ گِردی دِلَکا رَسَت ببو. 36یوسوف نی کن لاوی قامیکا و قِپرِسی آدَمونکا بَه، و رَسولِن نی بَی بَرنابا کن چَی معنی ’تشویقی زوعَه‘ یَه، اَواجینَه، 37زَمینی کن داری خِرَتِش و چَی پولِش وردَ و رَسولون نَکا آناشَه.

Currently Selected:

رَسولون اَعمال 4: CTB

Highlight

Copy