زکریأ ۵
۵
او طومأرٚ رویأ کی پروأز کودأندوبو
1 ایوأردِه آسمأنَ چوم بودؤختم و ایتأ دسخطَ بیدِم کی پروأز کودأندره. 2 فٚرٚشته می جَا وأوٚرسِه: «چی دینی؟»
جوأب بٚدأم: «ایتأ دسخطَ دینٚم کی پروأز کودأندره اونٚ درأزأ ده متر و پأنأ پنج متر ایسٚه.»
3 بوگفته: «اَ دسخط خودا نیفرینأنَ خو اَمرأ دأرِه و اوشأنَ بٚرِه تومأمٚ دونیأ اَسٚر تأ اوسٚر. اونٚ سٚر بینیویشته نیشأن دِهه کی تومأمٚ دوزدأن و دورُغگو آدمأن مٚردنٚ رِه محکوم ایسٚد.» 4 یهوه صبایوت فرمأیه کی اَ نیفرینأنَ اوسه کونِه اوشأنٚ خأنه میأن کی دوزدی کونٚده و اوشأنی کی اونٚ نأمٚ رِه دورُغٚ قسم خورٚده، کی اوشأنٚ خأنه‌یأن سٚر بینیشینه و اوشأنَ کأمیل جٚه بین بٚبره.
بوشکه رویأ
5 فٚرٚشته ایوأردِه ظأهیرَ بوسته و بوگفته: «بوجؤرَ فأندٚر. ایتأ دِه چی پروأز کودأندره.»
6 وأوٚرسِم: «اون چیسٚه؟» جوأب بٚدأ:
«ایتأ پیله بوشکه ایسٚه. اَ بوشکه پور جٚه او گونأیأن ایسٚه کی تومأمٚ زیمینَ پورَ کودٚد.»
7 نأخٚوٚرکی بوشکه سنگینٚ سٚر کی سربٚ جَا بو بوشؤ کنأر و من بٚتأنستم او زنأی کی بوشکه دورون نیشتِه بویَ بیدینٚم!
8 فٚرٚشته بوگفته: «او زنأی فیسأد و شرورٚ کأرأنَ نیشأنه ایسٚه.» بأزون زنأکَ دوسکؤل بٚزِه بوشکه دورون و ایوأردِه او سربٚ جَا سرَ بٚنأ اونٚ رو.
9 بأزون دوتأ دِه زنأکَ بیدِم کی لک‌لکٚ بألأنٚ مأنستَن بأل دأشتیدی و پروأز کودأندوبود. اوشأن بأمؤده، بوشکه‌یَ اوسأدٚد و هوطؤ کی پروأز کودأندوبود بٚبردٚد خوشأنٚ اَمرأ.
10 فٚرٚشته جَا وأوٚرسِم: «بوشکه‌یَ کویَه بٚردأندٚرد؟»
11 جوأب بٚدأ: «اونَ بٚرٚده بابِل کی ایتأ جیگأ چأکونٚد اونٚ رِه و بوشکه‌یَ بٚنٚد اونٚ میأن.»
Currently Selected:
زکریأ ۵: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org