کارَل رسولَل 8
8
سولُس کلیسا آزارَ مِ
1ئو سولُس دل بیتی استیفان بِکُشِن.
اَ روژَ، بِنیا آزار سخدی اَر کلیسا اورشلیم نیریا، هُنَ گه بِخِر اژ رسولَل، کُل پَشخِ‌پِلاآ بین اِنوم هیالَل یهودیَه ئو سامرَه. 2پیال دینداری استیفانو ناءِ قور ئو اَرِه او پِرس کَلِنگونی گِرت. 3مِنتائای سولُس کلیسا آزار ماتی ئو مال اَر مالَ مَجوریاتی، ژِنَل ئو پیالَ مَکیشیاتیَ دِریر ئو ماوشدِنیِ زندو.
فیلیپُس اِ شیَر سامرَه
4مِنتائای اونَلی گه پَشخِ‌پِلاآ بوئین، پائونَ مَنیا اَر هر جا، کلوم خدائو اِلومَ مَهَرد. 5فیلیپُس‌یش چی اِنوم یَکی اژ شیَرَل سامرَه ئو مسیح اَرِه مردِم اورَه موعظَه کِردی. 6بِری اژ مردِم وخدی قصَه‌ل فیلیپُسو شنَفت ئو نشونَه‌لی گه اَنجومَ ماتیو دی، کُل یِه‌دل خو گوشو گِرتَ اَ چیئَه گه موئِتی؛ 7اَرِیَگه روحَل گَن وَه قارَه قوئین اژ آمَل فِرِه گه کَتوئینِ گیرو، ماهاتِنَ دِریر ئو فِرَه کسَل اژ فِلجَل ئو شَلَل شِفائونَ مَگِرت. 8وَه ایی خاطرَ، خَوشی فِرِه اَ شیَرَ اِراگِرتی.
شَمعون جادوگر ایمونَ ماری
9مِنتائای اِنوم اَ شیَرَ، پیای شَمعون نُم زِنِه‌یَ مَهَردی گه وِر اژ یَه وَه جادوگری باعثَ موئیا مردِم سامرَه بِلُجوئیو بای ئو ادعا ماهاتی گه آم کَلِنگی کَ. 10هُنَ گه کُل مردِم اژ کَلِنگ تا گُجَر، گوشونَ مَگِرت‌ئون ئو موئِتو: «ایی پیا هَراَ قدِرت خداسَ گه موشِنی‌ئون ’کَلِنگ‘.» 11اونَل اوُ قبول داشد، اَرِیَگه مِدت فِرِه بی گه وَه جادوگریَلی باعثَ موئیا مردِم بِلُجوئیو بای. 12مِنتائای وخدی ایمونو آوِرد اَر خَوَر خَوش فیلیپُس اِبارَه پاتِشائی خدا ئو نُم عیسی مسیح، کُلو، یانی ژَن ئو پیا، خُسِل تیَمیدو گِرت. 13جُ‌جُ شَمعون ووژیشی ایمون آوِردی ئو دُما تیَمید گِرتِنی هَراَ گَرد فیلیپُس بی، ئو وخدی نشونَه‌ل ئو مُجِزَه‌ل کَلِنگی گه اَنجومَ موئیا، موئینیاتی، بِلُجوئیَ ماهاتی.
14وخدی رسولَل اِنوم اورشلیم خَوَردارا بین گه مردِم شیَر سامرَه کلوم خدائو قبول کِردیَ، پطرس ئو یوحنائو کِل‌کِرد اِرَه تَکو. 15اَ دو نفرَ هاتن اِرَه سامرَه، اَرِه ایمودارَل دوعائو کِرد تاگَه روح‌القدس بِگِرِن، 16اَرِیَگه هَنی روح‌القدس نَرِشیائی اَررُی هُیچ کُم اَژینون‌اِرا ئو فَخَد وَه نُم عیسیِ خداون تیَمیدو گِرتوئی ئو بس. 17اَسَه پطرس ئو یوحنا دَسَلو نا اَرنوم سر اونَل ئو اونَل روح‌القدسو گِرت.
18وخدی شَمعون دیتی گه وَه دس نائن رسولَل، روح‌القدسَ مَرِشی اَرسر مردِم‌اِرا، قِیلی پیل آوِردی ئو 19وِتیَ رسولَل: «ایی قدِرت‌واختیارَ بیَنَ مِن‌یش تاگَه دس بِنم اَرنوم سر هر کی، روح‌القدس بِگِری.»
20مِنتائای پطرس وِتی: «پیلتَ گَرد ووژِت نابود بو! اَرِیَگه گُمونِت کِرد گه مَتونین عطا خدا وَه پیل بِخِرین! 21تو اژ ایی خِلمتَ هُیچ بَشق ئو بیَری نِرین، اَرِیَگه دلت اَرتَک خدا راس نیَ. 22اژ ایی شرَباریتَ توئَه کَ ئو اژ خداونِت بِ تاگَه هایتِر ایی نیّت دلتَ بوئَشخی؛ 23اَرِیَگه دیرِم موئینِم گه پِر اژ ژیَر تیَل ئو اسیر بَنَل شَرَباریئین.»
24شَمعون وِتی: «هُمَه اَرتَک خداون اَرِه مِه دوعا کَن تاگَه اَ چیئَه گه وِتِتو نا اَرسرِم.»
25اِسَه پطرس ئو یوحنا دُما یَگه شاتیو دا ئو کلوم خداونو اِلوم کِرد، گِلوناهُارد اِرَه شیَر اورشلیم ئو خَوَر خَوش نجادون اِنوم آبادیَل فِرِه اژ سامرَه اِلوم کِرد.
فیلیپُس ئو خواجَه‌سرا حَبَشی
26اَسَه فریشدَه خداون وِتیَ فیلیپُس: «هیزگِر بِچُ ویرِ جنوب، ویرِ اَ رئیَ گه اژ اورشلیمَ مَچو اِرَه شیَر غَزَه، هَراَ رئی بیاوونیَ.» 27اَسَه فیلیپُس هیزگِرتی ئو کَتِ رئی، اَرنوم رئی خواجَه‌سرا حَبَشی‌ای هاتیَ وَرپیری گه اژ کَلِنگَل دربار ’کَنداکِه‘ ملکَه حَبَشَه ئو خزینَه‌دار بیتی، ئو اَرِه عَبادت هاتوئی اِرَه اورشلیم. 28وخدی داشدی گِلامَهُاردی، نیشتوئی اَرسر دُریشگَه ووژ ئو کِتاو اِشعیا پِخَمَرَ مَحیوَنی. 29اَسَه روحِ خدا وِتیَ فیلیپُس: «بِچُ اِنوا ئو ووژِت برَسِنَ اَ دُریشگَه.»
30فیلیپُس ویرِ او ناءِ دو ئو شنَفتی گه خواجَه حَبَشی کِتاو اِشعیا پِخَمَرَ مَحیوَنی. اَسَه وِتون: «یانی ایی چیئی گه دیرین مَحیوَنین، مَفیَمین؟»
31وِتی: «چطورَ مَتونِم بفیَمِم، اَرّ کسی رَنِمونیم نِهِه؟» اَسَه لالکیَ فیلیپُس گه سُوار بو ئو بِنیشتی اَر لِف. 32اَ جاءَ گه اژ نُسَخ مقدّسَ مَحیوَنی، یَه بیَ:
«چُی کاوِری گه اَرِه قُرونیَ میَرِنی،
ئو چُی وَرکی گه اَرتَک چیَرَّگَرِهِه بی‌کِشَ،
هَراَ جورَ، دَم واز نَهَردی.
33اِ خوارِزاری او، عدالت اَژی دَریخ بیتی؛
کیَ مَتونی اِبارَه نسِل او قصَه بِهِه؟
اَرِیَگه ژییاین او اژ رُی زَمی قط بی.»
34خواجَه‌سرا وِتَ فیلیپُس: «مَلالکِم‌ئونِت، بوشَ مِه گه پِخَمَر، ایرَه دیری اِبارَه کیَ موشی، اِبارَه ووژَ موشی یاگَه اِبارَه کسی‌تِرِک؟» 35اَسَه فیلیپُس بِنیا ناتی اَر قصَه کِردِن ئو اژ هَراَ نُسَخ مقدّسَ بِنیا ناتی اِبارَه عیسی خَوَر خَوش نجاد دائون.
36هَرهُنَ گه وَه نوم رئیا مَچیان، رَسینَ آوی. خواجَه‌سرا وِتی: «سِیل کَ، آو هار ایرَه! چَه مَتونی نوا خُسِل تیَمید گِرتِنِم بِگِری؟» 37[فیلیپُس وِتی: «اَرّ وَه تمومِ دل ایمونِت آوِردیَ، چیئی نِمَتونی نوا تیَمید گِرتِنِت بِگِری.» خواجَه‌سرا وِتی: «ایمو دیرِم گه عیسی مسیح کُر خداءَ.»]
38اَسَه خواجَه‌سرا فِربو داتی دُریشگِهَه آبوسی، ئو فیلیپُس ئو خواجَه‌سرا، هَردِکَ گَرد یَک چِن اِنوم آو ئو فیلیپُس او تیَمید داتی. 39وخدی اژ آو هاتِنَ دِریر، وَه یِگِل روحِ خداون فیلیپُس گِرتی ئو بِردی ئو خواجَه‌سرا دیَر او نِئیتی، مِنتائای وَه خَوشالی رئی ووژ گِرتی ئو چی. 40مِنتائای فیلیپُس ووژ اَر شیَر اَشدود دیتی. او اِنوم کُل شیَرَل اَ هیالَ مَگیردیا ئو خَوَر خَوش نجادَ ماتی، تاگَه رَسی اَر شیَر قیصریَه.
Currently Selected:
کارَل رسولَل 8: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
