لوقا 8

خِلمت ژِنَل

1دُما اَوَه، عیسی شیَر اَر شیَر ئو آبادی اَر آبادیَ مَگیردیا ئو خَوَر خَوش پاتِشائی خداءَ ماتی. اَ دوازَه نفریشَ وَه‌گَرد بینی، 2هَمیش بِری اژ ژِنَل گه اژ روحَل گَن ئو مِرَضَل شِفائو گِرتوئی: مریم مَشور وَه مَجدَلیّه گه اژ او هفت مِلاکَت هاتوئیَ دِریر، 3یوآنّا ژَن خوزا، پیشکار هیرودیس، سوسن ئو ژِنَل فِرِه‌ی‌تِر. ایی ژِنِلَ اژ دارایی ووژو اَرِه هَوَجَه‌ل عیسی ئو شاگردَلی تیارِکون ما.

4وخدی مردِم اژ شیَرَل فِرِه‌ی‎ ماهاتِن گه عیسی بوئینِن ئو جیَمیَت فِرِه‌ی جیَم بوئین، او ایی متلَ اَرِه آوِردِنی: 5«یِه روژ کشاورزی اَرِه تُئم آوشدِن چیَ دِریر. وخدی گه تُئمَ ماوشدی، قِری اَژینو کَتِن اِنوم رئی ئو لَخَ‌سا بین ئو مَلَل آسمو اونَلو هُارد. 6قِری‌تِر کَتِن اِنوم زَمی گُلور، ئو وخدی گه سُزو کِرد، حُشگا بین، اَرِیَگه نِمِرچی ناآشدی. 7قِریشی کَتِن اِنوم دِرِکو ئو دِرِکَل وَه‌گَرد تُئمَل سُزو کِرد ئو اونَلو خفَه کِرد. 8مِنتائای قِری اژ تُئمَل کَتِن اِنوم زَمی خو ئو سُزو کِرد ئو صد بِرُوَر ثمرو آوِرد.» وخدی یَه وِتی، وَه دَنگ کَلِنگا اِلوم کِردی: «هر کی گوش اَرِه شنَفتِن دیری، بشتوئی!»

9شاگردَلی میَنا ایی مَتَلونَ اَژی پِرسی. 10وِتی: «فیَم رازَل پاتِشائی خدائو داسَ هُمَه، مِنتائای اَرِه کسَلی‌تِر وَه متل قصَه مَهَم تاگَه:

«”سِیل کَن، مِنتائای نوئینِن،

بشتوئِن، مِنتائای نفیَمِن.“

11«میَنا مَتَلَهَه یَسَ: تُئم، کلوم خداءَ. 12تُئمَلی گه مَکُوئِن اِنوم رئی، کسَلی کِن گه کلومَ مَشتوئِن، مِنتائای ابلیسَ مای ئو اونَل اژ دلونَ مُئزی تاگَه نتونِن ایمو بارِن ئو نجاد بِگِرِن. 13تُئمَلی گه مَکُوئِن اِنوم زَمی گُلور کسَلی کِن گه وخدی کلومَ مَشتوئِن، وَه خَوشی مَچِنیِ گِرد، مِنتائای کلوم اِنوم اونَل ریشیا نِمِ. یوئنَ مِدت کمی ایمو دیرِن، مِنتائای موقَع اِنتحو، ایمو ووژون اژ دسَ میَن. 14تُئمَلی گه مَکوئِن اِنوم دِرِکَل، کسَلی کِن گه کلوم خداءَ مَشتوئِن مِنتائای وخدی رئی ووژونَ مَگِرِنِ وَر دلِ‌هولیَل ئو مالِ‌منال ئو خَوشیَل زِنِه‌ی، خفَه‌ئونَ مِهِه ئو ثمرونَ بار نِمای. 15مِنتائای تُئمَلی گه مَکُوئِن اِنوم زَمی خو، کسَلی کِن گه وَه دل پاک ئو خو کلوم خداءَ مَشتوئِن ئو سفدِسخد مَچسبِن‌َ اَوا ئو وَه صبِر ئو تیَمِل ثمرَ مارِن.

متل چراخ لمپا

16«هُیچ کس چراخ لمپا نِمَگیسِنی تاگَه چیئی بِنتی اَرسر، یاگَه بِنتیِ ژیر تخت! بلکِم چراخ لمپا مَنِن اَررُی چراخدو تاگَه هر کی با اِنوم، روشتایی بوئینی. 17اَرِیَگه هُیچ چی آشاریای نیَ گه آشگارا نو ئو هُیچ رازی نیَ گه نَکُوءِ در ئو فاش نو. 18اِسَه حُواستو بو گه چطورَ مَشتوئینو، اَرِیَگه وَه اَوَه گه دیری ویشتِرَ میَن ئو اَوَه گه نِری، هَر اَویشَ گه گُمونَ مِهِه دیری مَسینِنی اَژی.»

دا ئو بِرال عیسی

19اَسَه، دا ئو بِرال عیسی هاتِنیَ دُما، مِنتائای اژ زور جیَمیَت نتونستو نزیکا بوئنی. 20اَسَه خَوَرو دائون گه: «دا ئو بِرالِت هوسیانسِ در ئو میا تو بوئینِن.» 21مِنتائای عیسی جوواوا داتی: «دا ئو بِرال مِه کسَلی کِن گه کلوم خداءَ مَشتوئِن ئو مارِنیَ جا.»

آروما کِردِن رُحِیل دریاچَه

22اِ یَکی اژ اَ روژِلَ عیسی وِتیَ شاگردَلی: «بِچیم اَرِه اَکو دریاچَه.» اَسَه سُوار قائِق بین ئو کَتِنِ رئی. 23اَرنوم رئی، عیسی حیوَت. وَه یِگِل بیَ رُحِیل، هُنَ گه قائِقِهَه داشدی اژ آو پِرا موئیا ئو گیونون اِ خطر بی. 24شاگردَل چِن اَرِه تک عیسی ئو اوُ کِردَ خَوَر، وِتو: «اِاِ استاد، اِاِ استاد، دیریم مَمِریم!» عیسی بیَ خَوَر ئو تُنا بی اَر وا ئو تافَل تُن. رُحِیل هوسیاآ، ئو کُل جا آروم اِراگِرت. 25عیسی وِتی‌ئونو: «ایمونتو هار کو؟» شاگردَل اَخَ زِلَ‌تِراقا بوئین گه اژ یَکتِریونَ مَپِرسیا: «یَه دیَر کیَ گه جُ‌جُ فِربونَ مِئَه وا ئو آو ئو اونَل‌یش اَژی فِربونَ میَرِنی.»

شِفا پیا مِلاکَت‌دار

26اَسَه وَه قائِقا رَسینَ اَر هیال جِراسیَل گه اِ اَکو دریاچَه، ویراَرویر هیال جلیل بی. 27وخدی عیسی پا نا اَر لو آو، پیا مِلاکَت‌داری اژ مردِم اَ شیَرَ هاتیَ وَرپیری گه مِدت فِرِه‌ی بی جِنِک اِوَر نَهَردوئیتی، ئو اِنوم مالی زِنِه‌ی نَهَردوئیتی، بلکِم اِنوم قورِسو بی. 28وخدی اَ پیاءَ عیسی دیتی، نَرَه کیشیتی ئو کَت اَر مِل پال عیسی ئو وَه دَنگ کَلِنگا قارونی: «اِاِ عیسی، کر خداءِ متعال، اِ مِنِت چا؟ مَلالکِم‌ئونِت عذاوِم نِین!» 29اَرِیَگه عیسی فِربو دائیتیَ روحِ گَن گه اژ او بِچوءَ دِریر. اَ روحَ گُرّان او گِرتوئیتی، وَه‌یاآگه مردِم وَه زنجیر ئو زالِنَه اوئن آموئنیا ئو اَژی نگبونیونَ مَهَرد، او زنجیرِلَ مُئریاتی ئو مِلاکَت، اوءَ مَکیشاتی ویرِ بیاوو. 30عیسی پِرسی اَژی: «کی نُمتَ؟» جوواوا داتی: «قُشون،» اَرِیَگه مِلاکَتَل فِرِه چوئینیِ دَرین. 31مِلاکَتَل وَه لالکَ‌حُاس اژ عیسی‌ئو هِست گه فِربونون‌ئون نِ گه گِلابیرِن اِرَه نوم چا هاویَه.

32اِ، اَ هِناسَ، ریئَن کَلِنگی اژ خنزیل اِ پایِمو تپَه داشدو خوراکونَ مَهُارد. مِلاکَتَل لالکینَ عیسی تاگَه صِلا بِ بِچِن اِنوم خنزیلَل، ئو اویش صِلا داتی‌ئونو. 33اَسَه مِلاکَتَل اژ اَ پیاءَ چِنَ دِریر ئو چِن اِنوم خنزیلَل، ئو خنزیلَل‌یش اژ سِرالیژی تپَه رَمینَ هُار کَتِن اِنوم دریاچَه ئو غرخ بین.

34وخدی کسَلی گه مِتیَه‌جی خنزیلَل بین، یِئونَ دی، حِیواین ئو ایی گَپونَ اِنوم شیَر ئو آبادی تیَریف کِرد. 35اَسَه مردِم هاتِنَ دِریر تاگَه اَ چیئَه گه اتفاق کَتوئی بوئینِن، وخدی رَسینَ اَرتَک عیسی ئو دییو اَ پیاءَ گه مِلاکَتَل اژ او هاتوئینَ دِریر، کِراس کِردیَسی‌ِ وَر ئو عاخل نیشتیَس اَر وَر پال عیسی، زِلَ‌تِراقا بین. 36کسَلی گه ایی اتفاقونَ وَه چیَم دوئی، اَرِه اونَل تیَریفو کِرد گه پیا مِلاکَت‌دارِهَه چطور شِفا گِرتوئیتی. 37اَسَه کُل مردِم هیال جِراسیَل اژ عیسی‌ئو هِست گه اژ تَکو بِچو اَرِیَگه فِرَه زِلَئو چوئی. اِسَه اویش سُوار قائِق بی ئو چی. 38پیای گه مِلاکَتَل اَژی هاتوئینَ دِریر لالکیاءَ عیسی تاگَه بِیلی وَه‌گَرد بوتی، مِنتائای عیسی او رِ کِردی ئو وِتی: 39«گِلابیر اَرِه مال ووژِت ئو اَ چیئَه گه خدا اَرِنِت کِردیِ بوشا.» اِسَه او چی ئو اِ سِرُسَر شیَر اِلوم کِردی گه عیسی چَه اَرِه کِردیَ.

شِفا یِه ژَن ئو زِنیا کِردِن دِت یایروس

40وخدی عیسی گِلاهُاردی، مردِم وَه رُی خَوش چِنیِ نوا، اَرِیَگه کُل مردِم چیَمَ‌رئی بینی. 41اِ ایی وخدَ، پیای گه نُم یایروس بیتی، گه رِئیس عَبادتگا یهود بی، هات ئو کَت اَر مِل پال عیسی‌اِرا لالکیتی‌ئون تاگَه بِچوتی اِرَه مال، 42اَرِیَگه یَکونَه دِتِهِه گه نزیک اَر دوازَه سال بیتی، اَرسَکَرات بی.

وخدی عیسی وَه رئی‌اِرا بی، جیَمیَت فِرَه زورونَ ماوِرد اَری. 43اِنوم اونَل، ژَنی بی گه دوازَه سال بی خوین قائده‌ی آنِموسیاتی ئو [وَه‌یاآگه کُل دارایی ووژ خرج حکیمَل کِردوئیتی،] کس نِمَتونستی حِلاج کِیتی. 44او اژ پِشت‌سَر نزیکا بی اَر عیسی ئو دس نا اَر پر چوخای. هِرازِه خوین آهوسیاتی. 45عیسی پِرسیتی: «یَه کی بی دس نا اَر قِ مِنا؟» وخدی کُل مردِم نَگِرتونَ مِل، پطرس وِتی: «استاد مردِم اژ هر لای دور تونو گِرتیَ ئو زورتَ مارِن اَری!» 46مِنتائای عیسی وِتی: یَکی دس نا اَر قِم! اَرِیَگه فیَمیم قویَتی اژ مِه هاتَ دِریر!» 47اَ ژِنَ وخدی دیتی نِمَتونی ووژ آبِشاری، وَه ترسِم‌لرزِم هاتِ وَر ئو کَت اَر مِل پال عیسی ئو اِ وَر چیَم کُل مردِم وِتی گه اَرِه‌چَه دس ناسی اَر قِ او ئو چطور هِرازِه شِفا گِرتیَسی. 48عیسی وِتون: «اِاِ دِت، ایمونِت شِفات داسی. بِچُ مِزِلِت خِر.»

49عیسی هَنی داشدی قصَه مَهَردی گه یَکی اژ مال یایروس، رِئیس عَبادتگا، هات ئو وِتی: «دِتَهَت مِرد، دیَر استاد ناوژِ زیَمَت.» 50عیسی وخدی یَه شنَفتی، وِتیَ یایروس: «زِلَت نَچو! فَخَد ایمونِت داشدوئی! دِتَهَت شِفاءَ مَگِری.» 51وخدی رَسی اَر مال یایروس، عیسی نِئیشتی کسی بِخِر اژ پطرس ئو یوحنا ئو یعقوب ئو باوَه ئو دا دِتَهَه وَه‌گَرد او بان اِنوم مال. 52کُل مردِم اَرِه دِتَهَه شوینونَ مَهَرد ئو مَگیریان. مِنتائای عیسی وِتی: «نگیرِن، او نَمِردیَ بلکِم ها خاواِر.» 53اونَل ریشخَنو کِرد، اَرِیَگه مَذِناسدو دِتَهَه مِردیَ. 54مِنتائای عیسی دس دِتَهَه گِرتی ئو وِتی: «رولَه، هیزگِر!» 55روحِ او گِلاهُاردی ئو هِرازِه دِتَهَه اژ جا هیزگِرتی. عیسی وِتی گه خوراک‌ئون دَنی. 56داباوَه دِتَهَه واقونِ دَم پَروئی مِنتائای عیسی قِدَخَن کِردِنی گه ایی اتفاقَ اَرِه کسی نوشِنا.

Currently Selected:

لوقا 8: LBT

Highlight

Copy