ARING KELESING 40

Yusuf bara alem nyupin dawa' dua' laké' alem jin

1Men'uh anan la'an, té' nah ji laké' aleng ma'uk-ma'uk ata' men laja', nurei pah ji laké' aleng na luti awi kuih nih men laja' atih aleng na sala' ha' unan laja'. 2Avin anan bunget nah Firaun na dawa' aleng nyadui té' alem uma na' anan, té' laké' aleng mejei ata' anan dahin té' laké' aleng na luti anan lahuh. 3Avin anan iha' metei dawa' alem uma jin ha' uma laké' kepala' aleng penga uma jin anan, ha' alem jin aleng avan Yusuf anan dih. 4Kepala' aleng jaga' jin kenan laja' anan pah ma'uk dawa' men Yusuf ja iha' menga dawa' anan. Dawa' pah té' alem jin anan alem kuri-kuri dau dara na'.

5Té' nah ji hangun ngenyupé' nah laké' aleng ma'uk-ma'uk ata' men laja' anan dih, nurei pah laké' aleng na luti anan dih lahuh, alem uma jin anan, dawa' ngenyupé' tugung ji malem. Nyupin dawa' nan té' alem na' ngioh ha'ut na'an nyupé' dawa' tih. 6Jihima anan tegu Yusuf tei pala dawa', iha' nyineng dawa' awi tusah lan jam kenep dawa'. 7Iha' nah Yusuf meteng dawa' kelunan aleng nyadui alem uma laja' anan dih, aleng té' dahin na' alem uma jin atih, ken na' men dawa', “Na' nun neng kua' lalé' tusah jam na' dau anih nan du?”

8Iha' dawa' nyu'ei iha', “Kawa' ji'ek nih ngenyupé', bi nusi' té' kelunan aleng jam alem na' bara kawa'.” Iha' nah Yusuf kuma' men dawa', “Allah aleng seng bara alem nyupin kua' nan. Sayu kua' bara na' men akui ké'.”

9Iha' nah laké' aleng ma'uk ata' men laja' anan dih bara nyupin na' men Yusuf, ken na' men iha', “Alem kui ngenyupé' akui nyineng ji iung agun ha' unan kui. 10Iung agun anan té' telo' da'an na', aring-aring ha' nei ngubung, pidang na' pah pelalau nei musang, tepungo'-tepungo' agun anan pah pelalau sak aya' lelan. 11Beka' alem usu kui té' ji tebuk met Firaun. Bua agun anan ek ala alem usu kui ek meset nah alem tebuk met Firaun. Uh anan ek uk alem usu Firaun nah la'an.”

12Ken Yusuf men iha', “Nunih tuk alem nyupé' anan, telo' da'an anan, iha' nah alem na', telo' dau. 13Té' alem telo' dau la'an anih, Firaun seng meju ika' la'an metei ika' uli alem hadui ka' aleng una' arei dih, ika' pah seng mejei tebuk met Firaun awi menuna' dih la'an, awi jam tuk hadui ka' pa'en dih. 14Bi sayu im hituk té' akui, tegu ka' uh musang na'a, im bara nah halam ka' men akui dahin im bara nah tuk-tuk hadui kui men Firaun, ja ha' masi akui musang akui men alem uma jin anih. 15Avin akui ji'ek nih en kelunan nakau men daléh daha' Ibrani, ha' daléh anih pah nusi' pah té' akui na nun-nun ket aleng ji'ek, aleng tekep ngavak nei hinih alem luvang anih.”

16Tegu laké' kepala' na luti anan kelenghi alem nyupé' anan, sayu lelan alem na', iha' nah iha' kuma' men Yusuf, “Akui pah té' nyupé' lahuh nih. Akui jam akui geri telo' belatek luti hujung kahung kui. 17Té' alem belatek aleng hujung loh-loh anan té' kuri-kuri na'an kanen Firaun halem na', bi manuk-manuk nei kuman ket halem belatek aleng hujung kahung kui anan.”

18Iha' Yusuf nyu'ei, “Nunih tuk alem nyupim anan. 19Té' pah telo' belatek anan alem na' telo' dau. Té' alem telo' dau anih na'a Firaun seng meju ika' hujung bau, nekayung ika' té' ji jihé', uh anan manuk-manuk pah nei kuman sin ka'.”

20Té' dau aleng ketlo' iha' daha' na dau kanak Firaun, en Firaun na nah ji kuman aya' men daha' aleng nyadui alem uma na'. Iha' nah iha' geri laké' kepala' na ket du'i anan dih, dahin laké' kepala' na luti anan lahuh té' hang lim daha' aleng nyadui men iha'. 21Kepala' aleng na dui' anan dih, en na' tei alem hadui na' aleng pa'en, ja ha' tei mejei tebuk met men Firaun nan nekulah, 22bi kepala' na luti anan dih en na' tekayung nah iha' awi aleng kurin Yusuf men iha' anan dih. 23Bi laké' kepala' aleng pejei ata' anan dih, nusi' nah iha' hituk té' dahun Yusuf aleng en na' nangen iha' anan dih, tei hadau tua nah iha'.

Currently Selected:

ARING KELESING 40: TDK1990

Highlight

Copy