کارَل رسولَل 9

ایمو آوِردِن سولُس

1مِنتائای سولُس گه هَنی اژ سیَم‌سی کِردِن ئو کُشتِن شاگردَل خداون دس هیزنِماتی، چی اِرَه تک کاهن اعظم 2ئو اَژی نُامَه‌لی هِستی اَرِه عَبادتگائَل یهود گه اِنوم شیَر دمشق بین تا اَرّ کسی اژ اَل طریقت کِردیَ دی، چه ژَن چه پیا، اونِلا بوئنی ئو باری اِرَه شیَر اورشلیم.

3اَرنوم رئی وخدی هاتَ هِناس دمشق، وَه یِگِل نُیری اژ آسمو دَرشخیاتیِ دورا 4ئو کَت اَر دل زَمی، ئو دَنگی شنَفتی گه موئِت‌ئون: «شائول، شائول، اَرِه‌چَه عذاومَ مِین؟»

5شائول جوواوا داتی: «اِاِ خداون، تو کیئین؟»

جوواوا داتی: «مِه عیسی‌م هَر اَوَه گه تو عذاوَ مِینی. 6اِسگَه، هیزگِر بِچُ اِرَه شیَر. اَر اورَه موشِن‌ئونِت گه باس چَه بِهِین.»

7هُمسفرَل شائول بی‌کِش هوسیائین؛ اونَل دَنگَهِئونَ مَشتَفت، مِنتائای کَسونی نِموئینیا. 8شائول اژ زَمی هیزگِرتی، مِنتائای وخدی چیَمَلی واز کِردی نتونستی چیئی بوئینی؛ اَسَه دَسو گِرت ئو بِردونَ اِرَه دمشق. 9او سه روژ کور بی ئو نه نُو هُاردی نه آو.

10اِنوم شیَر دمشق یَکی اژ شاگردَل عیسی گه نُم حَنانیا بیتی زِنِه‌یَ مَهَردی. خداون اِنوم رویا، ووژ نِشو او داتی ئو وِتی: «حَنانیا!»

جوواوا داتی: «بفرما، اِاِ خداون.»

11خداون وِتون: «هیزگِر ئو بِچُ ویرِ کویچِه‌ی گه نُم ’راسِ‘، ئو اِنوم مال یهودا مِنِی شائول تارسوسی کَ. اَرِیَگه او اِسگَه دیری دوعاءَ مِهِه، 12ئو اِنوم رویا پیای حَنانیا نُم دیَسی، گه مای ئو دَسَ مَنی اَرنوم سر او تاگَه اِدوارَه بیناآ بو.»

13حَنانیا جوواوا داتی: «اِاِ خداون، اژ فِرَه کسَل اِبارَه ایی پیامَ شنَفتیَ گه اِنوم شیَر اورشلیم چَنی ایمودارَلِت آزار داسی. 14ئو اَر ایریشَ اژ جونِم رِیئسَل کاهنَل قدِرت‌واختیار دیری تاگَه هر کس گه نُم تو باری اَر زوئو، زندونی کِ.»

15مِنتائای خداون وِتیَ حَنانیا: «بِچُ، اَرِیَگه ایی پیا حاجتی کَ گه مِه جیاما کِردیَ تاگَه نُمِم بیَری اِرَه تک خِرِیهودیَل ئو پاتِشائَلو، ئو قوم اسرائیل. 16مِه نشونَ میَمی گه وَه خاطر نُم مِه چَنی باس جُور بِکیشی.»

17اَسَه حَنانیا کَتِ رئی ئو چیَ نوم اَ مالا ئو دَسَلی نا اَرنوم سر شائول، ئو وِتی: «شائول، بِرا، خداون عیسی گه اَر نوم رئی گه ماهاتین اِرَه ایرَه ووژ اَر تو ظاهر کِردی، مِه کِل‌کِردیِ تاگَه اِدوارَه بیناآ بوئین ئو پِرا بوئین اژ روح‌القدس.» 18جاوارجا چیئی اِجور پیلَک مای اژ چیَمَل شائول کَت‌اِرا ئو او اِدوارَه بیناآ بی ئو هیزگِرتی ئو خُسِل تیَمید گِرتی. 19اَسَه خوراک هُاردی ئو قویَت گِرتی.

شائول اِنوم شیَرَل دمشق ئو اورشلیم

شائول چَن روژی وَه‌گَرد شاگردَل عیسی مَن اِنوم دمشق. 20ئو هِرازِه اِنوم عَبادتگائَل یهود اِلومَ مَهَردی گه عیسی کُر خداءَ. 21هر کی پِغوم اوءَ مَشتَفتی بِلُجوئیَ ماهاتی ئو موئِتی: «مَر یَه هَر اَوَه نیَ گه اِنوم اورشلیم هر کی ایی نُمَ ماوِردی اَر زوئو نابودَ مَهَرد ئو هاتیَس اِرَه ایریشَ تاگَه اونَل بِگِری ئو بیَری اِرَه تک رِئیسَل کاهنَل؟» 22مِنتائای شائول روژ اَر روژ قویَت ویشتِری مَگِرتی ئو وَه دلیلَل سفدِسخدی یهودیَل دمشقَ ماوِردی اَر زُنی، ئو ثابتَ مَهَردی گه عیسی، هَراَ مسیحَسَ گه باس بای.

23چَن روژی اَژی چِتی، یهودیَل نشقه‌ئو کیشی گه بِکُشِنی. 24مِنتائای شائول اژ نشقه‌ئو خَوَردارا بی. اونَل شو ئو روژ اِ دروازَه‌ل شیَر کِشِکونَ ما تاگَه بِکُشِنی. 25مِنتائای شاگردَل شائول وَه شوآ اوُ نا اِنوم سَلِه‌ی، اژ کُنا حَصار شیَر رِئو کِردَ هُار.

26وخدی شائول رَسیَ شیَر اورشلیم، هِستی تاگَه بِچو اِرَه تک شاگردَل، مِنتائای کُل زِلَئون اَژینَ مَچیاتی، اَرِیَگه باوارو نِمَهَرد اِراسی بوئیَ شاگرد عیسی. 27مِنتائای برنابا او گِرتی ئو آوِردی اِرَه تک رسولَل، ئو اَرِنو تیَریف کِردی گه چطور اَرنوم رئی دمشق خداون دیَسی ئو خداون قصَه گَرد کِردیِ ئو چطور او اِنوم دمشق وَه جورَت وَه نُم عیسی موعظَه کِردیَسی. 28اَسَه شائول مَن اَر تک اونَل ئو آشگارا هر وخد مِهِستی ماهات اِرَه اورشلیم ئو مَچیا ئو وَه‌جورَتا وَه نُم خداون موعظَه مَهَردی. 29شائول وَه‌گَرد یهودیَلی گه یونانی‌زوئو بین گپَ ماتی ئو بحثَ مَهَردی، مِنتائای اونَل وَه دُم کُشتِنا بینی. 30وخدی گه بِرال اژ ایی گپَ خَوَردارا بین، اوُ بِرد اِرَه شیَر قیصریَه ئو اژ اورا کِلوکِرد اِرَه شیَر تارسوس.

31اُهُنَ، کلیسا اِ سِرُسَر هیال یهودیَه ئو جلیل ئو سامرَه سِتار گِرتی، ئو گیونَ مَگِرتی ئو اِنوم ترس اژ خداون زِنِه‌یَ مَهَردی ئو وَه دلگُوئی روح‌القدس، شِمارو ویشتِرا موئیا.

خِلمتَل پطرس

32ئو مِنتائای پطرس گه سرَ ماتی اَر کُل جا، هاتِ دیار ایمودارَل شیَر لُدَّه‌یش. 33اَر اورَه پیای دیتی گه نُم اینیاس بیتی، گه هشت سال فِلج بی ئو گِلپیائی اَر زَمی. 34پطرس وِتون: «اِاِ اینیاس، عیسی مسیح شِفاتَ مِ. هیزگِر ئو جِل‌ِجات جیَم دَ!» او هِرازِه هیزگِرتی، 35ئو کُل مردِم لُدَّه ئو شارون اوُ دی ئو رُیو آوِرد اَر خداون.

36اِنوم شیَر یافا شاگردی زِنِه‌یَ مَهَردی گه نُم طابیتا بیتی، گه وَه زوئو یونانیَ موشِن دورکاس گه میَنا آهوئَسی. ایی ژِنَ ووژ وَخمِ کارَل خو ئو دسگیری اژ ژارِلَ مَهَردی. 37طابیتا اِ، اَ روژِلَ مریض بی ئو مِرد. اَسَه لَشو شوری ئو نائونِ طَوَقَه‌سر مالی. 38اَرِیَگه شیَر لُدَّه اِ هِناس شیَر یافا بی، وخدی شاگردَل شنَفتو گه پطرس هار اورَه، دو نفرو کِل‌کِرد اِرَه تک ئو لالکینی‌ئون گه «بی‌زیَمَت هِرازِه بوری اِرَه تک ایمَه.»

39پطرس‌یش هیزگِرتی چیَ گَردو ئو وخدی رَسی اَر اورَه، بِردونِ طَوَقَه‌سر. بیوَه‌ژِنَل کُل جیَم بینی اَر دورا، وَه گیری‌گاو جِنِکَلی گه دورکاس وخدی زِنی بی دویروئیتی، نشونونَ ما.

40مِنتائای پطرس کُلو کِردیَ دِریر ئو زُنی داتی، دوعا کِردی. اَسَه ویر کِردی اَر لَشِهَه ئو وِتی: «طابیتا، هیزگِر!» طابیتا چیَمَلی واز کِردی ئو هَریَگه پطرس دیتی، نیشتِ راس. 41پطرس دس گِرت ئو هیزدا. اَسَه هِنا کِردی اَر ایمودارَل ئو بیوَه‌ژِنَل، ئو طابیتا زِنی سپارتیَ دَسونا. 42ایی خَوَرَ پَشخا بیِ سِرُسَر شیَر یافا ئو فِرَه کسَل ایمونو آوِرد اَر خداون. 43دُما یَه، پطرس روژَل فِرِه مَن اِنوم یافا اَرتَک دَبّاخی گه نُم شَمعون بیتی.

Currently Selected:

کارَل رسولَل 9: LBT

Highlight

Copy