مَتّی 18
18
کی اژ کُل کَلِنگتِرَ؟
1اِ اَ وخدَ، شاگردَل هاتِن اِرَه تک عیسی ئو پِرسیو: «کی اِنوم پاتِشائی آسمو اژ کُل کَلِنگتِرَ؟» 2عیسی هِنا کِردی اَر آویل گُجَری ئو او نا اِنومجا اونَل، 3وِتی: «حخیختاً، موشِم‌ئونتو، تاگَه عوض نوئینو ئو نوئینون اِجور آیلَل، هرگِس نِماینون اِنوم پاتِشائی آسمونا. 4اِسَه، هر کس ووژ اِجور ایی آویلَ فِروتنا کِ، اِنوم پاتِشائی آسمو اژ کُل کَلِنگتِرَ. 5ئو هر کی وَه نُم مِه، بِچوءِ گِرد هُنَ آویلی، چیَسِ گِرد مِه.
6«مِنتائای هر کی باعث بو یَکی اژ ایی گُجِرِلَ گه ایمون اَر مِه دیری اژ ایمو بِکُوءِ، اَرِه او بیتِر یَسَ گه بَرد اَسیو کَلِنگی بوئنِنی اَر مِل، ئو اِ تیَه دریا غرخ بو! 7هِرّو اَرِه ایی دنیاءَ گه وَه وسوسَه‌لی باعث گناءَ ماو! اَرِیَگه وَه‌یاآگه وسوسَه‌ل همیشَه هَن، مِنتائای هِرّو اَرِه اَوَه گه باعث وسوسَه بو!
8«اِسَه اَرّ دس یاگَه پات تونَ ماوژیَ گنا، باوژتی‌اِر ئو هُوَ دِیتی، اَرِیَگه اَرِنِت بیتِرَ گه شَل ئو لنگ بِچین اِنوم ژییاین ابدیا تاگَه وَه‌گَرد دو دس یاگَه دو پا باوژِنت اِنوم آگِر ابدی. 9ئو اَرّ چیَمِت تونَ ماوژیَ گنا، بارتیَ دِریر ئو هُوَ دِیتی، اَرِیَگه اَرِنِت بیتِرَ گه وَه یِه چیَما بِچین اِنوم ژییاین ابدیا تاگَه وَه دو چیَما باوژِنت اِنوم آگِر جیَنِم.
متل کاوِر گُم‌بیئی
10«حُواستو بو گه هُیچ کُم اژ ایی گُجِرِلَ خوار نِهِینو، اَرِیَگه موشِم‌ئونتو گه اِنوم آسمو، فریشدَه‌ل اونَل یِمِجو نوم‌رُی باوَه مِه گه ها نوم آسمون‌اِر، موئینِن. 11[اَرِیَگه کُر اِنسو هاتیَ تا اَوَه گه گم بیَ نجاد دِ.] 12چَه گُمونَ مِهِینو؟ اَرّ پیای صد ریئَن کاوِر داشدوئیتی ئو یَکی اژ اونَل گم بو، مَر اَ نود ئو نُه گِلَه کاوِرَ اِنوم کَش‌وکویَل نِمِیلیَ جا ئو نِمَچوءَ مِنِی اَوَه گه گم بیَ؟ 13حخیختاً، موشِم‌ئونتو، گه اَرّ اَوَه بِهِئَه دی، اَرِه اَ یِه کاوِرَ ویشتِر خَوشیَ مِهِه، تاگَه اَرِه اَ نود ئو نُه گِلَه کاوِری گه گم نوئینَ. 14ئو هَرِ ایی جورَ، خواس باوَه هُمَه گه ها نوم آسمون‌اِر یَه نیَ گه جُ‌جُ یَکی اژ ایی گُجِرِلَ نابود بو.
رفدارَ گَرد بِرا خطاکار
15«اَرّ بِرات گنات اَری کِ، بِچُتی اَرِه تک ئو اِ بِن ووژتو، خطاهِه بوشتی‌ئون. اَرّ چیِ گِرد قصَه‌ت، بِرات اِدوارَه آوِردِتَسَ دس؛ 16مِنتائای اَرّ نچِتیِ گِرد، یَکی یاگَه دو نفرتِرَ گَرد ووژِت بیَر تاگَه ”هر گپی وَه شاتی دو یاگَه سه شات ثابت بو.“ 17اَرّ نِهِستی گوش بِگِری اَر اون‌یش، بوشَ کلیسا؛ ئو اَرّ جُ‌جُ نَچیِ گِرد قصَه کلیسایش، اَسَه اوءَ بیگونَه یاگَه خِراجگیر بِذان. 18حخیختاً، موشِم‌ئونتو، هر چی گه اَررُی زمینا بوئنینو، اِنوم آسمونَ موئنی؛ ئو هر چی گه اَررُی زمینا واز بِهِینو، اِنوم آسمو وازَ ماو. 19اِدوارَه موشِم‌ئونتو گه حِنی گه دو نفر اژ هُمَه اَررُی زَمی اِبارَه هر چی گه بِئو وَه‌گَرد یَک یِه‌دل بوئن، اژ جونِم باوَه مِه گه ها نوم آسمون‌اِر، اَرِه اونَل اَنجومَ ماو. 20اَرِیَگه جای گه دو یا سه نفر وَه نُم مِه جیَم بوئن، مِن اَر اورَه هام اِنومو.»
متل خادمی گه نِموئَشخی
21اَسَه پطرس هات اِرَه تک عیسی ئو پِرسیتی: «اِاِ آقا، تا چَن گِل اَرّ بِرام گنا اَر مِه بِهِه، باس بوئَشخِنمی؟ یانی تا هفت گِل؟» 22عیسی جوواوا داتی: «موشِم‌ئونِت نه هفت گِل بلکِم هفتا گِل هفت گِل.
23«اَژونَسَ، پاتِشائی آسمون اِجور پاتِشای کَ گه قَص کِردی وَه‌گَرد خادمَل ووژ تسویَه حساو کِ. 24هَریَگه بِنیا نا اَر حساوکتاو، یَکونی آوِرد اِرَه تک گه دیَه هزار قَنطار، چَن دوهیس هزار سال مِزدَس کارگری، بِدیکار بیتی. 25مِنتائای وَه‌چوینا گه او نِمَتونستی قَرت ووژ بیَ دُما، اَرباوِهِه فِربو داتی گه او وَه‌گَرد ژَن ئو آیلَلی ئو کُل مالِ‌منالی بفِروشِن تا قَرتِهَه بِسینِنِ دُما. 26خِلمَتکارِهَه زُنی داتی اَر وَر پا اَرباو ئو لالکیاتی‌ئون، وِتی: ”مِجالِم بِ‌ئون تاگَه کُل قَرت ووژِم بیَمَ دُما.“ 27اَسَه دل اَرباو اَرِه سُتی ئو او آزاد کِردی ئو قَرتِهِه بَشخیتی. 28مِنتائای حِنی گه خِلمَتکارِهَه چیَ دِریر، یَکی اژ هُمکارَل ووژ دیتی گه صد دینار چَن سه مُنگ مِزدَس کارگری بِدیکار بیتی. اَسَه او گِرتی ئو چِنگ ناءِ تینی ئو وِتی: ”قَرتِهَت بیَ دُما!“ 29هُمکارِهِه زُنی دا اَر وَر ئو لالکیاتی‌ئون، وِتی: ”مِجالِم بِ‌ئون تاگَه کُل قَرت ووژِم بیَمَ دُما.“ 30مِنتائای او اِگِرد نَچی، بلکِم چی ئو او آوشدی اِنوم زندو تا وخدی گه قَرت ووژ بیَ دُما. 31وخدی خِلمتکارلِ‌تِر ایی اتفاقونَ دی، فِرَه پَژارا بین ئو چِن اِرَه تک اَرباو ووژو، ئو کُل ایی اتفاقونَ تیَریف کِرد اَرِه. 32اَسَه اَرباو، اَ خِلمتکارَ هِنا کِردی اَرِه تک ووژ ئو وِتون: ”اِاِ خِلمتکار شرَبار، مِنَ خاطر لالکیاین تو کُل قَرتِهَم بَشخین 33آیا نَباس تونیش ریَمتَ مَهَرد اَر هُمکار ووژِت، هَراَ جورَ گه مِه ریَمِم کِرد اَر تو؟“ 34اِسَه اَرباو آگِر اژ سر چِتی، او آوشدی اِنوم زندو تاگَه شکنجَه بو تا وخدی گه کُل قَرت ووژ بیَ دُما. 35هَرِ ایی جورَ، اَرّ هُمِه‌یش بِرا ووژتون اژ تیَه دلتونا نوئَشخینو، باوَه آسمونی مِن‌یش وَه‌گَرد هر کُم اژ هُمَه، هُنَ رفدارَ مِهِه.»
Currently Selected:
مَتّی 18: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
