مَتّی 20
20
متل کارگرَل باخ انگویر
1«پاتِشائی آسمو چُی اَرباوی کَ گه صوزوی اژ مال داءَ دِریر تاگَه اَرِه باخ انگویر ووژ کارگرَل روژمِز بِگِری. 2او قِطَ گَرد کِردِنی گه روژی یِه دینار گه مِزدَس یِه روژ کارگری بی، اَرِه کار کِردِن اِنوم باخ انگویر بیَ هر کُم اَژینو. اَسَه اونَل کِل‌کِردی اِنوم باخ انگویرِهِه. 3نزیک اَر سات نُه صو اِدوارَه داءَ دِریر ئو بِری‌تِر دیتی گه بیگار هوسیانَس اِنوم مِدو. 4وِتیَ اُوُن‌یش: ”هُمِه‌یش بِچِن اِنوم باخ انگویر مِه ئو اَ چیئَه گه حَختونَ میَم‌ئونتو.“ 5اِسَه اُوُن‌یش چِن. اِدوارَه نزیک اَر سات دوازَه ئو سات سه دُمانیمَرو داءَ دِریر ئو هُنَ کِردی. 6ئو نزیک اَر سات پنج ایوارِه‌یش داءَ دِریر ئو اِدوارَه دیتی چَن نفرتِر بیگار هوسیانَ. پِرسیتی اَژینو: ”اَرچَه تمومِ روژ بیگار هوسیاینونَس اَر ایرَه؟“ 7جوواوُ دا: ”اَرِیَگه هُیچ کس ایمَئَه کار نَگِرتی.“ وِتی‌ئونو: ”هُمِه‌یش بِچِن اِنوم باخ انگویر مِه.“ 8باایوارَه، صائای باخِهَه وِتیَ سرکارگر ووژ: ”هِنا کَ اَر کارگرَل ئو اژ آخِرینِهَه بِنیا بِن تاگَه اولینِهَه، مِزو بیَ.“ 9کارگرَلی گه نزیک اَر سات پنج ایوارَه هاتوئین اِرَه سر کار، هرکُمو یِه دینارو گِرت. 10وخدی رَسیَ گِ کسَلی گه وِر اژ کُل هاتوئین، گُمونو کِرد گه ویشتِر اژ کسَلی‌تِرَ مَگِرِن. مِنتائای هر کُم اژ اونَل‌یش یِه دینارو گِرت. 11وخدی مِز ووژونَ مَگِرتو، دَسو کِردَ خُت‌خَتَ گَرد صائای باخ، وِتو: 12”یوئنَ گه آخِر هاتِنَ فَخَد یِه سات کارو کِردیَ ئو تو اونَلتَ گَرد ایمَه گه ایمِرو هَمِه‌رو اِژیر مَشِرَقو زیَمَتمو کیشیَ، کِردَ یَکی!“ 13صائای باخِهَه ویر کِردی اَر یَکی اَژینو ئو وِتی: ”اِاِ رِقیف، مِه ظلمِمی اَر تو نَهَردیَ. مَرَ گَرد یَک قِطمو نَهَردَ یِه دینار؟ 14اِسَه حخ ووژِت بِسین ئو بِچُ! مِه دلمَ مِیتی چُی تو مِز بیَمَ ایی آخِریَ. 15مَر حخ نِرِم اَ چیئَه گه دلمَ مِیتیَ گَرد پیل ووژِم بِهَم؟ یانی چیَم نِرین دسِ‌دلوازی مِه بوئینین؟“ 16اِسَه، کسَلی گه آخِریِن، موئنَ اول ئو کسَلی گه اولِن موئنَ آخِری!»
سِئِمین پیشگوئی عیسی اِبارَه مرگ ئو زِنیابیئِنی
17وخدی گه عیسی ویرِ اورشلیمَ مَچیا، اَرنوم رئی دوازَه شاگردِهِه بِردیِ لای ئو وِتی‌ئونو: 18«سِیل کَن، دیریم مَچیمون اِرَه اورشلیم. اَر اورَه کُر اِنسونَ میَنَ گیر رِئیسَل کاهنَل ئو مَلِمَل توراتا. اونَل مَکومَ مَهَنیَ مرگ 19ئو میَنیَ دس خِرِیهودیَلا تاگَه تیزمَتَل کَنی ئو شلاخ دَنی ئو بِکیشِنی اَر صلیب. مِنتائای اِ روژ سِئِم زِنیا ماو.»
خواهشد یِه دا
20اَسَه دا کُرَل زِبِدیَ گَرد دو کُرِهِه هات اِرَه تک عیسی ئو زُنی دا اَر وَر ئو چیئی اَژی هِست. 21عیسی پِرسیتی: «چَتَ مِ؟» وِتی: «صِلا بیَ گه ایی دو کُر مِنَ اِنوم پاتِشائی تو یَکی اَر دس راس ئو یَکی‌تِر اَر دس چَپتا بِنیشِن.» 22عیسی جوواو دائون: «هُمَه نِمَذانینو چَتونَ مِ! آیا مَتونینو اژ جُمی گه مِه میا خُرّ دَم، خُرّ دِینو؟» جوواوُ دا: «اَاَ، مَتونیم.» 23عیسی وِتی: «اَلوَت گه اژ جُم مِه خُرَّ مِینو، مِنتائای نیشتِن اَر دس راس ئو چپ مِه اِ اختیار مِه نیَ تاگَه بیَمیَ کسی. ایی جاگَه هِن کسَلی کَ گه باوَه آسمونی مِن اَرِنو تیارِک دیَسی.»
24وخدی دیَه شاگردَلی‌تِر اژ ایی گپَ باخَوَرا بین، اژ دس اَ دو بِراءَ آگِرون اژ سر چی. 25عیسی هِنا کِردی‌ئونو ئو وِتی: «هُمَه مَذانینو گه حکِمرونَل خِرِیهودیَل آقاییون اَرِنَ مَهَن ئو کَلِنگَلو قدِرت‌واختیارون اَری دیرِن. 26مِنتائای اِنوم هُمَه هُنَ ناو. هر کی میا اِنوم هُمَه کَلِنگ بو، باس خادم هُمَه بو. 27ئو هر کی مِیتی اِنوم هُمَه اول بو، باس خُلُم هُمَه بو. 28هُنَ گه کُر اِنسون‌یش نِهات تاگَه خِلمت اَژی بِهَنی، بلکِم هات تاگَه خِلمت بِهِه ئو تا گیون ووژ اِجور نَسَخ آزادی اَرِه فِرَه کسَل بِ.»
شِفا دو کور
29وخدی گه عیسیَ گَرد شاگردَلی اژ شیَر اَریحا مَهَردونَ دِریر، فِرَه کسَل چِنیَ تُرّا. 30اَر لو جَدَه، دو پیا کور نیشتوئین. وخدی شنَفتو عیسی اژ اورَه کِلَ ماو، قارونو: «اِاِ آقا، اِاِ کُر داوود، ریَم کَ اَر ایمَه!» 31مردِم خِضو کِردِن اَری ئو هِستو گه دَنگو باوژِن؛ مِنتائای اونَل ویشتِر قارونو گه: «اِاِ آقا، اِاِ کُر داوود، ریَم کَ اَر ایمَه!» 32عیسی هوسیاآ ئو هِنا کِردی اَر اَ دو پیا ئو پِرسیتی: «چَتونَ مِ اَرِنتو بِهَم؟» 33اَ دو کورَ جوواوُ دا: «اِاِ آقا، مِمو چیَمَلمو واز بو.» 34عیسی وَه دلسوزیا دس نا اَر قِ چیَمَلو ئو جاوارجا چیَمَلو واز بی ئو وَه تُرّ اوآ کَتِنِ رئی.
Currently Selected:
مَتّی 20: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
