لوقا 18

متل بیوَه‌ژَن سِمِنج

1عیسی اَرِه شاگردَل وِتی تا نِشو دِ گه باس هَر دوعا بِهَن ئو هرگِس دلسردا نوئن. 2وِتی: «اِنوم شیَری قاضی‌ای بی گه نه اژ خدا زِلَه مَچیاتی ئو نه هَمیَتَ ماتیَ خَلک خدا. 3اِ اَ شیَرَ بیوَه‌ژَنی بی گه گُراگُر ماهاتی اَرِه تک ئو اَژینَ مِهِست حخ اژ دشمن بِسینتی. 4قاضی قِیلی هَمیَت‌ئون نا. مِنتائای دُماخِرِ وَه لا ووژا وِتی: ”دُریسَ گه زِلَم اژ خدا نِمَچو ئو هَمیَت نِمیَمَ خَلک خدایش، 5مِنتائای اَرِیَگه ایی بیوَه‌ژِنَ هَر مِنَ ماوژیِ زیَمَت، حخَ مَسینِمی، تاناخواد گُراگُر بای ئو مِه آس کِ!“» 6اَسَه عیسی خداون وِتی: «شنَفتِتو اَ قاضی بی‌انصافَ چَه وِتی؟ 7اِسَه، مَر خدا نِمَرَسیَ دای اونَلی گه ووژ دیاری کِردِنَسی گه شو ئو روژ اِمدایَ مارِنیِ درگا؟ یانی ایی کارَ هَراَ ماوژیِ دُما؟ 8موشِم‌ئونتو گه وَه ایی زویَ مَرَسی دایو. مِنتائای وخدی گه کُر اِنسو بای، یانی ایمونی اَررُی زمینَ مِهِئَه دی؟»

متل فَریسی ئو خِراجگیر

9اَسَه اَرِه بِری گه اطمینونونَ صالح‌بیئین ووژو داشد ئو باقی مردِمونَ چیَم خواریا سِیلَ مَهَرد، ایی متلَ وِتی: 10«دو نفر اَرِه عَبادت چِنَ نوم معبدا، یَکی اَژینو، اژ شیخَل فرقَه فَریسی ئو یَکی‌تِر خِراجگیر بی. 11فَریسیِهَه هوسیا ئو وَه لا ووژا هُنَ دوعا کِردی: ”اِاِ خدا، شگِرتَ مَهَم گه اِجور کسَلی‌تِر، دُز ئو ظالم ئو زِنهاکار نیِم، ئو اِجور ایی خِراجگیریشَ نیِم. 12هفته‌ی دو گِل روژیَ مَگِرِم ئو دیَه‌یَک هر چی گه مارِمَ دَسَ میَم.“ 13مِنتائای اَ خِراجگیرَ هوسیا اَر اَ دویرا ئو نِهِستی جُ‌جُ چیَمَل ووژ ویر آسمو بِلِنگ کِ، بلکِم دا اَر سینَه ووژ ئو وِتی: ”اِاِ خدا، ریَم کَ اَر مِنِ گنابار.“ 14موشِم‌ئونتو، ایی پیا خِراجگیرَ صالح وَه حساو یِهات ئو چی اِرَه مال، نه اَ یَکَ. اَرِیَگه هر کی ووژ بیَریِ رُ، خوارَ ماو ئو هر کی ووژ فِروتنا کِ، سربِلِنگا ماو.»

بِیلِن آیلَل بان اِرَه تک مِه

15مردِم جُ‌جُ کورپَه‌لونَ ماوِرد اِرَه تک عیسی تاگَه دس بِنی اَرنوم سرو. شاگردَل وخدی یِئونَ دی خِضو کِرد اَر مردِم. 16مِنتائای عیسی اونَل هِنا کِردی اِرَه تک ووژ ئو وِتی: «بِیلِن آیلَل بان اِرَه تک مِه؛ نوائو نَگِرِن، اَرِیَگه پاتِشائی خدا اَرِه هُنَ کسَلی کَ. 17حخیختاً، موشِم‌ئونتو، هر کی اِجور آویلی نَچوءِ گِرد پاتِشائی خداآ، هرگِس نِمَچوتی اِنوما.»

رِئیس ثرودمن

18یَکی اژ رِئیسَل اژ عیسی پِرسیتی: «اِاِ استادِ خو، چَه بِهَم تاگَه ژییاین ابدی بیَرمَ میرات؟» 19عیسی جوواوا داتی: «اَرِه‌چَه موشین‌ئونِم خو؟ هُیچ‌کس خو نیَ مَر تَنیا خدا. 20حکمَل شریعتَ مَذانین: زِنها نِهَه، آم نَکُش، دُزی نِهَه، شاتی دِرو نیَ، ئو عزّت بِن اَر باوِه ئو دات.» 21وِتی: «کُل یوئنَمَ هِر اژ آویلی آوِردیَسَ جا.» 22عیسی وخدی یَه شنَفتی وِتی: «هَنی یِه چی کَم دیرین؛ اَ چیئَه گه دیرین بفِروش ئو پیل بیَرا کِیتی اِنوم ژارَل، گه اِ آسمو گنجی دیرین. اَسَه بورَ تُرّ مِنا.» 23اَ پیا وخدی یَه شنَفتی، فِرَه پَژارا بی، اَرِیَگه ثرود فِرِه داشدی. 24عیسی وخدی دیتی اَ پیا پَژارا بیَ، وِتی: «اَرِه ثرودمنَل چَنی سخدَ گه بِچِن اِنوم پاتِشائی خداآ! 25اَرِیَگه رد بیئِن شتِر اژ کُنا دَرزِن، آسُتِر اژ یَسَ گه آم ثرودمنی بِچو اِنوم پاتِشائی خداآ.»

26کسَلی گه ایی قصه‌ئونَ شنَفت، پِرسیو: «اَنی کیَ مَتونی نجاد بِگِری؟» 27عیسی وِتی: «اَ چیئَه گه اَرِه اِنسو مِحالَ، اَرِه خدا مِحال نیَ.»

28پطرس وِتی: «سِیل کَ، ایمَه مال ئو زِنِه‌ی ووژمو وِل کِردیَ ئو هاتیمونَسَ تُرّ تونا!» 29عیسی وِتی‌ئونو: «حخیختاً، موشِم‌ئونتو، کسی نیَ گه وَه خاطر پاتِشائی خدا مال یا ژَن یا بِرال یا باوَه‌‌دا یاگَه آیلَل ووژ وِل کِ، 30ئو اِنوم هَرایی زمونَ چَن بِرُوَر ناریَ دس، ئو اِنوم زمون‌یشی گه دیری مای، ژییاین ابدی ناوتیَ نَصُی.»

عیسی اَرِه گِل سِئِم مرگ ئو زِنیابیئِن ووژ پیشگوئیَ مِهِه

31اَسَه اَ دوازَه نفرَ کیشیتیِ پِنِه‌ ئو وِتی‌ئونو: «اِسگَه مَچیم اِرَه اورشلیم. اَر اورَه کُل چیئَلی گه پِخَمَرَل اِبارَه کُر اِنسونو نُیسونیَ وَه اَنجومَ مَرَسی. 32اَرِیَگه میَنیَ دس خِرِیهودیَلا. اونَل تیزمَتَلَ مَهَنی ئو دُشمینَ میَن‌ئون ئو تِفَ ماوژِنی اَررُی ئو وَه شلاخَ میَنی اَری ئو مَکُشِنی. 33مِنتائای روژ سِئِم زِنیا ماو.» 34شاگردَل، هُیچ‌کُم اژ ایی قصَه‌لونَ نَفیَمی. میَنا قصَه عیسی اَژینو پنهو بی ئو نَفیَمین گه اِبارَه چَه قصَه مِهِه.

شِفا حُاسکَری گه کور بی

35وخدی عیسی رَسی اَر هِناس شیَر اَریحا، پیا کوری نیشتوئی اَر لا جَدَه‌آ ئو حُاسَ مَهَردی. 36وخدی دَنگ جیَمیَتی گه اژ اورَه کِلَ موئیان شنَفتی، پِرسیتی: «چِیکَ؟» 37وِتو: «عیسیِ ناصری دیری کِلَ ماو.» 38قارونی: «اِاِ عیسی، کُر داوودِ پاتِشا، ریَم کَ اَر مِه!» 39کسَلی گه اِ نوا جیَمیَتَ مَچیان خِضو کِرد اَری ئو هِستو گه دَنگی باوژی. مِنتائای او ویشتِر قارونی: «اِاِ کُر داوودِ پاتِشا، ریَم کَ اَر مِه!» 40اَسَه عیسی هوسیا ئو فِربو داتی گه اَ پیاءَ بارنی اِرَه تک. وخدی هاتِ وَر، عیسی اَژی پِرسی: 41«چَتَ مِ اَرِنِت بِهَم؟» جوواوا داتی: «اِاِ آقا، مِم گه بیناآ بوئم.» 42عیسی وِتون: «بیناآ بو! ایمونِت شِفات داسی.» 43پیا کورِهَه جاوارجا چیَم بیناآ بیتی ئو هَرهُنَ گه داشدی خدا جِلالَ ماتی، چیَ تُرّ عیسی‌آ. مردِم وخدی گه یِئونَ دی، شگِر خدائو کِرد.

Currently Selected:

لوقا 18: LBT

Highlight

Copy