یوحنا 21
21
عیسی ووژ اَر هفت نفر اژ شاگردَل ظاهرَ مِهِه
1دُما یَه، عیسی یِگِلی‌تِر اِ اَکو دریاچَه تیبِریَه گه هَراَ دریاچَه جلیلَ ووژ اَر شاگردَل ظاهر کِردی. ئو هُنَ ظاهر بی: 2یِه روژ شَمعونِ پطرس، توماءِ مَشور وَه لِفونی، نَتَنائیل اِ مردِم قانا جلیل، کُرَل زِبِدی ئو دو شاگردی‌تِر وَه‌گَرد یَک بین. 3شَمعونِ پطرس وِتیَ بینو: «مِنَ مَچِمَ ماهی گِرتِن.» اونَل وِتو: «ایمِه‌یشَ مایمَ گَردِت.» اَسَه چِنَ دِریر، ئو سُوار قائِق بین. مِنتائای اَ شوءَ چیونی نَگِرت. 4وِرِصو، عیسی هوسیا اَر لو حشگی؛ مِنتائای شاگردَل نَفیَمین گه یَه عیسیَ. 5عیسی وِتیَ بینو: «رولَه‌ل، ماهی اَرِه هُاردِن دیرینو؟» جوواوُ دا: «نه!» 6وِتی: «تورِهَه باوژن‌ِ لا راس قائِقا گه مِهِینونَ دی.» اونَل هُنِئونَ کِرد ئو اَخَ مایو گِرت گه نتونستو تورِهَه بِکیشِن اِنوم قائِق. 7شاگردی گه عیسی دوس داشد، وِتیَ پطرس: «خداونَ!» شَمعونِ پطرس وخدی شنَفتی گه خداونَ، هِرازِه جِنِک ووژ لو دا اَر قِ ووژ -اَرِیَگه لُت بی- ئو ووژ آوشدی اِنوم دریا. 8شاگردَلی‌تِر هُنَ گه تور پِر اژ مایون‌َ گَرد ووژونَ مَکیشیا، وَه قائِق هاتِن. اَرِیَگه اونَل نزیک اَر صد مترو داشدَ حشگی.
9وخدی اژ قائِق هاتِنَ هُار ئو پائو نا اَر حشگی، دییو آگِری وَه زِخال اِرکَریاءَ ئو ماهی نیریاس اَر رُی ئو نون‌یش هَس. 10عیسی وِتیَ بینو: «اژ اَ مایِِلَ گه هَراِسگَه گِرتِتونَ، بارِن.» 11شَمعونِ پطرس چی اِنوم قائِق ئو تورِهَه کیشیتیِ حشگی. تورِهَه پِر بی اژ ماهیَل کَلِنگ، چَن، صد ئو پنجا ئو سه گِلَه ماهی. وَه‌یاآگه ماهیَل اَخَ فِرَه بین، تورِهَه نیئَریا. 12عیسی وِتیَ بینو: «بورِن ناشتا بِهَن.» هُیچ‌کُم اژ شاگردَل زِلَئو نَهَرد اَژی بِپِرسِنی، «تو کیئین؟» اَرِیَگه مَذِناسدو گه خداونَ. 13عیسی هاتِ وَر، نونِهَه هیزداتی ئو داءَ بینو، ئو مای‌ِیش. 14یَه گِل سِئِم بی گه عیسی دُما زِنیابیئِن اژ مِردیَل، ووژ اَر شاگردَل ظاهر کِردی.
گَپ‌وگُر عیسی وَه‌گَرد پطرس
15دُما ناشتا، عیسی اژ شَمعونِ پطرس پِرسیتی: «شَمعون، کُر یونّا، آیا ویشتِر اژ یوئنَ دوسِم دیرین؟» او جوواو داتی: «اَاَ خداون؛ توءَ مَذانین گه دوسِت دیرِم.» عیسی وِتَ بی: «خوراک بیَ وَرکَلِم.» 16گِل دوئِم عیسی اَژی پِرسی: «شَمعون، کُر یونّا، آیا دوسِم دیرین؟» جوواو داتی: «اَاَ، خداون؛ مَذانین گه دوسِت دیرِم.» عیسی وِتی: «کاوِرَل مِه شوئونی کَ.» 17گِل سِئِم عیسی وِتیَ پطرس: «شَمعون، کُر یونّا، آیا دوسِم دیرین؟» پطرس اَرِیَگه عیسی اَرِه گِل سِئِم اَژی پِرسی، «آیا دوسِم دیرین؟» خُلک گیریاتی ئو جوواو داتی: «اِ خداون، تو اژ کُل چی باخَوَرین؛ توءَ مَذانین گه دوسِت دیرِم.» عیسی وِتی: «مِتیَه‌جی کاوِرَلِم بو. 18حخیختاً، موشِمَ بینِت، وخدی گه جِهال بین قِتَ مَوَست ئو هر جا گه مِهِستِت مَچیاین؛ مِنتائای وخدی پیرَ موئین دَسَلِت دِریژَ مِهِین ئو یَکی‌تِر قِتَ موئنی، ئو میَرِنت اَرِه جای گه نِمِت.» 19عیسی وَه ایی قصه‌لَ هَشارَه مَهَردی گه پطرس وَه چه مِردِنی خدا جِلالَ مِ. اَسَه عیسی وِتَ بی: «بوریَ تُرّ مِنا.»
20اَسَه پطرس کِلاداتی ئو دیتی اَ شاگردَ گه عیسی دوس داشد وَه دُم اونِلا مای. او هَراَوَه بیَ گه موقَع شُم مِرکا دائیتی اَر لِف عیسی ئو اَژی پِرسوئی، «آقا، کیَ گه تونَ مِئَه گیر دشمن؟» 21وخدی پطرس او دیتی، اژ عیسی پِرسیتی: «آقا، اَنی اَوَه چَه ماو؟» 22عیسی وِتیَ پطرس: «اَرّ بِم تا گِلاهُاردِن مِه بِمینی، وَه تو چَه؟ تو بوریَ تُرّ مِنا!» 23اَسَه ایی قصَه پَشخا بی اِنوم بِرال گه اَ شاگردَ نِمَمِری، مِنتائای عیسی وَه پطرس نوئتی گه او نِمَمِری، بلکِم وِتی «اَرّ بِم تا گِلاهُاردِن مِه بِمینی، وَه تو چَه؟»
24یَه هَراَ شاگردَسَ گه اَر ایی چیئِلَ شاتیَ مِ ئو یوئنَ نُیسونیَسی. ایمَه مَذانیم گه شاتی او راسَ.
آخِرسر
25عیسی کارَل فِرَه‌تِریشی کِردی گه اَرّ یَکی‌یَکیَ مَنُیسیان، گُمو نِمَهَم جُ‌جُ کُل دنیایش جا کتاوَلی گه باس مَنُیسیا باآشتاتی.
Currently Selected:
یوحنا 21: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
