Gen 7

Ukufika kukazamcolo

1INkosi yasisithi kuNowa: Ngena emkolweni, wena lendlu yakho yonke, ngoba ngibonile ukuthi nguwe wedwa olungileyo phambi kwami kulesisizukulwana. 2Kuzo zonke inyamazana ezihlambulukileyo uzathatha ezinduna zibe yisikhombisa lezinsikazi zibe yisikhombisa; lakuzo inyamazana ezingahlambulukanga uthathe ngazimbili, enduna lensikazi. 3Lakuzo inyoni zaphezulu uthathe ezinduna zibe yisikhombisa lezinsikazi zibe yisikhombisa, ukuba kube khona emhlabeni wonke inzalo yazo. 4Ngoba emva kwensuku eziyisikhombisa ngizakunisa izulu emhlabeni insuku ezingamatshumi amane lobusuku obungamatshumi amane, ngibhubhise emhlabeni konke okuphilayo engakwenzayo. 5UNowa wakwenza konke njengokutsho kweNkosi.

6UNowa wayeleminyaka engamakhulu ayisithupha lapho uzamcolo wamanzi efika emhlabeni. 7Ngenxa kazamcolo wamanzi uNowa wangena emkolweni kanye lamadodana akhe lomkakhe labafazi bamadodana akhe.#Mat 24:38, 39; Luka 17:27 8Kuzo inyamazana ezihlambulukileyo lezingahlambulukanga, lezinyoni, lakho konke okuhuquzela emhlabeni, 9kwangena ngazimbili emkolweni kuNowa, enduna lensikazi, njengokutsho kukaNkulunkulu. 10Kwathi emva kwensuku eziyisikhombisa amanzi kazamcolo afika emhlabeni.

11Ngomnyaka wamakhulu ayisithupha wokuhamba kukaNowa, ngosuku lwetshumi lesikhombisa lwenyanga yesibili, imithombo engaphansi komhlaba yabhoboka, leminyango yasezulwini yavuleka.#2 Pet 3:6 12Izulu lana emhlabeni insuku ezingamatshumi amane lasebusuku. 13Ngalolosuku uNowa wangena emkolweni loShemu loHamu loJafethi, amadodana akhe, lomkakhe, labafazi bamadodana akhe, 14kanye lenhlobo zonke zezinyamazana lezezifuyo, lenhlobo zonke zalokho okuhuquzela emhlabeni lezenyoni. 15Zangena ngambili emkolweni kuNowa inyamazana zonke okukuzo umoya wokuphila. 16Kwangena enduna lensikazi kuzo zonke, njengokutsho kukaNkulunkulu; iNkosi yasimvalela phakathi.

17Uzamcolo waba semhlabeni insuku ezingamatshumi amane; amanzi anda aze aphakamisa umkolo phezu komhlaba. 18Amanzi anda, agcwala kakhulu emhlabeni, umkolo wahamba phezu kwamanzi. 19Amanzi anda kakhulu emhlabeni, zaze zasitshekelwa zonke intaba eziphakemeyo ezingaphansi komthunzi welanga. 20Amanzi akhula, adlula ingqonga zezintaba ngezingalo ezilitshumi lanhlanu, zaze zatshona intaba. 21Konke okuphilayo okwakuhamba emhlabeni kwafa, izinyoni lezifuyo lezinyamazana lakho konke okuhuquzela emhlabeni, labantu bonke; 22konke okulomphefumulo wokuphila emakhaleni akho, konke okusemhlabathini owomileyo, kwafa. 23Kwabhujiswa konke okuphilayo okusemhlabeni, abantu lezifuyo lokuhuquzelayo lezinyoni zaphezulu; lokhu konke kwachithwa, kwasala uNowa kuphela kanye lakho okwakulaye emkolweni. 24Amanzi ayekhona emhlabeni insuku ezilikhulu lamatshumi amahlanu.

Currently Selected:

Gen 7: BE1978

Highlight

Copy