لوقا 7

ایمو افسر رومی

1دُما یَگه عیسی کُل قصَه‌ل ووژَ گَرد مردِم تموم کِردی، چی اِنوم شیَر کَفَرناحوم. 2اَر اورَه یِه افسر رومی بی گه خُلُمی داشدی گه فِرَه اَرِه اَرزشد داشد. خُلُمِهَه مریض ئو اَرسَکَرات بی. 3وخدی افسرِهَه اِبارَه عیسی شنَفتی، بِری اژ شیخَل یهودی کِل‌کِردی اِرَه تک او تاگَه اژ اوُ بِ گه بای ئو خُلُمِهِه شِفا دِ. 4اونَل هاتِن اِرَه تک عیسی ئو وَه لالکَ‌حُاس فِرِه‌ی وِتون‌ئون: «ایی پیاءَ لائق یَسَ گه ایی لِفطَ اَر حخ بِهِینی، 5اَرِیَگه قوم ایمَه دوس دیری ئو یَه هر اَوَه‌‌سَ گه عَبادتگامون اَرِه آوشدیَسی.» 6عیسی چیَ گَردو. وخدی رَسی اَر هِناس مال، اَ افسرَ چَن نفر اژ رِقیفَلی کِل‌کِردی اَرِه تک عیسی، وَه ایی پِغومَ گه: «اِاِ آقا، ووژِت ناوژِ زیَمَت، اَرِیَگه لائق نیِم گه باینِ ژیر طاق مال مِنا. 7اَژونَسَ، جُ‌جُ ووژِم لائق نَذِناسد بام اَرِه تک تو. فَخَد قصه‌ی بوش گه خُلُمِم شِفاءَ مَگِری. 8اَرِیَگه مِه ووژِم پیای کِم گه هامِ ژیرِ فِربو کسی ئو سروازَل‌یشی ژیردسَه ووژِم دیرِم. موشِمَ یَکی ”بِچُ،“ مَچو، موشِمَ یَکی‌تِرِک ”بوری،“ مای. موشِمَ خُلُم ووژِم ”یَه بِهَه“، مِهِیتی.» 9عیسی وخدی یوئنَ شنَفتی، اَژی بِلُجوئی هاتی ئو ویر کِردی اَر جیَمیَتی گه وَه دُم سِرا ماهاتِنی ئو وِتی: «موشِم‌ئونتو، هُنَ ایمونمی جُ‌جُ اِنوم اسرائیل‌یش نِئیَ.» 10وخدی قاصیَل گِلوناهُارد اِرَه مال، خُلُمِهَه‌ئو آزا دی.

زِنیا کِردِن کُر بیوَه‌ژَن

11دُما یَه، عیسی کَتِ رئی چی اَرِه شیَری گه نُم نائین بیتی. شاگردَل ئو جیَمیَت فِرِه‌ی وَه‌گَرد بينی. 12وخدی رَسی اَر هِناس دروازَه شیَر، دیتی مِردی‌ای میَرِن گه کُر یَکونَه بیوَه‌ژَنی بی. فِرَه کسَل اژ مردِم شیَریش وَه‌گَرد اَ ژِنَ بینَ. 13وخدی عیسیِ خداون او دیتی، دل اَرِه سُتی ئو وِتی: «نگیر.» 14اَسَه عیسی چیِ نوا ئو دس نا اَر قِ تاوُتِهَه. کسَلی گه تاوُتِهِه‌ئونَ موئرد، هوسیان. عیسی وِتی: «اِاِ جِهال، موشِم‌ئونِت، هیزگِر!» 15مِردیَ چُکِ‌راق نیشت ئو بِنیا نا اَر قصَه کِردِن! عیسی او سپارتیَ دس دایا. 16کُل اونَل زِلَ‌تِراقا بین ئو هُنَ گه داشدو خدائو جِلالَ ما، موئِتو: «پِخَمَر کَلِنگی اِنوم ایمَه ظاهر بیَ. خدا هاتیَسَ دیار قوم ووژ.» 17خَوَر ایی کار عیسی اِ سِرُسَر یهودیَه ئو هیالَل اَ هِناسَ پَشخا بی.

سؤال یحیی تیَمیددهندَه

18شاگردَل یحیی تیَمیددهندَه اوُ اژ کُل ایی چیئِلَ باخَوَرا کِرد. اَسَه او دو نفر اژ اونَل هِنا کِردی 19ئو وَه ایی پِغومَ کِل‌کِردِنی اِرَه تک عیسیِ خداون: «آیا تو هَر اَوینَ گه باس بای، یاگَه چیَمَ‌رئی یَکی‌تِر بوئیمو؟» 20اَ دوءَ هاتِن اِرَه تک عیسی، وِتو: «یحیی تیَمیددهندَه، ایمَه کِل‌کِردیَسی تاگَه بِپِرسیمت اَژی آیا تو هَر اَوینَ گه باس بای، یاگَه چیَمَ‌رئی یَکی‌تِر بوئیمو؟» 21هَراَ ساتَ، عیسی فِرَه کسَل اژ مِرَضَل ئو ژُنَل ئو روحَل گَن شِفا داتی ئو کورَل فِرِه بیناآ کِردی. 22اِسَه جوواو قاصیَلا داتی، وِتی: «بِچِن ئو اَ چیئَه گه دیتونَ ئو شنَفتِتونَ بوشِن اَرِه یحیی، گه کورَل بیناآ موئن، شلَلَ مَچِنَ رئیا، جِذامیَل شِفاءَ مَگِرِن، کرَلَ مَشتوئِن، مِردیَل زِنیا موئن ئو خَوَر خَوش پاتِشائی خداون اِلومَ ماو اَر ژارَل. 23خَوزگالَ کسی گه شِک نِهِه اَر مِه.»

24وخدی قاصیَل یحیی چِن، عیسی بِنیا نا اَر قصَه کِردِن اِبارَه یحیی وَه‌گَرد مردِم ئو وِتی: «چینون اِرَه بیاوو چَه بوئینینو؟ چینو زَل گه وَه وا مَشَکی، بوئینینو؟ 25اَنی چینو چَه بوئینینو؟ پیای گه کِراس نرم هایتیِ وَر؟ اونَلی گه جِنِکَل گِروخیمتَ مَهَنِ وَر ئو اِ تجمِلات زِنِه‌یَ مَهَن، هانِ قصرَل پاتِشائَل‌اِر. 26اِسَه چینو چَه بوئینینو؟ چینو پِخَمَری بوئینینو؟ اَاَ، موشِم‌ئونتو، کسی گه اژ پِخَمَریشی سرتِرَ. 27او هَراَ کسَسَ گه اِبارَه اِنوم کِتاو مَلاکی پِخَمَر نُیسیاسی:

«”اِسگَه رسول ووژِم وِر اژ تو کِلَ‌مَهَم

گه رئیِت وِر اژ تو آمادَه مِهِه.“

28موشِم‌ئونتو، گه کَلِنگتِر اژ یحیی تیَمیددهندَه کس اژ دا نِهاتیَسَ دی، وَه ایی حالا، گُجَرتِرین اِنوم پاتِشائی خدا، اژ او کَلِنگتِرَ.»

29کُل مردِمی گه ایی قصَه‌لونَ شنَفت، جُ‌جُ خِراجگیرَل‌یش، تاییدو کِرد گه رئی خدا حخَ، اَرِیَگه وَه دس یحیی تیَمیدو گِرتوئی. 30مِنتائای شیخَل فرقَه فَریسی ئو عالمَل دین گه فِتوائونَ ما، وَه تیَمید نَگِرتِن وَه دس یحیی، هدفی گه خدا اَرِه داشدِنی رَدو کِرد.

31عیسی وِتی: «اِسگَه بوشِم مردِم ایی نسِلَ گانَ چَه؟ چُی چَن؟ 32چُی آیلَلی کِن گه مَنیشِن اِنوم بازار ئو هِنا مَهَن اَر یَکتِری:

«”اَرِه هُمَه نِیمو دا، بازیتو نَهَرد؛

مُووَمو آوِرد، نگیریاینو.“

33اَرِیَگه یحیی هات گه نه نونَ مَهُاردی ئو نه شِراو خُرَّ ماتی؛ ئو هُمَه موشینو، ”مِلاکَت دیری.“ 34کُر اِنسو یِهات گه هم میری ئو هم خُرَّ مِ؛ ئو هُمَه موشینو، ”سِیل کَنی پیای کَ لَمو ئو گُراگُر مَس، رِقیف خِراجگیرَل ئو گناکارَل.“ 35مِنتائای دُریسی حکمت، وَه کُل آیلَلیا، ثابتَ ماو.»

ژَن گناکاری بَشخیاءَ ماو

36یِه روژ یَکی اژ فَریسیَل اَرِه نُو هُاردِن اژ عیسی دَوَت گِرتی. اَسَه او چی اِرَه مال اَ فَریسیَ ئو نیشت اَرسر سِفِرَه. 37اِنوم اَ شیَرَ، ژَن خِروای زِنِه‌یَ مَهَردی گه وخدی شنَفتی عیسی مِمو مال اَ فَریسیَسَ، ظرف مَرمَرینی، پِر اژ روین عطِردار وَه‌گَرد ووژ آوِردی. 38هُنَ گه مَگیریا، هوسیا اَر پِشت‌سَر عیسی، اَرتَک پال او. اَسَه بِنیا ناتی اَر شورین پال عیسی وَه اَسِر چیَمَلی ئو وَه گیسَلی حُشگا کِردِنی ئو پال ماچا کِردی ئو روین عطِردار سائی اَر قِئونا. 39وخدی صائای‌مال یانی اَ فَریسیَ یَه دیتی، وَه وَر ووژا وِتی: «اَرّ ایی پیاءَ اِ راسی پِخَمَر بی، مَذِناسدی ایی ژِنَ گه دَسَ مَنِتی اَر قِ کیَ ئو چطور ژَنی کَ؛ اَرِیَگه او ژَن خِراوی کَ.» 40عیسی وِتون: «اِاِ شَمعون، میا چیتی بوشم‌ئون.» وِتی: «بفرما، استاد!» 41عیسی وِتی: «یَکی بی گه دو نفر بِدیکار بینی: یَکی چَن یِه سال ئو نیم مِزدَس کارگری، ئو یَکی‌تِر چَن یِه مُنگ ئو نیم. 42مِنتائای وخدی چیئونی ناآشد بیَنی‌ئون، قَرتَل هَردِکو بَشخیتی. اِسگَه وَه گُمون تو اژ ایی دو نفرَ کُمینو ویشتِر دوس دیرِتی؟» 43شَمعون جوواوا داتی: «وَه گُمونِم اَوَه گه قَرت ویشتِری داشدی ئو بَشخیاتی‌ئون.» عیسی وِتی: «قضاوتِت دُریسَ.» 44اَسَه هَشارَه کِردی ویرِ اَ ژِنَ ئو وِتیَ شَمعون: «ایی ژِنَ موئینین؟ مِه هاتم اَرِه مالِت، ئو تو آوت اَرِه شورین پالِم ناوِرد، مِنتائای ایی ژِنَ وَه اَسِرَلی پال مِه شوریتی ئو وَه گیسَلی حُشگا کِردِنی! 45تو نوم‌رُی مِنِت ماچا نَهَرد، مِنتائای ایی ژِنَ اژ وخدی هاتِمَس اِنوم، گِری اژ ماچ کِردِن پالِم آنوسیاءَ. 46تو روینِت نَسائی اِسَر مِن‌اِرا، مِنتائای او پائلمَ روین عطِردار سائیتی. 47اِسَه موشِم‌ئونِت، گنائَل ایی ژِنَ گه فِرِه‌یشِن، بَشخیان، اَرِیَگه فِرَه مِحبت کِردی. مِنتائای او گه کمتِر بَشخیاءَ، کمتِریش مِحبتَ مِهِه.» 48اَسَه عیسی وِتیَ اَ ژِنَ: «گنائَلِت بَشخیان!» 49اَسَه اونَلی گه وَه‌گَرد عیسی نیشتوئین اَرسر سِفِرَه وِتونَ یَکتِری: «یَه کیَ گه گنال‌یشَ موئَشخی؟» 50عیسی وِتیَ اَ ژِنَ: «ایمونِت نجادِت داسی، بِچُ مِزِلِت خِر!»

Currently Selected:

لوقا 7: LBT

Highlight

Copy