متا ۲۴
۲۴
آخرٚ زمأتأنٚ
1 او وخت کی عیسا معبدٚ جَا شؤئؤندوبو بیرون، اونی شأگردأن بأمؤده، بٚخأستٚد اونَ ببرد معبدٚ سأختمأنأنٚ دِئنٚ رِه. 2 ولی عیسا اوشأنَ بوگفته: «اَ سأختمأنأنَ دینیدی؟ رأس‌رأسِی شٚمٚره گم کی سنگ سنگٚ سٚر نٚمأنه، بلکی همه فوگوردأن دگردأن بٚدأ.»
3 چن سأعت بعد، او وخت کی اون زیتون کوه دأمنه دورون نیشته بو، اونی شأگردأن بأمؤده، اونی جَا وأوٚرسِئده: «اَمٚرَه بوگو اَ ایتفأقأن چی زمأتی دکفه؟ تی اَمؤن و دونیأ آخر #۲۴:۳ یا «اَ زمأتٚ آخر».نیشأنه چیسه؟»
4 عیسا اَشأنٚ بوگفته: «بٚپّأئید کسی شٚمٚره گومرأ نوکونه. 5 چونکی خٚیلیأن می نأم اَمرأ اَیٚده، گده، "من مسیحم" و خٚیلیأنَ گومرأ کونٚده. 6 جنگأنٚ خٚوٚر جٚه دؤر و نیزدیک شیمی گوش فأرٚسِه. ولی پریشأنَ نیبید چونکی جنگأن ایتفأق دکفیدی، ولی اَ زودیأن دونیأ تومأنَ نیبه. 7 قومأن و کیشورأن کس‌کسَ جنگٚ رِه دؤخأنده، و دونیأ جأجیگأیأنٚ دورون، قحطی و زیمین لرزه پیش اَیِه. 8 ولی اَشأن تأزه زأستٚنٚ دردٚ شورو بوستنه.
9 «بأزین شٚمٚره تسلیم کونٚده کی شکنجه بیبید، و شٚمٚره کوشٚده. تومأمٚ دونیأ آدمأن می نأمٚ وأسی شیمی جَا نیفرت گیرده. 10 خٚیلیأن خوشأنی ایمأنٚ جَا وأگردٚد و کس‌کسَ تسلیم کونٚده و کس‌کسٚ جَا نیفرت اوسأنٚده 11 خٚیلیأن ویریزٚد، خوشأنَ نبی دؤخأنده و خٚیلیأنَ گومرأ کونٚده. 12 گونأ اَندر پٚخشَ به کی خٚیلیأن محبتٚ جَا سردَ بٚده. 13 ولی هرکی تأ آخر، زحمتأنَ تحمول بوکونه، نیجأت یأفه.
14 «آخرپٚسی او وخت کی اینجیل خورومٚ خٚوٚر تومأمٚ دونیأ آدمأنٚ گوش فأرٚسِه و همه اونی جَا وأخٚوٚرَ بوستٚد، بأزین دونیأ تومأنَ به.
15 «پس او وخت کی "ویرأنگرٚ مکروهَ" #۲۴:۱۵ دانیال ۹:۲۷؛ ۱۱:۳۱؛ ۱۲:۱۱.فأندٚرید بیدینید کی موقدسٚ جیگأ دورون بٚپأ بدأشته بوبوسته (اونی کی خأنِه توجه بوکونه) 16 بأزین اوشأنی کی یوهودیه دورون ایسأده، او دؤرٚوٚر تپه‌یأنٚ ور فرأر بوکوند، 17 و اوشأنی کی پوشتٚ بأمٚ جؤر ایسأده، فرأر موقع حتّا نٚشٚد خأنه دورون کی ایچی اوسأنٚد؛ 18 و هطؤیی اوشأنی کی کیشأورزی زیمینٚ دورون ایسأده، لیوأس اوسأدٚنٚ رِه وأنگردٚد بٚخأنه.
19 «وای بحألٚ او زنأکأنی کی او زمأتٚ دورون شکم بٚدأرٚد یا شیرخوره زأی بٚدأرٚد. 20 دوعأ بوکونید کی شیمی فرأر کودن زمستأنٚ دورون یا شَبّأتٚ روجٚ دورون کی شهر دروأزه‌یأن دٚوٚستِیه، نٚبه. 21 چونکی او روجأنٚ دورون مردوم چنأن موصیبتی رِه گریفتأر بٚده کی دونیأ سرگیفتنٚ زمأت تأ اَسه ایتفأق دنکفته و هیوختٚم دنکفِه.
22 «رأس‌رأسِی، اگه او سختٚ روجأن کوتأ نوبوسته بی، هیچ اینسأنی جأن بٚدر نبردی؛ ولی خودا اینتخأب بوکوده‌یأنٚ خأطرٚ وأسی، او روجأن کوتأ وأبِه.
23 «او روجأنٚ دورون اگه کسی شٚمٚره بٚگه، "بیدین، مسیح اَیَه ایسأ!" یا "بیدین، اویَه ایسأ!" بأوٚر نوکونید. 24 چونکی جٚه اَجور مسیحیأن و دورُغی پیغمبرأن خٚیلی اَیٚده و حتّا عجیب و غریبٚ موجیزه‌یأنٚم انجأم دٚهٚده، جوری کی اگه بوبوستی بی حتّا خودا اینتخأب بوکوده‌یأنم جٚه رأ بٚدٚرَ کودیدی. 25 بیدینید، من اَشأنَ جٚه پیش شٚمٚره بوگفتم.
26 «پس اگه بأیٚد و شٚمٚره بٚگد کی مسیح بیأبأنٚ دورون دووأره ظوهور بوکوده، اوشأنٚ گبأنَ محل نوکونید؛ و اگه بٚگد اَمی ورجأ جیگأ بوخورده، بأوٚر نوکونید. 27 چونکی هوطؤیی کی گؤرخأنه ایتأ لحظه دورون جٚه شرق تأ غربَ روشنٚ کونه، اینسأنٚ پٚسرٚ اَمؤنٚم هطؤیی به. 28 هر جأ کی لأشه بمأنه، لاشخورأن اویَه جمَ بٚدأ!
مسیحٚ وأگردٚستن آخرٚ زمأتٚ دورون
29 «دفأتن، او موصیبٚتأنٚ پٚسی، خورشید تأریکَ به، مأه دِه هیذره سو نٚزنه. ستأره‌یأن فٚوٚده و نیرویأنی کی زیمینَ خو جَا سٚر دأرٚده، بٚپٚرکٚش دکفده.
30 «و آخرپٚسی اینسأنٚ پٚسرٚ اَمؤن، آسمأنٚ دورون ظأهیرَ به. بأزین مردوم دونیأ دورون اَ سٚر تأ او سٚر عزأ گیرده و اینسأنٚ پٚسرَ دینٚده کی آسمأنٚ اَبرأنٚ رو، پیله شوکو و قودرتٚ اَمرأ اَمؤن دٚرٚه. 31 اون خو فٚرشتٚه‌یأنَ شیپورٚ بولندٚ صدا اَمرأ اوسه کونه کی خو اینتخأب بوکوده‌یأنَ، زیمین و آسمأنٚ کنأر گوشٚه جَا جمَ کونٚد.
32 «اَسه اَنجیل دأرٚ جَا درس بیگیرید. هر وخت اونی خألأنٚ سٚر زٚپّه زٚنِه و ولگ اَوٚره، فأمیدی تاوستأن فأرٚسِئن دٚرٚه. 33 هطؤیٚم او وخت کی تومأمٚ اَ نیشأنه‌یأنَ بیدینید، بدأنید کی کأرٚ تومأنَ بوستن، فأرٚسِئن دٚرٚه.
34 «رأس‌رأسِی شٚمٚره گم کی تأ اَ چیأن ایتفأق دنکفه، اَ نسل جٚه بین نیشه.
35 «آسمأن و زیمین جٚه بین شٚده، ولی می کلام هیوخت جٚه بین نیشه. 36 ولی هیکس نأنِه کو روج و چی سأعتی دونیأ تومأنَ به، حتّا فٚرٚشته‌یأنم نأنٚده، خودا پٚسرم اونی جَا خٚوٚر نأرِه. فقد می پئر خودا اونَ دأنه. 37 اینسأنٚ پٚسرٚ اَمؤنٚ وخت نوحٚ روجأنٚ مأنستَن به. 38 قبلٚ توفأنٚ روجأن، پیشتر جٚه اَنکی نوح بشه کشتی دورون، مردوم عیش و نوش و میهمأنی و عروسی اَمرأ موشغول بود. 39 او زمأت هیکس بأوٚر نوکودی کی رأس‌رأسِی توفأن اَیِه، ولی بیلأخره توفأن بأمؤ و اوشأنَ همّه خو اَمرأ ببرد. اینسأنٚ پٚسرٚ اَمؤنٚم هطؤ بِه. 40 بأزون او دوتأ مردأکٚ جَا کی کیشأورزی زیمین سٚر کس‌کسٚ اَمرأ کأر کودن دٚرٚد، ایتأیَ بٚرٚده و اویتأ مأنه؛ 41 دو تأ زنأی کی کس‌کسٚ ورجأ گندم سأبٚستٚن رِه موشغولٚد، ایتأیَ بٚرٚده و اویتأ مأنه. 42 پس شومأنم آمأده بیبید چونکی نأنیدی شیمی خوداوند کو روجٚ رِه دووأره وأگرده.
43 «اگه صأب خأنه بٚدأنستی بی کی چی زمأتی دوزد اَیِه، بیدأر ایسأیی و ولأشتی دوزد بشه اونی خأنه دورون. 44 پس شومأنم آمأده بیبید، چونکی اینسأنٚ پٚسر او زمأت وأگرده کی کمتر اونی رأفأ ایسأییدی.
45 «او وفادأر و دأنأ غولأم کسی ایسه کی اونی اربأب بتأنه اونَ خو خأنه البأقی غولأمأنٚ سرپرست چأکونه کی اوشأنی غذأیَ بموقع فأدَه. 46 خوشبحألٚ اَجور غولأم کی او وخت کی اونی اربأب وأگرده، اونَ خو وظیفه انجأم دئنٚ سٚر بیدینه. 47 یقین بٚدأرید کی تومأمٚ خو مأل و مینألٚ سرپرستی‌یَ اونَ ایسپأره.
48 «ولی اگه او غولأم شرور بٚبه و خو اَمرأ گومأن بوکونه کی "می اربأب هه زودیأنٚ رِه وأنگرده،" 49 و خو همکأرأنَ اَذِت آزأر بوکونه و شرأب خورأن اَمرأ عیأشی رِه موشغول بٚبه، 50 بأزون او روجٚ دورون کی رأفأ نئیسأ، اونی اربأب وأگرده 51 و اونَ سینگینٚ موجأزأت کونه، ریأکأرأنٚ سرنیویشت گریفتأر کونه و تأوٚده او جیگأ کی گریه و نأله و گأز گأزَ سأبٚستٚن نٚهأ.»
Currently Selected:
متا ۲۴: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org