لوقا 16
16
متل پیشکار قُشمَه
1اَسَه عیسی وِتیَ شاگردَلی: «پیا ثرودمنی پیشکاری داشدی. وخدی خَوَر رَسیتی‌ئون گه پیشکارِهَه دارایی او داسیَ رِفت‌اِرا، 2هِنا کِرداِر ئو پِرسیتی: ”یَه چیَ گه اِبارَه تونَ مَشتوئِم؟ حساو کِتاوَل ووژِت بِهَه گه دیَر نِمَتونین پیشکار مِه بوئین.“
3«پیشکارِهَه وَه لا ووژا وِتی: ”چَه بِهَم؟ اَرباوِم میا کارِهَم اَژی بِسینی. قویَت نِرِم زَمی بِکَنِم ئو عاریشمَ مای بِچمَ حُاس کِردِن. 4فیَمیم باس چَه بِهَم تا وخدی گه اژ پیشکاری کَتِم، کسَلی بوئن گه اِ مالَلو بِیلِنم‌ِ گِرد.“ 5اِسَه، یَکی یَکی بِدیکارَل اَرباوِهِه هِنا کِردی اَرِه تک ووژ. اژ اولینِهَه پِرسیتی: ”چَنی بِدیکار اَرباو مِنین؟“ 6جوواوا داتی: ”صد هیزَه روین زِتو.“ وِتی: ”بِگِر، یَه حساو تونَ، زوی بِنیش ئو بِنُیسِن پنجا هیزَه!“ 7اَسَه اژ یَکی‌تِر پِرسیتی: ”تو چَنی بِدیکارین؟“ جوواوا داتی: ”صد خَلوار گَنِم.“ وِتی: ”بِگِر، یَه حساو تونَ ئو بِنُیسِن هشتاد خَلوار!“
8«اَرباوِهَه، اَرِه زِرِنگی گه پیشکار قُشمَه کِردوئیتی، اَژی تیَریف کِرد؛ اَرِیَگه آیلَل ایی دنیا اِنوم کارَلو وَه‌گَرد هُم‌دورَه‌ل ووژو، اژ آیلَل نُیر زرِنگتِرِن. 9موشِم‌ئونتو گه مالِ‌منال فاسد ایی دنیاءَ اَرِه یَه خرج بِهَن گه رِقیفَلی بِهِینونَ دی تا وخدی گه اژ اَ ثرودَ چیئی نَمَن، اِنوم مالَل ابدی بِیلِنتونِ گِرد.
10«اَوَه گه اِ چیئَل گُجَر اَمونتدار بو، اِ چیئَل کَلِنگ‌یش اَمونتدارَ ماو، ئو اَوَه گه اِ چیئَل گُجَر اَمونتدار ناو، اِ چیئَل کَلِنگ‌یش اَمونتدار نِماو. 11اِسَه اَرّ اِ مالِ‌منال فاسد ایی دنیاءَ اَمونتدار نوئینو، کیَ گه اَ گنج حخیخیَ بِئَه دس هُمَه‌آ؟ 12ئو اَرّ هُمَه اَمونتدار مالِ‌منال کسی‌تِر نوئینو، کیَ گه مالِ‌منال ووژتو بِ‌ئونتو؟ 13هُیچ خُلُمی نِمَتونی خِلمت اژ دو اَرباو بِهِه، اَرِیَگه یاگَه اژ یَکی بیزارَ ماو ئو اَ یَکَ دوس دیری، ئو یا گیو ووژَ مِهِئَه خِر یَکی ئو اَ یَکَ خوارَ مِهِه. نِمَتونینو هم خِلمت اژ خدا بِهِینو، هم خِلمت اژ پیل.»
14شیخَل فرقَه فَریسی گه پیل‌دوس بین وخدی ایی قصَه‌ل عیسی‌ئونَ شنَفت ریشخَنو کِرد. 15عیسی وِتی‌ئونو: «هُمَه هَراَ کسَلینونَ گه ووژتون اَرتَک مردِم صالح نشونَ مِینو، مِنتائای خدا اژ دلتو خَوَر دیری. اَ چیئَه گه وَه چیَم مردِما اَرزشد دیری، وَه چیَم خداآ کفارت‌دارَ!
16«زَمو تورات ئو پِخَمَرَل هَر تا زَمو یحیی بی. اژ اَوِءِ دُما، خَوَر خَوش پاتِشائی خدا اِلوم بیَ ئو کُل کسی تقِلا مِهِه هَر اَ زور بِچوتی اِنوما. 17ئو هُنِ‌یشَ، آسُتِرَ گه آسمون ئو زَمی نابود بو تا یَگه نُخدِه اژ تورات اژ قِلم بِکُوءِ!
18«هر کی ژَن ووژ طِلاخ دِ ئو ژَنی‌تِر بُوازی، زِنها کِردیَسی، ئو هَمیش هر کی ژَنی گه طِلاخو داءَ، بُوازی، زِنها کِردیَسی.»
پیا ثرودمن ئو ایلعازَر ژار
19«پیا ثرودمنی بی گه هَر کِراس خیمتی کاوی اژ کتون نرمَ مَهَردی‌ِ وَر ئو کُلِ روژی وَه جَشتَل کَلِنگی خَوشَ مگذَرونی. 20ژار ایلعازَر نُمونی مَنیا اَر دِراخِل مال اَ پیل‌دارَ، گه زیَم کُل لار اِراگِرتوئی. 21ایلعازَر آواخد بیتی وَه حُیردَه خوراکَلی گه اژ دُما سِفِرَه اَ آم ثرودمنَ مَکَت‌اِرا، ووژ سیرا کِ. جُ‌جُ سگَل‌یشَ ماهاتِن ئو زیَمِلِهِه‌ئونا مَلِست. 22دُماخِرِ اَ ژارَ مِرد ئو فریشدَه‌ل اوُ بِرد اِرَه تک ابراهیم. پیا ثرودمنِهِه‌یش مِرد ئو نائونِ قور. 23اِنوم دنیا مِردیَل اِنوم عذاو اورَه چیَم هیزداتی ئو اژ دویر، ابراهیم دیتی گه ایلعازَر هایتی اَر لِف. 24اَسَه وَه دَنگ کَلِنگا وِتی: ”اِاِ باوَه‌م ابراهیم، ریَم کَ اَر مِه ئو ایلعازَر کِل‌کَ تا تُک کِلِک ووژ وَه آو تَر کِ ئو زوئونِم حُنِکا کِ، اَرِیَگه اِنوم ایی آگِرَ عذاوَ مَکیشِم.“ 25مِنتائای ابراهیم جوواوا داتی: ”اِاِ رولَه، بارَ ویرِت گه اِنوم زِنِه‌یت، چیئَل خوتی داشد، ئو چیئَل گَن بیَ نَصُی ایلعازَر. اِسگَه او اَر ایرَه ها آسائشت‌اِر ئو تو هاینِ عذاواِر. 26بِخِر اژ یَه، اِنومجا ایمَه ئو هُمَه هَور قویلی هَس؛ اونَلی گه بِ‌ئون اژ ایرَه بان اِرَه تک تو نِمَتونِن، ئو اون‌یشَ گه هان اَر اورَه نِمَتونِن بان اِرَه تک ایمَه.“ 27ثرودمنِهَه وِتی: ”اِسَه، اِاِ باوَه، مَلالکِم‌ئونِت گه ایلعازَر کِل‌کِین اِرَه مال باوَه‌م، 28اَرِیَگه مِه پنج بِرا دیرِم. کِل‌کِیتی تاگَه هُشتار ب‌ِئونو، ناخواد اون‌یش بِکُوئِنِ ایی جا عذاواِرَ.“ 29ابراهیم وِتی: ”اونَل موسی ئو پِخَمَرَل دیرِن، اِسَه گوش بِگِرنَ قصَه‌ل اُوُ.“ 30وِتی: ”نه، اِاِ باوَه ابراهیم، اَرّ کسی اژ مِردیَل بِچو اِرَه تَکو، توئَه مَهَن.“ 31ابراهیم وِتون: ”اَرّ گوش نَگِرِنَ موسی ئو پِخَمَرَل، جُ‌جُ اَرّ کسی‌شی اژ مِردیَل زِنیا بو، قانی نِموئن.“»
Currently Selected:
لوقا 16: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
