متا ۲۳
۲۳
ظأهیرٚ چأکودنٚ وأسی دین دأشتٚن
1 بأزین عیسا خو شأگردأن و مردومَ بوگفته: 2 «دین عألیمأن و فریسیأن، موسا شریعتَ تفسیر کونٚده.#۲۳:۲ یونأنی: دین عألیمأن و فریسیأن موسا مسند (تختٚ) رو نیشتِده. 3 پس اونچی کی شٚمٚره آموجٚده، انجأم بدید، ولی هیوخت اوشأنی کأرأنٚ مأنستَن انجأم ندید، چونکی هیوخت آموجه‌یأنی کی دٚهٚده، خودشأن انجأم ندٚد. 4 اَشأن دینٚ سینگینٚ تکلیفأنَ، مردومَ بچأنَ دٚهٚده، ولی هیوخت حأضیر نییٚده اَشأنٚ یاور دئنٚ رِه، حتّا ایتأ دٚسٚ پٚنجه تکأن بٚدٚد.
5 «هر تأ کأر کی بوکوند، خوشأنی ظأهیرٚ چأکودنٚ وأسی ایسه. موقدسٚ کیتأبأنٚ آیه‌یأن و دوعأیأنَ نیویسٚد و خوشأنی بألَ دٚوٚدٚد، و خوشأنٚ لیوأسأنٚ دأمأنَ درأزتر دوجٚده کی بِیتر بیدِه بٚبٚد و مردوم اوشأنَ دیندأرٚ آدم بدأنٚد. 6 چنقذر دوس دأرٚده کی میهمأنیأنٚ دورون مجلٚسٚ سرجأکش بینیشینٚد، و کنیسه‌یأنٚ دورون بِیترین جأجیگأیَ بٚدأرٚد، 7 و کوچه و بأزأرٚ دٚوأرٚستنٚ موقع، مردوم اَشأنٚ دٚس بٚسینه بئیسٚد و اوشأنَ "اوستأد" دؤخأنٚد. 8 ولی شومأن اَجور لقبأنَ مردومٚ جَا قوبیل نوکونید، چونکی شومأن ایتأ اوستأد دأرید و همه‌یٚ شومأن کس‌کسٚ اَمرأ ایتأیید و برأریدی. 9 اَطؤیی، هیکسَ زیمینٚ سٚر "پئر" نوأگفتٚنید، چونکی شومأن ایتأ "آسمأنی پئر" دأریدی کی خودا ایسه. 10 و ولأنید کسی شٚمٚره "اوستأد" دؤخأنه، چونکی ایتأ اوستأد دأریدی کی مسیح ایسه.
11 «هرچی ویشتر البأقیأنَ خیدمت بوکونید، پیله‌تر بیدی، چونکی پیله کس بوستن، خیدمت کودنٚ میأن نٚهأ. 12 چونکی هرکی حقٚ سعی بٚزٚنه خؤرَه پیله کس نیشأن بٚدأ، کوچیکَ به، ولی کسی کی خؤرَه فروتن چأکونه، سٚربولند به.
13 «وای بحألٚ شومأن، ای دینٚ عألیمأن و فریسیأن! چندر ریأکأریدی! نه وئألیدی البأقیأن آسمأنٚ پأدیشأیی دورون بٚشٚد و نه خودتأن بودورون شیدی.
14 «وای شٚمٚره اَی دین عألیمأن و ریأکأرٚ فریسیأن! شومأن او وخت کی شیمی دوعأیأنَ دٚرأزه دیهیدی و دین دأشتٚنٚ رِه تظاهر کونید، تومأمٚ شیمی هوش و حواس اَنٚ کی چوطؤ ویوه زنأکأنٚ مأل و مینألٚ صأب بیبید. هنٚ وأسی شیمی موجأزأت خٚیلی سینگینَ به. 15 وای به شیمی حأل اَی دین عألیمأن و فریسیأن! شومأن همه جأیَ وأموجیدی کی اینفرَ بیأفید کی شیمی شأگرد بٚبه؛ و او وخت کی موفق بوبوستید، اونَ خودتأنٚ جَا دو برأبر بدتر جهندمٚ سیزأوأر چأکونیدی.
16 «وای به شیمی حأل کی کوریدی و دٚسٚ‌چو گیریدی! چونکی گیدی: "عأیب نأرِه کی اینفر معبدٚ سٚر قسم بوخوره چونکی تأنه خو قسمَ بٚشکٚنه؛ ولی اینفر کی طلأیی ظرفأنَ کی معبدٚ دورون نٚهأ، قسم بوخوره وأستی حتمن اونَ وفأ بوکونه." 17 اَی جأهیلأن! اَی کورأن! کویتأ موهیمتره، طلأ یا معبد کی طلأیَ تقدیس کونه؟
18 «اَطویم گیدی: "مذبحٚ رو قسم خوردنَ شأ ایشکنئن، ولی مذبحٚ سٚرٚ پیشکشَ رو قسم خوردٚنَ وأستی حتمن وفأ کودن." 19 اَی کورٚ اَحمٚقأن! کویتأ موهیمتره، پیشکشی‌یی کی مذبحٚ رو نٚهأ یا خودٚ مذبح کی پیشکشی‌یَ تقدیس کونه؟ 20 او وخت کی مذبح رو قسم خوریدی، اَطؤیی خودٚ مذبحٚ سٚر و هر چی کی اونٚ رو نٚهأیَ قسم خوریدی؛ 21 و او وخت کی معبدٚ سٚر قسم خوریدی، اَطؤیی خودٚ خأنه سٚر و خودایی کی او خأنه دورون ایسأ سٚر قسم خوریدی؛ 22 و او وخت کی آسمأنٚ سٚر قسم خوریدی، اَطؤیی خودا تختٚ سٚر و خودٚ خودا کی تختٚ رو نیشته سٚر قسم خوریدی.
23 «وای به شیمی حأل اَی دین عألیمأن و ریأکأرٚ فریسیأن! شومأن حتّا شیمی باغچه نعناع و شیوید و زیره رِه ده یک پیشکش کونید، ولی شریعتٚ موهیمتره حوکمأن کی عیدألت و رحمت و امأنٚت ایسه، محل نٚنیدی. شومأن وأستی ده یکَ فأدید، ولی موهیمه حوکمأنٚم جٚه خأطرَ ندید. 24 اَی کی کوریدی و دٚسٚ چو گیریدی، شوکوزٚ صافی سولأخٚ جَا رٚدَ کونید ولی شوتورَ فٚوٚریدی!
25 «وای به شیمی حأل اَی دین عألیمأن و ریأکأرٚ فریسیأن! چونکی شومأن کأسه بوشقابٚ بیرونَ، اَندر تیمیزَ کونید کی پرکاله به، ولی اوشأنٚ دورون طمع و نأپرهیزی جَا پوره. 26 ای کورٚ فریسیأن، اوّل کأسه بوشقابٚ دورونَ تیمیزٚ کونید کی اوشأنٚ بیرونم پأکَ بِه.
27 «وای به شیمی حأل اَی دین عألیمأن و ریأکأرٚ فریسیأن! شومأن سیفیدٚ بوسته قبرأنَ مأنیدی کی اوشأنی ظأهیر قشنگه ولی اوشأنٚ دورون کثأفت و موردأل خأشأنٚ جَا پوره. 28 شومأن حقٚ سعی زنیدی شیمی ظأهیرَ دیندأر نیشأن بدید، ولی شیمی او موقدسٚ عبأ جیر، دیلأنی دأرید پور جٚه ریأ و گونأ.
29 «وای به شیمی حأل اَی دین عألیمأن و ریأکأرٚ فریسیأن! شومأن پیغمبرأنٚ رِه بوقعَه چأکونید و موقدسأنٚ قبرٚ چأکون وأکون کونیدی 30 و گیدی: "اگه اَمأن اَمی پیله بأبأیأنٚ جَا ایسأبیم، پیغمبرأنٚ کوشتٚنٚ دورون اوشأنی اَمرأ همدٚس نوبوستیم."
31 «ولی اَ گبٚ جَا، شیمی زٚوأنٚ اَمرأ گیدی کی پیغمبرأنٚ قأتیلأنٚ زأکأنیدی. 32 شومأن اوشأنی رأ مأله جَا پیروی کونیدی؛ شومأن نأجورٚ کأرأنٚ دورون، اوشأنٚ جَا پیش دکفتید. 33 ای خوش خط و خألٚ لنتی‌یأن! چوطؤ تأنیدی جهندمٚ موجأزأتٚ جَا جیویزید؟
34 «من، پیغمبرأن و حکیمٚ مردأکأن و عألیمأنی‌یٚ شیمی ور اوسه کونم، و شومأن بعضیتأنَ دأر زٚنید و بعضیتأنَ شیمی کنیسه‌یأنٚ دورون شلأقٚ جیر گیریدی، اَ شهر او شهر آوأرَ کونید. 35 پس او بی‌گونأ آدمأنٚ خون کی زیمینٚ سٚر فووُسته دأره، شیمی گردنه، جٚه معصومٚ هأبیلٚ خون بیگیفته تأ زکریأ، برخیا پٚسر کی اونَ معبدٚ دورون، محرأبٚ جیگأ و مذبحٚ بین، بوکوشتید. 36 رأس‌رأسِی شٚمٚره گم کی اَ نسل همه‌یٚ اوشأنی تأوأنَ دِهه.
عیسا اورشلیمٚ ویرأنَ بوستنَ پیشگویی کونه
37 «اَی اورشلیم، اَی اورشلیم، اَی شهری کی پیغمبرأنٚ قاتٚلی و خودا اوسه کوده‌یأنَ سنگسأر کونی! چن وأر خأستیم تی زأکأنَ جمَ کونم هوطؤ کی کولوشکٚن خو کیشکأيأنَ خو بألٚ جیر گیره، ولی تو نخأستی. 38 پس اَسه تی خأنه ویرأن مأنه. 39 چونکی شٚمٚره گم کی دِه مٚرَه نیدینیدی تأ هو زمأت کی بیگید" مووأرٚکه اونی کی خوداوندٚ نأمٚ اَمرأ اَیِه."»
Currently Selected:
متا ۲۳: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org