یوحنا 19

حکِم اَر صلیب کیشین عیسی

1اَسَه پیلاتُس فِربو داتی عیسی بِگِرِن ئو شلاخ دَنی. 2ئو سَروازَل تاجونی اژ دِرِک دُریس کِرد، نائون اَر نوم سر ئو چوخا کاوُنی کِردِ وَر، 3ئو ماهاتنی‌ اَرِه تک، موئِتو: «درود اَر پاتِشا یهودیَل!» ئو وَه چَپالی ماون‌ اَری.

4اَسَه پیلاتُس یِگِلی‌تِر چیَ دِریر ئو وِتیَ رِئیسَل یهودیَل: «اِسگَه اوءَ مارِمِ در اَرِه تک هُمَه، تاگَه بِذانینو گه مِه هُیچ جرمِمی اَرِه مَکوم کِردِنی نَهَردَ دی.» 5اَسَه عیسی وَه تاجی اژ دِرِک اَر نوم سر ئو چوخا کاوی اِوَر، هاتَ دِریر. پیلاتُس وِتیَ بینو: «یوئیشَ اَ پیا!» 6وخدی رِئیسَل کاهنَل ئو قِلااورَل معبد عیسی‌ئو دی، قارونو، وِتو: «بِکیشتی اَر صلیب! بِکیشتی اَر صلیب!» پیلاتُس وِتیَ بینو: «هُمَه ووژتو بیَرنی ئو بِکیشِنی اَر صلیب، اَرِیَگه مِه جرمِمی اَرِه مَکوم کِردِنی نَهَردَ دی.» 7یهودیَل جوواوُ دا، وِتونَ بی: «ایمَه اِنوم شریعتمو حکمی دیریم گه مِطابق اَوَه باس بِمِری، اَرِیَگه ادعاءَ مِهِه کُر خداءَ.»

8وخدی پیلاتُس یَه شنَفتی، ویشتِر زِلَه چِتی، 9ئو اِدوارَه گِلاهُاردی اَرِه نوم کاخ، اژ عیسی پِرسیتی: «تو اژ کو هاتینَ؟» مِنتائای عیسی جوواوی ناءَ بی. 10اَسَه پیلاتُس وِتَ بی: «قصَه‌مَ گَرد نِمِهِین؟ یانی نِمَذانین قدِرت‌واختیار دیرِم آزادِت کَم ئو قدِرت‌واختیار دیرِم بِکیشِمت‌ اَر صلیب؟» 11عیسی وِتَ بی: «هُیچ قدِرت‌واختیاری اَر مِنِت ناآشد، اَرّ اژ بِلِنگ نِماونَ بینِت؛ اَژونَسَ؛ گنا اَوَه گه مِه داءَ گیر تو، فِرَه کَلِنگتِرَ.» 12اژ اَوِءِ دُما پیلاتُس وَه دُم آزاد کِردِنا بیتی، مِنتائای یهودیَل قارونو، وِتو: «اَرّ ایی پیاءَ آزاد کِین، دوس امپراطور روم نیئین. هر کی ادعا پاتِشائی بِهِه، هوسیاس اَرضد امپراطور روم.»

13وخدی پیلاتُس ایی قصه‌لَ شنَفتی، عیسی آوِردیَ دِریر ئو ووژ نیشت اَر جاگا داوری، اَر جای گه وَه ’سنگفرش‘ مَشور بی، مِنتائای وَه زوئو آرامی گه زوئو یهودیِلَ موئِتونَ بی ’جَبّاتا‘. 14اَ روژَ، روژ ’تیارِک دائِن‘ اَرِه عِد پِسَخ ئو نزیک نیمَرو بی. پیلاتُس وِتیَ یهودیَل: «یوئیشَ پاتِشاتو!» 15اونَل قارونو: «نابود کِیتی! نابود کِیتی، ئو بِکیشتی اَر صلیب!» پیلاتُس وِتی: «یانی پاتِشاتو بِکیشِم اَر صلیب؟» رِئیسَل کاهنَل جوواوُ داءَ بی: «ایمَه بِخِر اژ امپراطور، پاتِشائی نِریم.» 16دُماخِرِ پیلاتُس عیسی داءَ دس اونِلا تاگَه بِکیشِنی اَر صلیب.

عیسی مَکیشِن اَر صلیب

اَسَه عیسی‌ئو گِرت، ئو بِردو. 17عیسی صلیب اَر کول، چی اَرِه جای گه کَپولِک نُم بیتی گه وَه زوئو آرامی موئِتونَ بی جُلجُتا. 18اَر اورَه عیسی‌ئو کیشی اَر صلیب. وَه‌گَرد او دو نفرتِریشو اِ ایلا ئو اَلای کیشی اَر صلیب ئو عیسی اِنومجا اونَل بی. 19وَه فِربو پیلاتُس کتیبه‌ئونی نُیسو ئو اَوُنَ نا اَر بِلِنگ صلیب. اَر رُی اَوَه نُیسیائی: ’عیسیِ ناصری، پاتِشا یهودیَل‘. 20فِرَه کسَل اژ یهودیَل اَ کتیبَه گه نُیسیائیو حیوَن، اَرِیَگه جای گه عیسی‌ئو کیشی اَر صلیب نزیک شیَر بی ئو اَ کتیبَه وَه زوئو آرامی، لاتینی ئو یونانی نُیسیائی. 21اَسَه رِئیسَل کاهنَل یهود وِتونَ پیلاتُس: «نَنُیسِن ’پاتِشا یهودیَل‘، بلکِم بِنُیسِن ایی پیا وِتیَسی گه مِه پاتِشا یهودیَلِم.» 22پیلاتُس جوواو داتی: «اَ چیئَه گه نُیسونِم، نُیسونِم.»

23وخدی سَروازَل عیسی‌ئو کیشی اَر صلیب، جِنِکَلو گِرت، ئو کِردونَ چوار بیَرا ئو هر کُم بیَرونی بِرد. ئو کِراس‌یشو سَن. مِنتائای اَ کِراسَ دَرزی ناآشدی، بلکِم اژ بِلِنگ تاگَه هُار چِنیائی. 24اَسَه وِتونَ یَکتِری «یَه نُئِریم بلکِم تیروپِشک باوژیم تاگَه بوئینیم ماوَ هِن کی.» هُنَ نُسَخ مقدّس اَنجوم گِرتی گه:

«جِنِکَلِم‌ اِنوم ووژو بیَرونا کِرد

ئو اَر سر کِراسِم تیروپِشکو آوشد.»

اَسَه سَروازَل هُنِئونَ کِرد.

25نزیک صلیب عیسی، دا او ئو خُیَه دای، ئو هَمیش مریم ژَن کْلوپاس ئو مریم مَجدَلیّه هوسیائین. 26وخدی عیسی دای ئو اَ شاگردَ گه دوس داشدی دیتی گه هوسیاس اَر تک او، وِتیَ دای: «اِ ژَن، سِیل کَ، کُرِت». 27اَسَه وِتیَ اَ شاگردَ: «سِیل کَ دات.» اژ اَ ساتَ، اَ شاگردَ، او بِردی اَرِه مال ووژ.

مِردِن عیسی

28اَسَه عیسی باخَوَر اژ یَگه کُل چی اَنجوم گِرتیَ، اَرِیَگه نُسَخ مقدّس وَه اَنجوم برَسی، وِتی: «تینیمَ.» 29اَر اورَه جُمی بی پِر اژ شِراو تُرشیا. اَسَه اَبریونی ژَنِ نوم شِراوِهَه نائون اَر رُی تَلی اژ گیا زوفا، ئو بِردونِ وَر دَم عیسی. 30وخدی عیسی شِراوِهَه چَشتی، وِتی: «تموم بی.» اَسَه سر آوشدیَ هُار ئو گیو ناتی.

31اَ روژَ، روژ ’تیارِک دائِن اَرِه عِد پِسَخ‘ بی، ئو روژ دُماینی، شَمَه مقدّس کَلِنگ بی. اَرِیَگه رِئیسَل یهود نِمِهِستو جنازَه‌ل تا روژ دُماین بِمینی اَر رُی صلیب، اژ پیلاتُسو هِست تاگَه قِلَمَه پال اَ سه نفرَ بِشکِنِن ئو جنازَه‌لو اژ صلیب بارِنَ هُار. 32اَسَه سَروازَل هاتِن ئو قِلَمَه پال پیا اولیِهَه ئو پیای‌تِر گه وَه‌گَرد عیسی‌ئو کیشوئی اَر صلیب، اِشکونو. 33مِنتائای وخدی رَسینَ اَر تک عیسی ئو دییو گه مِردیَ، قِلَمَه پائلو نَشکو. 34مِنتائای یَکی اژ سَروازَل نِزِه‌ی کِردی اِنوم پیَلی عیسی گه هِرازِه خوین ئو آو اَژی کَتیِ رئی. 35اَوَه گه یَه دیتی، شاتیَ مِ تاگَه هُمِه‌یش ایمو بارینو. شاتی او راسَ ئو، اوءَ مَذانی گه حخیختَ موشی. 36یوئنَ کُل اَنجوم گِرتی تاگَه نُسَخ مقدّس اَنجوم باوِنی گه: «هُیچ کُم اژ سِخونَلی نِمَشکی،» 37ئو هَنی جای‌تِر اژ نُسَخ مقدّس گه موشی: «اونَل سِیل اَوَه مَهَن گه نِزِه‌ئو دا اَری.»

عیسی‌ئو نا اِ قور

38اَسَه یوسف، گه اَل رامَه بی، اژ پیلاتُس صِلا گِرتی گه جنازَه عیسی هیزدِ. یوسف شاگرد عیسی بی مِنتائای وَه بی‌کِشکی، اَرِیَگه اژ یهودیَل زِلَه مَچیاتی. پیلاتُس صِلا داءَ بی. اَسَه یِهات، جنازَه عیسی هیزداتی. 39نیقودیموس‌یش گه وِرِکار وَه‌شو چوئی اَرِه تک عیسی، هات ئو وَه‌گَرد ووژ نزیک پنجا کیلو سدر ئو کافور گه هاوِنتوئی اَر یَک، آوِردی. 40اَسَه اونَل جنازَه عیسی‌ئو هیزدا، مِطابق رِسیم یهودیَل اوُ وَه‌گَرد عطِر ئو گُلاو لوئون اِردا اِنوم کفن. 41اَر اورَه گه عیسی‌ئو کیشی اَر صلیب باخی بی ئو اِنوم اَ باخَ لَحَک نووئی بی گه هَنی مِردیونی اِنوم نَنیائی. 42اَسَه اَرِیَگه روژ ’تیارِک دائِن‘ اَرِه عِد یهودیَل بی ئو لَحَک‌یش نزیک بی، جنازَه عیسی‌ئو نا اِنوم اَوَه.

Currently Selected:

یوحنا 19: LBT

Highlight

Copy