مَتّی 19
19
تیَلیم اِبارَه طِلاخ
1وخدی گه عیسی ایی قصه‌لَ تموم کِردی، اژ جلیل چی اِرَه اَکو روو اُردن هات اِرَه هیال یهودیَه. 2جیَمیَت فِرِه کَتِنیِ دُم ئو عیسی اَر اورَه شِفا دانی.
3شیخَل فرقَه فَریسی هاتِنی اَرِه تک تا اِنتحو کَنی. اونَل پِرسیو: «آیا جائزَ گه پیا وَه هر دلیلی ژَن ووژ طِلاخ دِ؟» 4عیسی جوواو داتی: «مَر اِنوم تورات نَحیوَنتونَ گه اَوَه گه اونَل خَلک کِردی، اژ اَ اولا ”اونِلَ ژَن ئو پیا خَلک کِردی“، 5ئو وِتی ”اَژونَسَ گه، پیا اژ باوِه ئو دا ووژ جیاآ ماو، ئو مَچسبیَ ژَن ووژا ئو اَ دوءَ موئنَ یِه لار“؟ 6اِسَه، اژ اَوِءِ دُما دیَر دو نیِن بلکِم یِه لارِن. اِسَه اَ چیئَه گه خدا ناءَ قِ یَکا، اِنسو نَباس جیاآ کِ.» 7فَریسیَل وِتون‌ئون: «اَنی اَرِه‌چَه موسی حکِم کِردی گه پیا طِلاخ‌نُامچِه‌ی بیَ ژَن ووژ ئو وِل کِیتی؟» 8عیسی وِتی‌ئونو: «موسی وَه خاطر سنگدلی هُمَه صِلا داتی گه ژَن ووژتو طِلاخ دِینو، مِنتائای اژ اَ اولا هُنَ نوئی. 9مِنَ موشِم‌ئونتو، هر کی وَه خاطر چیئی بِخِر اژ خیزی کِردِن ژَن ووژ طِلاخ دِ ئو ژَنی‌تِر بُوازی، زِنها کِردیَسی.»
10شاگردَل وِتون‌ئون: «اَرّ وَض پیا وَه‌گَرد ژَن ووژ هُنَسَ، اِسَه ژَن نَحُاستِن بیتِرَ!» 11عیسی وِتی‌ئونو: «کُل کسی نِمَتونی بِچوءِ گِرد ایی کلومَ، مَر کسَلی گه عطا بیَس‌ئونو. 12اَرِیَگه بِری خواجَه‌ن، وَه‌چوینا اژ لَم دائونا هُنَ هاتِنَسَ دی؛ بِری‌تِر خواجَه‌ن اَرِیَگه وَه دس مردِما خواجَه بینَ؛ ئو بِریشی خواجَه‌ن اَرِیَگه وَه خاطر پاتِشائی آسمونا ووژونَ خواجَه مَذانِن ئو ژَن نِمُوازِن. هر کی مَتونی بِچوءِ گِرد یَه، بیلا هُنَ بِهِه.»
عیسی ئو آیلَل
13اَسَه مردِم آیلَلو آوِرد اِرَه تک عیسی تاگَه دس بِنی اَرنوم سرو ئو دوعا خِر بِهِه. مِنتائای شاگردَل خِضو کِرد اَر مردِم. 14عیسی وِتی: «بِیلِن آیلَل گُجَر بان اِرَه تَکِم ئو نوائو نَگِرِن، اَرِیَگه پاتِشائی آسمو هِن هُنَ کسَلی کَ.» 15اَسَه دس نا اَرنوم سرو ئو اژ اورَه چی.
جِهال ثرودمن
16یِه روژ پیای هات اِرَه تک عیسی ئو پِرسیتی: «استاد، چَه بِهَم تاگَه ژییاین ابدی بیَرمَ میرات؟» 17عیسی جوواو داتی: «اَرِه‌چَه اِبارَه یَگه چه کاری خوءَ، اژ مِه سؤالَ مِهِین؟ فَخَد یَکی هَس گه خوءَ. اَرّ میا بِچین اِنوم ژییاین ابدیا، حکمَل شریعت بارَ جا.» 18اَ پیا پِرسیتی: «کُمین حکمَل؟» عیسی وِتی: «”آم نَکُش، زِنها نِهَه، دُزی نِهَه، شاتی دِرو نیَ، 19عزّت بِن اَر باوِه ئو دا ووژِت“ ئو ”هُمسات چُی ووژِت دوسِت داشدوئی.“» 20اَ جِهالَ وِتی: «کُل ایی حکمَلمَ آوِردیَسَ جا؛ دیَر چَه باس بِهَم؟» 21عیسی جوواو داتی: «اَرّ میا کاملا بوئین، بِچُ ئو اَ چیئَه گه دیرین بفِروش ئو پیل بِیتیَ ژارَل، گه اِنوم آسمو گنج دیرین. اَسَه بورَ تُرّ مِنا.» 22جِهالِهَه وخدی یَه شنَفتی، خَمَ‌بارا بی ئو اژ اورَه چی، اَرِیَگه مالِ‌منال فِرِه داشدی.
23اَسَه عیسی وِتیَ شاگردَلی: «حخیختاً، موشِم‌ئونتو، فِرَه سخدَ گه آم ثرودمنی بِچوءَ نوم پاتِشائی آسمونا. 24اِدوارَه موشِم گه رد بیئِن شتِر اژ کُنا دَرزِن، آسُتِر اژ یَسَ گه آم ثرودمنی بِچوءَ نوم پاتِشائی خداآ.» 25وخدی شاگردَل یِئونَ شنَفت فِرَه بِلُجوئیو هات ئو پِرسیو: «اَنی کیَ مَتونی نجاد بِگِری؟» 26عیسی گِز کِردی اَرینو ئو وِتی: «یَه اَرِه اِنسو مِحالَ، مِنتائای هُیچی اَرِه خدا مِحال نیَ.»
27پطرس وِتی: «سِیل کَ، ایمَه کُل چیمو وِل کِردیَ ئو هاتیمونَسَ تُرّ تونا. اِسَه چَه ماوَ نَصُیمو؟» 28عیسی وِتی‌ئونو: «حخیختاً، موشِم‌ئونتو، اِنوم دنیا نوو، وخدی گه کُر اِنسو بنیشی اَرسر تخت پاتِشائی پِرجِلال ووژا، هُمِه‌یش گه هاتینونَسَ تُرّ مِنا، مَنیشینون اَرسر دوازَه تخت ئو اَر دوازَه طائفَه اسرائیل داوری مِهِینو. 29ئو هر کی وَه خاطر نُم مِه مال یاگَه بِرا یاگَه خُیَه یاگَه باوَه یاگَه دا یا اولاد یاگَه مِلکِ‌مِحل ووژ وِل کِردوئیتی، صد بِرُوَرَ ماریَ دس ئو ژییاین ابدیَ میَریَ میرات. 30مِنتائای ویشتِر کسَلی گه اولِن، موئنَ آخِری، ئو کسَلی گه آخِریِن، موئنَ اول!
Currently Selected:
مَتّی 19: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
