یوحنا 20

عیسی زِنیا ماو

1اِ روژ اول هفتَه، وِرِصو، وخدی گه هُوا هَنی تیَریک بی، مریم مَجدَلیَّه هات اَرِه لَحَکِهَه ئو دیتی گه بَردِهِئون‌ِ وَر اَوَه هیزداءَ. 2اَسَه وَه دو چی اَرِه تک شَمعونِ پطرس ئو اَ شاگردی‌تِرَ گه عیسی او دوس داشدی، ئو وِتیَ بینو: «آقامون‌ اژ لَحَکِهِئو بِردیَ ئو نِمَذانیم نائونَس اَر کو.» 3اَسَه پطرس وَه‌گَرد اَ شاگردی‌تِرَ هاتَ دِریر، ئو کَتِن رئی چِن ویرِ لا لَحَکِهَه. 4ئو هَر دِک وَه‌گَرد یَک مَنیان‌ِ دو؛ مِنتائای اَ شاگردی‌تِرَ زویتِر چی، کَت اِ نوا پطرس ئو اول نفر رَسی اَر لَحَکِهَه. 5اَسَه چَمیا، سِیل کِردی ئو دیتی گه پارچَه‌ل کَفَنِهَه هان اَر اورَه، مِنتائای نَچی اِنوم لَحَکِهَه. 6شَمعونِ پطرس‌یش هاتَ دُم اوآ ئو چی اِنوم لَحَکِهَه، دیتی گه پارچَه‌ل کفن هان اَر اورَه، 7مِنتائای پَروئی گه بَسدوئیونِ دور سر عیسی‌آ اَر لا پارچَه‌ل کفن نوئی، بلکِم تاکَریا وَه جیا نیریاس اَر جای‌تِر. 8اَسَه اَ شاگِردی‌تِریشَ گه اول نفر رَسوئی اَر لَحَک، اویش هات اِنوم، دیتی ئو ایمو آوِردی. 9اَرِیَگه هَنی میَنا نُسَخ مقدّسو نفیَموئی گه او باس اژ مِردیَل زِنیا بو. 10اَسَه اَ دو شاگردَ گِلوناهُارد اَرِه مال ووژو.

عیسی ووژ اَر مریم مَجدَلیّه ظاهرَ مِهِه

11مِنتائای مریم، اِدِریر، نزیک لَحَکِهَه هوسیائی ئو مَگیریا. او هَرهُنَ گه مَگیریا، چَمیا تاگَه سِیل نوم لَحَکِهَه بِهِه. 12اَسَه دو فریشدَه دیتی گه جِنِکَل اِسبی اِوَرو بی ئو اَر اورَه گه جنازَه عیسی‌ئو نائی، یَکی اِ جا سر ئو یَکی‌تِر اِ جا پال نیشتوئی. 13اونَل وِتونَ بی: «اِ ژَن، اَرِه‌چَه مَگیرین؟» او جوواو داتی: «آقام بِردونَ ئو نِمَذانِم نائونَس اَر کو.» 14وخدی یَه وِتی، گِلاهُاردی ئو عیسی دیتی گه هوسیاءَ، مِنتائای نَفیَمی گه او عیسیَ. 15عیسی وِتَ بی: «اِ ژَن، اَرِه‌چَه مَگیرین؟ مِنِی کیَ مِهِین؟» مریم گُمو کِردی گه او باخاوُنَ، وِتی: «آقا، اَرّ تو اوئِت هیزداءَ، بوشَ بینِم ناتَس اَر کو، تاگَه بِچِم ئو، هیزدَمی.» 16عیسی هِنا کِردی: «مریم!» مریم کِلاداتیِ دُما، ئو وَه زوئو آرامی وِتی: «رَبّونی!» (یانی استاد). 17عیسی وِتَ بی: «دس ناوژ اَر مِلِم، اَرِیَگه هَنی نَچِمَسَ بِلِنگ اَر تک باوَه. بلکِم بِچُ اَرِه تک بِرالِم ئو بوشَ بینو گه مَچِمِ بِلِنگ اَر تک باوَه ووژِم ئو باوَه هُمَه ئو خداءِ ووژِم ئو خداءِ هُمَه.» 18مریم مَجدَلیّه چی ئو خَوَر داتیَ شاگردَل گه «خداونِم دیَ!» ئو اَ چیئَه گه وِتوئیَ بی، وِتیَ بینو.

عیسی ووژ اَر شاگردَل ظاهرَ مِهِه

19هَراَ روژَ ایوارَه، گه روژ اول هفتَه بی، وخدی گه شاگردَل جیَم بینِ دور یَک ئو دِرَل اژ ترس یهودیَل کِلیل بین، عیسی هات ئو اِنوم اونَل هوسیا ئو وِتی: «سِلام اَر هُمَه!» 20وخدی یَه وِتی، دَسَل ئو پیَلی ووژ نشونو داتی. شاگردَل وخدی خداونو دی خَوشالا بین. 21عیسی اِدوارَه وِتیَ بینو: «سِلام اَر هُمَه! هَرهُنَ گه باوَه، مِه کِل‌کِردی، مِن‌یش هُمَه کِلَ‌مَهَم.» 22وخدی یَه وِتی، پِف کِردی اَر نوم رُی شاگردَل ئو وِتی: «روح‌القدس بِگِرِن. 23اَرّ گنائَل کسی بوئَشخینو، بَشخیا ماو اَرِنو؛ ئو اَرّ گنائَل کسی نَبَشخیاءَ بِیلینو، نَبَشخیا مَمینی.»

عیسی ئو توما

24وخدی گه عیسی هات، توما، یَکی اژ اَ دوازَه نفرَ، گه لِفونی هِنائونَ مَهَرد، وَه‌گَرد اونَل نوئی. 25اَسَه شاگردَلی‌تِر وِتونَ بی: «خداونمو دیَ!» مِنتائای توما وِتیَ بینو: «تاگَه ووژِم جا میخَل اَر رُی دَسَلی نوئینِم ئو کِلِک ووژِم نَهَمِ جا میخَل ئو دس ووژِم نَنم‌ اَر کُنا پیَلی‌ای، باوار نِمَهَم.» 26دُما هشت روژ، شاگردَل عیسی اِدوارَه اِنوم مال بین ئو تومایش وَه‌گَردو بی. وَه‌یاآگه دِرَل کِلیل بین، عیسی هات ئو اِنوم اونَل هوسیا ئو وِتی: «سِلام اَر هُمَه!» 27اَسَه وِتیَ توما: «کِلِک ووژِت بِن اَر ایرَه ئو دَسَلِم بوئین، ئو دس ووژِت بارِ وَر ئو بِن اَر کُنا پیَلیم ئو بی‌ایمو نو، بلکِم باوارِت داشدوئی.» 28توما وِتَ بی: «خداونِ مِه ئو خداءِ مِه!» 29عیسی وِتی: «یانی اَرِیَگه مِنِت دیَ ایمونِت آوِرد؟ خَوزگالَ اونَل گه نِئیونَ ئو ایمونو آوِردیَ.»

قَص ایی کِتاوَ چیَ؟

30عیسی نشونَه‌ل ئو مُجِزَه‌ل فِرَه‌تِری اَر تک شاگردَل اَنجوم داتی گه اِنوم ایی کِتاوَ نَنُیسیاءَ. 31مِنتائای یوئنَ نُیسیاءَ تاگَه ایمو بارینو گه عیسی هَراَ مسیحَسَ گه باس بای، کُر خداءَ، ئو تا وَه ایی ایمونَ، وَه نُم او ژییاینتو داشدوئی.

Currently Selected:

یوحنا 20: LBT

Highlight

Copy