Gen 8

Ukuphela kukazamcolo

1UNkulunkulu wasemkhumbula uNowa lakho konke okuphilayo lezifuyo zonke ezazilaye emkolweni. UNkulunkulu wavunguzisa umoya phezu komhlaba, amanzi etsha. 2Imithombo engaphansi komhlaba leminyango yasezulwini kwavalwa, lezulu laphezulu laphela. 3Amanzi ayelokhu esetsha esuka emhlabeni; emva kwensuku ezilikhulu lamatshumi amahlanu amanzi ancipha. 4Ngenyanga yesikhombisa, ngosuku lwetshumi lesikhombisa lwenyanga umkolo wema entabeni zaseArarati. 5Amanzi etsha njalonjalo kwaze kwaba senyangeni yetshumi; ngosuku lokuqala lwenyanga yetshumi kwabonakala ingqonga zezintaba.

6Kwathi cmva kwensuku ezingamatshumi amane uNowa wasevula iwindi lomkolo abelenzile, 7wathuma iwabayi, lazulazula njalo, aze atsha amanzi emhlabeni. 8Wasethuma ijuba ukuba abone ukuthi amanzi aphelile yini emhlabeni; 9kodwa ijuba kalifumananga indawo yokubeka unyawo lwalo ukuba liphumule, labuyela kuye emkolweni ngoba amanzi ayesekhona emhlabeni wonke. Welula isandla sakhe, walithatha, walingenisa emkolweni. 10Wahlala futhi insuku eziyisikhombisa; waphinda walikhupha ijuba emkolweni. 11Ijuba labuya kusihlwa, kwakukhona emlonyeni walo ihlamvu elimanzi lesihlahla esithiwa yioliva; ngakho uNowa wasesazi ukuthi amanzi aphelile emhlabeni. 12Waphinda wahlala insuku eziyisikhombisa, walithuma ijuba; kalabe lisabuya.

13Kwathi ngomnyaka wakhe wamakhulu ayisithupha lanye, ngosuku lokuqala lwenyanga yokuqala, amanzi atsha emhlabeni. UNowa wasusa uphahla lomkolo, wabona ukuthi phezu komhlaba komile. 14Ngenyanga yesibili, ngosuku lwamatshumi amabili lesikhombisa lwenyanga, umhlaba wawusomile. 15UNkulunkulu wasekhuluma kuNowa 16wathi: Phuma emkolweni, wena lomkakho lamadodana akho labafazi bamadodana akho. 17Phuma kanye lakho konke okuphilayo kwenhlobo zonke, izinyoni lezifuyo lakho konke okuhuquzela emhlabeni, kuzale emhlabeni, kwande kube kunengi emhlabeni. 18UNowa wasephuma kanye lamadodana akhe lomkakhe labafazi bamadodana akhe. 19Kwaphuma inyamazana zonke lakho konke okuhuquzelayo lenyoni zonke, konke okuhamba emhlabeni ngenhlobo zakho.

20UNowa wakhela iNkosi ialtare; wathatha kuzo zonke inyamazana ezihlambulukileyo lakuzo zonke inyoni ezihlambulukileyo, wanikela umnikelo wokutshiswa phezu kwealtare. 21INkosi yezwa iphunga elimnandi, yathi enhliziyweni yayo: Kangisayikuphinda ngiqalekise umhlaba ngenxa yabantu, ngoba imicabango yomuntu mibi kusukela ebutsheni bakhe; futhi kangisayikuphinda ngibhubhise okuphilayo njengalokhu ngenzile. 22Lapho umhlaba usekhona kakuyikuphela ukuhlanyela lokuvuna, amakhaza lokufudumala, ihlobo lobusika, imini lobusuku.

Currently Selected:

Gen 8: BE1978

Highlight

Copy