لوقا 17
17
وسوسَه گنا
1اَسَه عیسی وِتیَ شاگردَل ووژ: «وسوسَه گنا هَر هَس، مِنتائای هِرّو اَرِه اَوَه گه باعث وسوسَه بو. 2اَرِه بیتِر بیتی گه بَرد اَسیوی باوژِنیِ مِل ئو باوژِنی اِنوم دریا تا یَگه باعث بو یَکی اژ ایی گُجِرِلَ گنا بِهِه. 3اِسَه حُواستونِ ووژتو بو. اَرّ بِرات گنا بِهِه، خِض کِیتی اَری، ئو اَرّ توئَه کِردی، بوئَشخِنی. 4اَرّ روژی هفت گِل گنات اَری بِهِه، ئو هفت گِل گِلابیری اِرَه تک تو ئو بوشی: ”توئَه مَهَم،“ تو باس بوئَشخینی.»
5رسولَل وِتونَ عیسی خداون: «ایمو ایمَه ویشتِرا کَ!» 6عیسی خداون جوواوا داتی: «اَرّ ایمونی وَه گُجَری دُ خردلتو داشد، مَتونِستو وَه ایی دار توتَ بوشینو: اژ ریشی بورَ دِریر ئو بِچُک اِنوم دریا، ئو اَوَه گوشَ مَگِرتی‌ئونتو.
7«کُماین اژ هُمِئَه گه خُلُمِهِه گایاری یاگَه شوئونی بِهِه ئو وخدی گه اژ صَرا گِلابیری، بوشتی‌ئون: ”بوری، بِنیش ئو بیر“؟ 8آیا نِموشتی‌ئون: ”شُم مِه حاضر کَ ئو قِت اَرِه خِلمت اژ مِه بوئن تاگَه بیرِم ئو خُرّ دَم، ئو دُما مِه تو بیر ئو خُرّ دَ“؟ 9آیا منّت‌بار خُلُمی ماو گه فِربونی اَنجوم داسی؟ 10اِسَه، هُمِه‌یش هَرهُنَ وخدی کُل فِربونَلی گه داونَس‌ئونتو، اَنجومتو دا، بوشِن: ”خُلُمَل نالائِقی کیم ئو فَخَد وظیفَه ووژمو انجوممو داءَ.“»
شِفا گِرتِن دیَه جِذامی
11عیسی اَرنوم رئی ووژ ویرِ شیَر اورشلیم، اژ مرز شیَر سامرَه ئو جلیل کِلَ موئیا. 12اَسَه حِنی گه هات اِنوم آبادی‌ایکا، دیَه نفر جِذامی هاتِنیِ وَرپیریا. اونَل هوسیانَ دویرا 13وَه دَنگ کَلِنگ قارونو: «اِاِ عیسی، اِاِ استاد ریَم کَ اَر ایمَه.» 14وخدی عیسی اونَل دیتی، وِتی: «بِچِن ئو ووژتو نِشو کاهن دَن.» اونَل کَتِنِ رئی چِن ئو اَرنوم رئی اژ جِذام پاکا بین. 15یَکی اژ اونَل وخدی دیتی شِفا گِرتیَسی، هَرهُنَ گه وَه دَنگ کَلِنگا خدا ستائشتَ مَهَردی، گِلاهُاردی 16ئو ووژ آوشدی اَر مِل پال عیسی‌اِرا ئو اَژی تشکر کِرد. اَ جِذامیَ سامری‌ای بی. 17عیسی وِتی: «مَر اَ دیَه نفرَ کُل پاکا نوئین؟ اَنی اَ نُه نفرِتِرَ هان اَر کو؟ 18آیا بِخِر اژ ایی خَریوَه، کسی‌تِر گِلانَهُاردی تاگَه خدا ستائشت کِ؟» 19اَسَه وِتیَ اَ پیا: «هیزگِر ئو بِچُ، ایمونِت شِفات داسی.»
هاتِن پاتِشائی خدا
20عیسی اِ جوواو شیخَل فرقَه فَریسی گه پِرسیوئیو پاتِشائی خدا کیَ مای، وِتی: «پاتِشائی خدا جوری نِمای گه بتونین وَه چیَم بوئینینی، 21ئو کسی نِموشی هار ایرَه یاگَه هار اورَه، اَرِیَگه پاتِشائی خدا ها نومجا هُمِه‌اِر.»
22اَسَه وِتیَ شاگردَلی: «روژَلی مای گه آواخدَ مُوازینو یَکی اژ روژَل کُر اِنسو بوئینینو، مِنتائای نِموئینینو. 23مردِمَ موشِن‌ئونتو: ”سِیل کَن، او هار ایرَه“ یاگَه ”سِیل کَن، او هار اورَه.“ نَچِن ئو تُرّو نَگِرِن. 24اَرِیَگه هَراَ جورَ گه تَش‌بِریق وَه گِری مَدَرشخی ئو آسمون اژ ایی پر تا اَ پر روشتاآ مِهِه، کُر اِنسون‌یش اِنوم روژ ووژ هُنَ ماوَ. 25مِنتائای اول‌بار باس عذاو فِرِه بِکیشی ئو اژ جونِم ایی نسِلَ رد بو. 26روژَل کُر اِنسونَ ماو اِجور روژَل نوح. 27مردِم مَهُاردون ئو خُرّونَ ما ئو ژَنونَ مَحُاست ئو شویونَ مَهَرد تا اَ روژَ گه نوح چیِ نوم کَشتی. اَسَه لافاو کَتِ رئی ئو قِر اژ کُل آوِردِنی. 28اِ زَمو لوط‌یش هُنَ بیَ. مردِم داشدو مَهُاردون ئو خُرّونَ ما ئو مَخِریان ئو مَفِروتو ئو کِشتونَ مَهَرد ئو مالونَ ماوشد. 29مِنتائای روژی گه لوط اژ شیَر سُدوم داءَ دِریر، آگِر ئو گوگرد اژ آسمو واری ئو قِر اژ کُل آوِردِنی. 30روژ ظاهر بیئِن کُر اِنسون‌یش هِرِ ایی جورَ ماوَ. 31اِ اَ روژَ، کسی گه ها سربُ مالا ئو پِرتالَل هانی اِنوم مال، اَرِه هیزدائِنو ناءَ هُار. ئو اَوَه گه ها سر زَمی گِلانیر اِرَه مال. 32ژَن لوط بارنَ ویرتو! 33هَر کی بِیتی گیو ووژ نجاد دِ، اژ کیس اِرَمَچوتی، ئو هر کی گیو ووژ اژ کیس اِربِچوتی، نجادَ مِیتی. 34موشِم‌ئونتو، اِ اَ شوءَ اژ دو نفر گه سرو ناس اَرسر یِه بالیشت، یَکی میَرِن ئو یَکی‌تِرَ مَمینی اَر جا. 35اژ دو ژَن گه وَه‌گَرد یَک دَسَرَ مَهَن، یَکی میَرِن ئو یَکی‌تِرَ مَمینی اَر جا. 36[هَمیش اژ دو پیا گه هانِ سر زَمی، یَکی میَرِن ئو یَکی‌تِرَ مَمینی اَر جا.]» 37اونَل اژ عیسی‌ئو پِرسی: «اَرَه کو، اِاِ خداون؟» عیسی جوواوا داتی: «هر جا لَشی بو، مِل‌رویتَل جیَمَ موئن اَر اورَه!»
Currently Selected:
لوقا 17: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
