ARING KELESING 39

Yusuf dahin hawan Potifar

1Yusuf ji'ek uh en daha' geri ha' Mesir. Té' pah Potifar, ji kelunan Mesir atih, iha' ji kelunan aleng nyadui alem uma laja', iha' aleng kepala' jaga laja', iha' aleng melé' Yusuf té' daha' kelunan Ismael aleng uh geri iha' tei hitih. 2#HST 7:9 Bi Tuhan aleng masi Yusuf, iha' pah ji kelunan aleng deng té' urip na', iha' pah té' murip dahin laké' aya' Mesir aleng ala iha' anak na' anan. 3Laké' aya' na' anan nyineng Yusuf en Tuhan masi pa'en-pa'en alem lim-lim hadui aleng en na' na. 4Yusuf pah en laké' aya' na' nan nyalam lelan, iha' pah nyadui dahin na', Yusuf nan en na' na dekaya' té' alem uma na', dahin lim-lim ket anun na' en na' uk men Yusuf nyihu iha' puboh na' lim. 5Men tegu iha' nyihu Yusuf gem lim-lim nun-nun aleng alem uma na' dahin lim ketanun na', Tuhan pah muak asi Na' té' alem amin laké' Mesir anan, tavit hadui Yusuf nan. Tuhan muak asi Na' té' lim ketanun na', sayu pah halem uma na', nurei pah ha' luma' na'. 6Lim-lim ketanun na' en na' nyihu Yusuf tua aleng gem na', nusi' nah tusah iha' pelemana' nun-nun la'an, bi ket aleng en na' kani dep kah aleng en na' pelemana'. 7Té' pa Yusuf nan tagep lan batung na' dahin sukup kajau layan na' lahuh. Beka' ji hangun tegu doh laké' aya' na' anan nyineng Yusuf, ngivah nah iha' jam iha', pelalau ha' kuma' men iha', “Sayu im nei tudu dahik si',” ken na'. 8Bi Yusuf duyah, iha' ha' kuma' men doh laké' aya' aleng ala iha' anan, “Akui aleng masi tamak dih, nusi' nah té' ha' tusah puboh ket aleng alem uma anih la'an, avin iha' uh ma'uk lim-lim ketanun na' alem usu kui, 9té' alem uma anih pah nusi' nah iha' dekaya' hadui na' la'an men'uh akui, lim-lim ket aleng ha' béh uh na' uk akui lim, ja kui puboh na', bi nusi' ha' ma'uk ika' men akui avin ika' hawan na'. Seng nuno' kurim du, seng deng kui na ket aleng huwi ji'ek nunan dahin na sala ha' unan Allah kurim iah?” 10Pulu hangun pah doh anan ha'ut-ha'ut dau negei Yusuf, nusi' loh kah Yusuf kelenghi dahun na' tei tudu dahin na', tei jeleng té' béh na' pah iha' em kaséh.

11Ji dau ji hangun tei nah Yusuf huma dawa' na hadui na', ji-ji la'ung pah em té' alem uma anan melo'. 12Pelalau doh anan gem basung Yusuf, kuma' men iha', “Nei nah im tudu dahik.” Bi Yusuf melek basung na' aleng en doh anan gem anan, pelalau tei lap hawang. 13Tegu doh anan nyineng basung Yusuf uh té' alem usu na' avin Yusuf uh tei lap iha' hawang nutih, 14en na' uvui nah lim kelunan huang uma anan, iha' ha' kuma' men daha', “Ineng kelo' iha' nei geri kelunan Ibrani anih, seng nei peha'éh alem uma tam tua anih pa, kelunan anih nei béh kui ngenep nei tudu dahik anih, bi akui medéng-medéng lan-lan. 15Tegu ha' kelenghi dahuk medéng aya' lelan nunan, pelalau nah iha' tei lap melek basung na' tua té' béh kui, em havah geri na'.”

16En doh anan lo' nah basung Yusuf té' béh na, ateng laké' aya' hawan na' anan nei uli. 17Iha' nah doh anan bara lim daho' aleng uh en na' bara anan dih men Potifar, ken na' pah bara iha', “Kelunan Ibrani aleng im geri salut hinih anan dih, iha' meté' nei kiso'-kiso' akui anan. 18Bi tegu kui medéng aya'-aya', lap nah iha' hawang, en na' lek nah basung na' nih em havah geri na' lap.”

19Tegu laké' aya' anan kelenghi daho' aleng en doh na' bara men iha' anan, “Nuréh nutih nah tuk laké' nyam ka' nan puyah akui,” ken na', pelalau bunget nah laké' aya' anan. 20Yusuf pah pelalau en na' apuh metei iha' alem uma jin ha' ngavan laja' metei daha' aleng jin. Nunan nah tuk na' Yusuf en daha' tei alem jin. 21#HST 7:9 Bi Tuhan pa'en té' dahin Yusuf. Iha' pah pa'en bara halam Na' dahin teneng Na' men Yusuf. Nyalam lelan pah laké' kepala' aleng gem uma jin anan té' Yusuf. 22Avin anan Yusuf nah aleng dekaya' puboh daha' lim aleng té' alem jin anan, hu'en laké' kepala' aleng jaga uma jin anan. Lim-lim hadui aleng en daha' na alem uma anan, Yusuf nah aleng petmei na'. 23Kepala' aleng jaga uma jin anan nusi' ha' peletu muéh dahun Yusuf, nginah lelan ha' té' iha', avin Tuhan aleng té' dahin na' pa'en, nun-nun hadui aleng en na' na, Tuhan aleng pela'ung na' men iha.

Currently Selected:

ARING KELESING 39: TDK1990

Highlight

Copy