یوحنا 16
16
1«ایی چیئَلمَ وِتَ بینتو تاگَه اژ ایمونتو نَکُوئینو. 2هُمَل اژ عَبادتگائَل یهودَ ماوژِنَ دِریر ئو جُ‌جُ زمونی مای گه هر کی هُمَه بِکُشی، گُمونَ مِهِه گه خِلمت کِردیَسی اَر خدا. 3ئو ایی کارِلَ مَهَن، اَرِیَگه نه باوَه آسمونیَ مَشتاسِن، نه مِه. 4مِنتائای ایی چیئَلمَ وِتَ هُمَه تاگَه وخدی یوئنَ وَه سرتونَ مای، بارینونَ ویر گه خَوَرِم دائیَ هُمَه. ایی چیئَلمَ اژ اول نوئتَ هُمَه، اَرِیَگه ووژِم وَه‌گَرد هُمَه بیم.
روحِ خدا چَه مِهِه
5«اِسگَه مَچِم اَرِه تک کسی گه مِه کِل‌کِردیَسی، ئو هُیچ‌کُم نِمَپِرسینو، ”کوءَ مَچین؟“ 6مِنتائای اَرِیَگه ایی چیئَلمَ وِتَ هُمَه، دلتون اژ خُصَه پِرا بیَ. 7وَه ایی حالا، مِه راسیتونَ بینَ موشِم گه وَه نَفتونَ مِه بِچِم. اَرِیَگه اَرّ نَچِم، اَ هِنارَسَ نِمای اَرِه تک هُمَه؛ مِنتائای اَرّ بِچِم، او کِلَ‌مَهَم اَرِه تک هُمَه. 8ئو وخدی او بای، دنیا قانیَ مِهِه گه اِبارَه گنا، صالح‌بیئین ئو داوری، تصقیرکارَ. 9اِبارَه گنا، اَرِیَگه ایمو نِمارِنَ بینِم. 10اِبارَه صالح‌بیئین، اَرِیَگه مَچِم اَرِه تک باوَه ئو دیَر مِه نِموئینینو. 11ئو اِبارَه داوری کِردِن‌یش، اَرِیَگه رِئیس ایی دنیا مَکوم بیَ.
12«چیئَل فِرَه‌تِری دیرِم تاگَه بوشمَ بینتو، مِنتائای اِسگَه جوخ شنَفتِنی نِرینو. 13مِنتائای وخدی روحِ حخیخت بای، رئیَ مَنیِ وَرتو تاگَه وَه کُل حخیخت بِرَسینو؛ اَرِیَگه او اژ جونِم ووژ قصَه نِمِهِه، بلکِم اَ چیئَه گه مَشتوئی، موشی ئو اژ اَ چیئَه گه اِنواتِر میا بو، وَه‌گَرد هُمَه قصَه مِهِه. 14او مِه جِلالَ مِ، اَرِیَگه اَ چیئَه گه هِن مِنَ مَگِری، اِلومَ مِهِیتی اَر هُمَه. 15هرچی گه هِن باوِه‌ءَ، هِن مِن‌یشَ. اَژونَسَ وِتمَ بینتو، اَ چیئَه گه هِن مِنَ مَگِری، اِلومَ مِهِیتی اَر هُمَه.
عیسی دلگُوئی شاگردَلیَ مِ
16«دُما مِدتی‌تِر، دیَر مِه نِموئینینو ئو دُما مِدتی‌تِریش، اِدوارَه مِنَ موئینینو.» 17اَسَه بِری اژ شاگردَل عیسی وِتونَ یَکتِری: «یَه دیری چَه موشی، ”دُما مِدتی‌تِر، دیَر مِه نِموئینینو ئو دُما مِدتی‌تِریش، اِدوارَه مِنَ موئینینو“؟ یاگَه موشی ”اَرِیَگه مَچِم اَرِه تک باوَه“؟» 18اَسَه موئِتونَ یَکتِری: «ایی ”مِدتی‌تِرَ“ گه موشی، چیَ؟ ایمَه نِمَفیَمیم گه او اِبارَه چَه قصَه مِهِه؟» 19عیسی فیَمی گه میا اژ او چیئی بِپِرسِن؛ اَسَه وِتیَ بینو: «یانی وَه خاطر یَه بحثَ مِهِینو گه وِتِم، ”دُما مِدتی‌تِر، دیَر مِه نِموئینینو ئو دُما مِدتی‌تِریش، اِدوارَه مِنَ موئینینو“؟ 20حخیختاً، موشِمَ بینتو، هُمَه مَگیرینو ئو پَژارَ موئینو، مِنتائای دنیا خَوشالیَ مِهِه؛ هُمَه خَمینَ موئینو، مِنتائای خَم هُمَه ماوَ خَوشی. 21ژَن موقَع زائین هول اِرامَگِرِتی، اَرِیَگه وخد او رَسیَ؛ مِنتائای وخدی گه آویل هاتیَ دی، دیَر حالِ‌روژی گه وخد زائین داشدی نِماریِ ویر، اَرِیَگه خَوشالَ گه، اِنسونی هاتیَسَ دی. 22هَرهُنَ، هُمِه‌یش اِسگَه خَمبارینو؛ مِنتائای اِدوارَه هُمَه موئینِم ئو دل هُمَه خَوشالی مِهِه ئو هُیچ‌کس نِمَتونی اَ خَوشیَ اژ هُمَه بِسینی. 23اِ اَ روژَ، دیَر چیتونی اژ مِه نِمِ. حخیختاً، موشِمَ بینتو، هر چَتونی اژ باوَه وَه نُم مِه بِ، اَوَه مِئَه بینتو. 24تا اِسگَه وَه نُم مِه چیتونی نِهِستیَ؛ بِتو تاگَه بِسینینو ئو خَوشیتو کاملا بو.
25«یوئنَمَ اِجور متل وِتَ هُمَه؛ مِنتائای زمونی مای گه دیَر هُنَ وَه‌گَردتو قصَه نِمَهَم، بلکِم آشگارا اژ باوَه موشِمَ بینتو. 26اِ اَ روژَ، وَه نُم مِنتونَ مِ. ئو نِموشِمَ بینتو گه مِه اژ جونِم هُمَه اژ باوَه‌مَ مِ، 27اَرِیَگه باوَه ووژ هُمَه دوس دیری اَرِیَگه هُمَه مِنتو دوس داشدیَ ئو ایمونتو آوِردیَ گه اژ تک خدا هاتِمَ. 28مِه اژ تک باوَه هاتِمَ ئو هاتِمَسَ نوم ایی دنیا؛ ئو اِسگَه ایی دنیا مِیلِمَ جا، ئو مَچِم اَرِه تک باوَه.»
29اَسَه شاگردَلی وِتو: «اِسگَه آشگارا قصَه مِهِین نه وَه متل. 30اِسگَه دیَر مَذانیم گه اژ کُل چی خَوَر دیرین ئو جُ‌جُ نیاز نِرین کسی چیتی اَژی بِپِرسی. اَژونَسَ، ایمو دیریم گه اژ تک خدا هاتینَ.» 31عیسی وِتیَ بینو: «یانی اِسگَه ایمو دیرینو؟ 32اِسَه زمونی مای گه اِراسی هَراِسگِه‌یشَ هاتیَ، گه اژ یَکَ مَچویچینو ئو هرکُمتو مَچو اَرِه مال ووژ ئو مِه تَنیاءَ مِیلینو؛ وَه ایی حالا مِه تَنیا نیِم، اَرِیَگه باوَه ها گَردِم. 33یوئنَمَ وِتَ هُمَه تاگَه اِنوم مِه سِتارتو بِگِری. دنیا اَرِه هُمَه ماوَ جُور؛ مِنتائای بِیلِن دلِ‌دَرینتو داشدوئی، اَرِیَگه مِه بیمَسَ حریف ایی دنیاءَ.»
Currently Selected:
یوحنا 16: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
