یوحنا 18

عیسی‌ئو گِرت

1عیسی دُما وِتِن ایی قصه‌لَ، وَه‌گَرد شاگردَلی چی اَرِه اَ لا تنگ قِدرون. اَر اورَه باخی بی، گه عیسی ئو شاگردَلی چِن اِنوم اَ باخَ. 2مِنتائای یهودایش، اَ کسَ گه عیسی داءَ گیر، مَذِناسدی اَ جاءَ هار کو، اَرِیَگه عیسی ئو شاگردَلی ویشتِر وَخدَل اَر اورَه جیَمَ موئیان. 3اَسَه یهودا بِری اژ سَروازَل ئو هَمیش مأمورَل رِئیسَل کاهنَل ئو شیخَل فرقَه فَریسی وَه‌گَرد ووژ هیزداتی، وَه چراخ‌دَسی ئو مَشَل ئو اسلحَه وَه دس چِن اَرِه اورَه. 4عیسی، وَه‌یاآگه مَذِناسدی چَه اَر سرَ مایتی، چیِ نوا وِتیَ بینو: «هاینونِ فِتِراخ کی؟» 5جوواوُ دا: «عیسیِ ناصری.» وِتی: «مِنِم.» یهودایش، اَ کسَ گه عیسی داءَ گیر هوسیائی اَر تک اونَل. 6وخدی عیسی وِتی، «مِنِم.» اونَل پِشتَ‌پِشت چِن، هاوِنتِن اَر زَمی. 7اَسَه یِه گِلی‌تِر اَژینو پِرسیتی: «هاینونَ فِتِراخ کی؟» وِتو: «عیسیِ ناصری.» 8جوواو داتی: «وِتمَ بینتو گه مِنِم. اَسَه اَرّ مِنتونَ مِ، بِیلِن یوئنَل بِچِن.» 9یَه وِتی تاگَه اَ چیئَه گه وِرِکار وِتوئیتی اَنجوم باوِنی گه: «هُیچ‌کُم اژ اونَلی گه داتَ بینِم، اژ دَسِم ناءَ.»

10اَسَه شَمعونِ پطرس شِمشیری گه داشدی، کیشیتیَ دِریر ئو دا اَر خِلمتکار کاهن اعظم ئو گوش راس بِری. نُم اَ خِلمتکارَ مالخوس بی. 11عیسی وِتیَ پطرس: «شِمشیر ووژِت غِلاف کَ! مَر نَباس پیاله‌ی گه باوَه آسمونی داسیَ بینِم، خُرّ دَم؟»

12اَسَه سَروازَل، وَه‌گَرد فرموندَه‌ل ووژو ئو مأمورَل یهودیَل عیسی‌ئو گِرت. اونَل دَسَل اوُ بَسد 13ئو اول‌بار بِردون اَرِه تک حَنّا. اَرِیَگه اَ پیا هَسویرَه قیافا بی ئو قیافا اَ سالَ کاهن اعظم قوم بی. 14قیافا هَر اَوَه بیَ گه وِتوئیتیَ یهودیَل صِلا هار یَگه یِه پیا اَرِه قوم یهود بِمِری.

15شَمعونِ پطرس ئو شاگِردی‌تِریش کَتِنِ دُم عیسی‌آ. اَرِیَگه اَ شاگردَ اژ شِناسَل کاهن اعظم بی، اَسَه وَه‌گَرد عیسی چی اِنوم قِلا مال کاهن اعظم. 16مِنتائای پطرس هوسیا اَر پِشت دِراخِل. اَسَه اَ شاگردی‌تِرَ گه اژ شِناسَل کاهن اعظم بی، چیَ دِریر ئو وَه‌گَرد کلفتی گه دَربو بی، گپ داتی، ئو پطرس بِردی اِنوم. 17اَسَه اَ کلفتَ گه دَربو بی اژ پطرس پِرسیتی: «مَر تونیش اژ شاگردَل اَ پیاءَ نیئین؟» پطرس جوواو داتی: «نیِم.»

18هُوا سرد بی. خِلمتکارَل ئو مأمورَل وَه زِخال آگِرونی اِرکِردوئی ئو اِ دور اَوَه هوسیائین ئو ووژو گرم‌اِرا مَهَرد. پطرس‌یش وَه‌گَردو هوسیائی ئو ووژ گرم‌اِرا مَهَردی.

19کاهن اعظم اژ عیسی اِبارَه شاگردَل ئو چیئَلی گه تیَلیمَ ماتی پِرسیتی. 20عیسی جوواو داتی: «مِه وَه‌گَرد دنیا وَه آشگارام قصَه کِردیَ ئو هَر اِنوم عَبادتگا یهودیَل ئو اِنوم معبد جای گه کُل یهودیَل جیَمَ موئن، تیَلیمِم داءَ ئو وَه بی‌کِشکی چیمی نوئتیَ. 21اَرِه‌چَه اژ مِنَ مَپِرسین؟ اژ اونَلی بِپِرس گه قصَه‌ل مِنو شنَفتیَ! اونَل خوءَ مَذانِن گه چَمَ بی وِتِنَ.» 22وخدی یَه وِتی، یَکی اژ قِلااورَل گه هوسیائی اَر اورَه، وَه چَپالی دا اَر نوم رُی عیسی ئو وِتی: «وَه هُنَ جوواو کاهن اعظما مِین؟» 23عیسی جوواو داتی: «اَرّ خِلافِم وِت، شاتی بِ؛ مِنتائای اَرّ دُریسِم وِت، اَرِه‌چَه مِین اَرینِم؟» 24اَسَه حَنّا، او دَس‌بوئنیا کِل‌کِردی اَرِه تک قیافا، کاهن اعظم.

25هَراَ موقَع گه شَمعونِ پطرس هوسیائی ئو ووژ گرم‌اِرا مَهَردی، بِری اَژینو پِرسی: «مَر تونیش اژ شاگردَل او نیئین؟» او حاشا کِردی ئو وِتی: «نه! نیِم.» 26یَکی اژ خِلمتکارَل کاهن اعظم گه اژ قومِ‌خویشَل اَ کسَ بیَ گه پطرس گوش بِروئی، وِتی: «مَر مِه تونمَ گَرد عیسی اِنوم اَ باخَ نِئی؟» 27پطرس اِدوارَه دا اَر حاشا. هِرازِه کِلَه‌شیر هاتِ بال.

مِحاکمَه عیسی اَر تک پیلاتُس

28عیسی‌ئو اژ تک قیافا بِرد اَرِه کاخ فرموندار. شوصو بی. اونَل ووژو نَچِن اِنوم کاخ تاگَه نِجس نوئن ئو بتونِن پِسَخ بیرِن. 29اَسَه پیلاتُس هاتَ دِریر اَرِه تک اونَل ئو پِرسیتی: «ایی پیاءَ وَه چه جرمی مَکومَ مِهِینو؟» 30جوواوُ دا، وِتو: «اَرّ جرمی نَهَردوئیتی، نِمامونَ گیر تو.» 31پیلاتُس وِتیَ بینو: «هُمَه ووژتو او بیَرِن ئو مِطابق شریعت ووژتو مِحاکمَه کَنی.» یهودیَل وِتو: «ایمَه صِلا نِریم کسی اِدوم کِیم.» 32یَه وَه خاطر اَنجوم گِرتِن قصه‌ی بی گه عیسی وِتوئیتی وَه چطور مرگی میا بِمِری.

33اَسَه پیلاتُس گِلاهُاردی اَرِه نوم کاخ ئو هِنا کِردی اَر عیسی، وِتَ بی: «یانی تو پاتِشا یهودیَلین؟» 34عیسی جوواو داتی: «یَه ووژتَ موشین، یاگَه کسَلی‌تِر اِبارَه مِنو وِتیَسَ بینِت؟» 35پیلاتُس جوواو داتی: «مَر مِه یهودیِم؟ قوم ووژِت ئو رِئیسَل کاهنَل، تونو داسَ گیر مِه؛ چَت کِردیَ؟» 36عیسی جوواو داتی: «پاتِشائی مِه هِن ایی دنیاءَ نیَ. اَرّ پاتِشائی مِه اژ ایی دنیاءَ بی، خادمَلِم جنگونَ مَهَرد تاگَه نَکُوئِمِ گیر یهودیَل. مِنتائای پاتِشائی مِه اژ ایی دنیاءَ نیَ.» 37پیلاتُس اَژی پِرسی: «اِسَه تو پاتِشای کین؟» عیسی جوواو داتی: «توءَ موشین گه مِه پاتِشام. مِه اَرِه یَه زاندَه بیم، ئو اَرِه یَه هاتِمَسَ ایی دنیا تاگَه اِبارَه حخیخت شاتی بیَم. اَسَه هر کی گه لا حخیخت دیری، گوشَ مَگِریَ قصَه‌ل مِه.» 38پیلاتُس پِرسیتی: «حخیخت چیَ؟»

وخدی یَه وِتی، اِدوارَه چیِ در اَرِه تک یهودیَل ئو وِتیَ بینو: «مِه هُیچ جرمِمی اَرِه مَکوم کِردِنی نَهَردَ دی. 39مِنتائای هُمَه رِسیمی دیرینو گه اِنوم عِد پِسَخ یَکی اژ زندونیَل اَرِنتو آزاد کَم؛ یانی مِتو پاتِشا یهودیَل آزاد کَم؟» 40اونَل قارونو، جوواوُ دا: «او نه، بلکِم اِجالی باراباس آزاد کَ!» ئو باراباس مِلَه‌بگیری بی.

Currently Selected:

یوحنا 18: LBT

Highlight

Copy