لوقا 5

اول شاگردَل عیسی

1یِه روژ گه عیسی هوسیائی اَر لو دریاچَه جِنیسارِت ئو جیَمیَت اِ هر لا زورونَ ماوِرد اَری تاگَه کلوم خدا بشتوئِن، 2عیسی دو قائِق اَر لو دریاچَه دیتی گه مایگیرَل اَژینو هاتوئینَ دِریر، ئو داشدو تورَلونَ مَشُشت. 3اِسَه عیسی سُوار یَکی اژ اَ قائِقِلَ بی گه هِن شَمعون بی ئو اَژی هِست کمی اژ حشگی دویرا بو. اَسَه ووژ نیشتی اِنوم ئو اژ نوم قائِق تیَلیم مردِم داتی. 4وخدی قصَه‌ل تموم بیتی، وِتیَ شَمعون: «قائِقِهَه بیَر اَرِه جا قویلی، ئو تورَلتون اَرِه مای گِرتِن باوژِن اِنوم آو.» 5شَمعون جوواوا داتی: «استاد، تموم شو فِرَه جُورمو کیشی ئو چیمونی نَگِرت. مِنتائای اِسگَه گه تونَ موشین، تورِلَ ماوژِم اِنوم آو.» 6وخدی هُنِئونَ کِرد، اَخِنَ مایو گِرت گه وخد بی تورَلو بُئِری! 7اَژونَبیَ، وَه هَشارَه اژ رِقیفَل ووژو اِنوم قائِقی‌تِرو هِست تاگَه بانَ یاریو. اونَل هاتِن ئو هَردِک قائِقَلو اَخَ پِر کِرد اژ مای گه وخد بی بِچِنَ ژیر آوا. 8وخدی شَمعونِ پطرس یَه دیتی کَتِ رُی پال عیسی ئو وِتی: «اِاِ خداون، اژ مِه دویرا بِگِر، اَرِیَگه مِه پیا گناباری کِم!» 9اَرِیَگه ووژ ئو کُل کسَلی گه وَه‌گَرد بینی، اژ ایی مای صید کِردِنَ، بِلُجوئیو هات. 10یعقوب ئو یوحنا، کُرَل زِبِدی‌یش، گه هُمکار شَمعون بین، هَر ایی حالونَ داشدَ. عیسی وِتیَ شَمعون: «زِلَت نَچو، اَژیرِ دُما اِجال مای، مردِم صیدَ مِهِین.» 11هَریَگه قائِقَلو آوِرد اِرَه حشگی کُل چیو وِل کِرد، چِنَ تُرّ عیسی‌آ.

شِفا پیا جِذامی

12یِه روژتِر وخدی عیسی اِنوم یَکی اژ شیَرَل بی، پیای هات گه جِذام کُل لار اِراگِرتوئی. وخدی عیسی دیتی، رُی نا اَر زَمی ئو لالکیا وِتی: «اِاِ خداون، اَرّ بِت مَتونین شِفام بِین.» 13عیسی دس ووژ دِریژاِرا کِردی ئو دس نا اَر قِ او، ئو وِتی: «مِم؛ شِفا بِگِر!» هِرازِه جِذام اژ اَ پیاءَ چیَ دِریر. 14اَسَه عیسی فِربو دائون گه اِبارَه ایی گپَ چیئی نوشیَ کس، بلکِم وِتون: «بِچُ ووژِت نِشو کاهن دَ ئو قُرونی‌ای گه موسی پِخَمَر اَرِه پاکا بیئِن اژ جِذام فِربو داسی، پیشکَش کَ تاگَه شاتی‌ای بو گه شِفات گِرتیَ.» 15وَه ایی حالا، خَوَر کارَل او ویشتِر پَشخا موئیا، هُنَ گه مردِم فِرِه جیَمَ موئیان تاگَه قصَه‌ل بشتوئِنی ئو اژ مِرَضَلو شِفا بِگِرِن. 16مِنتائای عیسی مَچیا اِرَه جال چَفتی تاگَه دوعا کِ.

شِفا پیا فِلج

17یَکی اژ اَ روژِلَ، گه عیسی داشدی تیَلیمَ ماتی، شیخَل فرقَه فَریسی ئو مَلِمَل تورات اژ اورشلیم ئو کُل شیَرَل جلیل ئو یهودیَه هاتوئین ئو نیشتوئین اَر اورَه، ئو قدِرت خداون اَرِه شِفا مریضَل وَه‌گَرد عیسی بی. 18هَرِ ایی وخدَ چَن پیا، فِلَجونی اَرسر نالیا آوِرد ئو تقِلائو کِرد او بیَرن اِنوم مالا ئو بِنِنی اَر وَر دَم عیسی. 19مِنتائای وخدی اژ زور جیَمیَت رئیونی نَهَردَ دی گه بارنی اِنوم، اَسَه چِن اَرِه سر بُ مالِهَه ئو سفالَل تاقو داءِ لا ئو فِلَجِهَه‌ئون گَرد نالیِهِه اژ نومجا سفالَل رِ کِردَ هُار ئو اِنوم جیَمیَت نائون اَر وَر دَم عیسی. 20عیسی وخدی ایمو اونَل دیتی، وِتی: «اِاِ پیا، گنائَلِت بَشخیان!» 21فَریسیَل ئو مَلِمَل تورات وَه وَر ووژونا فگِرو کِرد: «یَه کیَ گه کِفِرَ موشی؟ بِخِر اژ خدا کیَ مَتونی گنائَل بوئَشخِنی؟» 22وخدی عیسی فیَمی چَه فگِرَ مَهَن، پِرسیتی: «اَرِه‌چَه اِنوم دلتو هُنَ فگِرَ مِهِینو؟ 23وِتِن کُمینو آسُتِرَ: یَگه ”گنائَلِت بَشخیان،“ یاگَه ”هیزگِر ئو بِچوءَ رئیا“؟ 24مِنتائای تاگَه بِذانینو گه کُر اِنسو اَررُی زَمی ایی قدِرت‌واختیارَ دیری گه گنائَل بوئَشخِنی» -عیسی وِتیَ پیا فِلَجِهَه: «وَه تونَ موشِم، هیزگِر، نالیِهَه‌ت هیزدَ ئو بِچُ اِرَه مال!» 25ئو هِرازِه، اَ پیا اَر وَر چیَمَل اُوُ هیزگِرتی ئو رَختاوی گه اِنوم حیوَتوئیتی هیزداتی ئو هُنَ گه خدا جِلالَ ماتی چی اِرَه مال. 26کُل بِلُجوئیو هات، ئو خدائو جِلال دا ئو هُنَ گه ترس کَتوئیَ گیونو، موئِتو: «ایمِرو چیئَل بِلُجوئیمونی دی.»

دَوَت اژ لاوی

27اَسَه عیسی اژ اَ مالَ کِردیَ دِریر ئو خِراجگیری دیتی، گه نُم لاوی بیتی ئو نیشتوئی اِنوم دکَه خِراجگیری، وِتون: «بورَ تُرّ مِنا.» 28لاوی کُل چی وِل کِردی، هیزگِرتی ئو چیَ تُرّ عیسی‌آ.

29لاوی اِ مال ووژ وَه خاطر عیسی مِمونی کَلِنگی گِرتی ئو جیَمیَت فِرِه اژ خِراجگیرَل ئو کسَلی‌تِر، وَه‌گَرد عیسی ئو شاگردَلی نیشتِن اَرسر سِفِرَه. 30مِنتائای شیخَل فرقَه فَریسی ئو بِری اژ مَلِمَل تورات گه اژ دارِدسَه فَریسیَل بین، کِردونَ خُت‌خَت ئو وِتونَ شاگردَل عیسی: «اَرِه‌چَه وَه‌گَرد خِراجگیرَل ئو گناکارَل میرینون ئو خُرَّ مِینو؟» 31عیسی جوواوا داتی: «مریضَلِن گه حکیمونَ مِ، نه آمَل آزا. 32مِه اَرِه آمَل صالح نِهاتِمَ، بلکِم هاتِمَ تاگَه گناکارَل دَوَت بِهَمَ توئَه.»

سؤال اِبارَه روژی گِرتِن

33اونَل وِتونَ عیسی: «شاگردَل یحیی ویشتِر وخدَل هانَ روژی ئو دوعاءَ مَهَن؛ شاگردَل فَریسیَل‌یش هُنَئنَ، مِنتائای شاگردَل تو هَر هانِ هُاردِن ئو خُرّ دائِن.» 34عیسی وِتی‌ئونو: «مَر هُمَه مَتونینو مِمونَل داوات، تا زمونی گه ذُما ها گَردو، وادار کِینونَ روژی گِرتِن؟ 35مِنتائای زمونی مای گه ذُمائون اَژینَ مَسینِن. اَسَه اِ اَ روژِلَ روژیَ مَگِرِن.» 36عیسی ایی متل‌یشَ اَرِه آوِردِنی: «کس پارچَه اژ جِنِک نوو نِمُئری تاگَه پَرو کِیتی اَر قِ جِنِک کُینِه‌یکا. اَرّ هُنَ بِهِه، هم جِنِک نووءِهَه میَئری ئو هم پارچَه نوو اَر قِ جِنِک کُینَه جور اِرنِمای. 37هَمیش کس شِراو نوو نِمَرِشِنی اِنوم مَشگَل کُینَه. اَرِیَگه اَرّ هُنَ بِهِه، اَ شِراو نووءَ مَشگِلَ مَتوقِنی ئو شِراوِهَه مَرِشی ئو مَشگِلِهِ‌یش یِه لا مَچِن. 38اِسَه شِراو نوو باس بِرِشِنین اِنوم مَشگَل نوو. 39ئو کس دُما خُرّ دائِن شِراو کُینَه، شِراو تازَه نِمِیتی، اَرِیَگه موشی: ”شِراو کُینَه بیتِرَ.“»

Currently Selected:

لوقا 5: LBT

Highlight

Copy