مَتّی 21
21
شاهونَه هاتِن عیسی اِنوم اورشلیم
1وخدی عیسی ئو شاگردَلی نزیکا بین اَر شیَر اورشلیم ئو رَسین اَر آبادی بِیت‌فاجی اَر پایِمو کوی زِتو، عیسی دو نفر اژ شاگردَلی کِل‌کِردی، 2وِتی‌ئونو: «بِچِن اَرِه آبادی‌ای گه ها ویرَرویرتو. هَریَگه چینون اِنوم، خری وَه‌گَرد کُریِهِه موئینینو گه بوئنیاسا. اونِلَ واز کَن ئو بارن اِرَه تک مِه. 3اَرّ کسی قصَه‌تونی‌ئون کِردی، بوشِن: ”خداون نیازَ بینو دیری،“ ئو او هِرازِه کِلونَ‌مِهِه.» 4یَه بی تا اَ چیئَه گه اِشعیا پِخَمَر وِتوئیتی اَنجوم بِگِری گه:
5«بوشِنَ اورشلیم، دِت صَهیون،
”اِسگَه پاتِشاتَ ما اِرَه تَکِت،
فِروتن ئو سُوار خری،
اَر کول خِرولی‌ایکا.“»
6اَ دو شاگردَ چِن ئو مِطابق فِربونی گه عیسی دائیتی‌ئونو، کِردو. 7اونَل خِرِهَه ئو کُریِهِئو آوِرد ئو چوخائَل ووژو آوشدون اَر کولو ئو عیسی سُوارو بی. 8جیَمیَت فِرِه‌یشی چوخائَل ووژو وِلائون اِراکِرد اَرنوم رئی ئو بِریشی پَلَل دارَلو بِروئی، ئو وِلائون اِرامَهَرد اَرنوم رئی. 9جیَمیَتی گه وَه نوا اواِرا مَچیان ئو جَرخِه‌ی گه وَه دُم سِرا ماهاتِنی، مَقارونو، موئِتو:
«نجاد بِ، اِاِ کُر داوود».
«بِمارِکَ اَوَه گه وَه نُم خداونَ مای!»
«نجاد بِ، اِ عرشِ فِلک!»
10حِنی گه او چی اِنوم اورشلیم، کُل شیَر هَوَسونَ مَهَرد ئو مَپِرسیائو: «یَه کیَ؟» 11ئو اَ جیَمیَتَ جوواوُنَ ما: «یَه عیسی پِخَمَرَ، اَل ناصرَه جلیل!»
عیسی معبد خدا پاکا مِهِه
12اَسَه عیسی چی اِنوم معبد خدا ئو کسَلی گه اَر اورَه مامِلِه‌ئونَ مَهَرد، تار کِردی ئو تختَل صرافَل ئو بَنِ‌بِساط کموترفِروشَل چاوارشاآ کِردی 13ئو وِتی‌ئونو: «اِنوم نُسَخ مقدّس نُیسیاءَ گه، ”وَه مال مِنَ موشِن مال دوعا،“ مِنتائای هُمَه اَوتونَ کِردیَسَ ’لونَه دُزَل‘.»
14اِنوم معبد، کورَل ئو شَلَل هاتِن اِرَه تک عیسی ئو او شِفا دانی. 15مِنتائای وخدی رِئیسَل کاهنَل ئو مَلِمَل تورات کارَل بِلُجوئی عیسی‌ئو دی ئو هَمیش دییو گه آیلَل اِنوم معبدَ مَقارِنِن: «نجاد بِ، اِاِ کُر داوود،» آگِرون اژ سر چی. 16اَسَه وِتونَ عیسی: «آیا مَشتوئین یوئنَ چَه موشِن؟» جوواوا داتی: «اَاَ. مَر اِنوم کِتاو زبور داوودتو نَحیوَنیَ گه،
«”دَم آیلَل ئو ساوَه‌لِت
اَرِه ستائشت واز کِرد؟“
17اَسَه عیسی اونَل هُیشتیِ جا ئو اژ شیَر چیَ دِریر، ئو چی اِرَه بِیت‌عَنْیا ئو شو مَن اَر اورَه.
حُشگا بیئِن دار انجیر
18صوشفق، حِنی گه عیسی گِلامَهُاردی اَرِه شیَر، وِرسِنی اِرابیتی. 19اَر لا جَدَه، دار انجیری دیتی ئو چِتی اِرَه تک، مِنتائای بِخِر اژ وَلگ چیئی اَر قِ نِئیا. اَسَه وِتیَ دارِهَه: «دیَر هرگِس اژ تو میوَه ناءَ عمل!» جاوارجا دارِهَه حُشگا بی. 20وخدی شاگردَل یِئونَ دی بِلُجوئیو هات، اَژینو پِرسی: «دار انجیر چطور هُنَ زوی حُشگا بی؟» 21عیسی جوواو اونِلا داتی، وِتی: «حخیختاً، موشِم‌ئونتو، اَرّ ایمونتو داشدوئی ئو چِرچ اِ دل نیَرینو، نه فَخَد مَتونینو اَ چیئَه گه اَرسر دار انجیر هات، اَنجوم دِینو، بلکِم هر وخد بوشینونَ ایی کویَ ”اژ ریشی اِربوری، ئو بِکُوء اِنوم دریا،“ هُنَ ماو. 22اَرّ ایمونتو داشدوئی، هر چَتونی گه اِنوم دوعا بِ، مَگِرینو.»
سؤال اِبارَه قدِرت‌واختیار عیسی
23اَسَه عیسی چی اِنوم معبد ئو داشدی تیَلیم مردِمَ ماتی گه رِئیسَل کاهنَل ئو شیخَل قوم هاتِنی اِرَه تک ئو وِتو: «وَه چه حَخی ایی کارِلَ مِهِین؟ کی ایی حخَ داسی‌ئونِت؟» 24عیسی جوواوا دانی: «مِن‌یش یِه چیتونی اَژینَ مَپِرسِم. اَرّ جوواوتو دا، مِن‌یشَ موشِم‌ئونتو گه وَه چه قدِرت‌واختیاری ایی کارِلَ مَهَم. 25تیَمید یحیی اژ کو بی؟ اژ جونِم خدا بی یاگَه اژ جونِم اِنسو؟» اونَل اِنوم ووژو شورو کِرد ئو وِتو: «اَرّ بوشیم اژ جونِم خدا بی، موشی‌ئونمو، ”اَنی اَرچَه ایمونتون‌ئون ناوِرد؟“ 26ئو اَرّ بوشیم اژ جونِم اِنسو بی، زِلَمونَ اژ مردِمَ مَچو، اَرِیَگه کُل مردِم یحییَ پِخَمَرَ مَذانِن.» 27اَسَه جوواو عیسی‌ئونا دا: «نِمَذانیم.» عیسی وِتی: «مِن‌یش نِموشِم‌ئونتو گه وَه چه حَخی ایی کارِلَ مَهَم.»
متل دو کُر
28«هُمَه چَه گُمونَ مِهِینو؟ پیای دو کُر داشدی. چی اِرَه تک کُرَ اولینِهِه ئو وِتی: ”اِاِ کُرِم، ایمِرو بِچُ اَرِه نوم باخ انگویر ئو کار بِهَه.“ 29جوواو داتی: ”نِمَچِم.“ مِنتائای دُماخِرِ عخیدَه اِرگیردونی ئو چی. 30باوَه چی اِرَه تک کُر اَلاینِهَه ئو هَر یَه وِتون. کُرِهَه جوواو داتی: ”مَچِم، آقا،“ مِنتائای نَچی. 31اَ دو کُرَ کُماینو خواس باوَه ووژ آوِردِ جا؟» اونَل جوواوُ دا: «اولینِهَه.» عیسی وِتی‌ئونو: «حخیختاً، موشِم‌ئونتو، خِراجگیرَل ئو ژِنَل خِراو وِر اژ هُمَه مَچِن اِنوم پاتِشائی خدا. 32اَرِیَگه یحیی هات اِرَه تک هُمَه تاگَه رئی دُریستو‌ن‌ئون نِشو دِ مِنتائای باوارتو نَهَرد، مِنتائای خِراجگیرَل ئو ژِنَل خِراو باوارو کِرد. هُمَه وَه‌یاآگه ایی چیئَلتونَ دی، پشیمونا نوئینو ئو یحیی‌تو باوار نَهَرد.
متل باخائونَل شرَبار
33«گوش دَن اَر متلی‌تِر. صائای مِلکی، باخ انگویری آوشدی ئو حَصار کیشیَ دورا ئو حوضی اَرِه تِلیقونِن انگویر ئو شِراو گِرتِن اِنوم کَن ئو بِرجکی‌شی اَرِه نگبونی آوشدی. اَسَه باخ انگویرِهَه داتیَ کِراءَ چَن باخائو ئو ووژ چی اِرَه مملکتی‌تِر. 34وخدی بیَ مُسِم چِنین ثمرَل، خُلُمَل ووژ کِل‌کِردی اَرِه تک باخائونَل تاگَه بیَر او اژ ثمر بِسینِن. 35مِنتائای باخائونَل خُلُمِلِهِئو گِرت، یَکونی سیرکُش کِرد ئو یَکی‌تِرو کُشت ئو اَ یَکِهِئو سنگسار کِرد. 36اِدوارَه، خُلُمَل ویشتِری کِل‌کِردی اِرَه تکو، مِنتائای باخائونَل وَه‌گَرد اُوُن‌یش هَرهُنَئونَ کِرد. 37دُماخِرِ کُر ووژ کِل‌کِردی اِرَه تک باخائونَل، وَه لا ووژا وِتی: ”عزّتَ مَنِن اَر کُرِم.“ 38مِنتائای وخدی گه باخائونَل کُرِهِه‌ئو دی، وِتونَ یَکتِری: ”یَه صائای میراتَ. بورِن بِکُشیمی ئو میرات بِهِیمیِ هِن ووژمو.“ 39اِسَه اوُ گِرت ئو اژ باخ انگویر آوشدونَ دِریر ئو کُشتو. 40اِسَه، وخدی صائای باخ انگویرِهَه بای، چَئِه ایی باخائونِلَ مِهِه؟» 41اونَل جوواوُ دا: «اَ آمَل شرَبارَ وَه بی‌ریَمی تموم نابودَ مِهِه ئو باخ انگویرِهَه مِئَه کِراءَ باخائونَلی‌تِر تاگَه بیَر ثمرِهِه اِ مُسِم ووژ بیَنی‌ئون.»
42اَسَه عیسی وِتی‌ئونو: «مَر تاگَه اِسگَه اِنوم کِتاو زبور داوودتو نَحیوَنیَ گه،
«”بَردی گه مِمارَل رَدو کِرد،
بیَ بَرد بِنچین ساخدِمو.
یَه کار خداون بی،
ئو وَه چیَم ایمَه بِلُجوئیا مای“؟
43اِسَه موشِم‌ئونتو گه پاتِشائی خدا اژ هُمَه مَسینِن ئو میَنَ قومی گه ثمر بیَن. 44[هر کی بِکُوءِ اَررُی اَ بَردَ، حُیردَ ماو، ئو وخدی اَ بَردَ بِکُوءِ اَررُی کسی، تِلوهَرا مِهِیتی.]»
45وخدی رِئیسَل کاهنَل ئو شیخَل فرقَه فَریسی متلَل عیسی‌ئو شنَفت، فیَمین گه اِبارَه اونَل قصَه مِهِه. 46وَه‌یاآگه مِهِستو بیَنَ قاپ عیسی‌آ، مِنتائای زِلَئون اژ مردِمَ مَچیا اَرِیَگه اونَل عیسی‌ئونَ پِخَمَرَ مَذِناسد.
Currently Selected:
مَتّی 21: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
