رَسولون اَعمال 3

مادَر زادَ شِلی شفا دوعه

1ایی روج پِطروس و یوحنا ناهاری موقه ساعت سه را کن دِوا کردِ وَقت بَه، مَعبَدیرا اَشینَه. 2اَ هَنگومیکا، چَند نَفَر، ایلَه مِردی کن مادَر زاد شِل بَه، اِشتَنَه اَوَرینَه. اَیِن بَی هَر روج مَعبَدی اَ دَروازَ کَناریکا کن چَی نوم قَشنگَه دَروازَ بَه آرَنَرین تا آدَمِنیکا کن مَعبَدی دِلَه بَشین صَدَقَه ویگِرِ. 3وَقتی اَ شِله مِرد پِطروس و یوحناش ویندَ کن اَپیشون مَعبَدی دِلَه دَران، اَوونکا صَدَقَه خاستشَه. 4پِطروس و یوحنا اَ شِله مِردیکاشون چَم دَشتَه؛ پِطروس اَ مِردیش واتَه: «اَمه دیَس!» 5پس اَ شِلَه مِرد اَوون دَیَشتِشَه و مُنتَظیر بَه کن اَیِن چیی ایی بَی بِدَرِن.

6ولی پِطروس بَش واتَه: «مِرا نقرَ و طِلِه نییَه، ولی اَچیی ایکا کن دارِم بَتِه آمَدا! عیسای مَسیحِه ناصِری نومینَه پِب و گَل بِژَن!» 7چَی بَه دومله پِطروس اَ شِلَه مِردی راستَه بالی گَتِشَه و بَی راست آکَردِش. جَخت شِلَه مِردی لِنگِن و زنگِن زِبقِشون گتَه 8و اِشتَن جِگاکا وَشتَه و اِشتَن لِنگون سَردِرِ پا مَندَ و دَمندَ گل ژِ. چَی بَه دوملَه هَتَه کن وَشتو واز اَکَریَه خدا شکر کَری، و اَوونَّه مَعبَدی دِلَه دَرمَه. 9آدَمِن گِرد اَی گَل ژِ موقِه و خدا شکر واتِه موقِه ویندِشون، 10و سَر آگِنینَ اَ، هَه شِلَه مِردَ کن چیمی بَه نَ صَدَقَه ویگَتِه خونه مَعبَدی قشنگَه دَروازَ سَر اَنِشیَه؛ اَیِن اَ چیی ایکا کن چَیرا گِذَشتَه بَه، تَتَّه وسَّه و حَیرون آبَه بین.

پطروسی گفِن سِلِیمونی اِیوانیکا

11هَه موقه کن اَ مِرد پِطروس و یوحنا نَه اَشیَه و اَوونکا تاک آنَبیَه، حَیرونَه جَماعَت گرد، سِلِیمونی اِیوانیکا چَوون طَرَف ویریتین. 12وَقتی پِطروس اِمِش ویندَ، جَماعَتِش دَیَشتَه واتِش: «اَی یهودی مِردِن، چیرا اِم کاریکا اَنَه تعجوبِرون کردَ؟ چیرا کاینَه اَمه دَیَشتِه، هِنتَه کن اَمه اِشتَن زِبق و دیندارینَه، کاریمون کَردیَه کن اِم مِرد پا آرا؟ 13ابراهیمی خدا و ایسحاقی خدا و یعقوبی خدا، چَمَه بابا اون خدا، اِشتَن پاسَری، عیساش شکوه جَلال آداشَه، هَه کن شِمَه اَی تَسلیم آکَردِرون و پیلاتُس فرمانداری نَکا بَی حاشا ژِرون، هَر چَنَه پیلاتُسی تصمیم اِم بَه کن بَی براخِمونِه. 14ولی شِمَه اَ صالِح و قودوسی حاشا ژِرون، و اَپیرون بَه ایلَه آدَمَه کِشی چَی جِگا شِمَرا بِرَخِه. 15شِمَه، اَ کن زندَگی سَرچِشمَه بَه کِشتِرون، ولی خدا بَی مَردَاونکا زندَ آکَردِش و اَمه اِم چییون شاهیدِمون. 16عیسی نومینَه و چَی نومی سَر ایمان داشتِه خونه اَ کن، اِم مِرد زبق گَتِشه، اِم مِردی کن، کاینَه ویندِ و بَی آزنَه. ایمان داشتِه ایی کن چَی نومی واسیطنَه، اِم مِردی شِمَه گِردی چَمی ناریکا کامیلا شَفاش دوعَه یَه.

17«و اَی برااِن ایسَه، بَموستیم کن شِمَه کار و شِمَه قامی یالون کار، نافَم گیریکا بَه. 18ولی خدا هِم کارینَه اَ چیی ایی کن گِردِ پَیغمبَرون زونینَه پیش گویی کَردَش بَه، کن چَی مَسیح عذاب بَکَشتیَه، اَنجوم داشَه. 19پس توبَه بکَرَ و خدا طَرَف آگَردَ تا شِمَه گناخِن پاکییَه ببون، 20تا اَ زمانی آرَسِه کن خداوندی حِضوریکا شِمرا تازَگی با و تا خدا، وَعدَ آدوعَه مَسیح کن چیمی بَه نَه شِمَرا اینتخاب آبَه بَه، بَینِه، یعنی هَه عیسی 21کن پی آستامون بَی قِبول بکَریَه تا اَ روجِنی کن گِردِ چییِن بنابَر اَچیی کن خدا قَدیمَه دوورَ کا گِردِ اِشتَن موقدسَه پَیغمبَرون زونینَه واتَشَه، ایتفاق دگِنِه. 22موسای پیغمبر واتَشَه: ” خداوند خدا، شِمَه بِرااون دِلَکا، چمن شیوارَ پیغمبری شِمَرا رونَه آرَکَرد؛ و هَر چیی ایی کن اَ بَه شِمَه بِواجِه پی گوش آدَرَ. 23هَر کَم کن اَ پَیغمبَری گَفون گوش آنِدَرِ، قامی دِلَکا نیفیت آرَبن.“

24«هَتَه نی سَموئیل پیغَمبری بَه دوملَه، گِردِ پَیغمبَرِنی کن آمَه بین، گِرد یَک صَدا اِم روجون خونِه پیش گوییشون کردیَه. 25و شِمَه پَیغمبَرون خِردَنِنیرون و اَ عَهدی کن خدا شِمَه بابا اونَّه دَبَستِش، وارِثیرون. اَ موقه کن ابراهیمیش واتَه: ”اِشتِه اودومی واسیطنَه آدَمِنی کن زَمینی سَردِرِ مندین گِرد بَرَکَت بَگتینَه.“ 26هَنگومی کن خدا اِشتَن پاسَری، عیساش اینتخاب کَردَ، اَوَلیکا اَی شِمَه وَر رَونَه آکَردِشَه تاهر کِرَمی شِمَکا بَرَکَت بدَرِ، و اِم کارینَه بَشِمَه، شِمَه آوشَرَ راهونکا آگاردِنِستِش.»

Currently Selected:

رَسولون اَعمال 3: CTB

Highlight

Copy