لوقا 9

عیسی دوازَه شاگرد کِلَ‌مِهِه

1عیسی اَ دوازَه شاگردَ جیَم کِردی اَر دور یَک ئو قدِرت‌واختیار دانی‌ئون تاگَه کُل مِلاکَتَل بِهَنَ دِریر ئو مِرَضَل شِفا بیَن؛ 2ئو اونَل کِل‌کِردی تاگَه پاتِشائی خدا اِلوم کَن ئو مریضَل شِفا دَن. 3وِتی‌ئونو: «هُیچ اَرِه سفر هیزنیَن، نه موزبِرَه، نه تورَه، نه نُو، نه پیل، ئو جُ‌جُ نه کِراس زیاکی. 4مَچینون اِنوم هر مالیکا، تا وخدی گه هاینون اِنوم اَ شیَرَ، بِمینِن اِنوم اَ مالَ. 5ئو هر جا گه مردِم هُمِه‌ئون‌ِ گِرد نِئیشت، وخدی اژ اَ شیَرَ مِهِینونَ دِریر، توز پال ووژتو بِتَکِنِن تاگَه شاتی‌ای بو اَرضد اُوُ گه خَضو خدا ما اَر سرو.» 6اَسَه کَتِنِ رئی، ئو آبادی اَر آبادیَ مَگیردیان ئو مَرَسیان اَر هر جا، خَوَر خَوش پاتِشائی خدائو اِلومَ مَهَرد ئو مریضَلو شِفاءَ ما.

7وخدی گه خَوَر کُل ایی چیئِلَ رَسی اَر گوش هیرودیس پاتِشا، هیرودیس تَپ اَری شویاتی، اَرِیَگه بِری موئِتو عیسی هَراَ یحیاسَ گه اژ مِردیَل زِنیا بیَ. 8بِری‌تِر موئِتو ایلیا پِخَمَر ظاهر بیَ، ئو بِریشی موئِتو یَکی اژ پِخَمَرَل قدیم زِنیا بیَ. 9مِنتائای هیرودیس وِتی: «مِه ووژِم سر یحیی‌ما بِری. اَسَه یَه کیَ گه ایی چیئِلَ اِبارَه مَشتوئِمی؟» ئو وَه دُم یَه‌آ بیَ گه عیسی بوئینی.

خوراک دائِن وَه پنج هزار نفر

10وخدی رسولَل گِلوناهُارد، هر چَئونی گه کِردوئی اَرِه عیسی‌ئو تیَریف کِرد. اَسَه عیسی اونَل وَه‌گَرد ووژ بِردی اَرِه شیَری گه نُم بِیت‌صِیْدا بیتی تاگَه اَر اورَه تَنیا بوئن. 11مِنتائای مردِم یِئونَ فیَمی، ئو چِنَ دُم اوآ. عیسی‌یش وَه رُی خَوش چیِ گِردو ئو اِبارَه پاتِشائی خدا قصَئَه گَرد کِردِنی ئو کسَلی گه میتاج حِلاج بین، شِفا داتی.

12نزیک اَر ایوارَه، اَ دوازَه رسولَ هاتِن اِرَه تک عیسی ئو وِتو: «ایی مردِمَ مِرخص کَ تاگَه بِچِن اَرِه آبادیَل ئو زمینَل ایی هِناسَ تاگَه خوراک ئو جاسَری بِهَنَ دی، اَرِیَگه ایرَه جا چَفتی کَ.» 13عیسی جوواوا داتی: «هُمَه ووژتو خوراک بیَن‌ئونو.» وِتو: «ایمَه بِخِر اژ پنج نون ئو دو گِلَه ماهی چیئی نِریم، مَر یَگه ووژمو بِچیم ئو اَرِه کُل ایی مردِمَ نُو بِخِریم.» 14اَر اورَه نزیک اَر پنج هزار پیا بین. عیسی وِتیَ شاگردَلی: «مردِم اِ دَسَل پنجا نفری بنیشِنِن.» 15شاگردَل هُنِئونَ کِرد ئو کُل مردِمو نیشو. 16اَسَه عیسی پنج نون ئو دو گِلَه مایِهَه گِرتی، سِیل کِردی اَر آسمو ئو بِرَکت دانی، اونَل کُت کِردی ئو داءَ شاگردَل تاگَه بِنِن اَر وَر مردِم. 17کُل هُاردون ئو سیر بین ئو دوازَه سَلَه‌ئونیش اژ دُما سِفِرَه جیَم دا.

اعتراف پطرس اِبارَه عیسی

18یِه روژ عیسی اِ خلوت ووژ دوعاءَ مَهَردی ئو فَخَد شاگردَلی وَه‌گَرد بینی. پِرسیتی اَژینو: «وَه چیَم مردِما مِه کیِم؟» 19جوواوُ دا: «بِری موشِن یحیی تیَمیددهنده‌ین، بِری‌تِرَ موشِن ایلیا پِخَمَرین، ئو بِریشی موشِن یَکی اژ پِخَمَرَل قدیمین گه زِنیا بیَ.» 20عیسی اژ اونَل پِرسیتی: «هُمَه چَه؟ وَه چیَم هُمَه‌آ مِه کیِم؟» پطرس جوواوا داتی: «مسیحِ خدا گه باس بای.»

پیشگوئی عیسی اِبارَه مرگ ئو زِنیابیئِن ووژ

21اَسَه عیسی قِدَخَن کِردِنی ئو فِربو داتی گه یَه اَرِه کسی نوشِن، 22ئو وِتی: «کُر اِنسو باس عذاو فِرِه‌ی بِکیشی ئو شیخَل ئو رِئیسَل کاهنَل ئو مَلِمَل تورات رد کَنی ئو بِکُشِنی ئو اِ روژ سِئِم اژ مِردیَل زِنیا بو.»

صلیب ووژِت بِگِرِ کول

23اَسَه عیسی وِتیَ کُل: «اَرّ کسی بِیتی وَه تُرّ مِنا بای، باس ووژ حاشا کِ، کُلِ روژی صلیب ووژ بِگِریِ کول ئو وَه تُرّ مِنا بای. 24اَرِیَگه هر کی بِیتی گیو ووژ نجاد دِ، اژ دَسَ مِیتی؛ مِنتائای هر کی وَه خاطر مِه گیو ووژ اژ دس بِ، نجادَ مِیتی. 25اَرِه اِنسو چه فادِه‌ی دیری گه کُل دنیا باریَ دس، مِنتائای گیو ووژ اژ دس بِ یاگَه بِیتیَ وااِرا. 26اَرِیَگه هر کی اژ مِن ئو قصَه‌لِم عار بایتی، کُر اِنسون‌یش اَسَه گه اِنوم جِلال ووژ ئو جِلال باوَه ئو فریشدَه‌ل مقدّس بای، اژ او عارَ مایتی. 27حخیختاً موشِم‌ئونتو، بِری هوسیانَس اَر ایرَه گه تا پاتِشائی خدا نوئینِن، مرگ طُم نِمَهَن.»

عوض بیئِن نوم‌رُی عیسی

28نزیک هشت روژ دُما ایی قصه‌لَ، عیسی، پطرس ئو یوحنا ئو یعقوب وَه‌گَرد ووژ هیزداتی ئو چِن اَرِه بِنار کوی تاگَه دوعا بِهَن. 29هَرهُنَ گه دوعاءَ مَهَردی، نوم‌رُی عوض بیتی ئو جِنِک اِسبی ئو بِریقَه‌دارا بیتی. 30وَه یِگِل دو پیا، یانی موسی ئو ایلیا پِخَمَر، ظاهر بین، وَه‌گَرد او گپو دا. 31اونَل اِنوم جِلال ظاهر بوئین ئو اِبارَه نجاد آمَل وَه مرگ عیسی گه وَه ایی زویَ اِنوم اورشلیم اتفاقَ مَکَت، قصه‌ئونَ مَهَرد. 32پطرس ئو کسَلی گه وَه‌گَرد بینی، اِ خاو سنگینی بین، مِنتائای وخدی گه کامل بینَ خَوَر، جِلال عیسی‌ئو دی ئو اَ دو پیاءَ گه هوسیائینی اَرتَک. 33وخدی گه اَ دوءَ اژ تک عیسی مَچیان، پطرس وِتی: «استاد، خوءَ گه ایمَه هایم اَر ایرَه! بِیل سه کولا باوژیم، یَکی اَرِه تو، یَکی اَرِه موسی ئو یَکی‌شی اَرِه ایلیا.» او نِمَذِناسدی چَه موشی. 34ایی قصَه هَنی اِ دَم پطرس بی گه اُری هات ئو اونَل گِرتیِ وَر. وخدی مَچیان اِنوم اُرِهَه، زِلَ‌تِراقا بین. 35اَسَه دَنگی اژ اُرِهَه هات گه وِتی: «یَسَ کُر مِه گه اوئِم اِنتخاو کِردیَ؛ گوش بِگِرنی‌ئون!» 36وخدی دَنگِهَه کَت، عیسی‌ئونَ تَنیا دی. شاگردَل بی‌کِش مَنِن، ئو اَ موقَع اژ اَ چیئَه گه دوئیو، هُیچونَ کس نوئت.

شِفا کُر مِلاکَت‌دار

37روژ دُماین، وخدی اژ کوی هاتِنَ هُار، جیَمیَت فِرِه هاتِن عیسی بوئینِن. 38وَه یِگِل پیای اِنوم جیَمیَت قارونی: «استاد، مَلالکِم‌ئونِت نظر لِفطی بِهَه اَر کُرِم، اَرِیَگه آویل یَکونَه مِنَ. 39روحی یِگِلی اوءَ مَگِری ئو او جاوارجا نَرَه مَکیشی ئو دل‌تَپَ مَگِری، هُنَ گه دَم کفَ مِهِیتی. ایی روحَ وَه زور اَژی جیاآ ماوتی، ئو زیَم‌دار وِلَ مِهِیتی. 40لالکیامَ شاگردَلِت تاگَه ایی روحَ اَژی بِهَنیَ دِریر، مِنتائای نتونستو.» 41عیسی جوواوا داتی: «اِاِ نسِل بی‌ایمون ئو اَژرئی‌اِرهاتی، تا کِ باس وَه‌گَرد هُمَه بوئم ئو تیَمِلتو کَم؟ کُرِهَت بار اَرِه ایرَه.» 42وخدی گه کُرِهَه ماهات، مِلاکَت او کوئیتی اَر دل زَمی آوشدِ دل‌تَپَ. مِنتائای عیسی تُنا بی اَر اَ روحِ گَنَ ئو کُرِهَه شِفا داتی ئو سپارتَ باوِه. 43مردِم کُل اژ کَلِنگی خدا بِلُجوئیو هات.

هَرهُنَ گه کُل مردِم اژ کارَل عیسی واقونِ دَم پَروئی، او وِتیَ شاگردَلی: 44«خو گوش بِگِرنَ چیئی گه میا اَرِنتو بوشِم: کُر اِنسو وَه دس مردِم تسِلیمَ ماو.» 45مِنتائای اُوُ میَنا ایی قصَه اوُ نَفیَمی؛ ئو اژ اونَل پنهو مَن تاگَه درک نَهَنی؛ ئو زِلَئونَ مَچیا اِبارَه ایی چیئَه اژ عیسی بِپِرسِن.

کی اژ کُل کس کَلِنگتِرَ؟

46یِه روژ دَمَرَگِی کَت اِنوم شاگردَل گه کُمین اَژینو اژ کُل کَلِنگتِرَ. 47عیسی گه اژ فگِرَل اونَل باخَوَر بی، آویلی گِرتی ئو نا اَرتَک ووژ، 48وِتیَ اونَل: «هر کی وَه نُم مِه بِچوءِ گِرد ایی آویلَ، چیَسِ گِرد مِه؛ ئو هر کی بِچوءِ گِرد مِه، چیَسِ گِرد کِل‌کَر مِه. اَرِیَگه اِنوم هُمَه اَ کسَ کَلِنگتِرَ گه اژ کُلتو گُجَرتِر بو.»

49یوحنا وِتی: «استاد، یَکمونی دی گه وَه نوم تو مِلاکَتِلَ مَهَردیَ دِریر، مِنتائای اَرِیَگه اژ ایمَه نوئی، نوامو گِرت.» 50عیسی وِتی: «نوا نَگِرِنی، اَرِیَگه هر کی اَرضد هُمَه نیَ، ها گَردتو.»

51وخدی موقَع ویرِ آسمو بِردِن عیسی نزیکا موئیا، قَص کِردی گه بِچو اَرِه شیَر اورشلیم. 52ئو وِر اژ ووژ قاصیَلی کِل‌کِردی گه چِن اِنوم یَکی اژ آبادیَل سامریَل تاگَه اَرِه او تیارِک بوئینِن. 53مِنتائای مردِم اورَه اوُنِ گِرد نِئیشت، اَرِیَگه مِهِستی بِچو اِرَه اورشلیم. 54وخدی گه یعقوب ئو یوحنا، شاگردَل عیسی یِئونَ دی وِتو: «اِاِ آقا، آیا مِت بوشیم آگِر اژ آسمو باواری ئو کُلو بِهِئَه بیل [هُنَ گه ایلیا پِخَمَر کِردی]؟» 55مِنتائای عیسی کِلاداتی، تُنا بی اَر اونَل. [ئو وِتی: «هُمَه نِمَذانینو اژ کُمین روحینو! 56اَرِیَگه کُر اِنسو نِهاتیَ تاگَه گیو مردِم نابود کِ بلکِم تاگَه نجاد بِ.»] اَسَه چِن اَرِه آبادی‌ای‌تِر.

خیمت اِ تُرّ عیسی‌آ چیئِن

57اَرنوم رئی، یَکی وِتیَ عیسی: «بِچین اِرَه هر جا، مامَ تُرّتا.» 58عیسی جوواوا داتی: «روائَل لونَه دیرِن ئو مَلَل لونَه، مِنتائای کُر اِنسو، جای اَرِه سِرا نائن نِری.» 59عیسی وِتیَ یَکی‌تِر: «بورَ تُرّ مِنا.» مِنتائای او جوواوا داتی: «اِاِ آقا، صِلا بِ تاگَه اول بِچِم ئو دُما هِوَت کِردِن ئو مِردِن باوَه‌م، بِنِمیِ قور. اَسَه بامَ تُرّ تونا.» 60عیسی وِتون: «بِیل مِردیَل، مِردیَل ووژو بِنِنِ قور؛ مِنتائای تو بِچُ ئو پاتِشائی خدا اِلوم کَ.» 61یَکی‌تِر وِتی: «اِاِ آقا، وَه تُرّ تونا مام، مِنتائای صِلا بیَ تاگَه اول بِچِم ئو اژ عتِ‌عیالِم خدافظی کَم.» 62عیسی جوواوا داتی: «کسی گه دس بیَری اَرِه شُئم‌ دائِن ئو کِلا‌بِئِه دُما، لائق پاتِشائی خدا نیَ.»

Currently Selected:

لوقا 9: LBT

Highlight

Copy