کارَل رسولَل 10
10
پطرس ئو کُرنِلیوس
1اِنوم شیَر قیصریَه پیای بی، کُرنِلیوس نُم، او اژ فرموندَه‌ل گردان رومی مَشور وَه ’گردان ایتالیایی‘ بی. 2او، ئو عتِ‌عیالی کُل دیندار ئو خداترس بین. کُرنِلیوس اژ تیَه دلا صِدقَه ماتیَ ژارَل ئو گُرّان وَه درگا خدا دوعاءَ مَهَردی. 3یِه روژ نزیک اَر سات سه دُمانیمَرو، آشگارا اِ رویا دیتی گه فریشدَه خدا هاتی اِرَه تک ئو وِتی: «کُرنِلیوس!»
4کُرنِلیوس هِراسو گِز کِرد اَری ئو جوواوا داتی: «خداون چَه بیَ!»
فریشدَه وِتی: «دوعائَل ئو صِدقَه‌لِت چُی پیشکَشی یادِبودی رَسینَس اَرتَک خدا. 5اِسگَه کسَلی کِل‌کَ اِرَه شیَر یافا تاگَه شَمعون مَشور وَه پطرس بارن اِرَه ایرَه. 6او اَرتَک دَبّاخی گه نُم شَمعونِ، مِمونَ گه مال هایتی اَر لو دریا.»
7وخدی اَ فریشدَه گه قصَه گَردَ مَهَرد اژ تک چِتی، کُرنِلیوس دو نفر اژ خِلمتکارَل ئو یِه سَرواز وفادار اژ سپائیَلی، هِنا کِردی 8ئو کُل ایی ماجِراءَ اَرِنو تیَریف کِردی ئو کِل‌کِردِنی اِرَه یافا.
9وَه صوایکا، نزیک اَر نیمَرو، وخدی گه اونَل اَرنوم رئی بین ئو نزیکا موئیان اَر شیَر، پطرس چیِ سر بُ مال تاگَه دوعا کِ. 10اَر اورَه وِرسِنی بیتی ئو هِستی گه چیئی بیری. مِنتائای وخدی داشدو خوراکو دُریسَ مَهَرد، چیِ خلسه‌اِرا. 11هَرِ اَ حالَ دیتی گه آسمو تاقا بی ئو چیئی چُی سِفِرَه کَلِنگی گه اژ چوار سویکا دُرّاِرا بیَ، ویرِ زمینَ ماءَ هُار 12ئو کُلِ جور حِوون ئو جونورَلی گه وَه ژیر لَما سُرَ مَگِرِن ئو مَلَل آسمون هایتی اِنوم. 13اَسَه دَنگی رَسیتی‌ئون: «پطرس، هیزگِر، سِرا بُئِر ئو بیر!»
14پطرس وِتی: «حاشا اژ مِه، خداون، اَرِیَگه هرگِس دَمِم نَنیاس اَر چی حروم یاگَه نِجسی.»
15یِگِلی‌تِر دَنگی یِهات گه «اَ چیئَه گه خدا پاک کِردیِ، تو نوش نِجسَ!»
16ایی اتفاقَ سه گِل کَت ئو جاوارجا اَ سِفِرَه ویرِ آسمو بَریا.
17هَراَ حِنَ گه پطرس واقِ دَم پَروئیتی، گه ایی رویای گه دیَسی میَنا چَسی، اِسگَه کسَلی گه کُرنِلیوس کِل‌کِردوئینی، مِنِی مال شمعونو کِرد، ئو رَسین اَر در مال. 18اونَل وَه دَنگ کَلِنگَ مَپِرسیائو: «آیا شَمعون مَشور وَه پطرس مِمو ایرَه‌سَ؟»
19پطرس هَنی داشدی وَه رویاهَه فگِرَ مَهَردی گه روح‌القدس وِتون: «سِیل کَ، سه نفر دیرِن مِنِیتَ مَهَن. 20هیزگِر بِچُ‌ءَ هُار ئو اَرِه یَگه بِچینَ گَردو چِرچِ دل نیَر، اَرِیَگه مِه کِلِم‌کِردِنَ.»
21پطرس چیِ هُار ئو وِتی‌ئونو: «مِه هَر اَوِمَ گه مِنِیَ مِهِینونی. اَرِه‌چَه هاتینونَ؟»
22اونَل وِتو: «کُرنِلیوسِ فرموندَه، ایمَه کِل‌کِردیَسی. او پیا دُریس ئو خداترسی کَ ئو یهودیَل کُل اژ خوئیَ موشِنی. او اژ فریشدَه مقدّسی فِربو گِرتیِ گه کِل‌کِ اَر دُمِت تاگَه باین اِرَه مال، قصَه‌لِت بِشتوءِ.» 23اَسَه پطرس اونَل بِردی اِرَه مال تاگَه بوئنیَ مِمو.
وَه صوایکا پطرس هیزگِرتی ئو وَه‌گَرد اونَل کَتِ رئی چی. بِری اژ بِرالی گه اَل شیَر یافا بین‌یش چِنیَ گَرد. 24وَه صوایکا رَسین اَر شیَر قیصریَه. کُرنِلیوس قومِ‌خویشَل ئو رِقیفَل نزیک ووژ هِنا کِردوئیتی ئو چیَم‌َرئیو بی. 25وخدی پطرس چی اِنوم، کُرنِلیوس چِتیِ نوا ئو کَت اَر وَر پالی، پِرَسی. 26مِنتائای پطرس او هیزداتی ئو وِتی: «هیزگِر؛ مِن‌یش آمی کِم.»
27اَسَه پطرس هَرهُنَ گه داشدی قصَه گَردَ مَهَرد چیَ نوم مالا ئو اَر اورَه جَرخَه کَلِنگی دیتی. 28پطرس وِتی‌ئونو: «هُمَه ووژتونَ مَذانینو گه اَرِه یِه یهودی شرعاً دُریس نیَ گه وَه‌گَرد بیگونَه‌ل بای ئو بِچو یاگَه بِچوءِ دیارو. مِنتائای خدا نشونِم داتی گه وَه هُیچ‌کس نوشِم نِجس یاگَه ناپاک. 29اِسَه وخدی گه کِلتوکِردوئیَ مِنِیِم، بی‌چِکِ‌چِنَه هاتِم. اِسگَه مَپِرسِم اَژینتو گه اَرِه‌چَه کِلتوکِردوئیَ مِنِیِم؟»
30کُرنِلیوس جوواوا داتی: «چوار روژ وِر اژ یَه، هَرِ ایی وخدَ، نزیک اَر سات سه دُمانیمَرو، اِ مال ووژِم داشدِم دوعامَ مَهَرد گه وَه یِگِل پیای وَه جِنِک نُیرداری هوسیا اَر نوام 31ئو وِتی: ”کُرنِلیوس، دوعات قبول بیَ ئو چیئَلتی گه صِدقَه داءَ اَرتَک خدا هاتیَسَ ویر. 32کسَلی کِل‌کَ اِرَه شیَر یافا تاگَه شَمعون مَشور وَه پطرس بارن اِرَه ایرَه. او اَرتَک شَمعونِ دَبّاخ گه مال هایتی اَر لو دریا، مِمونَ.“ 33اَسَه هِرازِه کِلِم‌کِردَ دُمِت ئو تونیش لِفطِت کِرد ئو هاتین. اِسگَه ایمَه کُل هایمون اَر ایرَه اَرتَک خدا، تاگَه هر چی گه خداون فِربو داسی‌ئونِت، بشتوئیم.»
34پطرس دَم واز کِردی ئو وِتی: «اِراسی فیَمیم گه خدا دوچیَمکی نِمِهِه؛ 35بلکِم اژ هر قومی، هر کی اژ تیَه دلا زِلَه اژ خدا بِچوتی ئو هر چی گه دُریسَ اَنجوم دِ، خدا قبولَ مِهِیتی. 36خدا پِغوم ووژ کِل‌کِردی اَرِه قوم اسرائیل ئو هُنَ، خَوَر خَوش صُئل‌وسِلامتی وَه‌سونگَ عیسی مسیح گه خداون کُلَ، اِلوم کِردی. 37هُمَه ووژتون اژ اَ چیئَه گه اِ سِرُسَر هیال یهودیَه اتفاق کَت، خَوَر دیرینو ئو مَذانینو بِنیا اژ جلیل بیتی، دُما خُسِل تیَمیدی گه یحیی پِخَمَر موعظَه مَهَردی، 38ئو چطور خدا، عیسیِ ناصری وَه روح‌القدس ئو قدِرت مسح کِردی، هُنَ گه کُل جا مَگیردیا ئو کارَل خاصَ مَهَردی ئو کُل اونَلی گه اِ ژیر ظلم ابلیس بین، شِفا ماتی، اَرِیَگه خداءَ گَرد بیتی.
39«ایمَه شاتَل کُل کارَلی کیم گه او اِ وِلات یهود ئو اِ شیَر اورشلیم اَنجوم داتی. اونَل عیسی‌ئو کیشی اَر صلیب ئو کُشتو. 40مِنتائای خدا او اِ روژ سِئِم زِنیا کِردی ئو ظاهر کِردی، 41مِنتائای نه اَر کُل کس، بلکِم اَر شاتَلی گه خدا وِرِکار دیاری کِردوئینی، یانی اَر ایمَه‌لی گه دُما زِنیابیئِنی اژ مِردیَل، وَه‌گَرد او هُاردمون ئو خُرّمو دا. 42او فِربو دائونمو تاگَه ایی حخیختَ اِلوم کِیم اَر قوم ئو شاتی بِیم گه خدا او ناسی تاگَه داور زِنیَل ئو مِردیَل بو. 43پِخَمَرَل، کُل اِبارَه او شاتیَ میَن گه هر کی ایمو باری اَر عیسی، وَه نُم او گنائَلی بَشخیا ماو.»
44پطرس هَنی داشدی یوئنَ موئِتی، گه روح‌القدس هات اَررُی کُل اونَلی گه پِغومونَ مَشتَفت. 45بِری اژ ایمودارَلی گه یهودی بین ئو وَه‌گَرد پطرس هاتوئین، بِلُجوئیو هات اَرِیَگه عطا روح‌القدس رِشیا اَر سر خِرِیهودیَل‌یش‌اِرا. 46اَرِیَگه شنَفتو گه اونَل وَه زوئونَلی‌تِر قصَه مَهَن ئو خدا مَپِرَسِن. اَسَه پطرس وِتی: 47«اِسگَه گه یوئنَ روح‌القدسو اِجور ایمَه گِرتیَ، دیَر کیَ مَتونی نوا تیَمید گِرتِنون اِنوم آو بِگِری؟» 48اِسَه پطرس فِربو داتی تاگَه وَه نُم عیسی مسیح تیَمیدو دَن. اَسَه اژ پطرسو هِست گه چَن روژی بِمینی اَر تَکو.
Currently Selected:
کارَل رسولَل 10: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
