لوقا 6

عیسی، صائای روژ شَمَه مقدّسَ

1اِ یَکی اژ روژَل شَمَه مقدّس، عیسی اِنومجا زمینَل گَنِم ردَ موئیا ئو شاگردَلی گُلَل گَنِمونَ مَچِنیا ئو اِنوم دَسَلو مَپِرزونو ئو مَهُاردو. 2مِنتائای بِری اژ شیخَل فرقَه فَریسی وِتو: «اَرِه‌چَه کاری مِهِینو گه اَنجوم دائِنی اِ روژ شَمَه مقدّس جائز نیَ؟» 3عیسی جوواوا داتی: «مَر اِنوم نُسَخ مقدّستو نَحیوَنیَ گه داوودِ پاتِشا چَه کِردی، وخدی گه ووژ ئو کسَلی گه وَه‌گَرد بینی وِرسِنی بین؟ 4او چی اِنوم مال خدا ئو نُو پیشکَشی گِرتی ئو هُاردی ئو داتیَ کسَلی گه وَه‌گَرد بینی، وَه‌یاآگه فَخَد کاهنَل صِلائو داشد اَ نونَ بیرِن.» 5اَسَه عیسی وِتیَ اونَل: «کُر اِنسو صائای روژ شَمَه مقدّسَ.»

شِفا پیای گه دس حُشگ بیتی

6عیسی اِ روژ شَمَه مقدّسی‌تِر، چی اِرَه عَبادتگا یهود ئو داشدی تیَلیمَ ماتی. پیای اَر اورَه بیَ گه دس راس حُشگ بیتی. 7مَلِمَل تورات ئو فَریسیَل، عیسی‌ئو آوشدوئیِ کِل چیَم تاگَه بوئینِن آیا اِ روژ شَمَه شِفا مِ یاگَه نه؛ تاگَه دَسپیچی اَرِه مَکوم کِردِنی بِهَنَ دی. 8مِنتائای عیسی گه اژ فگِرَلو باخَوَر بی، وِتیَ اَ پیا گه دس حُشگ بیتی: «بوری بوس اَر ایرَه.» اویش هیزگِرتی ئو قاوا داتی اَر اورَه. 9عیسی وِتیَ اونَل: «اژ هُمَه مَپِرسِم، کُمینو اِ روژ شَمَه جائزَ: خوئی کِردِن یاگَه گَنی کِردِن؟ نجاد گیو اِنسو یاگَه نابود کِردِنی؟» 10اَسَه سِیل کِردی اَر یَکی‌یَکیو ئو وِتیَ اَ پیا: «دسِت دِریژاِرا کَ!»، او هُنَ کِردی، ئو دس آزاآ بیتی. 11مِنتائای اونَل آگِر اژ سرو چی، وَه‌گَرد یَک نیشتِنَ شور گه چَه بارِن اَر سر عیسی.

دوازَه رسول

12اِ یَکی اژ اَ روژِلَ، عیسی اَرِه دوعا چی اَرِه کوی ئو شو تا صو اِ درگا خدا دوعا کِردی. 13وخدی چیَم روژ تِرَکی شاگردَلی هِنا کِردی، ئو اژ نوم اونَل دوازَه نفر دیاری کِردی ئو نُم نانیَ رسول: 14شَمعون (گه نُم ناءَ پطرس)، آندریاس (بِرا پطرس)، یعقوب ئو یوحنا، فیلیپُس ئو بَرتولْما، 15مَتّی ئو توما، یعقوب کُر حَلْفای، شَمعون مَشور وَه غیور، 16یهودا کُر یعقوب، ئو یهودا اَسخَریوطی گه عیسی داءَ گیر دشمن.

’خَوزگالَ هُمَه‘

17ئو عیسی وَه‌گَرد شاگردَلی اژ کوی هاتِ هُار ئو هوسیا اَر جا هُماری. فِرَه کسَل اژ شاگردَلی ئو جیَمیَت کَلِنگی اژ مردِم اِ سِرُسَر هیال یهودیَه ئو اورشلیم، ئو اژ شیَرَل لو آو صور ئو صِیدون، اَر اورَه بینَ. 18اونَل هاتوئین تاگَه قصَه‌ل او بشتوئِن ئو اژ مِرَضَل ووژو شِفا بِگِرِن؛ ئو کسَلی گه روحَل گَن آزارونَ مان، شِفائونَ مَگِرت. 19کُل مردِم تقِلائونَ مَهَرد دس بِنِن اَر قِ عیسی، اَرِیَگه قویَتی اَژینَ ماهاتیَ دِریر گه اونَل کُل شِفاءَ ماتی.

20اَسَه عیسی سِیل کِردی اَر شاگردَلی ئو وِتی:

«خَوزگالَ هُمَه گه ژارینو،

اَرِیَگه پاتِشائی خدا هِن هُمِئَه.

21خَوزگالَ هُمَه گه اِسگَه وِرسِنیئینو،

اَرِیَگه سیرا موئینو.

خَوزگالَ هُمَه گه اِسگَه مَگیرینو،

اَرِیَگه مَخَنینو.

22«خَوزگالَ هُمَه، وخدی گه مردِم وَه خاطر کُر اِنسو، اژ هُمَه بیزار بوئن ئو هُمَه اِنوم ووژو تار کَن ئو دُشمینتون‌ئون دَن ئو بَنُمتو کَن. 23اِ اَ روژَ، خَوشالی بِهَن ئو هَلپَرکی، اَرِیَگه اِنوم آسمو اَجِرتو فِرَه کَلِنگَ. اَرِیَگه اَژداد اون‌یش هُنِئونَ پِخَمَرَل کِرد.

24«مِنتائای هِرّو اَرِه هُمَه گه ثرودمنینو

اَرِیَگه دلگُوئی ووژتو گِرتِتونَ.

25هِرّو اَرِه هُمَه گه اِسگَه سیرینو،

اَرِیَگه وِرسِنیا موئینو.

هِرّو اَرِه هُمَه گه اِسگَه مَخَنینو،

اَرِیَگه هَری مَگِرینونِ سرتو ئو مَگیرینو.

26هِرّو اَرِه هُمَه وخدی گه کُل اَژینتو تیَریفَ مَهَن، اَرِیَگه اَژداد اون‌یش وَه‌گَرد پِخَمَرَل دِروزِنِ هُنِئونَ کِرد.

دوس داشدِن دشمنَل

27«مِنتائای اِاِ کسَلی گه قصَه‌ل مِنَ مَشتوئینو، موشِم‌ئونتو گه دشمنَل ووژتو دوستو داشدوئی ئو وَه اونَلی گه اژ هُمَه بیزارِن، خوئی بِهَن. 28اَرِه اونَلی گه نُئِرَ بینتونَ مَهَن بِرَکتو بِ، ئو اَرِه اونَلی گه آزارتونَ میَن دوعا خِر بِهَن. 29اَرّ کسی وَه چَپالی بِ اَر نوم‌رُیت، اَ لا رُیشِت بارِ وَر. اَرّ کسی چوخات اَژی بِسینی، کِراس‌یشِت اَژی دَریخ نِهَه. 30هر کی چیتی اَژی بِیتی، بِیتی‌ئون ئو وخدی کسی چیئی گه هِن تونَ، وَه زورت اَژی بِسینی، اژ اوئِت نِ گه گِلادِیتیِ دُما. 31وَه‌گَرد مردِم هَراَ جورَ رفدار بِهَن گه مِتو وَه‌گَرد هُمَه رفدار بو.

32«اَرّ فَخَد کَسَلتونی دوس داشدوئی گه دوستو دیرِن، چه افتخارتونی اَرِه دیری؟ جُ‌جُ گناکارَل‌یش دوسدارَل ووژو دوس دیرِن. 33ئو اَرّ فَخَد اَر کسَلی خوئی بِهِینو گه اَر هُمَه خوئیَ مَهَن، چه افتخارتونی اَرِه دیری؟ اَرِیَگه جُ‌جُ گناکارَل‌یش هُنَ مَهَن. 34ئو اَرّ فَخَد وَه کسَلی قَرت بِینو گه چیَمَ‌رئی تِلافَتی اژ اونَلینو، چه افتخارتونی اَرِه دیری؟ جُ‌جُ گناکارَل‌یش قَرتَ میَن گناکارَل تاگَه یِه روژ اِدوارَه اَژینو بِسینِنیا. 35مِنتائای هُمَه، دشمنَلتو دوس داشدوئی ئو خوئی بِهَنَ اَرینو، ئو بی‌یَگه چیَمَ‌رئی تِلافَتی بوئینو، قَرت بیَن‌ئونو، اَرِیَگه اَجِرتو فِرِهءَ، ئو موئینونَ آیلَل خداءِ متعال، اَرِیَگه او وَه‌گَرد ناشُگیرَل ئو گَنَ‌کارَل مِرِبونَ. 36اِسَه رِئیم بوئن، هَرهُنَ گه باوَه‌تو رِئیمَ.

قضاوت کِردِن کسَلی‌تِر

37«قضاوت نَهَن ئو قضاوت نِماو اَرینتو. مَکوم نَهَن ئو مَکوم نِموئینو. بوئَشخِنِن تا بَشخیا بوئینو. 38بیَن، میَن‌ئونتو. کیلَه پِر، تَپیا ئو شَک‌هاوِنتی ئو نِقُ‌نِق مَرِشی اِنوم دامونتو! اَرِیَگه وَه هر کیلَه گه بِینو وَه اَ کیله‌یشَ اِجالی مَسینینو.»

39عیسی ایی متل‌یشَ اَرِه آوِردِنی: «مَر کورَ مَتونی عصاکیش کوری‌تِر بو؟ یانی هَردِک نِمَکُوئِن اِنوم چا؟ 40شاگرد، سرتِر اژ استاد ووژ نیَ، مِنتائای هرکی تیَلیم ئو تربیت کاملا بوتی، ماو اِجور استاد ووژ.

41«اَرّا پر کیَه اِ چیَم بِراتَ موئینین، مِنتائای اژ کُتَلی گه ها نوم چیَم ووژت‌اِر، خافِلین؟ 42یاگَه چطورَ مَتونین وَه بِرات بوشین ”بِرا، بِیل پر کیَه اژ چیَمِت اِربارِم“، مِنتائای کُتَل اِنوم چیَم ووژِت نِموئینین؟ اِاِ ریاکار، اول‌بار کُتَل اژ چیَم ووژِت اِربار، اَسَه بیتِرَ موئینین تاگَه پر کیَه اژ چیَم بِرات اِربارین.

دار ئو ثمری

43«هُیچ دار خوئی، ثمر گَن نِمِ ئو هُیچ دار گَنی، ثمر خو نِمِ. 44هر داری اژ ثمرَ مَشتاسِنی. نه اژ بوتِک دِرِک، انجیرَ مَچِنِن، نه اژ بوتِک تویرِک، انگویر! 45اِنسو خو، اژ خزینَه خو دل ووژ خوئیَ ماریَ دِریر ئو اِنسو گَن اژ خزینَه گَن دل ووژ، گَنیَ ماریَ دِریر، اَرِیَگه زوئون او اژ اَ چیئَه قصَه مِهِه، گه دل اَژی پِرَسی.

مِمار دونا ئو مِمار نایو

46«اَرِه‌چَه مِنَ ’آقا، آقا‘ هِناءَ مِهِینو، مِنتائای اَ چیئَه گه موشِم، اَنجوم نِمِینو؟ 47هر کی با اِرَه تک مِه ئو قصَه‌لِم بشتوئی ئو اَنجومو دِ، نشونتونَ میَم گه اِجور کیَ. 48او اِجور کسی کَ گه اَرِه مال آوشدِنی، زَمی قویل کَنی ئو پِ مال نا اَررُی کمر. وخدی لاف هات ئو لافاو، هاوِنت اَر مالِهَه، نتونستی تَکو دِیتی اَرِیَگه موکَم سازیائی. 49مِنتائای اَوَه گه قصَه‌ل مِه بشتوئی ئو اَنجومو نِ، اِجور کسی کَ گه مالی آوشدی اَر زَمی بی‌پِ. وخدی گه لافاو هاوِنت اَری، جاوارجا رِمیا ئو خِراوی فِرِه هُیشتی اَر جا.»

Currently Selected:

لوقا 6: LBT

Highlight

Copy