یوحنا 17

دوعا عیسی

1دُما یَگه عیسی ایی قصه‌لَ کِردی، سِیل کِردی اَر آسمو ئو وِتی: «باوَه، دیَر اَ وخدَ رَسیَ. جِلال بِ اَر کُرِت تاگَه کُریشِت جِلال بِ اَر تو. 2اَرِیَگه تو قدِرت‌واختیار کُل بشرِت داسَ بی، تاگَه ژییاین ابدی بوئَشخیَ کُل کسَلی گه داتَسَ بی. 3ئو ژییاین ابدی یَسَ گه، تو تَنیا خدا حخیخی ئو عیسی مسیح‌یش گه تو کِلِت‌کِردیَ، بشتاسِن. 4مِه کاری گه سپارتَ بینِم، تمومِم کِرد، ئو هُنَ تونم اَر رُی زَمی جِلال دا. 5ئو اِسگَه باوَه، تونیش اَر تک ووژِت جِلالِم دَ، هَراَ جِلالی گه وِر اژ یَگه دنیا دُریس بو، اَر تک تونِم داشد.

6«مِه نُم تونم اَر اونَلی گه اِ ایی دنیا داتَ مِه، آشگار کِرد. هِن تو بین ئو تو اونَلتَ داءَ مِه، ئو کلوم تونو آوِردَ جا. 7اِسگَه فیَمینَ هَر چَتی گه داتَسَ مِه، اِراسی اژ جونِم تونَ. 8اَرِیَگه کلومی گه سپارتَ مِه، سپارتمَ بینو، ئو اونَل چِنِ گِرد اَوَه، فیَمین گه اِراسی اژ تک تو هاتِمَ، ئو ایمونو آوِرد گه تو مِنِت کِل‌کِردیَ. 9دوعا مِه اَرِه اونَسَ؛ مِه نه اَرِه دنیا بلکِم اَرِه اونَلی دوعا مَهَم گه تو داتَسَ مِه، اَرِیَگه هِن تونِن. 10هرچی گه هِن مِنَ، هِن تونَ ئو هرچی گه هِن تونَ، هِن مِن‌یشَ؛ ئو اِنوم اونَل جِلالِم گِرتیَ. 11ویشتِر اژ یَه اِنوم دنیا نِمَمینِم، مِنتائای اونَ هَنی هان اِنوم دنیا؛ مِنَ مام اَرِه تک تو. اِ باوَه قدوس، وَه دیار سر اونَلی بو گه وَه قدِرت نُم ووژِت داتَسَ مِه، تاگَه یَکی بوئن، هَرهُنَ گه ایمَه یَکی کیم. 12مِه تا وخدی گه وَه‌گَردو بیم، وَه دیار سرونا بیم، ئو وَه قدِرت نُم تو گه داتَسَ مِه مِتیَه‌جی اونَل بیم. هُیچ‌کُم اژ اونَل هِلاک نوئین، بِخِر اژ کُر هِلاکت، تاگَه نُسَخ مقدّس اَنجوم بِگِری. 13مِنتائای اِسگَه مام اَرِه تک تو، ئو ایی قصه‌لَ وخدی موشِم گه هَنی هام اِنوم ایی دنیا، تاگَه خَوشی مِن اِنوم ووژو کامل داشدوئی 14مِه کلوم تونِم داءَ بینو، ئو دنیا اژ اونَل بیزار بی، اَرِیَگه هِن ایی دنیاءَ نیِن، هُنَ گه مِن‌یش هِن ایی دنیاءَ نیِم. 15مِه نِمِم گه اونَل اژ ایی دنیاءَ بیَرین، بلکِم مِم اژ اَ شِطو شریرَ حفظو کِین. 16اونَل هِن ایی دنیاءَ نیِن، هُنَ گه مِن‌یش هِن ایی دنیاءَ نیِم. 17اونِلَ وَخمِ حخیخت کَ؛ کلوم تو حخیختَ. 18هَرهُنَ گه تو مِنِت کِل‌کِرد اَرِه ایی دنیاءَ، مِن‌یش اونَلِم کِل‌کِردیَس‌ اَرِه ایی دنیاءَ. 19مِه ووژِم وَه خاطر اُوُ وَخمَ مَهَم، تاگَه اون‌یش اِنوم حخیخت وَخم بوئن.

20«مِه فَخَد اَرِه یوئنَمَ نِمِ، بلکِم هَمیش اَرِه کَسَلمی مِ گه وَه‌سونگَ کَلومو ایمونَ مارِنَ بینِم، 21تاگَه کُل یَکی بوئن، هَرهُنَ گه تو اِ باوَه هاین اِنوم مِه ئو مِن‌یش هام اِنوم تو. هُنَ بِهَه گه اون‌یش اِنوم ایمَه بوئن، تاگَه دنیا ایمو باری گه تو مِنِت کِل‌کِردیَ. 22ئو مِه جِلالی گه داتَسَ بینِم، دامَسَ بینو تاگَه بوئنَ یَکی، هُنَ گه ایمَه یَکی کیم؛ 23مِه اِنوم اونَل ئو تو اِنوم مِه. هُنَ بِهَه، گه اون‌یش بِن‌کُل بوئنَ یَکی، تاگَه دنیا بِذانی گه تو مِنِت کِل‌کِردیَ، ئو اونَلتَ هَرهُنَ دوس داشد گه مِنِت دوس داشد. 24اِ باوَه، مِم اونَلی گه داتَسَ بینِم وَه‌گَرد مِه بوئن، هَراَ جاءَ گه مِه هم، تاگَه جِلالِم بوئینِن، جِلالی گه تو داتَسَ بینِم؛ اَرِیَگه وِر اژ یَگه بِنیا دنیا باوِنی مِنِت دوس داشدیَ.

25«اِ باوَه صالح، دنیا تو نِمَشتاسی، مِنتائای مِه تونَ مَشتاسِم، ئو یوئنَ فیَمینَ گه تو مِنِت کِل‌کِردیَ. 26مِه نُم تونم اَر اُوُ شناسو ئو مَشتاسِنِم، تاگَه مِحبتی گه تو اَر مِنِت داشدیَ، اِنوم اون‌یش بو ئو مِن‌یش اِنوم اونَل بوئم.»

Currently Selected:

یوحنا 17: LBT

Highlight

Copy